Génesis 19

Sodomata y Gomorrata Tayta Dios ushakätsishqan

1Patsa tsakaykaptinnami Sodomaman chayarqan nawpaq ishkay angilkuna. Lotnami jamaraykarqan markaman yaykuna sawan punkucho. Rikaykurmi paykunapa nawpanman Lotqa qonqurpakuykurqan urkunpis pampaman töpashqanyaq. 2Tsaymi paykunata kayno nirqan: <<Taytakuna, wayïman aywaykuläshun patsakärinaykipaq. Tsaychömi chakikita maylakärinkipaq. Nirkur wara tutanami pasakärinkipaq>>.

Tsayno niptin paykuna kayno nirqan: <<Yusulpäki, tayta. Noqakunaqa pläzalachömi waräkärishaq>>.

3Tsayno mana munaykaptinpis yaparir yaparir Lot ruwaptinmi wayinman patsakuq aywapäkurqan. Tsaychömi Lotqa levadüraynaq tantata rurarkatsir y ali mikuyta yanukarkatsir mikupäkurqan.

4Lotpa wayincho mayqanpis manaraq punuptinmi Sodoma markacho taq lapan runakuna juntapaykurqan mözupita qalaykur hasta awkis runakunayaq. 5Nirkurmi qayapar Lotta kayno nipäkurqan: <<¿Maytaq wayikiman patsakamuq runakuna? ¡Paykunata jukla qarqamuy tsaripakunäpaq!>>

6Tsayno nipäkuptinmi wayipita Lot yarqurir punkuta shumaq wichqarkur 7tsay runakunata kayno nirqan: <<Qorpäkunataqa imatapis ama ruraykulaytsu, taytakuna. 8Paykunata imatapis ruranaykipa trukanqa ishkay warmi tsurïkunata qarqapämushayki munashqaykita rurapäkunaykipaq. Tsurïkunaqa manaraqmi runata reqinraqtsu. Wayïman patsakamuq runakunataqa ama imatapis ruraykulaytsu>>.

9Tsayno niptinpis runakuna nipäkurqan: <<¡Qamqa washata ayway! ¿Jäpa runa kaykarku noqakunata mandayta munapäkamanki? ¡Kananmi itsanqa paykunata ruranäpaq kashqanpitapis mas peorraq rurashayki!>>

Tsayno nirmi Lotta wakpita kaypita maqarkur aywapäkurqan wayi punkuta amipäkunanpaq.

10Tsaymi qorpankunaqa Lotta tsutaypa wayi ruriman yaykarkatsir punkuta trancakarkamurqan. 11Nirkurnami waqtacho karkaykaq runakunata qaprayätsirqan mözukunapita qalaykur awkin runakunayaq. Tsaymi wayi punkuta ashiykashqalancho utikarqan.

12Tsaypitanami qorpankuna Lotta kayno nirqan: <<¿Mas ayluykikuna kay markacho kanku? Ayluykikuna kaptinqa warmitapis, olqutapis, mashayki kananpaq kaq mözukunatapis lapanta pushakurkur kay markapita qeshpikäriy. 13Atskaqmi Tayta Diosman quejakushqa kay markacho runakuna jutsa ruraq kashqanta. Tsayno jutsasapa kapäkuptinmi noqakunata kachamashqa kay markata chipyaq ushakätsinäpaq>>.

14Tsayno niptinmi Lot aywarqan mashan kananpaq kaq mözukunaman kayno ninanpaq: <<¡Kay markapita lapantsi aywakushun! ¡Tayta Dios kay markata ushakätsinanpaqnami kaykan!>>

Tsayno niptinpis Lot brömapashqanta yarparmi mana criyipäkurqantsu.

15Patsa waraykaptinna Lotta angilkuna kayno nirqan: <<Kay markata ushakätsiptï mana wanunaykipaq jukla aywakuy warmikita y ishkan tsurikita pushakurkur>>.

16Jukla mana yarquptinmi angilkuna Lotta, warminta y tsurinkunatapis makipita jancharkur markapita jorqurqan. Tayta Dios kuyapashpanmi mana ushakänanpaq tsayno jorqurqan.#2Ped. 2.7. 17Markapita karucho kaykaptinnami juknin kaq ángel kayno nirqan: <<Mana wanunaykipaq qepapa mana tikraypa warakayla qeshpikäriy. Pampacho mana ichiypa jukla jirkayaq aywakäriy>>.

