ZEKHARIAH 10
10
K’phyawn Vai ah Bawipa ah Shaitak
1Khawhtui khaw ah khaw aa khai ah Bawipa ah ng’yoi vä. Bawipa naw khaw k’aa ng’mei gui awn khaw aa sak sei, chang van ah hmawk ah lolai gui m’kim ne nik ci. 2Chang gui naw agup gui la k’ce gui cu yum ne ng’shik ci gui, cun ung phi ami gah cu hleeihlak la akholä gui ah kyak ci. Amshah naw ng’mang k’phlan ci, cun naw lam ning hma sak gui ci; ngami naw m’lung üpnak ami ning pek gui cu akholä ah kyak ci. Cun ah kyasei chang gui cu maih ciah htome ah mäih ah ng’vaak shüi ci gui. Ngami cu ami ng’vaihta kä om sei yaica ci gui.
3 Bawipa naw, “Ka chang gui uk gui ci gui ah a khohei chang gui ah khan ah ka m’lungshe ci, ka m’kyuk law gui khai nei. Judah chang gui cu ka chang gui, Kei, Hlüngtai ciah Bawipa naw, ka m’hteihtang gui khai. Ngami cu huham mah ciah ng’tuk nak ng’se ah kyak khai gui. 4Ami mät ungka ka chang gui uk gui khai ah uktu gui, aghampa gui, thumkhän thei ci gui, om lawk khai nei. 5Judah chang gui cu lam ng’nai hmu ah ami ga gui leh dep dep ciah gakap gui ah mäih ah m’gäi khai gui nei. Ngami cu Bawipa naw om püi gui ci kyasei, ng’tuk bik khai gui, ngami naw ng’se ng’cuum ciah ga gui phi hnim khai gui nei.
6“Kei naw Judah chang gui cu,
Ka khüi ghaat sak gui khai;
Israel chang gui cu
ka gung gui khai.
Ngami cu ka k’dük gui khai,
Ami van ami im ah
ka law püi ba gui khai.
Ngami cu kei naw
kä ka hnungtuk püi man ah mäih ah
kyak khai gui.
Kei cu Bawipa ami Khanpughi ah
ka kyak ci;
Ami taigü cu ka m’shang gui khai.
7Israel chang gui cu
gakap ah mäih ah thamah khai gui;
Sapyit tui awk ciah chang ah mäih ah
yeikyai khai gui.
Ami htangshon naw
shin ah näng nak cu gah khai gui,
Bawipa ah bii bi ah hmawk ah
yeikyai khai gui.
8“Kei naw ka chang gui cu khü ne,
Atäng ah ka ng’bum sak gui khai,
Kei naw ka gung gui khai,
acau ami da man ah mäih ah
ka da ba sak gui khai.
9Kei naw
chang pakhui gui ah ng’lung ah
ka püi sak gui ci,
Cun ung phi a sho nak yung ah
om pang u ne phi,
kei cu na shüm khai gui.
Ngami la ami hta gui cu
ghing ne ng’shon ne
ami im ah law ba khai gui.
10Egypt khaw la Assiria khaw ungka
ami im ah law püi ba gui ne,
ami ng’dü ung
ka om ba sak gui khai.
Kilead la Lebanon ung phi
ka om sak gui khai.
Khaw avan ung
chang avan be khai.
11Tuinu kat ne ami yaica yah ung,
Kei Bawipa naw
tui ng’hnawk cu
ka k’shedam nak khai.
Thuuk ciah Nile tuinu cu
kawi ne ket khai.
Chang ah ng’shei ciah Assiria gui cu,
ami m’lung neim khai.
M’gäi ciah Egypt cu
a huham maih khai.
12Kei naw ka chang gui cu
ka khüighaat sak gui khai,
Ngami naw na khawihnah ne
na läk khai gui.”
Cun cu Bawipa ah ng’thu ah kyak ci.
Currently Selected:
ZEKHARIAH 10: CBC
Highlight
Share
Copy
Want to have your highlights saved across all your devices? Sign up or sign in
Cho Bible Common Language © Bible Society of Myanmar, 2016.
