Mwanzo 25
25
Ojama nkina wa Eburahiima
1Eburahiima khunrala muukha nkina aari wiitthiwaaye Khetuura. 2Ye khunvokolela aana apa: Zimraani, Yokishaani, Medaani, Midiyaani, Ishibaaki na Shuuwa. 3Yokishaani khunvokola Sheeba na Dedaani, aana a Dedaani aari Asuuri, Letusi na Leemi. 4Aana a Midiyaani aari Eefa, Eferi, Enookhi, Abiida na Eelida. Ooshi apa aari aana na atuulu a Khetuura.
5Eburahiima khumwinkha Esiyaakha vitthu zooshi aariinaazo. 6Ila aanaawe apale aawaavokoleliyeeyo na aakha akina, ari haayi nalelo, khuwenkha vitthu zaya nayo, khuwaaperekha phantte ya okhu lintthamuwaawo njuwa yoori ahiikhale vamote na mwanawe Esiyaakha.
Ofwa wa Eburahiima
7Eburahiima eekhaliye nyaakha miiya na saapiini na mithaanu. 8Ye afwa ari wawuuluvala arina nyaakha zawaatta, khulawa khuzikhiwa vamote na ajamaaze afwiiyeeyo. 9Esiyaakha na Esumayila, khunthuula khulawa khunzikha nlikurakuza la Makhipeela kharipu ya Manre, nshapa la Eforoni mwaana wa Zohaari nhiiti. 10Nshapa nttintthile oozanyeziweeyo Eburahiima pi ahiiti, pi ottuukho azikhiweewo ye na muukhaawe Suhura. 11Paata ya Eburahiima ofwa, Nluku khuparikhiya mwanawe Esiyaakha. Esiyaakha aari wiikhala kharipu ya Beeri-Laayi-Rooyi.
Ojama wa Esumayila
12Eti hatiithi ya ojama wa Esumayila mwaana wa Eburahiima, anvokoliyeeyo Hajira wa Misuri njaazi wa Suhura.
13Apa mazina a aana aavokoliweeyo ti Esumayila: Nepayoothi, mwaana wa mwanzo wa Esumayila, Kedaari, Adibeeli, Mibisa. 14Miishima, Duuma na Maasa. 15Hadaadi, Teema, Yetuuri, Nafisi na Kedeema. 16Apa aana a Esumayila, khumi na awiri, pi atthaapo aari anamalokozela, wakhula mwaana na lihimo lawe na nhali aari omakaamo. 17Esumayila eekhaliye nyaakha miiya na talaathiini na sapa. Khufwa khulawa khuzikhiwa vamote na ajamaaze apa afwiiyeeyo. 18Ojama awe weekhaliye waaza Havila mpakha Shuuri kharipu na Misuri tarikhi ya weetta Ashuuru. Yo aari woohisiilani na ojama nkina wa Eburahiima.
Ezawu na Yaakhumpa
19Eti hatiithi ya ojama wa Esiyaakha mwaana wa Eburahiima: Eburahiima khunvokola Esiyaakha. 20Esiyaakha noopattha hirimu ya nyaakha arupayiini khunrala Rapekha mwaana wa Betuweeli, nlupuwe Labani. Ye aari wa nti wa Aramu aari wiikhalaaye Paata Ara, tuniya ya Mezapotaamiya.
21Mwaasa wa muukhaawe ohiina mavokozi, Esiyaakha khulompa wa shariyavo anvekelaka Nnyizinku. Ye khusiila lompa yawe Rapekha khwiimittha. 22Aana awiri khusala oomana mwiirukulu mwawe. Ye khushanka khusala ajuuzela yoori: “Niini enrettikhanaaye mwiirukulu mwaka, nkhama pi toono keemitthela ni?” Aphano ye khumuuzela Nnyizinku.
23Nnyizinku khunjipu yoori:
“Mahimo mawiri pi ariiye mwiirukulu mwawo.
Weeyo onttela ovokola khapila piiri zoohisiilani:
moote enttela wiiya ya kuvu zayita eti kiina.
Nttunkhulu onteela onrumeyela nsimaana.”
24Efiiyeevo siikhu ya opattha ekumi, khuwaavokola a maphapo. 25Otu woovokoliwa mwanzo aari wookhuttuwa na wa waatta ovuzi, ti maana yootthajiwa nzina la Ezawu#25:25 Nzina ntthi la Ezawu lina maana la mwiili wa wiitaala ovuzi. . 26Elottelanaka khuvokoliwa ttwiiye, nkhono awe okholeliye ekwakuno ya Ezawu. Ti maana yootthajiwa nzina la Yaakhumpa#25:26 Nzina ntthi la Yaakhumpa khwa luuka ya Meepereewu lina maana a ekwakuno na theenya lina maana a ottettekha. . Ampattikhanaru aana apa, Esiyaakha aarettiye arina nyaakha siithiini.
27Aana apale khuwula, Ezawu khwiiya namasaya nwulu na aari wontuvela weettetta ntthuttu, ila Yaakhumpa aari ntthu woonyamala wontuvela wiikhala vaje. 28Esiyaakha aari ompheta Ezawu, mwaasa wontuvela orafuna nyama epile aari osayaazo. Ila Rapekha aari ompheta Yaakhumpa.
29Siikhu moote, Yaakhumpa khwiipikha sekuseku, wakathi aya opo Ezawu aarettiye eettaka orutiru ntthuttu arina jala na ari wooshokhera. 30Ye khumuuza Yaakhumpa yoori: “Okinkhe sekuseku epo oniipikhaazo zookhuttuwela kije. Kintakha ofwa jala!” Tiito Ezawu enkhiweeyo nzina la Edomu.
31Yaakhumpa khumuuza yoori: “Waaze okuuzanyeza lifunku lawo la omwaana wa omwanzo.”
32Ye khumuuza yoori: “Lina fwayita ni lifunku laya nttho la wiiya mwaana wa mwanzo, miiyo kitakhaka ofwa jala!”
33Yaakhumpa khusala ankhanyarela yoori: “Olaphe.” Ye khulapha, khumuuzanyeza Yaakhumpa lifunku la omwaana wa mwanzo.
34Aphano ye khumwinkha Ezawu phaawu na sekuseku ya epwiri. Khuja khunywela, khusala alawa safwari zawe.
Ti nanna ethiito Ezawu atarawiyeeyo ruhusa yawe ya wiiya mwaana wa mwanzo.
Currently Selected:
Mwanzo 25: eko
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
