Génesis 31

Labánpita Jacob qeshpishqan

1Tsaypitami Jacob mayarqan Labánpa tsurinkuna wasanta rimar kayno niykashqanta: <<Jacobqa papänintsipa kaqta duëñu tukurmi rïcuyashqa>>.

2Tsaynöpis Jacob tantiyarqan suedrun Labán paypita jukaqyashqa puriykashqanta. Tsaymi nawpata kashqannönatsu karqan. 3Tsaypitami Jacobta Tayta Dios kayno nirqan: <<Papäniki y ayluykikuna tashqanman kutikuy. Qamwanmi imaypis kaykäshaq>>.

4Tayta Dios tsayno niptinmi mitsikuykashqan jirkaman Jacob qayatsirqan Raquelta y Leata. 5Paykuna chayaykuptinmi kayno nirqan: <<Papäniki jukaqyashqa puriykashqantami tantiyashqä. Tsayno kaptinpis papänï yärakushqan Dios manami kachaykamashqatsu. 6Qamkuna musyashqaykinöpis papänikita lapan voluntänïwanmi arupashqä. 7Tsayno arupaykaptïpis atska kutimi engañamashpan parlashqänöqa mana arreglamashqatsu. Tsayno ruraykämaptinpis Tayta Diosqa yanapamashqami. 8Tsaymi <arupämashqaykipita kananqa pägashayki yana muru uyshakunata> nimaptinqa lapan malwakunapis yana murulami yuriq. Tsaynöpis <alqa kaq yuriqkunata pägashayki> nimaptinqa lapan malwakunapis alqalantaqmi yuriq. 9Tsaynöpami Tayta Dios papänikipa uyshankunata qoykamashqa.

10<<Uywakuna tsarikunan#31.10 Wakin runakunaqa chulpakunan nipäkun. witsanmi sueñuynïcho rikashqä alqa chïvukuna, yana muru chïvukuna y yoraqniyuq chïvukuna cabrakunata tsariykaqta. 11Tsay sueñuynïchömi Tayta Diospa angilnin <¡Jacob!> nir qayamarqan. Qayamaptinmi <¿Tayta, ima?> nirqä.

12<<Tsaymi Diospa angilnin kayno nimarqan: <Noqa rikaykämi Labán imano nakatsishushqaykitapis. Tsaymi kamakätsishqä lapan yayankuna alqala, yana murula y yoraqniyuqla kananpaq. Tsayta rikar shumaq tantiyakuy. 13Noqami kaykä aywaykämuptiki Bet-elcho yuripaq Dios. Tsaychömi rumita jawiykur aceitita winapar promitimarqayki sirvimänaykipaq.#Gén. 28.18-22. Kananqa yurishqayki Canaánman kutikuy> >>.

14Tsayno wilapaptinmi Raquel y Lea kayno nirqan: <<Noqakunataqa papänï ima herenciatapis manami rakipämanqatsu. 15Tsaynöpis jäpatano rikapäkamashpanmi rantikamashqa. Noqakuna rayku arupashqaykitapis mana rakipämaylapami ushashqa. 16Papänïpa uyshankunata Tayta Dios makikiman churamushqanqa noqantsipa y wamrantsikunapami kaykan. Kananqa Tayta Dios nishushqaykinöla lapantapis ruray>>.

17-18Tsaymi Jacob kamarikurqan papänin Isaac tashqan Canaánman kutikunanpaq. Nirkurmi tsurinkunata y warminkunata camëlluman muntarkatsir imaykantapis cargakurqan. Tsaynölami Padan-aramcho arushqanpita tarishqan uywakunatapis qatikurkur kutikurqan. 19Tsayno kutikurqan milwa rutuq Labán aywashqanyaqmi. Raquelnami papäninpa ïdulunkunata suwaypa apakurqan. 20Tsaynömi Labánta mana wilapaylapa Arampita Jacob kutikurqan. 21Kikinpa kaqtaqa lapanta apakurkurmi qeshpikurqan. Tsayno aywaykurmi Éufrates mayuta pasar Galaad jalqakuna lädupa aywarqan.

