Mwanzo 12

Nnyizinku oninkhuwela Eburamu na onimwaahiti

1Siikhu moote, Nnyizinku khumuuza Eburamu araka: “Olikhe tuniya yawo, na ajamaazo, na vaje wa apapazo olawe tuniya kinttelaaye wuuthoonyeza. 2Kinteela wuuretta wiiya paapa wa ojama wa waatta, kinteela wuuparikhiya na onteela wiiya woojuwanikha, kinteela owaaparikhiya atthu akina mwaasa wa weeyo. 3Kiniwaaparikhiya apale anuuparikhiyaaye, na kininlaani otule anuulaanaaye. Khwa weeyo enteela wiiya zooparikhiyiwa khapila zooshi za voolumwenku.”

4Eburamu khulankha khusala alawa nkhama etthiipo Nnyizinku anrumiyeezo. Ye aalawiye vamote na Loothi, wakathi aliyeewo Harani aari oretta arina nyaakha saapiini na mithaanu. 5Khunthuula muukhaawe Suhuriiya na Loothi mwaana wa ttwiiye, na maali zawe zooshi aariinaazo, vamote na amwiitthwaana awe aawaapatthiyeeyo Harani, khusala alawa Kanaani. Khufiya tuniya ya Kanaani, 6ye khuvira eettettaka tuniya etile, khulawa mpakha Shekemu, phantte ya Moore ohali waariiwo muutthi nwulweene#12:6 Muutthi opo nwulweene, waari vahali aari olompakaavo a Kanaani na opiyavo sako. Nzina ntthi la Moore lina maana a mwaaliimu.. Wakathi aya opule a Kanaani aari oretta eekhalaka tuniya ethiitile.

7Nnyizinku khunteela Eburamu, khumuuza yoori: “Tuniya eti kinteela winkha ojama awo.” Aphano Eburamu khunjekela alitaari#12:7 Nzina ntthi la alitaari lina maana a meeza a mawe othateliwa vahali yaari orettiwakaavo twaha yoolukuziwa. Nnyizinku attaaphale. 8Eeshiyeevo, khusala eetta phantte ya onyaako okhu lintthamuwaawo njuwa ya Beetele. Noofiya onyaako okhule, khweemesa heema yawe. Beetele yaari okhu lintupweelaawo njuwa, Aayi yaari okhu lintthamuwaawo njuwa. Ye khunjekela alitaari Nnyizinku khwaaputu nzina la Nnyizinku. 9Aphano, ye khusala avira alawaka mpakha Nikeepu, phantte ya kusini ya Kanaani.

Eburamu na Suhuriiya antta tuniya ya Misuri

10Tuniya ya Kanaani yaapuwiyewo jala ya waatta, aphano Eburamu khulankha khusala alawa tuniya ya Misuri yoori eekhalewo siikhu vattitthiiru. 11Asaleelaka ofiya, khumuuza muukhaawe Suhuriiya yoori: “Osiileze, miiyo kajuwacha yoori weeyo o muukha wooshapweya. 12Amisuri noowoona anttela olupa yoori weeyo o muukhaaka, antta okuula yoori osalane weeyo. 13Amana wuuzeliwa olupe yoori nlupwaaka, ahikuule na akikhole saana mwaasa wa weeyo.”

14Wakathi Eburamu afiiyeevo, amisuri khumoona Suhuriiya yoori aari muukha wooshapweya channu. 15Afwalume a Firawuuna#12:15 Nzina ntthi la Firawuuna lina maana a mfwalume wa Misuri., amooniyeevo muukha otule, khulawa omuuza Firawuuna yoori amoona muukha wooshapweya. Pi apho khunthuula khunlawana wa Firawuuna. 16Eburamu aakholiwe saana ti Firawuuna mwaasa wa muukha otule, khwinkhiwa pwittipwitthi, mompe, amwiitthwaana aalume na aakha, apuuru na khavalo.

17Ila Nnyizinku khunhukhumu Firawuuna, khuntiisela pala ya waatta na ajamaaze, mwaasa wa Suhuriiya muukha wa Eburamu. 18Aphano, Firawuuna khunkhuwelisa Eburamu, khumuuzela yoori: “Mwaasa aya niini okirettelaka toono? Wahaakuuziye yoori otu muukhaawo? 19Mwaasa wa okuuza yoori nlupuwo. Tiito, kanthuuliyeeyo yoori eeye muukha aka. Apho muukhaawo otu, onthuule olawe!” 20Aphano Firawuuna khuwaaruma atthu awe omperekha Eburamu yoori aleemo mmuti mphule na muukhaawe na vitthu zawe zooshi.

Currently Selected:

Mwanzo 12: eko

Highlight

Copy