Juan 19

1Tsayno nipäkuptinmi Jesústa Pilato astatsirqan. 2Soldädukunanami kashapita corönata awaykur Jesúspa umanman jatiparqan. Tsaynöpis granäti cäpatami ayluparqan.#19.2 Granäti cäpataqa reykunalami jatikuq. 3Nirkurnami Jesústa laqyashpan kayno nipäkurqan: <<¡Alabashqa katsun Israel runakunapa mandaqnin rey!>>

4Tsaypitanami despächunpita yapay yarqaramur Pilato kayno nirqan: <<Tantiyakäriy. Apapäkamushqayki runapa ima jutsantapis manami tarïtsu. Tsaymi jutsaynaq kashqanta tantiyapäkunaykipaq jorqamushaq>>.

5Tsayno nirmi Jesústa jorqamurqan kasha corönan jatishqata y granäti cäpan jatishqata. Tsaymi Pilato kayno nirqan: <<¡Rikapäkuy kay runata!>>

6Jesústa rikaykurmi mandaq cürakuna y templu täpaq wardiakunapis qayarar kayno nipäkurqan: <<¡Crucificay! ¡Crucificay!>>

Tsayno niptinmi Pilato kayno nirqan: <<Kikikikuna crucificapäkuy. Noqa manami ima jutsantapis tarïtsu>>.

7Tsayno niptinmi kayno nipäkurqan: <<Diospa Tsurin tukuqkunata wanutsipäkunäpaqmi leynïkunacho qelqaraykan. ¡Tsayno kaptinqa tsay runa wanutsishqa katsun!>>

8Tsayno niptinmi Pilato fiyupa mantsakarqan. 9Tsaymi despächunman kutiykur Jesústa yapay tapurqan kayno nir: <<¿Qam maypitataq kaykanki?>>

Tsayno tapuptin Jesús manami imatapis parlakurqantsu. 10Tsaymi Pilato kayno nirqan: <<¿Manaku imatapis contestamanki? ¿Manaku musyanki crucificatsinäpaq o kacharinäpaqpis munayniyuq kashqäta?>>

11Tsayno niptinmi Jesús kayno nirqan: <<Qampa makikiman Tayta Dios mana churamaptinqa imata ruramänaykipaqpis munayniki manami kanmantsu. Tsaymi makikiman churamaq runa qampita mas jutsayuq kaykan>>.

12Tsayno niptinmi Pilato kachariyta munarqan. Kachariyta munaptinpis Israel runakunapa autoridäninkuna masraqmi kayno nir qaparparqan: <<¡Kay runaqa rey tukurmi mandaq Césarpa contran sharkushqa! ¡Payta kacharirqa qampis Césarpa contranmi kanki!>>

13Tsawraqa Jesústa waqtaman jorqaykatsimur Gábata nishqan alarman aywaykur Pilato jamakurqan. (Hebreo idiömachöqa Gábata nishqanqa <<läja rumikunawan rurashqa>> ninanmi.) 14Tsay höraqa karqan pulan junaqnömi. Tsay tardimi Pascua fiestacho jamay junaq qalaykunanpaqna karqan.#19.14 Israel runakunapaqqa mushuq junaq qalaykurqan las seis tardimi. Tsaychömi Pilato kayno nirqan: <<¡Mandaqniki reyta rikapäkuy!>>

15Tsawraqa fuertipa kayno nipäkurqan: <<¡Wanutsun! ¡Wanutsun! ¡Crucificay!>>

Tsaymi Pilato kayno nirqan: <<¿Mandaq reynikitaku crucificatsishaq?>>

Tsawraqa mandaq cürakuna kayno nipäkurqan: <<¡Noqakunapa mandamaqnï reyqa Césarlami! ¡Paypita mas juk reyqa manami kantsu!>>

16Tsayno nipäkuptinmi paykuna munashqanno soldädukunata Pilato mandarqan Jesústa crucificananpaq. Tsawraqa Jesústa apakärirqan.

Jesústa crucificashqan

Mateo 27.32-44; Marcos 15.21-32; Lucas 23.26-43

17Cruzta umruparkurmi Jesústa apapäkurqan Calavëra nishqanman. Hebreo idiömachöqa Calavëra nishqanta Gólgota nipäkunmi. 18Tsayman chayaykatsirnami Jesústa crucificarqan. Tsaynölami ishkay runakunatapis Jesúspa ishkan lädunman crucificarqan.

19Tsaypitanami juk letrëruta qelqarkur cruzpa puntanman Pilato laqatsirqan. Tsay letrëruchömi kayno nirqan: <<Nazaretpita kaq Jesús, Israel runakunapa mandaqnin rey>>.

20Jerusalénpa cercalancho crucificashqa kaptinmi atska Israel runakuna liyipäkurqan tsay letrëruta. Tsay letrëruqa hebreo, latín y griego idiömakunachömi qelqararqan. 21Tsaymi mandaq cürakuna Pilatuta kayno nipäkurqan: << <Israel runakunapa mandaqnin rey> nirqa ama qelqarätsuntsu. Tsaypa trukanqa kayno nir qelqarätsun: <Israel runakunapa mandaqnin rey kashqantami kay runaqa nirqan> >>.

22Tsayno niptinmi Pilato kayno nirqan: <<Qelqatsishqäqa qelqashqanami kaykan>>.

