Mwanzo 28

Otthira wa Yaakhumpa

1Esiyaakha khunkhuwela Yaakhumpa khumparikhiya, khumuuza yoori: “Ohinrale hatha muukha mmote wa Kanaani. 2Olankhe olawe nti wa Pata Ara owawe Betuweeli pwapwiyo. Olawe wanrale mwaana wa Labani nlupu wa mamaawo. 3Nluku Nwahi zooshi ooparikhiye, mwivokolelane na ojama enu waattelane, yoori khwa weeyo epuwe khapila zawaatta. 4Awinkhe weeyo na ojama awo parakha etile ahitiweeyo Eburahiima, wiiye mweenyewe nti opu oniikhalaaye nkhama nletto enkhiweeyo Eburahiima ti Nluku.” 5Paata ya toole, Esiyaakha khunleeza Yaakhumpa na khulawa Pata Ara owawe Labani mwaana wa Betuweeli wa nti wa Ara, nlupuwe Rapekha maama wa Yaakhumpa na Ezawu.

6Ezawu aajuwiye yoori Esiyaakha amparikhiyiye Yaakhumpa, khumuuza yoori alawe nti wa Pata Ara, amweekese muukha woottuukho anrale. Na khusiila yoori papaawe amuuza Yaakhumpa yoori ahinrale muukha wa Kanaani. 7Khujuwa theenya yoori Yaakhumpa anshututela papaawe na mamaawe alawa Pata Ara. 8Ezawu ajuwiyeevo yoori papaawe khaari ontuvela aakha a Kanaani. 9Aphano khulankha khulawa owawe Esumayila mwaana wa Eburahiima, khunrala Mahalaathi mwaana wa Esumayila, nlupu wa Nepayoothi, owaalikha aakha apale akina aarinaaye.

Jozi ya Yaakhumpa Beetele

10Yaakhumpa khulankha Beeresheba khusala alawa Harani. 11Eettaka olawa etthiipile, nootupweela njuwa ye khufiya puuro moote khulala attaapho. Khuthuula liwe laari attaaphale khuretta nsaawu khurapalela. 12Alotthaka, khoona yeemesiwe shikatta vathi, chanka yaya yaari okomaaye pinku. Malayikha a Nluku aari owelana ethiito na wiishukhana. 13Nnyizinku aari vatulu wa shikatta na khumuuza araka: “Miiyo ki Nnyizinku, Nluku wa papaawo Eburahiima na wa Esiyaakha. Nti opo orapaleliyeeyo kinteela owinkha weeyo na ojama awo wooshi. 14Ojama awo onteela wiiya yawaatta nkhama mishaka za vathi, onteela omwazeyela okhu lintupweelaawo njuwa, lintthamuwaawo njuwa, kashikhazini na kusini. Khwa weeyo na ojama awo khapila zooshi za voolumwenku enteela oparikhiyiwa. 15Woone! Miiyo kiri vamote na weeyo, kinteela owiinanela wakhula vahali oneettaavo, na kinteela wuurutisela tuniya ethiiti, akiniwanswi kihiretteeni epile zooshi kiwaahitiyeezo.”

16Yaakhumpa asisimuwiyeevo aphale aari olalaavo khuri: “Khweele, Nnyizinku ori puuro ethiiti, miiyo akaajuwiye.” 17Ye khwiiya wa woova channu, khulupa yoori: “Puuro eti ti yawoopisa! Nyuupa ya Nluku, na nlako wa pinkuuni.”

18Mmeesho mwaya supuyeene, Yaakhumpa khuthuula liwe ntthile aaphiteeziyeeyo, khweemesa khwiitthela mafuttha vatulu vaya. 19Puuro etile khutthaja nzina la Beetele, ila raku sitati etile yaari wiitthiwa Luuzhu.

20Yaakhumpa khwaahiti yoori: “Amana Nluku eeya vamote na miiyo, eenanela safwari yaka eti, khukinkha etthu yoojiwa na kuwo zoowala, 21khukirutisela vaje wa paapa kiri nkumi, Nnyizinku onteela wiiya Nluku aka. 22Liwe ntthi keemesiyeeyo apha nkhama nripu linttela wiiya nyuupa ya Nluku, na wakhula etile onikinkhaaye kiwinkhaka lifunku la khuumi.”

Currently Selected:

Mwanzo 28: eko

Highlight

Copy