MALAKHI 1
1
1Shin cu Malakhi naw Israel chang gui am am thein gui vai ah Bawipa naw a pek ah ng’thu ah kyak ci.
Bawipa naw Israel gui am Hni nak
2 Bawipa naw a chang gui am, “Kei naw angtäi sei ka ning m’hni gui ci nei” cik ci.
Cun ung phi ngami naw, “Na na m’hni nak gui cu a i hawkcha ah na m’dang khai ang?” cik ci gui.
Bawipa naw, “Esau la Jakob cu ng’phäi nau goi ah kyak ci, cun ung phi Jakob la a hta ng’shon cu kei naw ka m’hni ci. 3Esau la a hta ng’shon cu ka gen ci. Esau ah khogui hmun cu khaw tai ah kyak sak ne, cun ah khaw cu sa-ui gui am ka nawng pe gui ci.”
4Esau ah hta ng’shon Edomit gui naw “Mi gawnu gui cu di pyi ci, cun ung phi mi co ba khai” ami ci ung, Bawipa naw, “Co ba u sä — kei naw ka phyet pe ba gui khai nei. Chang gui naw ‘khawshe khaw’ ah khü gui khai, ‘Bawipa naw angtäi sei amlung she nak ah pakhui ah kyak khai gui nei’ ” cik ci.
5Israel chang gui naw shin gui cu ami mät ah mik awn hmuk khai gui, ngami naw, “Israel khaw akpung yung ah phi Bawipa cu hlüngtai ci nei” cik khai gui.
Bawipa naw Taigü gui Yüisha gui ci
6Hlüngtai ciah Bawipa naw taigü gui am, “A hta naw apa cu chang m’sui ci, ashäm naw abawi cu chang m’sui ci. Kei cu nami na pa — a i ah kyasei kä nami na chang m’sui ang? Kei cu nami na bawi — a i ah kyasei kä nami na kyih aa ang? Nangmi naw nami na päipih ci, cun ung phi a i hawkcha ah ang kami ning päipih? nami cik ci.’ 7Nami na päipih nak cu — ka mang kyang ung ei-she nami na pek ah kyak ci. Cun kawn ah a i cha ah ang kä kami ning kyih aa? nami cik ci, Ka ning m’thein gui khai — cun cu ka mangkiang a i ah kä nami sui ah kyak ci. 8Amik m’dauh, akgaw, akshum gui cu nami na khawihnah nak vai ah law püi u neta, nami katnak kä om ciah nami ngai ci. Acun ah mäih ah akghing gui cu uktu bawi am pe shüm vä, ning yei na gui khai aw! A i baw ning pe taak gui khai aw!”
9Tuhbäi tagü gui aw, mikmi ah khan ah ani vai ah Khanpughi cu ng’shi thäh vä. Ani naw nami taigü kä ning m’shang gui khai nei. Cun cu nami katnak ah kyak khai. 10Hlüngtai ciah Bawipa naw, “Nangmi ungka tumat naw pum im shoh a khai vai ah ka ng’ya hlük ci, cun cu mang kyang ung mei, akholä ah a däi vai cu shungshet nak ah kyak ci. Kei naw kä ka ning yei na gui ci, nami na pek law phi kä ka dou khai. 11Vang khaw cawi ungka naw vang khaw cawi ung khüt ciah chang gui naw na m’taam ci gui. A hmun päng ung ang ui gui m’khih u ne, dou thei vai ah khawihnah ci gui. Ami van naw na m’taam ci gui! 12Nangmi naw ka mang kyang cu shemshai ciah nami pyen nak la nami päipih ah ei nami na pek nak awn kei cu kä nami na kyih aa ci. 13Nangmi naw, ‘Shin ah hmawk ah kami cümbawng ci!’ cine, kei ungka nami hnga cu nami m’hlat ci. Nangmi naw nami na pektak law ung nami m’guk ah akghing gui la akshum, akgaw gui cu nami law püi ci. Cun cu ka dou khai ah nami ngai ne ang? 14Ana pek vai ah a shaitak ah htome akni om lang sei, shekhak ciah ak ghing awn na khawihnah lawk ciah chang ah khan ah plah tam nak om sä! Kei cu küikyang ciah ghangpughang ah ka kyak ci, chang pakhui avan naw kei cu na kyih aa ci nei” cik ci.
Currently Selected:
MALAKHI 1: CBC
Highlight
Share
Copy
Want to have your highlights saved across all your devices? Sign up or sign in
Cho Bible Common Language © Bible Society of Myanmar, 2016.
