Mwanzo 30

1Rakeele ooniyeevo yoori Yaakhumpa khaari ompatthela mwaana, khusala anlilela wiivu ttwiiye. Khumuuza Yaakhumpa yoori: “Okipatthele mwaana, nohiiyi etthiipo kintta ofwa!”

2Yaakhumpa khumkatipukhela Rakeele, khumuuza yoori: “Weeyo onikoona nkhama Nluku? Ye ti ahiniwinkhaaye mavokozi.”

3Aphano Rakeele khumuuza yoori: “Kinaaye karumeya aka Biila, onthuule othuuto orapalelane yoori ampatthe mwaana zwaamu yaka, kiiye maama khwa ye.”

4Tiito Rakeele khunthuula Biila khumwinkha Yaakhumpa khwiiya muukhaawe. 5Biila khwiimittha khumpattha mwaana. 6Aphano Rakeele khulupa yoori: “Nluku akirettela shariya, asiila lompa yaka akinkha mwaana.” Khuntthaja nzina la Daani.

7Biila karumeya wa Rakeele khwiimittha theenya khumpattha mwaana wa phiiri. 8Rakeele khulupa yoori: “Kaarina viittha khuluyeene na ttwiiyaku, ila kanshintta.” Mwaana otule khuntthaja nzina la Nafitaali.

9Liiya nawoona yoori alikha ovokola, khunthuula karumeya awe Ziilipa khumwinkha Yaakhumpa khwiiya muukha awe. 10Ziilipa karumeya wa Liiya, khupattheliwa mwaana ti Yaakhumpa. 11Liiya khulupa yoori: “Kashapweyiwa mwaani!” Khuntthaja nzina la Gaati.

12Ziilipa karumeya wa Liiya khunvokola mwaana nkinoko theenya. 13Liiya khuri: “Kafurahi mwaani! Mpakha aakha akina anteela okuuza yoori kenkhiwa furaha!” Mwaana otule khuntthaja nzina la Asheeri.

14Wakathi wa wuurula tiriku Ruubeni aalankhiye khusala alawa omashapa, khusikana mishumo eniitthiwaaye mathunkuja#30:14 Atthu a raku aari wuupuwela yoori mathunkuja aniishisa tafwawuthi zoohivokoli. , khuthuula khulawa khumwinkha Liiya mamaawe. Rakeele khunvekela araka: “Safwatali, kimeeleni mathunkuja vattitthiiru apo atiisiyeeyo mwanenu.”

15Ye khujipu araka: “Wanthuula mannaka, khootosheeni? Theenya ontakha othuule mathunkuja apa atiisiyeeyo mwanaka?” Rakeele khunjipu araka: “Kemaani! Nlaweni nipatili, mwikinkhe mathunkuja apo, osikhu opu Yaakhumpa mwilawe mwarapalelane mweeyo.”

16Njuwa looveva Yaakhumpa arutaka omashapa, Liiya khunthepeeza khusala amuuza yoori: “Leelo onttela orapalelana miiyo, maana keetta wuurentteri na mathunkuja atiisiyeeyo mwanaka.” Nooripa Yaakhumpa khulala vamote na Liiya.

17Nluku khusiila lompa ya Liiya, khwiimittha khumpattha mwaana wa thaanu wa Yaakhumpa. 18Liiya khulupa yoori: “Nluku akitthuva mwaasa wonthuula karumeya aka khumwinkha mannaka.” Tiito khuntthaja nzina la Ezakaari.

19Liiya khwiimittha theenya khumpattha mwaana wasiitha. 20Ye khuri: “Nluku akinkha etthu ya fwayita, aphano mannaka onteela otuveliwa venkivene ti miiyo mwaasa wompatthela aana sitha.” Tiito mwaana otule khuntthaja nzina la Zebulooni.

21Wiishela waya Liiya khumpattha mwaana nkina wankha khuntthaja nzina la Tiina.

22Nluku khumuupuwela Rakeele, khusiila lompa yawe khumwinkha mavokozi. 23Ye khwiimittha khumpattha mwaana. Khulupa yoori: “Nluku eeshisa haaya yaka.” 24Khuntthaja nzina la Yuusufu, alupaka yoori: “Nnyizinku ti akinkhe mwaana nkina.”

