Mwanzo 22
22
Nluku ontakha woona amini ya Eburahiima
1Paata yoovira nyaakha, Nluku aamweeziye Eburahiima, khunkhuwela araka: “Eburahiima!”
Ye khujipu yoori: “Lapeekha!”
2Nluku khumuuza araka: “Onthuule mwanawo Esiyaakha, othuuto mmote oriinaaye onimphetachaaye, olawe mpakha nti wa Moriya, vamwaako oriiye ottuukho kinttelaaye wuuthoonyeza, onrette twaha yoolukuziwa.”
3Ye khulankha mmeesho mwaya lifwajiri khunthuula puuru awe, khuwaathuula akarumeya awe awiri na mwanawe Esiyaakha. Khurema khuuni zoolawa orettela twaha yoolukuziwa, khusala alawa ottuukhule Nluku aamuuziyeewo. 4Siikhu ya ttaatthu, Eburahiima khweesa maasho awe khoona puuro etile ari ohali woolepawo. 5Ye khuwooza akarumeya awe apale yoori: “Mwisale attaapha na puuru otu, miiyo na shaapu otu nintta aphale, ninttela omwaaputu Nluku. Amana niisha nintta oruti nite niiye vamote na mweeyo.”
6Eburahiima khuthuula khuuni epile aari weettelaaye orettela twaha yoolukuziwa, khunttikha Esiyaakha mmafuzi mwawe. Ye khuthuula eesu na moottho khusala alawa. 7Esiyaakha khunkhuwela papaawe yoori: “Mweeyo paapa!”
Ye khujipu: “Lape mwanaka!”
Aphano Esiyaakha khumuuzela papaawe: “Nathuula moottho na khuuni, khi pwittipwitthi yoolawa otwahi eri vayi?”
8Ye khujipu araka: “Nluku ti ye anjuwaaye pwittipwitthi ninttelaaye orettela twaha yoolukuziwa mwanaka.” Yo khusala alawa vamote.
9Noofiya ohali okhule aathoonyeziweewo ti Nluku, khunjeka alitaari vatulu vaya khuthatelavo khuuni. Khunfuka mwanawe Esiyaakha khunttha vatulu wa khuuni. 10Khuthuula eesu, khulansa makhono awe yoori antwahi mwanawe. 11Ila nlayikha la Nnyizinku khukhuwa pinkuuni liraka: “Eburahiima! Eburahiima!”
Ye khujipu: “Lapeekha!”
12Khumuuza yoori: “Ohimwaavulele eesu shaapu oto, na ohinrettele hatha etthu. Aphano kinjuwa yoori onimoova Nluku, mwaasa woohikikhattazi mwanawo mmote othuuto oriina.”
13Eburahiima khuzukuluwa khoona pwittipwitthi ewateeliye manyaka aya va muutthi. Ye khulawa khuthuula khurettela twaha yoolukuziwa khwa zwaamu ya mwanawe. 14Aphano khutthaja nzina puuro etile la “Nnyizinku ti anjuwaaye.” Mpakha leelo eti oniittheliwavo yoori: “Omwaako wa Nnyizinku ti ye anjuwaaye.”
15Elottelanaka, nlayikha la Nnyizinku khukhuwa theenya pinkuuni linkhuwelaka Eburahiima. 16Khumuuza yoori: “Miiyo Nnyizinku, kinjilaphelela ki mweenyeweru, mwaasa weeyo oretta etile kiwuuziyeeyo, ohikikhattazi mwanawo mmote paasi oriinaayo, 17khweele, kinteela wuuparikhiya na kiwinkhe ojama wa waatta nkhama matthottowa ootulu na mishaka za mmattima, yo anteela othuula nti wa maatuwi aya. 18Atthu ooshi a voolumwenku anteela oparikhiyiwa, mwaasa wa ojama awo, maana weeyo wakishututela.”
19Eburahiima na Esiyaakha khurutela aphale aawaalikhiyeevo akarumeya awe. Ooshi khurutela Beeresheba ohali Eburahiima aari wiikhalaawo.
Aana a Nahoori
20Noovira vitthu epile khuuziwa Eburahiima oriwa: “Miilika avokoleliwa aana ti ttwiiyo Nahoori; 21wamwanzo aya nzina lawe ti Wuuzi, na ttwiiye Puuzi, khulotteliwa ti Kemuweeli, papaawe Aramu, 22Keseeti, Haazo, Pilitashi, Yitalafu, na Betuweeli.” 23Betuweeli khunvokola Rapekha. Aana apo wanaane aawaavokoliye Miilika na Nahoori ttwiiye Eburahiima. 24Nahoori aarina muukha nkinoko aari wiitthiwaaye Rewuma, na ye anvokoleliye aana: Teepa, Kahaamu, Tahaashi na Maaka.
Currently Selected:
Mwanzo 22: eko
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