23Crucificaykurnami Jesúspa röpankunata chusku soldädukuna aypunakurqan. Rurin kaq tünican costüraynaq kaptinmi 24kayno nipäkurqan: <<Kaytaqa ama rachishuntsu. Tsaypa trukanqa suertita jitashun mayqantsipis apakunantsipaq>>.

Tsayno rurarmi Tayta Diospa palabran kayno nishqanta cumplirqan: <<Röpätapis rakipänakushqami. Mayqanpis apakunanpaqmi suertita jitapäkushqa>>.#Sal. 22.18. Tsay nishqannölami soldädukuna rurapäkurqan.

25Crucificaraykashqan kaqchömi kaykarqan Jesúspa maman, mamanpa nanan, Cleofaspa warmin María y María Magdalenapis. 26Mamanta y kuyashqan discïpulun nawpancho kaykaqta rikärirmi Jesús kayno nirqan: <<Mamä, paynami wawayki kanqa>>.

27Nirkurnami kuyashqan discïpuluntapis kayno nirqan: <<Kananqa mamaykitano rikaykulanki>>.

Tsayno nishqanpita patsami wayinman pusharkur mamantano rikarqan.

Jesús wanushqan

Mateo 27.45-56; Marcos 15.33-41; Lucas 23.44-49

28Lapanpis cumplishqana kashqanta musyarmi Tayta Diospa palabran cumplikänanpaq Jesús kayno nirqan: <<¡Yakulaw!>>#Sal. 69.21.

29Tsaychömi puyñu junta pochquq vïnu kaykarqan. Tsaymi hisöpu jachaman esponjata watarkur tsay pochquq vïnuman ushmarkatsir Jesús shoqunanpaq shiminman jatiparqan. 30Tsay vïnuta yawarkurmi Jesús kayno nirqan: <<Lapantanami cumplishqä>>.

Tsayno nirkushpanmi wanurqan.

Jesústa tuksishqan

31 Pascuacho jamay junaq qalaykunanpaqna kaptinmi#19.31a Pascuaqa qalaykurqan las seis tardimi. Israel runakunapa autoridäninkuna munarqantsu jamay junaqcho pipis crucificaränanta. (Pascuacho jamay junaqqa pasaypa sagrädumi karqan.) Tsawraqa Pilatuta manakurqan cruzcho wanuyta nakaykaqkunapa chankankunata pakirkur cruzpita jorqunanpaq.#19.31b Crucificaraykaqpa chankankunata pakipäkuq jukla wanunanpaqmi. Pakirkuptinnami jämayta kachananpaq kalpakuyta mana kamäpakushpan jämaytsaypa wanuq. 32Manakushqanta awniptinmi soldädukuna aywaykur Jesúswan crucificaraykaq runakunapa chankankunata pakirqan. 33Jesús wanushqana kaykaqta rikarmi paypa chankankunataqa mana pakirqannatsu. 34Tsaypa trukanqa juk soldädumi lanzawan lapsha pachanpa tuksirqan. Tsaymi yawarwan yaku jukla yarqamurqan.

35Lapan tsaykunatami rikarqä. Tsawraqa imano kashqantapis qelqaykä salvamaqnintsi Cristo kashqanta qamkunapis criyipäkunaykipaqmi. Lapan qelqashqäkunaqa rasun kaqmi kaykan. 36Tayta Diospa palabranpis kaynömi niykan: <<Manami ni juk tululantapis pakinqatsu>>.#Éxo. 12.46; Núm. 9.12; Sal. 34.20.

Lapan tsaykuna pasarqan Tayta Diospa palabran cumplikänanpaqmi. 37Tsaynölami Tayta Diospa palabran kayno niykan: <<Tuksishqantami rikapäkunqa>>.#Zac. 12.10.

Jesústa pampashqan

Mateo 27.57-61; Marcos 15.42-47; Lucas 23.50-56

38Tsaypitami Arimatea markapita José jutiyuq runa Pilatuta ruwakur kayno nirqan: <<Jesúspa ayanta pampaq apanäpaq kachapaykalämay>>.

Josépis Jesúspa discïpulunmi karqan. Itsanqa Israel autoridäkunata mantsakushpanmi musyatsikurqantsu. Manakushqanta Pilato awniptinmi Jesúspa ayanta pampaq apakurqan. 39Tsaymanmi Nicodemupis aywarqan kimsa arröbano mïrra y áloe takushqata#19.39 Mïrra karqan yörapa weqinmi. Áloepis karqan juk yörami. Tsaykunatami Israel runakuna tsakirkatsir ñutqu aqapäkuq. Tsaytami ayaman winaq mana asyänanpaq. apakurkur. Nawpatami Nicodemo tsakaylapa Jesúswan parlaq aywarqan.#Juan 3.1-2. 40Israel runakunapa costumbrin kashqannömi José y Nicodemo tsay apashqankunata säbanasman winapaylapa Jesúspa ayanta piturqan.

41Jesústa crucificashqan nawpanchömi karqan juk huerta. Tsaychömi karqan pitapis manaraq pampashqan mushuq sepultüra.#Mat. 27.60. 42Jamay junaq qalaykunanpaqna kaptinmi tsay sepultüralamanna Jesústa pampapäkurqan.

Currently Selected:

Juan 19: qvmB

Highlight

Copy