Ạsuor 55
55
Ịiḅereghi oye dị ọyaghiri aakeleghi
1Nạghan ịiḅereghi ạmi, Ẹnaan;
kạ́ḅitonaan ịlom mọ ạmi.
2Ler rụru ạnaghan kụ ụphagharanaan ịmi;
mị maminenom loor ịiḅaghami phọ ạmi.
3Mị rakiilaan ni loor ịgbiphoghom ạbukaraph awe.
Bịdi ọsighe ịiḅaghami uruom ịmi;
bịdi ụghagham ịmi ologhi kụ mị akia bịdi.
4Mị rakiilaan ni,
ḅịle ịka aḍuugh misoroghuom ịmi.
5Aruugu rꞌokpereghaan muzuom ịmi,
kụ oḅio ạmi ọ́pho.
6Edi esi ạmi ọbo mị ạmoogh raphaaph ịdipho ọkurughozo.
Mị mụpeeph ni ạḍua ạwa ekpisi ophooghian
7Mị mụpeeph ni ạḍua
ạwa esi orugh ẹpe ẹdala phọ.
8Mị mụmoogh esi ạaghian okpetenaan
ogbogh oghim rꞌookuugh.
9Gbạragbarami rạghaaph ạbumulogh-ḍien ạmi, Ọmoogh-we.
Oomo ịdi mị ạmiin sịphe ẹmha phọ, ịpaaghian rꞌẹwalalaany elephiri bịn.
10Tọrotoro esi, asighiton rꞌịiḅaghami
bịn kụ edi ghan ootaany rꞌaḍughul.
11Ọgbiphoghom rꞌimi rꞌoogulemi ạraraar
kụ imuza pạ aroḅodo phọ.
12Eḍighi ịyaar dị ạmulogh-ḍien kụ ụnmoghoghoom ịmi,
mị mutue ni ạkparam.
Eḍighi ịyaar dị oye iipikian kụ aabaga mọ ọno ạkpar upu ịmi,
mị mụbooghi ni loor ạmi esi lọ ọdi odi.
13Kụ ẹḅile eḍighi nyịna phọ rꞌạmi ooleeny bọ ni,
ọnyo ogbo ạmi rꞌọyaghiri ạmi, kụ ụnmoghoghoom ịmi.
14Yira ụḅoph ghan ni ọnhu ọghaaph,
orelhian ghan ọghi Otu Ịiḅereghi phọ.
15Ạbumulogh-ḍien ạmi omugh ẹpuuny!
Bịdi ogheel ọmar iḍim imoom!
Ịkaraph kụ edi ghan ruutu ạbidi rꞌiloghi ạbidi.
16Kụ ọlo mị ạlom Ọmoogh-we Ẹnaan phọ ọloghonaan ạḍighaagh
kụ ọdi kụphel li ịmi.
17Ḍịroor, ogbo ootaany rꞌaḍughul,
ạsiagba rꞌịkuph ạmi ẹki ạnyu ẹteeny nyọdi,
kụ ọdi kạnaghan ni ẹḍogh ạmi.
18Ọdi kụḅulemi ịmi rꞌẹwoor
ẹpe ạraagham mọ mị eenom bọ rꞌịbadi ạbumulogh-ḍien phọ.
19Ẹnaan, ọpo ạda bọ kꞌageedi,
kịnaghanan ni ịmi kụ ạkpar apu bịdi;
loor esi dị bịdi úmeera ukiton,
ḅịle bịdi nyọdi úkiilaan.
20Ogbaany ạmatuan ạmi azuom rịghiri phọ ọdi;
ọdi abi ruguanan phọ ọdi.
21Ikpo ọnhu ọdi ẹkorom epu elho
kụ ạri sịphe ekpom mọ ọdi aḍikia kụ edi.
Ikpo ọnhu ọdi ịipholion ghan mụdi ạmunum,
kụ ạri rẹmeeghan ịdipho isiko dị eroph.
22Ngọ dool phọ ạna Ọmoogh-we phọ,
bịn ọdi kạphel li nyịna.
Ọdi rámeera ghan ạbunon kụ ọkpar opu bugey awe phọ.
23Kụ ọlo, Ẹnaan, nạ kạsighe ni
rọkoom-enu phọ rꞌạbugbaam ọkpe phọ
asiemi oḍi ạbidi, tụtu bịdi ọrol egbem ạsia ạbidi.
Ạmi ạmi, mị kaḍuom ni nyịna ologhi.
Currently Selected:
Ạsuor 55: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
