Ạsuor 72
72
Ịdi kọoḅereghinaan ghan ọdaam mọ
1Tụghemi ọdaam mọ oogbo ghan ịiruen phọ rꞌaruukuan;
dian iiḅi ịiruen phọ ạna,
2pịdi ọdi ạdaam we phọ rꞌiiḅi ịiruen
ạḅile apoghom bụphe awe rọgbiphoghom bọ rꞌaruukuan.
3Ade phọ ẹmoogh ẹeḍiom,
awe phọ ọrol dọl aruukuan!
4Eḍighi ni ịdi ọdaam mọ kaagbo igey ịiruen ạngo rukulom mọ;
eḍighi ni ịdi ọdi kạloghonaan ḍịghaagh bụphe ẹkparam bọ,
ạḅile ạkpar apu bụphe rọgbiphoghom bọ bịdi.
5Awe phọ ạna ooseeny ni nyịna oomo amem lọ ogogo phọ rạmu,
oomo amem lọ ụnwanyu phọ rạngo ḍịḅaal phọ ọdi kꞌagee-pọ!
6Ọdaam mọ ạrol mụdi ọlophia dị rạlophom iizo,
mụdi oyiririph dị rạḅore ghan de phọ!
7Ạdol aruukuan eganana mem aghuḍum mọ ọdi,
ḅịle ẹeḍiom ẹrol ebia tụtu ụnwanyu phọ rạ́ngo mun ḍịḅaal phọ ọdi!
8 #
Zẹk 9.10
Eelhe phọ ọdi kẹḍua ni ọphiiny ẹteeny ọphiiny,
emiigh Yufratis kụ esi ruukuna ade phọ.
9Bụo areelhe ade ịisaar phọ kozumeri rụmhu risigh ọdi;
ạbumulogh-ḍien ọdi kokpuḍughian kụ ooseeny nyọdi.
10Ạbudaam mọ aSpen rꞌạbuphe odi bọ iigbom ạriphiiny phọ kọngo nyọdi ruunmo;
ạbudaam mọ Arebia rꞌaSeba kọsighe rạraar otuomaan nyọdi.
11Oomo ạbudaam mọ kokpuḍughian risigh ọdi;
kụ bụo oomo areelhe phọ okumu ghan nyọdi.
12Ọdi rạtagharan ghan rukulom lọ oru esi ọdi,
rꞌạbuphe ẹkparam bọ kụ oghinom bọ.
13Ọdi rạnma ghan ighirigiir bụphe odugh bọ rꞌarukulom mọ;
ọdi rạpel ghan sighuḍum ạbuphe ẹkparam bọ.
14Ọdi rạtagharan ghan bịdi esi ọgbiphoghom rꞌesi ọwa asighiton;
asighuḍum ạbidi ẹman ni mạar esi ọdi.
15Ọdaam mọ ạrol li ebia!
Eḍighi ịdi kọngo nyọdi gol dị ọsighe ẹpe Arebia kụ oru.
Eḍighi ịdi kọoḅereghi ghan nyọdi Ẹnaan oomo amem;
kụ ạḍiseph Ẹnaan ẹteeny ghan nyọdi oomo amem.
16Ịbiakpa emuza sịphe ade phọ ịdipho ịpe ạLebanon;
awe oḍiza sịphe ạramha phọ,
ịdipho ạroogho sịphe ade phọ!
17Eḍighi ịdi ḍien ọdaam mọ kóbula,
kụ aḍien phọ ọdi eeleghaan ịdipho erumuḍio phọ edi ghan bọ!
Bụo oomo areelhe ọoḅereghi mọ Ẹnaan ẹseph aani bụno,
ịdipho ọdi mạseph bọ ọdaam mọ!
18Iboom Ọmoogh-we Ẹnaan phọ Ịzirel.
Ọdi bịn kụ raḍighi yogh ghan rạraar ịiḍaany phọ ịphen.
19Iboom ḍien oghur phọ ọdi kꞌagee-pọ.
Oghur phọ ọdi amuza oomo aḅirini phọ.
Ẹrol li ịdipho! Ẹrol li ịdipho!
20Ịphen kụ ekureriom ịiḅereghi phọ aDevid ọony phọ ạJesi.
Currently Selected:
Ạsuor 72: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
