Marcos 16

Wanushqanpita Jesús kawarimushqan

Mateo 28.1-8; Lucas 24.1-12; Juan 20.1-10

1Jamay junaq pasarkuptinnami María Magdalena, Santiagupa maman María y Salomépis ali asyaq#16.1 Wakin runakunaqa mushkuq nipäkun. jachakunata rantipäkurqan Jesúspa ayanman winapänanpaq. 2Tsawraqa domingu tuta inti jeqaykämuptin Jesús pamparashqanman aywapäkurqan. 3Nänita aywarmi kayno nipäkurqan: <<¿Piraq sepultüra tsaparaq rumita kichapämäshun?>>

4Chayaykurmi taripäkurqan sepultüra tsaparaq jatunkaray rumi wititsishqana kaykaqta. 5Tsawraqa aya tsutarashqanman yaykuykurmi rikapäkurqan juk mözu yoraq röpan jatishqa alawqa kaq nawpancho jamaraykaqta. Payta rikaykurmi pasaypa mantsakashqa rikakärirqan. 6Tsawraqa tsay mözu kayno nirqan: <<Ama mantsakäriytsu. Musyämi crucificaypa wanutsishqan Jesústa rikaq shapäkamushqaykita. Payqa manami kaychönatsu. ¡Kawarimushqanami! Maski rikapäkuy mayman tsutashqantapis.

7<<Kananqa aywar Pedruta y wakin discïpulukunata wilapäkuy Galileaman nawpaykashqanta. Nawpata nishqannölami tsaycho paykunawan tinkunqa>>.#Mat. 26.32; Mar. 14.28.

8Tsayno niptinmi warmikuna mantsakashqa siksikyaykar jukla aywakärirqan. Mantsakashpanmi rikashqankunata pitapis mana wilaparqantsu.

María Magdalenata Jesús yuripashqan

Mateo 28.9-10; Juan 20.11-18

9[Domingu tuta Jesús kawarirkamurmi puntata yuriparqan María Magdalenata. Paypitami nawpata qanchis supaykunata qarqushqa karqan. 10Yuriparkuptinmi María Magdalena aywarqan Jesúswan puriqkunata wilananpaq. Chayaykurmi tarirqan lakikur waqarkaykaqta. 11<<Jesústa kawaykaqtami rikashqä>> nir wilaptinpis manami criyipäkurqantsu.

Ishkay discïpulunkunata Jesús yuripashqan

Lucas 24.13-35

12Tsaypitanami markapita aywarkaykaptin ishkay discïpulunkunata Jesús yuriparqan. Itsanqa manami nawpata kashqannönatsu karqan. 13Tsaypita kutiykurmi discïpulu mayinkunata wilapäkurqan Jesús yuripashqanta. Wilaptin paykunatapis manami criyipäkurqantsu.

Wilakunanpaq discïpulunkunata Jesús kachashqan

Mateo 28.16-20; Lucas 24.36-49; Juan 20.19-23; Hechos 1.6-8

14Tsaypitanami chunka juk discïpulunkuna mikurkaykaptin Jesús yuriparkur kayno nirqan: <<Yärakuyniynaq chukru shonqu runakuna, kawarimushqäta wilashuptiki ¿imanirtaq mana criyipäkushqankitsu?>>

15Tsaynöpis kayno nirqan: <<Maytsaypapis aywar lapan runakunata ali wilakuynïta wilapäkunki.#Mat. 28.19-20; Hech. 1.8. 16Mayqanpis criyir bautizakuq kaqqa salvashqami kanqa. Mana criyiqkunami itsanqa infiernuman qaykushqa kanqa. 17Criyiqkunaqa milagrukunatapis rurapäkunqami. Jutïchömi supaykunatapis qarqapäkunqa y juk idiömakunatapis parlapäkunqa. 18Culebra picaptinpis, venënuta qaraptinpis manami wanupäkunqatsu. Tsaynölami qeshyaykaqkunata yataykur Tayta Diosta manakuptinpis aliyanqa>>.

Jana patsaman Jesús kutishqan

Lucas 24.50-53; Hechos 1.9-11

19Discïpulunkunata parlapayta usharkuptinmi Señor Jesústa gloriamanna Tayta Dios shuntakurqan.#Hech. 1.9. Tsaychömi Tayta Diospa alawqa kaq lädunman jamaykurqan. 20Tsaypitanami discïpulunkuna maytsaychöpis wilakärirqan. Kikin Señornintsimi yanaparqan milagrukunata rurapäkunanpaq. Tsayta rikarmi runakuna tantiyakärirqan tsay wilakärishqan rasunpa kashqanta. Amén.]#16.20 Nawpa kaq griego copiakunacho versïculu 9-pita ushashqanyaqqa manami kantsu.

Currently Selected:

Marcos 16: qvmB

Highlight

Copy