ATÜNNAK 16
16
Hakarah la Ishmaela
1Abram ah chu Sarai cu kä hta ci. Ani ung Hakarah ming nak ciah Egypt chang hnumi hta a changshäm om ci. 2Cun ah kyasei ani naw Abram am, “Bawipa naw ka hta vai kä na pek ci, changshäm hnumi hta cu na ih püi vai, ani ung a hmaw ng’tüi hman hngaw khai nei” cine pyen nak ci. Abram naw Sarai ah pyen cu yum ci. 3Cun ah kyasei Sarai naw Hakarah cu a chu nak vai ah Abram am ap ci. Cun gui cu Abram Kanaan khaw ah kum gha a om kawn ah a mawng gui ah kyak ci. 4Abram cu Hakarah awn ip ni neta, Hakarah cu kämah lawk ci. Hakarah naw a kämah hmat neta, amlung m’däm ne, bawinu cu shedam nak ci.
5Cun kawn ah Sarai naw Abram am, “Hakarah ah na shedam nak cu, nang ah khan ah gawk sä. Ani cu kei naw ka ning ap nei, cun ung phi a kämah law hmat neta, kei cu na shedam nak ci nei. Bawipa naw nang la kei ung düng ci la kä düng cicu ng’thumcha sä” cine pyen ci.
6Abram naw, “Ani cu nang ah changshäm ah kya ne, nang ah kut kyong ung om ci, ani ah khan ah na bi hlü na bi vai” cine Sarai am pyen nak ci. Cun kawn ah Hakarah cu Sarai naw shedam na khätah dawng ci.
7 Bawipa ah khankho chang naw, Hakarah cu Shura ah hteh nak lam tui pei ah hmu neta, 8“Sarai ah changshäm Hakarah, a hawi kaa na lawk ci, a hawi lam ah na hteit khai” cine ng’shik ci.
Ani naw, “Kei cu ka bawinu ah im ungka ka dawng ci nei” cik ci. 9Khankho chang naw, “Na bawinu ah hteit ba ne a changshäm ah na kyak ba vai nei” cik ci. 10Khankho chang naw pyen bamä ne, “Chang naw kä a khei tai vai ah da khai ah ka ning shon sak khai. 11Nang cu pami ah na hta khai, aming cu Ishmaela ah na sui khai, a i ah kyasei ci ung Bawipa naw yaica ne na kyah cu ng’ya pyi ci nei. 12Cun ung phi na hta cu ng’se k’yäng awn täng khai nei, chang avan cu hnungtuk püi khai, chang avan naw hnungtuk püi ba khai. Ani cu a mätyah gui avan awn ng’shawng ne om khai” cine pyen nak ci.
13Hakarah cu amät ng’htau ne, “Kei na hmuk ciah Bawipa cu shin ung akcang ah ka hmuk ci nei” ci neta, ani ng’thu püi ciah Khanpughi cu ‘Elroi’ ah a ming sui ci. 14Cun ah kyasei Kadesh la Bered ah ng’lak ah om ciah tui shawk cu, “Ghing ne kei na hmuk ciah tui shawk” ciah sui ci gui.
15Hakarah cu pami ah hta law sei, Abram naw Ishmaela ah aming sui ci. 16Cun yah ung Abram cu a khawkum 86 lawk ci.
Currently Selected:
ATÜNNAK 16: CBC
Highlight
Share
Copy
Want to have your highlights saved across all your devices? Sign up or sign in
Cho Bible Common Language © Bible Society of Myanmar, 2016.
