1 Juan 3
3
Tayta Diospa wamrankuna kashqantsi
1¡Tantiyakäriy! ¡Tayta Dios pasaypami kuyamantsi! Kuyamashpantsimi <<wamräkunami karkaykanki>> nimantsi.#Juan 1.12. Rasunpami wamrankuna kaykantsi. Wamran kashqantsitaqa Tayta Diosta mana chaskikuq runakuna manami tantiyapäkuntsu. Tsayno tantiyapäkuntsu Tayta Diosta mana reqirmi.
2Kuyay wawqi panikuna, Tayta Diospa wamran kashqantsita kanan musyarpis manami musyantsiraqtsu imano kanantsipaq kashqantapis. Tsayno kaptinpis musyantsimi Jesucristo kutimuptin paywan tinkur kikin niraqman tikranantsipaq kashqanta.#Fil. 3.21. 3Tsayno kanantsipaq kashqanta shuyaraykarqa Jesucristo jutsaynaq püru kashqanno noqantsipis jutsaynaq püru kashun.
4Pipis jutsata rurarqa Tayta Diospa leyninkunata manami cäsukuykantsu. 5Musyantsimi jutsaynaq kanantsipaq Jesucristo kay patsaman shamushqanta. Payqa manami imaypis jutsata rurashqatsu. 6Tsaymi Jesucristupa makincho kawaqkunaqa jutsa rurayta kacharin. Jutsa rurayta mana kachariqkunaqa manami Jesucristuta chaskikushqatsu ni reqintsu.
7Kuyay wamräkuna, pipis <<Tayta Diostami cäsukü>> nirqa Jesucristunömi alikunata rurar kawatsun. Cäsukuq kashqanta niykar jutsata ruraptinqa yachatsishushqaykita ama chaskipäkuytsu. 8Jutsa rurayta mana kachariq kaqqa diablupa munayninchömi kaykan. Diabluqa kay patsa qalaykushqanpita patsami jutsata ruran. Diablu rurashqankunata ushakätsinanpaqmi Tayta Diospa Tsurin Jesucristo shamushqa.#Heb. 2.14-15.
9Tayta Diospa wamran kaqkunaqa manami jutsata rurannatsu, sinöqa Tayta Dios munashqannönami kawapäkun. Tayta Diospa wamran karmi jutsa ruraykunata kacharin. 10Pipis jutsata rurar y runa mayinta chikirqa manami Diospa wamrantsu kaykan, sinöqa diablupa wamranmi. Tsaynöpami musyantsi Diospa wamran pï kashqanta y diablupa wamran pï kashqantapis.
Pïmaywanpis kuyanakunantsipaq nishqan
11Juknintsi juknintsipis kuyanakunantsipaq kashqantaqa unaypitanami musyantsi.#Juan 13.34; 15.12. 12Ama kashuntsu Caínnöqa. Payqa diablu munashqanta rurarmi wawqin Abelta wanutsirqan.#Gén. 4.8. ¿Imanirtaq wanutsirqan? Kikinpa rurayninkuna mana ali kaptin y wawqinpa rurayninkuna ali kaptinmi wanutsirqan.
13Wawqi panikuna, musyantsimi jutsa ruraq runakuna chikimashqantsita. 14Tsaynöpis musyantsimi wanushqano kashqantsipita mana ushakaq kawaytana tarishqantsita. Tsayta musyantsi wawqi panikunawan kuyanakur kawarmi.#Juan 5.24. Mana kuyaq kaqqa wanushqanömi kaykan. 15Lapanpis runa mayinta chikiqkunaqa wanutsiqnömi kaykan. Musyashqantsinöpis wanutsikuqkunaqa manami Tayta Diospa nawpanman chayanqatsu.
16Kuyakuq kanantsipaqqa Jesucristo noqantsi rayku wanushqanta tantiyakushun.#Juan 15.13. Noqantsipis kuyakuq karqa runa mayintsi rayku wanunantsipaq listu kaykäshun. 17Imantsipis kaykaptin runa mayintsi nisidächo kaykaqta mana yanaparqa manami Tayta Dios kuyakuq kashqannötsu kuyakuq kantsi.
18Kuyay wamräkuna, janan shonqulaqa ama kuyanakushuntsu, sinöqa imaypis yanapanakur rasunpa kuyanakushun. 19Tsayno kuyanakurmi musyantsi Tayta Diospa wilakuyninta rasunpa chaskikushqantsita y jutsantsipita perdonamashqantsita. 20Mana perdonamashqantsita yarpaptintsipis payqa jutsantsipita lakikushqantsita musyarmi perdonamantsi.
21Kuyay wawqi panikuna, perdonashqana kashqantsita musyaykarnaqa mana mantsakuypa Tayta Diosta manakushun. 22Mandamientunkunata cäsukur pay munashqanno kawarqa imata manakushqantsitapis chaskishunmi.
23Tayta Diospa mandamientunmi niykan Tsurin Jesucristuman yärakunantsipaq y juknintsi juknintsipis kuyanakunantsipaq.#Juan 13.34; 15.12, 17. 24Mandamientunkunata cumplirqa paywanmi kaykantsi y paypis noqantsiwanmi kaykan. Noqantsiwan pay kaykashqanta musyantsi kachamushqan Espíritu Santuta chaskikushqa karmi.
Currently Selected:
1 Juan 3: qvmB
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.