Jacobta Labán qatipashqan

22Tsaypita kimsa junaqtaraqmi Labán mayarqan Jacob qeshpir aywakushqanta. 23Tsaymi aylunkunata minkakurir Jacobpa qepanta aywapäkurqan. Qanchis junaqtaraqmi tariparqan Galaad jalqakunacho. 24Taripananpaq kaq tsakaymi sueñuynincho Labánta Tayta Dios kayno nirqan: <<Cuidädu Jacobta toscu shimikipa imatapis niykankiman>>.

25Galaad jalqakunacho Jacob patsaraykaptinmi Labán tariparqan. Tsaychömi Labánpis aylunkunawan patsakurqan. 26Taripaykurnami Jacobta Labánqa kayno nirqan: <<¿Imatataq rurashqanki? ¿Imanirtaq mana wilamaylapa shakamushqanki? ¿Imanirtaq guërrapita prësu apaqno tsurïkunata apakamushqanki? 27¿Imanirtaq upälala qeshpir shakamushqanki? Shakamunaykipaq wilamaptikiqa fiestata rurar panderëtakunata y arpakunatapis tukar kushishqami despachamüman karqan. 28Tsurïkunata ni wilkäkunata mutsar despidikunaläpaqpis manami wilamashqankitsu. ¡Tsayno rurarqa upanömi ruraykushqanki! 29Tsayno rabyanätsimashqaykipita imatapis ruraykümanmi karqan. Tsayno kaptinpis papäniki yärakushqan Diosmi kayno nimashqa: <Cuidädu Jacobta toscu shimikipa imatapis niykankiman>. 30Papänikipa wayinman kutikurpis ¿imapaqtaq diosnïkunata suwapämashqanki?>>

31Tsayno niptinmi Jacobqa kayno nirqan: <<Tsurikikunata qechumänaykipaq kashqanta yarparmi upälala qeshpir shakamushqä. 32Diosnikikunataqa manami suwakamushqätsu. Mayqanpis diosnikita tsararaq kaqqa wanutsishqa katsun. Ayluntsikuna rikaykaptin ashikuy. Qampa kaqta imatapis tarirqa lapanta kutitsikuy>>.

Jacobqa manami musyarqantsu diosninkunata Raquel suwamushqanta.

33Tsayno niptinmi Jacobpa toldun rurinman Labán yaykurqan diosninkunata ashinanpaq. Tsaycho mana tariykurmi yaykurqan tsurin Leapa toldunmanpis. Nirkur yaykurqan ishkay ashmay kaq warmikunapa toldunkunamanpis. Mayqanchöpis diosninkunata mana tarirmi Raquelpa toldunmanna yaykurqan diosninkunata ashinanpaq. 34Raquelnami tsay dioskunata camëllupa sillan rurinman pakaykur tsay jananman jamakuykurqan. Tsaymi Labánqa toldu rurinta kuchun kuchun ashirpis mana tarirqantsu.

35Tsawraqa taytanta Raquel kayno nirqan: <<Papä, ama rabyakuykulaytsu kay jamaraykashqäpita mana sharkuptï. Killa qeshyäwanmi kaykä>>.

Tsaymi mayjina ashirpis ïdulunkunata Labán mana tarirqantsu.

36Tsayno ashirpis mana tariptinmi Jacob rabyakushpan Labánta kayno nirqan: <<¿Imatataq mana alita rurashqä? ¿Ima jutsatataq rurashqä tsayjinanpa rabyashqa qatipaykamänaykipaqqa? 37Lapan imaykätapis tikwaypa tikwarmi ashishqanki. Tsayno ashirpis ¿imatataq qampa kaqta tarishqanki? Tarishqa karqa kayman churamuy ayluntsikuna rikananpaq. Paykunami nimäshun mayqantsipis rasun kaqta niykashqantsita.

38<<Ishkay chunka (20) watantin uywaykikunata qatiraykaptï uyshaykikuna y cabraykikuna manami ni juklaylapis shulushqatsu. Tsaynöpis manami ni juk carnilatapis pishtakurkushqätsu. 39Manami imaypis jirka uywakuna wanutsishqanta apapämushqätsu. Tsaypa trukanqa kikïpa kaqtami trukanta churaq kä. Uywaykikunata tsakaypa o junaqpa suwa apaptinpis lapantami qamqa cobramashqanki.

