Mwanzo 6

Otakhala rooho wa anaatamu

1Wakathi anaatamu aaziyeevo waattelana voolumwenku na khuwaavokola aana aakha, 2mahaakhimu#6:2 Mahaakhimu apa anlupiwaaye mphu aari atthu ookhomaala na oolepisana, aari wiitthiwa yoori aana a Nluku; na aarina ofwalume nwulweene. khuwoona yoori aakha apale aari ooshapweya, wakhula mmote wa yo khusala awaathuula apale aari owaatakhaaye. 3Aphano Nnyizinku khuri: “Akinteela onlikhela pinaatamu phuumu zoohaayi khwa mileele, maana ye nyama ya taamu; nyaakha zawe enttela wiiya miiya na eshiriini.”

4Wakathi aya opo voolumwenku aarivo atthu awulu awulu na oozivala, aruteliye wiiyavo theenya. Aari aana aalume aavokoliweeyo pi mahaakhimu noorapalelana aana aakha a anaatamu. Aana atthaapo, pa yo aari atthu oozivala na ootafikhana.

5Nnyizinku khoona yoori va tuniya zootakhala za anaatamu zeetta ovira zeekezeleyaka. Na wuupuwela wa nroho mwaya waari wootakhala wakhula siikhu. 6Aphano Nnyizinku khukafilikha mwaasa womumpa pinaatamu va tuniya, khwiiya woolemeliwa nroho mwawe. 7Khuri: “Kintta owaafujavo anaatamu aya apa kiwompiyeeyo voolumwenku apha; waaza anaatamu, nyama, anyanyama, na anyannyi ootulu, Kiwookafilikha mwaasa wowumpa.”

8Ila Nuuhi khwiiya ntthu aapatthiyeeyo rehema omaasho wa Nnyizinku.

Aaraka wa Nuuhi

9Eti hatiithi ya ojama wa Nuuhi. Vakatthi wa atthu ooshi ye paasi ti ye aari ntthu weekhweele na washariya, aari weettettelaaye mwentto wa Nluku. 10Nuuhi aawaavokoliye aanaawe aalume attatthu: Sheemu, Haamu na Yafeeti.

11Olumwenku waazukuleliwe pi vitthu zootakhala na zoohusuti omaasho wa Nluku. 12Nluku khweekesa olumwenku khusala oona ori wooharipweya, maana zumpe zooshi zaari zooharipweya menttezi aya.

13Nluku khumuuza Nuuhi yoori: “Kintta wiishisa zumpe zooshi zoohaayi, vamote na olumwenku aya kipweche. 14Weeyo omwaattale aaraka#6:14 Aaraka yaari kalawa yawaattaliwa nkhama kaashothi. nwulweene na thaapwa za mpila, onremule ontthe kaatthi, onkokotte ontthe piriniisi oje na nkatthi mwaya. 15Omwaattale nanna eti: phiima miiya na talaathiini na thaanu olepa waya, phiima eshiriini na piiri na nuusu owula waya, phiima khuumi na ttatthu chanka yaya. 16Ontthe tarato enfiyaaye nuusu ya phiima vatulu vaya. Waawanye tarato moote vathi, moote vakatthi, kinoko vatulu, ontthe nlako mpavu mwaya.

17“Onjuwa! Miiyo kasaleela ozamisa olumwenku wooshi na maati a nnyeri, kiishise zumpe zooshi ziriina phuumu zoohaayi ziriiye vathi wa pinku. Zooshi ziriiye va tuniya zinttela ofwa. 18Ila wahati aka kinretta na weeyo, onttela weetta mmwaaraka, weeyo, muukhaawo, aanaawo na aakha aya. 19Othuule nyama wakhula jaati piiri piiri, yeelume na yeekha, opakhire mmwaaraka mwawo yoori ziiye haayi vamote na weeyo. 20Wakhula jaati ya anyannyi, wakhula jaati ya nyama, wakhula jaati ya epile zinjipurulaaye vathi, zooshi piiri piiri ziiye vamote na weeyo yoori ziiye haayi. 21Othuule vitthu zooshi zinjiwaaye, opwehe yoori osala oja weeyo na nyama epo zooshi.”

22Nuuhi khuretta zooshi epile aarumiweezo ti Nluku.

Currently Selected:

Mwanzo 6: eko

Highlight

Copy