18Tsayno niptinmi Lotqa kayno nirqan: <<¡Ichiklata shuyaykamayraq, taytakuna! 19Qamkunaqa ali runa karmi kuyapämar mana wanunäpaq jorqamashqanki. Itsanqa jirkayaqqa qeshpiyta manami kamäpakushaqtsu. Markata jukla ushakätsiptikiqa lätaykachaykaqtachari taripamanqa. 20Taqay taksha markalaman qeshpirkunäyaq shuyaykuy, taytakuna. Tsay takshala markataqa ama ushakaykatsilaytsu>>.

21Tsawraqa ángel kayno nirqan: <<Manakamashqaykino katsun. Taqay taksha markata manami ushakätsishaqtsu. 22Tsawraqa jukla tsay markaman qeshpikäriy. Tsayman manaraq chayaptikiqa ushakätsinäpaq kaq markata manami ushakätsishaqraqtsu>>.

Tsaypita patsanami tsay markapa jutinta churaparqan Zoar#19.22 Zoar ninanqa takshala ninanmi. jutin kananpaq.

23Inti mashtaykaptinnami Zoarman Lot chayarqan. 24Chayaykuptinnami Sodoma y Gomorra markakunaman Tayta Dios tamyatsimurqan azufriwan talushqa ninata. 25Tsay markakuna kashqan pampakunachömi runakunata, uywakunata y lapan imaykatapis chipyaq nina usharqan.#Mat. 10.15; 11.23-24; Luc. 10.12; 17.29; 2Ped. 2.6; Jud. 7. 26Lotpa warminmi#Luc. 17.32. itsanqa qeshpiykashqancho qepapa tikraykur kachi rumiman tikrarqan.

27Tsaypita jukaqnin tutanami Abraham aywarqan Tayta Dioswan parlashqan kaqman. 28Tsaypitami rikärirqan Sodoma y Gomorra markakunapita hornupitanöraq qoshtay sharkuykaqta. 29Tsaynömi Tayta Dios ushakätsirqan Lot tashqan pampacho kaq markakunata. Tsayno ushakätsirpis Abraham manakushqa kaptinmi Lotta tsay markakunapita qeshpitsirqan.

Lotpa warmi tsurinkuna imanöpa wawayuq rikakushqanpis

30Tsaypitami Lot pasaypa mantsakurqan Zoarlacho tayta. Tsaymi ishkan warmi tsurinkunata jalqaman pushaykur machaylacho tarqan. 31Tsaychömi qechpa kaq jipash nananta kayno nirqan: <<Papänintsiqa awkinnami kaykan. Kaychöqa manami olqu runakuna kantsu noqantsiwan tänanpaq. 32Tsayno kaykaptinqa papänintsita shinkarkatsir paywan punushun noqantsicho tsurin yurishpan ayluntsikuna mana ushakänanpaq>>.

33Tsawraqa wilanakushqan tsakaylami papäninta vïnuwan shinkatsirqan. Nirkurnami qechpa kaq jipash papäninwan punurqan. Papäninqa shinkashqa kar manami mayarqantsu imay höra tsurin yaykapashqantapis ni yarqushqantapis.

34Waraynin#19.34 Wakin runakunaqa warantin nipäkun. junaqnami qechpa kaq jipash shulka nananta kayno nirqan: <<Qanyan tsakaymi papänintsiwan punushqä. Kanan tsakay qampis paywan pununaykipaq yapay shinkatsishun. Tsaynöpami papänintsi aylu mana ushakanqatsu>>.

35Tsayno nirmi tsay tsakay papäninta yapay upyatsirqan. Nirkurmi shulka kaq tsurinna papäninwan punurqan. Pasaypa shinkashqa karmi papäninqa mana mayarqantsu imay höra tsurin yaykapashqantapis ni yarqushqantapis.

36Tsaynöpami Lotpa ishkan tsurinkuna qeshyaq rikakurqan taytanpata. 37Mayor kaq wacharqan olquta. Tsay wamrapa jutinmi karqan Moab. Paypita miraqkunami moabita runakuna karkaykan. 38Shulka kaq jipashpis wacharqan olqulatami. Tsay wamrapa jutinnami karqan Ben-ammi. Ben-ammipitanami amonita runakuna karkaykan.

Currently Selected:

Génesis 19: qvmB

Highlight

Copy