Marcos 14

Jesústa wanutsinanpaq wilanakushqan

Mateo 26.1-5; Lucas 22.1-2; Juan 11.45-53

1Jesús tsayno yachatsirqan Pascua fiesta y Levadüraynaq Tantata Mikupäkunan fiesta#Éxo. 12.1-27; Deut. 16.1-8. qalaykunanpaq ishkay junaq pishiykaptinmi. Tsay junaqkunami mandaq cürakuna y ley yachatsiqkuna wilanakurqan runakunata mana musyatsiylapa Jesústa imanöpapis prësu tsariykur wanutsinanpaq. 2Tsayno wilanakurmi kayno nipäkurqan: <<Fiestachöqa ama tsarishuntsu. Tsaycho tsariptintsiqa contrantsimi runakuna sharkapäkunqa>>.

Jesúspa umanman perfümita winapashqan

Mateo 26.6-13; Juan 12.1-8

3Betania markacho leprösu nishqan Simónpa wayincho Jesús kaykaptinmi juk warmi chayarqan alabastro rumipita rurashqa pömuwan perfümin aptashqa. Tsay perfümi nardupita rurashqa karmi pasaypa chanin karqan. Mësacho Jesús kaykaptinmi tsay warmiqa pömupa shiminta pakirir Jesúspa umanman winaparqan.#Luc. 7.37-38. 4Tsayta rikarmi wakin tsaycho kaykaqkuna rabyashpan kayno nipäkurqan: <<¿Imapaqtaq tsay perfümita perditsishqa? 5Tsaypa trukanqa juk wata arupakur gänashqantsipita mascho rantikushwan karqan.#14.5 Griëgucho niykan kimsa pachak (300) denariupita mascho rantikunanpaq kashqanta. Juk denariuqa juk junaq aruypa chaninmi karqan. Nirkur tsay qellaywanna waktsakunata yanapashwan karqan>>.

Tsayno nirmi tsay warmita jamurparqan.

6Tsaymi Jesús kayno nirqan: <<¿Imanirtaq kay warmita jamurpaykanki? Payqa alitami rurashqa. 7Waktsakunaqa qamkunawanmi imaypis karkaykanqa.#Deut. 15.11. Noqami itsanqa qamkunawan mana kashaqnatsu. 8Pampashqa kanäpaqmi payqa perfümita winapaykäman. 9Rasunpami kayno nï: Maytsaychöpis wilakuynïta wilakurqa kay warmi perfümita winapämashqantapis wilakärinqami>>.

Jesústa rantikunanpaq Judas Iscariote conträtuta rurashqan

Mateo 26.14-16; Lucas 22.3-6

10Jesúspa apostolnin Judas Iscariotimi mandaq cürakunaman aywaykur Jesústa entregananpaq nirqan. 11Tsawraqa cürakuna kushikärishpan pägananpaq nipäkurqan. Tsayno niptinmi Judas yarpachakurqan Jesús kaqman imay höra pushananpaqpis.

Pascua mikuyta discïpulunkunawan Jesús mikushqan

Mateo 26.17-25; Lucas 22.7-14, 21-23; Juan 13.21-30

12Levadüraynaq Tantata Mikupäkunan fiesta qalaykunan junaqmi Pascuacho mikunanpaq carnishta pishtapäkuq. Tsay junaqmi discïpulunkuna Jesústa tapupäkurqan kayno nir: <<Tayta, Pascua mikuyta mikunantsipaq ¿maychötaq kamarikamushaq?>>

13Tsayno niptinmi Jesús ishkay discïpulunkunata kayno nirqan: <<Jerusalénman aywapäkuy. Tsayman chayarmi juk runa puyñuwan yakuta apaykaqta taripäkunkipaq. Tsay runapa qepalanta aywapäkunki may wayimanpis chayananyaq. 14Tsaycho wayiyuqta kayno nipäkunki: <¿Mayninchöshi cuartu kaykan discïpulunkunawan Pascua mikuyta Jesús mikunanpaq?> 15Tsayno niptikimi altuscho jatun cuartu kamarishqa kaykaqta rikatsipäkushunkipaq. Tsaycho mikunantsipaq kamarikärinki>>.

