SALMO 34
34
Tata Diosta roygaptinchikuna payka yanapawanchisapa.
1Tukuy oras ñuka Tata Diosta willasha alli rurak kananta.
Mana shaykushpa Tata Diosta alabasha.
2Tata Dios yanapawaptin sukaman kushikuni.
Kankuna, alli modoyuk runakuna,
chayta yachashpa kushikuychi.
3Tata Dios sukaman tukuy laya atipak kaptin
akuychi tantalla payllata alabaypachi.
4Tata Diosta yanapawananpa mañaptini
payka uyariwashka.
Uyariwashpa yanapawashka
amana manchakunaynipa.
5Tata Diosta shuyashpanchikuna yanapawananchikunapa
sukaman kushikunchisapa.
Tata Dios yanapawaptinchikuna
mana pinkakunchisapachu.
6Ñuka sukaman sufrishpayni
Tata Dios yanapawananpa
roygaptini uyariwashka.
Yanapawashpa llakidu kashkaynimanta kushichiwashka.
7Tata Diospa angelninkuna
tukuy Tata Diosta kasuk runakunata amachansapa.
8Kankuna mishkik mikunata mallikshina
Tata Diosta kuyaychi yachanaykichipa alli rurak kananta.
Tata Dios yanapashunaykichita yachashpaykichi
sukaman kushikunkichi.
9Kankuna, Tata Diosta kasuk runakuna,
payta kuyaychi.
Chashna kuyaptikichi manami nima illapushunkichichu.
10Pumakuna sinchi kashpankunapish yarkansapa.
Chashnapish kaptin ñukanchikuna Tata Diosta kasuptinchikuna
aypa allikunata kuwanchisapa.
11Wambraynikuna, shamuychi uyariwak.
Kunanka yachachiykichi
imashnami Tata Diosta kuyankichi nishpa.
12Kunanka tapuykichi:
¿Munankichichu unayta kawsayta?
¿Munankichichu kushikushpalla kawsayta?
13Chashna kawsanayashpaykichika
ama munaychichu mana allikunata rimayta nima llullakuyta.
14Mana alli ruranaykichita sakishpa
allikunallata ruraychi.
Tukuy piwan allillapi kushikushpa kawsaychi.
15Allita rurashpa kawsaptikichi
Tata Dios kuydashunkichi.
Roygaptikichi yanapashunkichi.
16Chaymanta Tata Dios
tukuy mana alli rurak runakunata chikninsapa.
Paykunata kulluchinkasapa
amana ni pi paykunata yuyanankunapa.
17Allita rurashpa kawsaptinchikuna
Tata Diosta roygaptinchikuna payka yanapawanchisapa.
Llakishpa sufrishpa kawsaptinchikuna
payka yanapawashpanchikuna kushichiwanchisapa.
18Tukuy uchanchikunata wananayashpa llakiptinchikuna
Tata Dios llakichiwashpanchikuna perdonawashpanchikuna kushichiwanchisapa.
19Allita rurashpa kawsashpanchikunapish
sukaman padesinchisapa.
Chashna padesiptinchikunapish
Tata Dios yanapawanchisapa
kushikushpalla kawsananchikunapa.
20Tata Dios yanapawashpanchikuna
amachawanchisapa ama chikniwakninchi runakuna
tullunchikunata polvonankunapa.
21Chaymanta sakra runakuna runamasinkunata wañuchinayashpa
kikinkunalla wañuyta
maskaykansapa.
Tata Dios tukuy alli rurakta chiknik runakunata kastigankasapa.
22Chaymanta Tata Diosta kasushpa kawsaptinchikuna
payka llakichiwashpanchikuna salvawanchisapa.
Tata Dios amachawananchikunata munaptinchikuna
payka mana kastigawanchisapachu.
Currently Selected:
SALMO 34: qvs
Highlight
Share
Copy
Want to have your highlights saved across all your devices? Sign up or sign in
© 1992, 2008, Wycliffe Bible Translators, Inc. All rights reserved.
