Yaahaya 20

Osisimuwa

1Jumwa phiili supuyeene, Mariyamu Mataleena khulawa okhapuri, khoona liwe ntthile laattiyelaniweeyo khapuri lilaziwevo. 2Aphano khutthira khulawa mpakha vahali aariivo Simawu Pheeturu na nakhiyoni nkina, otule Yinsa aari omphetaaye, khuwooza yoori: “Mbwana alaziwamo nkhapuri, khanijuweeni vahali atthiiweevo!”

3Pheeturu khulankha na nakhiyoni nkina khulawa mpakha okhapuri. 4Oowiiri khulankha eettaka otthira, ila otu nkina khutthira channu khunziti Pheeturu, khwiiya mwanzo woofiya okhapuri. 5Khwiinama khutturumelamo, khoona joora, ila khuhivirimo nkhapuri mphule. 6Aphano, Simawu Pheeturu otule aari onlottaaye, khufiya khuvira nkhapuri mphule na ye khoona joora etile, 7na joora etile yaari veeshwa wa Yinsa, eri yooputaputeliwa eri phantte kiina. 8Aphano naye nakhiyoni otule aari mwanzo woofiya khuvira nkhapuri nttumphule, khoona na khukhupali. 9Yo nalelo zaari ehinaaweeleye Zawaatikhiwa Ttakatthiifu, zaari olupaaye yoori yaari ohithajiya Yinsa osisimuwa muufwa.

Yinsa onimpuwelela Mariyamu Mataleena

10Anakhiyoni apale khurutela owaya. 11Ila Mariyamu, khusala nalelo ari vanlako wa khapuri, eettaka olila, khwiinama khuthurumela nkatthi wa khapuri. 12Khoona malayikha mawiri awaliye kuwo zoolakala, eekhaliye aphale waariivo mwiili wa Yinsa, mmote ovishwa nkina omoolu.

13Aphano malayikha apale khumuuzela yoori: “Weeyo muukha, onlila ni?”

Ye khujipu araka: “Eetta othuuliwa Mbwana aka na akijuweeni vahali atthiiweevo.” 14Paata ya olupa toowo, khuzukuluwa khumoona Yinsa eemeliye, ila khuhinjuwi yoori ti ye.

15Aphano Yinsa khumuuzela yoori: “Weeyo, muukha onlila ni? Onimweekesa paani?”

Ye khusala oopuwela yoori aari namalimela woorotha, khunjipu yoori: “Mwinyi, nkhama mweetta onlazamu, nkakuuzeni vahali mwintthiyeevo, miiyo kilawe kanthuule.”

16Yinsa khuri: “Mariyamu!”

Ye khuzukuluwa, khulupa khwa luuka ya meepereewu yoori: “Raboni!” (Eriina maana, a Mwaaliimu). 17Yinsa khulupa yoori: “Ohikikholele, maana nalelo akinarutele wa Paapa. Olawe vakatthi wa attwiizaku wawooze yoori: ‘Miiyo kintta orutela wa Paapa na Papeenu mweeyo, wa Nluku aka na Nluku weenu mweeyo.’ ”

18Aphano Mariyamu Mataleena khulawa khuwooza anakhiyoni a Yinsa yoori: “Kamoona Mbwana!” Na khuwooza zooshi epile oziweeyo ti Yinsa.

Yinsa oniwaapuwelela anakhiyoni awe

19Jumwa phiili njuwa looveva, anakhiyoni akusanyeyiye milako ziri zoofukiwa, mwaasa wa owoova mayaahuuti, Yinsa khuvira khweemela vakatthi vaya khuri: “Heeri yiiye vamote na mweeyo!” 20Alupiyeevo vitthu epile khuwaathoonyeza makhono awe na pavu yawe. Anakhiyoni apale khwiiya ofurahi paata ya omoona Mbwana.

21Yinsa khulupa theenya yoori: “Heeri yiiye vamote na mweeyo! Nkhama etthiipo Paapa akirumiyeeyo, na miiyo kinuurumani mweeyo.” 22Paata ya olupa toowo khuwaavitelela khuri: “Mwipokhere Rooho Ttakatthiifu. 23Amana mwiswaamihi twampi za ntthu, twampi zaya epo eniiya zooswamihiwa, ila amana mwihiswaamihi khazinswamihiwa.”

Yinsa onimpuwelela Tome

24Tome, aniitthiwaaye Maphapo, mmote wa anakhiyoni apale khumi na awiri, kaari vamote na anakhiyoni wakathi Yinsa awaapuweleliyeevo. 25Anakhiyoni apale akina khumuuza yoori: “Namoona Mbwana!” Ila ye khuri: “Miiyo noohooni mmakhono ye alama za misumari, kitthaamo yaala yaka mphule aakhomeliweemo, na kittha nkhono aka mpavu mwawe, hatha vattitthiiru akinkhupali!”

26Paata ya ovira siikhu naane anakhiyoni awe khurutela okusanyeya nttumphule theenya na Tome aarivo. Milako ziri zoofukiwa, Yinsa khuta khweemela vakatthi vaya khuri: “Heeri yiiye vamote na mweeyo!” 27Aphano Yinsa khumuuza Tome yoori: “Otthe yaala yawo apha, na woone makhono aka, na wookole nkhono awo ottheele pavu yaka. Ohiiye nanhikhupali, ila wiiye namakhupali.”

28Tome khujipu araka: “Mbwana aka na Nluku aka!”

29Yinsa khumuuzela yoori: “Mwaasa wa okoona, wakhupali? Ooparikhiyiwa pi apale ahooneeni ila khukhupali.”

30Yinsa khuretta alama za minjuza kiina zinkizene vakatthi wa anakhiyoni zihaatikhiweenimo nkithaapu mphu. 31Ila epi zaatikhiwa yoori mweeyo mwikhupali yoori Yinsa ti Al-Masiihu, Mwaana wa Nluku na yoori amana mwinkhupali mwiiyane ohaayi khwa nzina lawe.

Currently Selected:

Yaahaya 20: eko

Highlight

Copy