16Tsaymi Jerusalénman discïpulunkuna aywashpan Jesús nishqannöla tariykur Pascua mikuyta kamaripäkurqan.

17Patsa tsakaykaptinnami chunka ishkay discïpulunkunawan tsay wayiman Jesús chayapäkurqan. 18Mikurkaykashqanchömi Jesús kayno nirqan: <<Rasunpami kayno nï: Qamkunapita juknikimi prësu tsarimänanpaq entregamanqa. Tsayno entregamanqa noqawan juntu mikuykaqmi>>.#Sal. 41.9.

19Tsayno niptinmi lakikärishpan juknin juknin Jesústa tapupäkurqan kayno nir: <<¿Noqatsuraq kaykä?>>

20Tsawraqa Jesús kayno nirqan: <<Qamkunapita juknikimi kaykan. Paymi noqawan juntu tantata plätucho ushmaykätsin. 21Rasunpami Runapa Tsurinqa qelqaraykashqannöla nakar wanunqa. Payta prësutsiq runami itsanqa pasaypa kuyapaypaq kanqa. Tsay runaqa ama yurinmanpistsu karqan>>.

Mushuq pactupita Jesús yachatsishqan

Mateo 26.26-30; Lucas 22.15-20; 1 Corintios 11.23-25

22Mikurkaykaptinmi tantata aptarkur Tayta Diosta Jesús yusulpalä nirqan. Tantata pakiparmi discïpulunkunata kayno nirqan: <<Kay tantata mikupäkuy. Kayqa cuerpümi>>.

23Tsaynölami vïnuyuq väsutapis aptarkur Tayta Diosta yusulpalä nirqan. Nirkurnami discïpulunkunata makyaptin lapan upupäkurqan. 24Tsaypitanami kayno nirqan: <<Kay vïnuqa Tayta Dios [mushuq] pactuta rurananpaq#Jer. 31.31-34. jichashqä yawarnïmi. Atska runakuna jutsankunapita perdonashqa kananpaqmi yawarnïta jichar wanushaq.#Éxo. 24.8; Zac. 9.11. 25Rasunpami kayno nï: Tayta Dios mandaykashqancho mushuq vïnuta upunäyaq manami vïnuta yapay upushaqnatsu>>.

26Discïpulunkunawan salmukunata cantarkurnami Olivos jirkanman aywapäkurqan.

Pedro ñëgananpaq kashqanta Jesús nishqan

Mateo 26.31-35; Lucas 22.31-34; Juan 13.36-38

27Tsaypitanami Jesús kayno nirqan: <<[Kanan tsakaymi] lapayki kacharqärimankipaq. Tayta Diospa palabranchöpis kaynömi qelqaraykan: <Uysha mitsiqta wanuykatsiptï uyshankuna wakpa kaypami aywakärinqa>.#Zac. 13.7. 28Tsayno kaptinpis wanushqäpita kawarirkamurmi qamkunapita mas puntata Galileaman aywashaq>>.#Mat. 28.16.

29Niptinmi Pedro kayno nirqan: <<Wakinkuna kacharishuptikipis noqaqa manami kachashaykitsu>>.

30Tsawraqa Jesús kayno nirqan: <<Rasunpami kayno nï: Kanan tsakay ishkay kuti gällu manaraq cantaptinmi kimsa kuti mana reqimashqaykita ninkipaq>>.

31Tsayno niptinmi Pedro kayno nirqan: <<Ishkantsita wanutsimänantsi kaptinpis manami ñëgashaykipaqtsu>>.

Wakin kaq discïpulunkunapis tsaynölami nipäkurqan.

Getsemanícho Jesús manakushqan

Mateo 26.36-46; Lucas 22.39-46

32Getsemaní nishqanman discïpulunkunawan Jesús chayaykurmi kayno nirqan: <<Tayta Diosta manakamushqäyaq kaylacho jamarpaykay>>.

33Nirkurmi Pedruta, Santiaguta y Juanta washa läduman pusharqan. Tsaychömi pasaypa lakikur 34kayno nirqan: <<Wanunayparaqmi lakikuy tsarimashqa. Mana punuylapa kaylacho shuyarpaykämay>>.