Labani na Yaakhumpa ansiilana opheya

25Paata ya Rakeele ompattha Yuusufu, Yaakhumpa khumuuza Labani yoori: “Kilikheni kirutele nti kivokoliweeyo. 26Okinkhe aakhaaka apa kiwaakholeliyeeyo khaazi na aanaaka kilawe. Weeyo onjuwa khaazi kuukholeliyeeyo.”

27Labani khujipu yoori: “Safwatali nkhama onikisiileza ohilawe, miiyo sako zaka zakuuza yoori Nnyizinku akiparikhiya mwaasa wa weeyo. 28Apho okuuze phakari ontakhaaye kisala kuuripha.”

29Yaakhumpa khunjipu: “Weeyo onjuwa yoori khaazi kuukholeliyeeyo ti yawaatta na nanna kaari oshukisaazo nyama zawo mpakha waatta. 30Miiyo kihinate nyama zawo zaari vattitthiiru leelo pi zawaatta. Nnyizinku ooparikhiyani mwaasa wa miiyo. Khi ajamaazaku kinttela owaatthantta lini?”

31Labani khumuuzela yoori: “Kuuriphe niini?” Khujipu Yaakhumpa: “Mwihikiriphe hatha etthu. Kintta orutela oshukisa nyama zenu amana nisiilana saana. 32Leelo kinttela woona maphanko ooshi a nyama zawo, kilazakamo pwittipwitthi zooriipa, zoottweleela na za malepa, puuzi zoottweleela na za malepa. Eto ti enttelaaye wiiya phakari yaka. 33Etthiipo enttela okhweya woona okho ninttaawo nkhama ki wa waamineya. Wakathi onttelaaye woona nyama zaka, amana yiiyamo nliphanko mwaka puuzi yohiiyi ya malepa ama ya mattottonka, na pwittipwitthi kiina yohiiyi yooriipa, ontta ojuwa yoori pi za wiiyiwa.”

34Labani khuri: “Osiilana weetthu wiiye otthuupo olupiyeeyo.” 35Siikhu ethiitile, Labani khuphakula puuzi zeelume na zeekha zaariina malepa oolakala, na pwittipwitthi epile zaariina malepa ooriipa khuwenkha aanaawe oshukisa. 36Labani khuruma osusisiwa liphanko ntthile, khulawaniwa ohali woolepawo kiyasi ya siikhu ttatthu ntthu ari nsafwari na okhule aariiwo Yaakhumpa. Yaakhumpa khusala ashukisa nyama za Labani epile zaasaliyeezo.

Nanna ariphiweezo Yaakhumpa ti Labani

37Yaakhumpa khushija puutta ttatthu miwishi za miitthi zoofwarikhana na khwa etthiipo khuttha mikhwenyenye zoolakala, amanyaka woolattanisavo na khuttha etthiipo phantte yoolakala nkatthi wa puutta zaya etthiipo. 38Nawiisha khuttheya puutta epile zomanyiwa vahali aphale zaari onywaavo, omaasho wa liphanko vahali zaari opepheranaavo. Tiito aari otthaakaaye puutta epile zoophaka omaasho waya amana zinywaka. 39Amana zipepherana paata ya woona puutta epile, aana zaari owaapatthaaye aari wiiya oophaka, oottweleela, na a malepa. 40Yaakhumpa khuphakula nyama epile khuttha mphule zaariimo pwittipwitthi zeekha zoolakala yoori zisala zeekesa okhule ziriiwo epile zooriipa na za malepa za nliphanko la Labani. Khufuwa maphanko awe khuphakula khuhikusanyi na epile za Labani. 41Amana zipepheriwaka epile zeekha zaruthupa, ye eetta ootthaka puutta omaasho waya vahali zaari onywakaavo yoori zisala ziimittha zeekesaka puutta. 42Ila nawoona yoori nyama eti ti yawootta khaari ottheela puutta. Epile zawootta zaari wiiya za Labani ila epile za ruthupa zaari wiiya za Yaakhumpa. 43Khwa etthiipo, ye khwiiya thaajiri nwulweene khwiiyana maphanko awaatta a nyama, akarumeya aakha na aalume, nkamiiya na apuuru.

Currently Selected:

Mwanzo 30: eko

Highlight

Copy