Matewuzhu 1
1
Eti warakha ya mazina a ojama wa Yinsa
1Eti warakha ya mazina a amarehemu a phantte ya ojama wa Daawuuda, wiiyiye ojama wa Eburahiima.
2Eburahiima khunvokola Esiyaakha;
Esiyaakha khunvokola Yaakhumpa;
Yaakhumpa khunvokola Yuuda na attwiize;
3Yuuda khunvokola Pereezi na Zeera, mamaaya aari Tamaara;
Pereezi khunvokola Hezoro;
Hezoro khunvokola Haruni;
4Haruni khunvokola Aminataapi;
Aminataapi khunvokola Naaso;
Naaso khunvokola Silimaani;
5Silimaani khunvokola Bowaazi, mamaawe aari Rahaape;
Bowaazi khunvokola Obeedi, mamaawe aari Rukhiiya;
Obeedi khunvokola Yeese;
6Yeese khunvokola mfwalume Daawuuda.
Daawuuda khunvokola Seleyimaana, mamaawe aari muukha wa Uriiya;
7Seleyimaana khunvokola Ropowaawu;
Ropowaawu khunvokola Apiiya;
Apiiya khunvokola Asa;
8Asa khunvokola Josafa;
Josafa khunvokola Jorawu;
Jorawu khunvokola Uziiya;
9Uziiya khunvokola Jotawu;
Jotawu khunvokola Akaazi;
Akaazi khunvokola Ezakiiya;
10Ezakiiya khunvokola Manaase;
Manaase khunvokola Amooni;
Amooni khunvokola Joziiya;
11Joziiya khunvokola Jekoniiya na attwiize, wakathi aakholiweeyo khulawaniwa Babilooniya.
12Paata ya weettaniwa Babilooniya:
Jekoniiya khunvokola Salatiyeele;
Salatiyeele khunvokola Zoropapeele;
13Zoropapeele khunvokola Apiwuute;
Apiwuute khunvokola Eliyakhiimu;
Eliyakhiimu khunvokola Azoori;
14Azoori khunvokola Satookhi;
Satookhi khunvokola Akiini;
Akiini khunvokola Eliwuuti;
15Eliwuuti khunvokola Eliyazaari;
Eliyazaari khunvokola Mata;
Mata khunvokola Yaakhumpa;
16na Yaakhumpa khunvokola Yuusufu, manna wa Mariyamu, otule anvokoliyeeyo Yinsa, othuuto aniitthiwaaye Al-Masiihu.
17Khwa etthiipo wavira ojama khumi na mine waaza va Eburahiima mpakha Daawuuda, na khumi na wane waaza va Daawuuda mpakha va okholiwa khulawaniwa Babilooniya, na khumi na nne waaza Babilooniya mpakha va ovokoliwa wa Yinsa.
Ovokoliwa wa Yinsa Al-Masiihu
18Ovokoliwa wa Yinsa Al-Masiihu pi toono. Mariyamu, ari wooposiwa ti Yuusufu, ahirapalelaneeni khwiimittha khwa Rooho Ttakatthiifu. 19Ila Yuusufu, mposi awe, khwiiya ntthu wa shariya na woohitakhi ontwayifusha, ye khulakela sirini okayiri onrala. 20Ila, paata ya wuupuwela vitthu epile, khumpuwelela nlayikha la Mbwana nkatthi wa olottha, khumuuza yoori: “Yuusufu, mwaana wa Daawuuda, ohoove ompokhera Mariyamu wiiya muukhaawo, maana ye eemittha khwa Rooho Ttakatthiifu. 21Ye onteela ompattha mwaana, weeyo ontthaje nzina la Yinsa, maana ye onteela owoosuru atthu awe khwa twampi zaya.”
22Zarettikhana zooshi epo, yoori ziretteye zooshi epile Mbwana alupiyeeyo khwa napiyu yoori:
23“Mwaari onteela wiimittha ampatthe mwaana,
anttelaaye wiittheliwa nzina la Emanuweele,
enlupaaye yoori ‘Nluku ona fweeyo’.”
24Paata ya osisimuwa, Yuusufu khuretta etile nlayikha la Mbwana laamuziyeeyo khumpokhera Mariyamu nkhama muukhaawe. 25Ye khaarapalelaniye mpakha ompattha mwaana. Ye khuntthaja nzina la Yinsa.
Currently Selected:
Matewuzhu 1: eko
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.