35Nirkur mas washa läduman aywashpanmi pampaman lätakuykur Tayta Diosta manakurqan wanuypita salvananpaq. 36Manakurmi kayno nirqan: <<Abba, Papä, qampaqqa imapis manami sasatsu. Cöpacho winaraykaq castïguykita ama upuykatsilämaytsu.#Sal. 75.8; Isa. 51.17; Jer. 25.15-29; Hab. 2.16. Itsanqa noqa munashqänöqa ama kaykutsuntsu, sinöqa qam munashqaykino kaykulätsun>>.

37Tsaypita discïpulunkuna kaqman kutiykurmi punukashqata tarirqan. Tsaymi Pedruta kayno nirqan: <<Simón, ¿imanirtaq punukashqa kaykanki? ¿Manaku juk höralapis rikchayta kamäpakunki? 38Rikchapäkuy. Tayta Diosta manakäriy Satanásta ichipänaykipaq. Cäsukamayta munarpis kikilaykikunapitaqa manami kamäpakunkitsu>>.

39Tsayno nirkurmi yapay aywashpan puntata manakushqannöla Tayta Diosta manakurqan. 40Tsaypita yapay kutirmi discïpulunkunata tarirqan punukashqata. Punuy pasaypa nitiptinmi punukashqa karkaykarqan. Tsayno kaykaqta tariykuptinmi ima niytapis mana kamäpakurqantsu. 41Kimsa kuti Diosta manakushqanpita kutirnami kayno nirqan: <<¿Jinalaku punurkaykanki? ¡Rikchapäkuyna! Höra chayamushqanami Runapa Tsurinta jutsasapa runakunapa makinman entregananpaq. 42¡Sharkapäkuy, aywashunna! Entregamaq runa aywaykämunnami>>.

Jesústa prësu tsarishqan

Mateo 26.47-56; Lucas 22.47-53; Juan 18.3-12

43Jesús tsayno parlaykaptinmi apostolnin Judas Iscariote chayarqan atska runakuna pushashqa. Tsay runakunatami mandaq cürakuna, ley yachatsiqkuna y Israel mayor runakuna kacharqan espädankuna y garrutinkuna aptashqata. 44Manaraq chayarmi pushashqan runakunata yätsir Judas kayno nirqan: <<Mayqantapis mutsar winchikushqä kaqmi Jesús kanqa. Payta prësu tsaripäkunki>>.

45Tsaymi chayaykur <<¡rabí!>> nishpan Jesústa mutsaykurqan. 46Tsawraqa Jesústa prësu tsaripäkurqan. 47Tsarirkuptinnami juk discïpulun espädanta jorqurir mas mandaq cürapa ashmayninpa rinrinta roquriykurqan.

48Prësu tsaripäkuptinmi runakunata Jesús kayno nirqan: <<¿Imanirtaq suwamannöpis espädaykikunawan y garrutikikunawan shapäkamushqanki? 49Waran waran qamkunawan templu patiucho kaykaptï#Luc. 19.47; 21.37. ¿imanirtaq tsaycho prësu mana tsarimarqaykitsu? Itsanqa Tayta Diospa palabran nishqannölami kaykuna pasaykäman>>.

50Jesústa prësu tsariykuptinnami discïpulunkuna qeshpir aywakärirqan. 51Juk mözulami säbanasnin aylushqa qepanta aywarqan. Tsay mözumi prësu tsariyta munapäkuptin 52aylurashqan säbanasta kachariykur qarapächula qeshpir aywakurqan.

Jesústa mas mandaq cüra tapushqan

Mateo 26.57-68; Lucas 22.54-55, 63-71; Juan 18.13-14, 19-24

53Tsaypitanami Jesústa apapäkurqan mas mandaq cüraman. Tsaymanmi juntakarqan mandaq cürakuna, Israel mayor runakuna y ley yachatsiqkunapis. 54Pedruqa karu qepalanta aywarmi ruri patiuyaq yaykurqan. Tsaychömi jamakurqan templu täpaq wardiakunawan ninacho mashakushpan.