40<<Qampa uywaykikunata mitsir fiyupami nakashqä junaqpa shanaywan y tsakaypana qasaywan. Punuytapis manami tarishqätsu. 41Chunka chusku watami ishkan tsurikikunapaq arupashqä. Uywaykipaq kashqami soqta wata mas arupashqä. Tsaymi chayamushqäpita patsaqa ishkay chunka (20) wata makikicho tashqä. Atska kutimi mitsipashqäpita pägamänaykipaq kashqantapis trukatsikushqanki. 42Awkilü Abraham y papänï Isaac yärakushqan Tayta Dios mana yanapamaptinqa jinaylatami qarqamankiman karqan. Fiyupa nakar y lakikur aruptïmi Tayta Dios yanapamashqa. Tsaymi qanyan tsakaypis sueñuynikicho olqüpäshushqanki>>.

Labán y Jacob promitinakushqan

43Jacob tsayno niptinmi Labán kayno nirqan: <<Kay warmikunaqa noqapa tsurïmi. Kay wamrakunaqa noqapa wilkämi. Lapan uywakunapis noqapa uywäkunapa wawanmi kaykan. Lapan kaycho rikashqaykiqa noqalapami kaykan. Kanan imanäshaqtaq tsurïkunata y lapan wilkäkunata. 44Pactuta kanan rurashun qampis y noqapis mana qonqaypa cumplinantsipaq>>.

45Tsayno niptinmi Jacobqa wanka rumita jawirqan señalpaq. 46Nirkurmi lapan aylunkunata kayno nirqan: <<Atska rumikunata shuntapäkamuy>>.

Tsawraqa juk muntun rumita wanka kaqman qotupäkurqan. Nirkurnami muntunaraykaq rumi nawpancho mikupäkurqan. 47Tsaypitami Labánqa kikinpa idiömancho tsay partipa jutinta churaparqan Jegar Sahaduta jutin kananpaq. Jacobnami kikinpa idiömancho jutinta churaparqan Galaad jutin kananpaq.#31.47 Tsay jutikunaqa testïgu qotu ninanmi.

48Tsaymi Labán kayno nirqan: <<Kanan kay muntunashqantsi rumikunami señal kanqa promitinakushqantsita imaypis yarpänantsipaq>>.

Tsaypitami tsay partipa jutin karqan Galaad.

49Tsaynömi jukaq jutintapis churaparqan Mizpa jutin kananpaq.#31.49 Mizpa ninanqa rikachakuna törri ninanmi. Tsay jutita churaparqan Labán kayno nishqanpitami: <<Kananpita manana rikanakuptintsipis Tayta Diosmi rikamäshun imano kashqantsitapis. 50Tsurïkunata maqaptiki o paykuna jananman juk warmita ashiptikiqa mana musyaptïpis Tayta Diosmi juzgashunkipaq>>.

51Nirkurmi Labán kayno nirqan: <<Kaychömi kaykan rumikunata muntunashqantsi y jawishqantsi wanka rumipis. 52Tsaykunami señal kanqa kanan promitinakushqantsita imaypis yarpänantsipaq. Kananpitaqa qampis ni noqapis ama pasapänakushuntsu ni imatapis ama yatapänakushuntsu. 53Awkiluyki Abraham y awkilü Nacor yärakushqan Diosmi juzgamäshun promitinakushqantsita mana cumpliptintsiqa>>.

Labán tsayno niptinmi Jacobpis papänin Isaac mantsakushqan Tayta Diospa jutincho promitirqan imaypis cumplinanpaq.

54Tsaypitanami Jacobqa uywakunata pishtarkur wiranta Tayta Diospaq rupatsirqan. Aytsata y tantatami lapan aylunkunawan mikupäkurqan. Nirkurmi tsay jalqalacho punupäkurqan.

55 55 (32.1) Patsa wararkuptinnami Labán sharkurkur lapan wilkankunata y tsurinkunata mutsarqan. Nirkur paykuna ali kawananpaq bendicionta qoykur markanpa kutikurqan.

Currently Selected:

Génesis 31: qvmB

Highlight

Copy