Mateo 9
9
Paralïticu runata Jesús aliyätsishqan
Marcos 2.1-12; Lucas 5.17-26
1Tsaypitanami büquiwan tsimparkur tashqan Capernaúm markaman Jesús kutikurqan. 2Tsaychömi paralïticu runata kirmawan Jesús kaqman apapäkurqan. Apaqkuna payman yärakushqanta musyarmi tsay qeshyaqta Jesús kayno nirqan: <<Ama lakikuytsu, hïju. Lapan jutsaykikunatami perdonashqä>>.
3Tsayno niptinmi ley yachatsiqkuna yarpachakurqan kayno nir: <<¡Tsayno nirqa Dios tukuykanmi!>>
4Tsayno yarparkaykashqanta musyarmi Jesús kayno nirqan: <<¿Imanirtaq lutanta yarparkaykanki? 5¿Mayqantaq mas sasa kaykan? ¿Runapa jutsankunata perdonayku? ¿O qeshyaqta aliyätsiyku? 6Runapa Tsurin kay patsacho munayniyuqmi kaykan runakunata perdonananpaq. Tsaytami kanan musyatsishayki>>.
Nirkurmi paralïticu runata kayno nirqan: <<¡Sharkuy! Kirmaykita apakurkur wayikipa aywakuy>>.
7Tsayno niptinmi jinan höra aliyashqana sharkurkur wayinpa aywakurqan. 8Tsayta rikaykurmi runakuna kushikushpan Tayta Diosta alabapäkurqan kayno nir: <<¡Kay runataqa Tayta Diosmi munayninta qoykushqa kaykunata rurananpaq!>>
Discïpulun kananpaq Mateuta Jesús qayashqan
Marcos 2.13-17; Lucas 5.27-32
9Tsaypita aywakurmi Jesús rikarqan Mateo jutiyuq runa impuestuta cobrar jamaraykaqta. Tsawraqa kayno nirqan: <<Qatirämay>>. Tsayno niptinmi Jesúswan Mateo aywakurqan.
10Tsaypitanami Jesústa Mateo qayatsirqan wayincho mikunanpaq. Tsaychömi impuestu cobraq runakuna y jutsasapa runakunapis Jesúswan y discïpulunkunawan mikupäkurqan. 11Tsayta rikaykurmi fariseukuna Jesúspa discïpulunkunata kayno nipäkurqan: <<¿Imanirtaq impuestu cobraqkunawan y jutsasapa runakunawan Señorniki mikuykan?>>#Luc. 15.1-2.
12Tsayno nishqanta mayaykurmi Jesús kayno nirqan: <<Sänu kaqkunaqa manami jampikuqta munantsu, sinöqa qeshyaqkunalami. 13Tayta Diospa palabrancho imata nishqantapis yachakäriy. Tsaychöqa kaynömi niykan: <Sacrificiuta rupatsishqaykipitapis mas munä kuyapäkuq kanaykitami>.#Ose. 6.6; Mat. 12.7. Noqa manami jutsaynaq runakunamantsu shamushqä, sinöqa [jutsankunata kacharinanpaq] jutsasapa runakunamanmi>>.
Yachatsikuynin mushuq kashqanta Jesús tantiyatsishqan
Marcos 2.18-22; Lucas 5.33-39
14Juk kutichömi Juanpa discïpulunkuna Jesústa tapurqan kayno nir: <<Noqakunapis y fariseukunapis cadalami ayunapäkü. Qampa discïpuluykikunaqa ¿imanirtaq mana ayunapäkuntsu?>>
15Tsayno tapuptinmi Jesús kayno nirqan: <<Casaraq mözu kaykaptinqa casaray fiestaman qayatsishqan runakuna ¿lakikunmantsuraq? Casaraq mözuta wanutsiptinmi itsanqa ayunapäkunqapaq.
16<<Manami pipis makwa röpata mushuq ratashwan shilpantsu. Mushuq ratashqa qentir makwa röpata masmi rachikätsin. 17Tsaynöpis manami pipis tsayraq rurashqa vïnuta makwa urpuman winantsu. Winaptinqa vïnu poqur pakiriykunqami. Tsawraqa vïnupis jichanqami y urpupis ushakanqami. Tsaymi tsayraq rurashqa vïnuta sänu urpuman winantsi. Tsayno ruraptintsiqa vïnupis manami jichanqatsu ni urpupis ushakanqatsu>>.#9.17 Makwa röpata y makwa urputami Jesucristo tinkutsirqan unay costumbrinkunaman. Mushuq ratashta y tsayraq rurashqa vïnutanami tinkutsirqan kikinpa yachatsikuyninman. Tsayno tinkutsirmi Jesucristo nirqan paypa yachatsikuynin mushuq kar unay costumbrinkunaman mana tinkushqanta.