55Tsaychömi mandaq cürakuna y lapan Sanedrín juezkuna Jesústa wanutsiyta munar testïgukunata ashipäkurqan lulakur Jesúspa contran parlapäkunanpaq. Mayjina ashirpis wanutsishqa kananpaqnöqa manami ima jutsantapis taripäkurqantsu. 56Manakaqkunata jitapashpan contran atskaq sharkurpis kikinpurami apänakärirqan. 57Tsaypitanami wakin runakuna manakaqta jitapashpan Jesúspa contran sharkur kayno nipäkurqan: 58<<Noqakunami mayapäkushqä kay runa kayno parlashqanta: <Noqaqa templuta juchuratsirmi kimsa junaqlacho juk templutana sharkatsishaq. Tsay templutaqa manami runakunatsu sharkatsinqa> >>.#Juan 2.19.

59Tsayno nipäkuptinpis manami wakin testïgukuna nishqankunaman tinkurqantsu.

60Tsaymi mas mandaq cüra sharkurkur Jesústa tapurqan kayno nir: <<Tsayno jitapäshuptiki ¿manaku imatapis ninki? ¿Rasun kaqtaku nirkaykan o lulakurkaykanku?>>

61Tsayno tapuptinpis manami imatapis Jesús parlakurqantsu. Tsawraqa mas mandaq cüra yapay tapurqan kayno nir: <<¿Qamku Diospa Tsurin Cristo kaykanki?>>

62Tsawraqa Jesús kayno nirqan: <<Noqami Kä.#14.62 Noqami Kä nirqa Jesucristo tantiyatsirqan kikin Dios kashqantami. Tsaypita masta musyanaykipaq liyinki Éxo. 3.14; Juan 10.30-33. Kananpitaqa Runapa Tsurinta rikapäkunki munayniyuq Diospa alawqa kaq nawpancho jamaraykaqta y pukutay janancho jana patsapita aywaykämuqtami>>.#Dan. 7.13.

63Tsayno niptinmi mas mandaq cüra fiyupa rabyashpan sotänantapis rachirir kayno nirqan: <<¿Imapaqnataq mas testïgutapis ashishun? 64Mayapäkushqankimi Tayta Diospa contran rimashqanta. Kanan ¿imatataq nipäkunki?>>

Tsayno niptinmi lapan nipäkurqan Jesústa wanutsinanpaq.#Lev. 24.16. 65Tsawraqa wakinkuna toqapashpan nawinta ratashwan wataparkur kutapäkurqan kayno nir: <<¡Mä nimay pï kutashushqaykitapis!>> Tsaynölami templu täpaq wardiakunapis maqapäkurqan.

Jesústa Pedro ñëgashqan

Mateo 26.69-75; Lucas 22.56-62; Juan 18.15-18, 25-27

66Ruri patiucho Pedro kaykaptinmi mas mandaq cürapa ashmaynin warmi chayarqan. 67Ninacho mashakuykaqta rikaykurmi Pedruta kayno nirqan: <<Qampis taqay Jesúswanmi purishqanki ¿aw?>>

68Tsayno niptinmi Pedro ñëgashpan kayno nirqan: <<Noqa manami payta reqïtsu, ni tantiyätsu imapita parlaykashqaykitapis>>.

Tsayno nishpanmi patiu yaykunaman witikurqan. Tsay hörami gällu cantarkurqan. 69Tsaychöpis tsay ashmay yapay Pedruta rikärirmi tsaycho kaykaq runakunata kayno nirqan: <<¡Kay runaqa kaykan Jesúswan puriqmi!>>

70Tsayno niptinmi Pedro yapay ñëgarqan. Tsaypita mas rätulantami tsaycho kaykaq runakuna Pedruta yapay kayno nirqan: <<Qamqa rasunpami paywan puriq kaykanki. Galilea runami kankipis. [Rimakuynikipis Galilea runakunapa niraqmi kaykan]>>.

71Tsayno niptinmi Pedro jurashpan kayno nirqan: <<¡Tsay runataqa manami reqïtsu!>>

72Tsay hörami gällu yapay cantarkurqan. Tsawraqa Pedro yarparkurqan Jesús kayno nishqanta: <<Manaraq ishkay kuti gällu cantaptinmi kimsa kuti mana reqimashqaykita ninkipaq>>.

Tsayta yarparkurmi pasaypa lakikushpan waqarqan.

Currently Selected:

Marcos 14: qvmB

Highlight

Copy