Luka 23
23
Pilat Hmielie Zingsuv
(Mat 27:1-2, 11-14; Mar 15:1-5; Jhn 18:28-38)
1Ama phuv yalya khata a thu yite Zingsuv ca Pilat hmie luo ama chiykhyi. 2Ama kha pachie yite: “Hingpapaa hingta ma cawsaa zaw a cuo lipa luo aa chiypa yi kha ma hmungpuo; Siepahruopa'a luo ngukhyi pi'a va ungciy, malie ta te kama hingna ‘Messiah, siepahruo#23:2 Or sathu pathuvpa siepahruo ta a cuo ang,’ a ta” ama ta. 3Cakhutaata Pilat ta, “Judah ming siepahruo ta na cuo ma?” a ta. Zingsuv ta, “Na ripa haata i cuo,” tapata a palie. 4Cakhutaa Pilat ta tluobyilepa tie hne cawsaazaapuv kha, “Hingpapaa hing a suena hmung va ang,” a ta yi. 5Cuorasala khi vie hryly yite, “A pacuvnapa ta Judea pe bangkhuo hnaahnawnapa a chiykhyi. Galilee taata pathu te hingpa hmang te hing a vya chiy tli,” ama ta.
Herod Hmie Luo Zingsuv Ama Chiykhyi
6Capa bie ca Pilat ta a thyi tiyta, “Hingpapaa hing Galilee ming ta a cuo ma?” tapata a hiehriy yi. 7Pilat ta Zingsuv ca Herod ta a uvnapa ruo chung taata na a cuo tapa kha a pachang tiyta Zingsuv ca Herod'a luo kha a paphya: capa cuo ning ca Herod zaw kha Jerusalem lie a aw ningta a cuo. 8Herod ca Zingsuv a hmung tiyta a palung a tluo hringhruo. Zingsuv kaw kha za thyi pari te a hmung khing napa a syisa tli, tahematapakieca a tuepa kharuehaa hmang hmung riypa kha a nguopuo. 9Zingsuv kha bie a hluvsa a hiehriy, cuorasala Zingsuv ta kaakha hmuo palie vyi. 10A thaa lie a tupa tluobyilepa tie hne Phungbie saya tie ta khuopuv ta ama pachie. 11Herod hne a rieka tie ta Zingsuv ca ese yite ama tue hyalya; pang rungnaapa kha pabuv yite Pilat'a luo kha ama paphya pakhaa. 12Capa ning liecata Herod hne Pilat ca viesaa pha ta amaa li; capa hluo ta ca cariepa tana ama za cuo.
Zingsuv Thie Riypata Bie Ama Chi
(Mat 27:15-26; Mar 15:6-15; Jhn 18:39—19:16)
13Cakhutaata Pilat ta tluobyilepa tie, uvthyi tie hne cawsaazaapuv kha ku yite, 14“Niema ta hingpapaa hing cawsaazaapuv na a cuo lipa luo aa chiy yi tapata kama'a luo nama vya chiykhyi. Niema hmielie hrahring i hiehriypasie tiyta niema ta nama pachiepa suena suokha hmuo hmung va ang. 15Herod zaw ta hmung ra vyi, cacuonakawta kiema'a luo malie a vya paphya pakhaa. Hingpa cawsaapapaa hingta thiy aa phuvpa hmang suokha hmuo tue vyi. 16Cacuonakawta asung ta pachisa'a yi ang te i pathlie aa,” a ta. 17(Lawsena pyi kyry ta Pilat ta thaw a tlapa pakha a pathliepa pari taw yi.)#23:17 Hluo vie caa-uv lieca rina tluo 17 hing aw vyi.
18Cawsaazaapuv ca khi yite, “Ama kha thie tie! Barabbas kha malie pathliepa tie!” ama ta. 19(Barabbas ca khy chunglie a duna a papuv sa nakaw hne lie a naw nakawta thaw ama pathlapa tana a cuo.) 20Pilat ta Zingsuv kha a pathlie khing nakawta cawsaazaapuv'a lie kha bie a ri pakhaa. 21Cuorasala khi pakhaa yite, “Vieluo lie thie tie! Vieluo lie thie tie!” ama ta. 22Pilat ta a yi thungnapa ta, “Khaapa suena ma a tue? Thiy aa phuvpa suena a cunglie suokha hmuo hmung va ang! Asung ta pachi sa'a yi ang tena i pathlie aa,” a ta. 23Cuorasala Zingsuv ca vieluo cunglie thie riypata ama khi khu thiyta khi yite ama hiecade pari nakawta, a hnangcaw taca iema ueryi khata a te. 24Cacuonakawta Pilat ta ama hiena haata pi riypata biechina a tue. 25Ama khingpapaa, aduna a tue nakaw hne lie a naw nakawta thaw ama pathlapapaa kha pathliepa yite, Zingsuv kha iema khingna haata ama kuv luo a pi yi.
Zingsuv Vieluo Lie Ama Thie
(Mat 27:32-44; Mar 15:21-32; Jhn 19:17-27)
26Zingsuv ama pyakhyile pa khata, khyta taata khypuv luo a vya chiypa Sairin khy ming Simon kha amaa taw. Patuv yite, vieluo kha papuv sa yite Zingsuv hnang luo kha ama paziy sa. 27Cawsaa hluvpuv ta ziy yite capa hrawlie ca a cacunghnaa a cung te a caakhyi nguoluopa canung chekha zaw ama aw. 28Zingsuv ta iema kha a palichiy yite, “Vya Jerusalem sacanung zaw, kama cuota ca caa kha ung; niema cuo hne nama saata zaw cuo khata caa hriy tie ung. 29Tahematapakieca cawsaa ta, ‘A cingpa canung, nu a phya buo lipa hne haatiy ta aa hnung a pazaw buo lipa ca thluechiypa tana a cuo!’ ama tana cuo kha a vya pha aa. 30Cakhutaata cawsaa ta tluo kha, ‘Na za vy la!’ ta'a yite sing kha, ‘na za buvkhung la!’ ama ta aa. 31Tahematapakieca thing a hring ning hmuo hinghaapa hmang hing tuepa a cuo kieca a rue taa changchiy ca khaapama a lu aa?” a ta.