Warmita aliyätsishqan y wamrata kawaritsimushqan
Marcos 5.21-43; Lucas 8.40-56
18Tsayno parlaykaptinmi sinagögacho mandaq runa chayaykur Jesúspa nawpanman qonqurpakuykushpan kayno nirqan: <<Warmi tsurïmi wanukäkushqa, tayta. Aywaykuläshun. Makikita jananman churaykuptikiqa kawariykamunqami>>.
19Tsayno ruwakuptinmi discïpulunkunawan Jesús aywarqan. 20Aywarkaykaptinmi chunka ishkay watana yawar apaywan qeshyaykaq warmi qepalanpa yaykuykur Jesúspa röpanpa kuchunta yataykurqan. 21Tsayno rurarqan <<Jesúspa röpanta yataylapis yataykurqa aliyäshaqmi>> nir yarpashpanmi. 22Yataykuptinmi tikraykur Jesús rikärishpan kayno nirqan: <<Ama lakikuytsu, hïja. Yärakamashqaykipitami aliyashqanki>>.
Tsay nishqan hörami warmi aliyarkurqan.
23Tsaypitanami autoridäpa wayinman Jesús chayaykur tarirqan tukapakuqkuna tukarkaykaqta y runakunapis qaparayparaq waqarkaykaqta. 24Paykunatami Jesús kayno nirqan: <<Waqtapa yarqukäriy. Wamraqa manami wanushqatsu, sinöqa punuykanlami>>.
Tsayno niptinmi runakuna asiparqan. 25Yarqupäkuptinnami wamra tsutaraykashqanman Jesús yaykuykur makinpita aptarkuptin sharkamurqan. 26Tsayno kawaritsimushqantami tsay markacho y wakin markakunachöpis musyapäkurqan.
Ishkay qaprakunata Jesús aliyätsishqan
27Tsaypita Jesús aywakuptinmi ishkay qaprakuna paypa qepanpa aywar kayno nipäkurqan: <<¡Davidpa Tsurin Jesús, kuyapaykalämay!>>
28Wayiman Jesús yaykuptinpis tsay qaprakuna qepantami yaykapäkurqan. Tsaymi Jesús tapurqan kayno nir: <<¿Qamkuna criyinkiku nawikita aliyätsinäpaq kashqanta?>>
Tsayno niptin kayno nipäkurqan: <<Awmi tayta, criyipäkümi>>.
29Tsayno niptinmi paykunapa nawinta yataykur Jesús kayno nirqan: <<Yärakamashqaykipitami nawiki rikanqa>>.
30Tsayno niptinmi paykunapa nawin jukla aliyarqan. Tsaymi Jesús kayno nirqan: <<Aliyätsishqäta pitapis ama wilapäkuytsu>>.
31Tsayno niykaptinpis yarqurilarmi Jesús aliyätsishqanta pïmaytapis wilaparqan.
Mana parlaq runata Jesús aliyätsishqan
32Tsay aliyätsishqan qaprakuna yarqurishqalantami Jesús kaqman pusharqan parlayta mana puëdiq runata. Tsay runacho supay kaptinmi mana parlarqantsu. 33Tsay supayta Jesús qarquptinnami runa parlayta qalaykurqan. Tsayta rikaykurmi runakuna kushikushpan kayno nipäkurqan: <<¡Manami maychöpis rikashqantsitsu kayno aliyätsiqtaqa!>>
34 Fariseukunami itsanqa kayno nipäkurqan: <<Kay runaqa supaykunapa mandaqninpa munayninwanmi supaykunata qarquykan>>.#Mat. 10.25; 12.24; Mar. 3.22; Luc. 11.15.
Runakunata Jesús kuyapashqan
35Lapan markakunapa y jalqakunapa Jesús purirmi Tayta Dios mandaykashqanpa ali wilakuyninta sinagögakunacho yachatsirqan y tukuy niraq qeshyawan qeshyaqkunata aliyätsirqan.#Mat. 4.23; Mar. 1.39; Luc. 4.44. 36Tsawraqa tsaytsika runakuna Jesús kaqman juntakarqan. Mitsiqniynaq y oqrakashqa uyshakunano kaykaqta rikarmi Jesús kuyaparqan.#Núm. 27.17; 1Rey. 22.17; 2Crón. 18.16; Jer. 50.6-7; Eze. 34.5; Zac. 10.2; Mar. 6.34. 37Tsawraqa discïpulunkunata kayno nirqan: <<Cosëcha shuntaypaq kaykaqnömi tsaytsika runakuna karkaykan Tayta Diospa wilakuyninta chaskikärinanpaq. Tsayno kaptinpis walkaqlami wilakuqkuna karkaykan. 38Tayta Diosta manakäriy wilakuqkunata kachananpaq>>.#Luc. 10.2.
Currently Selected:
Mateo 9: qvmB
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