32A hrangpa, a suepa pahning kha, Zingsuv hne thie hne riypata ama sikhyi ra. 33“Luvruv,” ama tapa hmang ama pha tiyta capa hmang lieca Zingsuv kha vieluo lie khepuo yite a suepa pahning zaw ca a cavyi luota pakha a cacuo luota pakha ama khepuo ra. ( 34Zingsuv ta, “I Paa! A ngiethe tie yi, tahematapakieca khaapama ma tue tapa kha a pachang vayi,”)#23:34 Hluo vie caa-uv chekha lieca rina tluo 34 hing aw vyi. a ta. Cakhutaata a caw kha a re riypata vyisung amaa da. 35A thaa lie a daapa cawsaa tie ta ama mang nguoluo ning kha Judah uvthyi tie ta tue hyalya yite: “Malie ca a khuo yi; Khazing ta aa tlawpa Messiah#23:35 Or Khrih a cuo kie ama hne ama ca a khuo se,” ama ta 36Rieka tie zaw ta ama tue hyalya: khawchiy yite mingsuv tiy thuepa kha pi yite, 37“Judah ming siepahruo ta na cuo kieca nama hne nama kha a khuo tie,” ama ta. 38A luv cunglie ama taapa caa ca: “Hingpa hing Judah ming Siepahruo tana a cuo,”#23:38 Hluo vie caa-uv lieca Grik, Latin hne Hebru ryi phang thung ta ama cape. tapata a cuo.
39Capa lie ama pathlie rapa a suepapaa pakha ta esena cang ta, “Nama ca Messiah cuo va cama? Nama hne nama kha a khuo la kiema zaw hing malie khuo tie nie!” a ta. 40Cuorasala a hrangpa pakha khata ama kha chuo te, “Ama hne aa lupa biechina rawlie na aw nguoluo thluopa hing tama Khazing ciy li pata na aw? 41Kiema cuota biechina ama tuepa hing ca aa hmuopa tana a cuo, tahematapakieca ma hmang tuepa cunglie ang aa tlapa khana ma ang; cuorasala ama hing ca phalina khaahmuo tue vyi,” a ta. 42Cakhutaata Zingsuv kyihuo kha, “Vya Zingsuv, na pena chung luo naa vaw tiyta naa thyi thi mya!” a ta. 43Zingsuv ta, “Biehmisi tana ica chang: Ata ning kama hne Paradais lie na aw aa,” a ta.
Zingsuv Thiyna
(Mat 27:45-56; Mar 15:33-41; Jhn 19:28-30)
44Ningchung khingkhuo tluv taata zuoluo siymaluo pathung te ruo bangkhuo lie zingna a tlung. 45Ning a zing chung cata Biena-ing pangzu ca tlaa te chehning ta aa che. 46Zingsuv ca khuopuv ta khi te, “I Paa! I thlaapa ca na kuv chunglie na ica pi!” a ta. Capaca a ri khu taata a huv a ci. 47Riebyipapaa ca hmang a cuopa kha a hmung tiyta Khazing kha pathuosa te, “Hingpapaa hing suena a hnyi bangby lipa#23:47 Or aa dangpa tana a cuo!” a ta. 48Capa hmang mang riypata a hmyapa cawsaa zaw ta hmang a cuopa kha ama hmung tiyta ama cacunghnaa kha a cung yite amaa diy. 49Pangpa ta Zingsuv a pachangpa bangkhuo hne Galilee ruo taata ama a ziypa canung zaw ca a luopaa khata a daa yite ama suo.
Zingsuv Pabyna
(Mat 27:57-61; Mar 15:42-47; Jhn 19:38-42)
50Cawsaa phasapa hne a dangsapa Josef ama tapapaa ca bierituv phuv chunglie a te rapa a cuo raalaa pata 51ama tingtuopa hne ama hmang tuepa kha a palung tling vyi. Ama ca Judah ming khy Arimathea taata cuote Khazing Pena a zuv riypa kha a huopa a cuo. 52Pilat'a luo kha vaa te Zingsuv riy kha a hie. 53A riy kha vieluo cung taata pachung te, pawruo ta cataw te, ahungtahmuo hmuo buo li liepa alung ama ryipa thluo chunglie a paby. 54Capa cuo ca A chiedaw ning ta cuote Sabbath ning kha aa thu tyalya tli. 55Galilee ruo taata Zingsuv a ziypa canung zaw ca Josef kha ziy yite thluo hne Zingsuv riy tuokhaatama ama chi tapa kha ama va mang. 56Cakhutaata ing luo a diy yite ziyhmyi hne sathu kha pachie pacie pata ama chi.
Sabbath ning ca Phungbie haakhata amaa pahy.
Currently Selected:
Luka 23: LNT1
Highlight
Share
Copy
Want to have your highlights saved across all your devices? Sign up or sign in
New Testament in Chin Lautu © Bible Society of Myanmar, 2015.
