Ạsuor 44
44
Ịiḅereghi ịlo oghoph
1Ẹnaan, yoor mọsighe ni reḅeri ayoor ạnaghanam —
ạburude phọ ayoor mọghaaph ni ụḅeni iyoor —
ịlo igbogh ạraraar phọ nạ aḍighi yogh bọ ḍiodiidi phọ mem mọ ạbidi,
2ịpe nạ rꞌaloor kụ aphorogh bọ amitiom bụo aruru phọ,
kụ arughemi we phọ ạna sịphe ade phọ ạbidi;
ịpe nạ ạlhiom bọ bụeri phọ areelhe phọ
kụ aḍighi bọ ịdi bụo ạna oḍum ọrara.
3Awe phọ ạna ụ́sighe elhool ẹgham kụ ọmooghom bọ de phọ;
ḅịle kẹn, ịnyaam ạbidi kụ bịdi ị́pel bọ;
ạḍighaagh elhiom mọ ạna rꞌịnyaam mọ ạna kụ ịphel bọ bịdi
ịdi eḍighi bọ bịdi ọḅeeraan nyịna.
4Nạ kụ ọdaam ạmi rꞌẸnaan ạmi.
Nạ kụ ụngo bọ we phọ ạna ọkpar opu.
5Loor ịnyaam mọ ạna yoor konyuughi ni bụmulogh-ḍien phọ ayoor olereghi;
yoor kọozeghiom ni bịdi ruwol — bụphe oḅetenu bọ rọwa phọ ozuom ayoor.
6Mị úḍuom ologhi kụmugh ạmi rꞌelhool ẹgham ạmi,
dị kịphel ịmi.
7Nạ kụ ụphel bọ iyoor ạsighe esi ạbumulogh-ḍien phọ ayoor,
kụ nạ mạgbaragbarami bụphe ụlhogh bọ iyoor ḍien phọ.
8Yoor rootumaam ghan ni Ẹnaan phọ oomo aḍio,
ḅịle yoor koboom ghan ḍien phọ ọdi kꞌagee-pọ.
9Kụ nyịidipho nạ mughel iyoor.
Nạ rạ́daph ghan mun we ẹgham mọ ayoor kạghi aani ẹgham.
10Nạ maḍighi ịdi yoor rokiilaan bụmulogh-ḍien phọ ayoor,
kụ ạbumulogh-ḍien phọ ayoor mowum rạraar ayoor.
11Nạ mụḅogh iyoor ạngo mọze ịdipho iyool-ịga,
ạḅile ụwalalami iyoor oomo areelhe phọ.
12Nạ maal we phọ ạna ẹnum ikpoki
dịadi yoor mạar ụ́man.
13Nạ maḍighi ịdi yoor moḍigh ạagia esi amatuman ayoor;
yoor moḍigh rẹer rꞌạrigilaam esi ạbuphe orugh bọ ukoom iyoor.
14Yoor moḍighi ọghoogh ạbidi esi oomo areelhe phọ;
ḅịle bụphe Ẹnaan úlegheri bọ rụnmoghoghoom ghan iyoor.
15Oomo amem mọ ạmi mị odimom ghan rꞌaroofola,
ḅịle umugholoor muukpereghiom ịmi,
16loor ịinaghan rꞌiitunyian rꞌịḅenian
ạbumulogh-ḍien phọ ạmi rꞌạbuphe mị akia bọ.
17Oomo ịphen phọ mimiteghunaan iyoor,
ghạlamo ịduon yoor nyịna úbula bọ ni,
ḅilẹ kẹn ụ́ka bọ ịyo phọ ạna.
18Iloghi ayoor ínmia;
kẹn, ịgbaranuom aruwol phọ ayoor ị́piom eten phọ ạna.
19Nạ mughin iyoor ạbilenaan ilhom ịnam,
kụ oogho aḍuugh muukpereghiom iyoor.
20Eru mạar dị yoor mowula ḍien Ẹnaan phọ ayoor
ọḅile onme eeruen ẹmugh kụ rọoḅereghi,
21Ẹnaan kétue ẹwa ịphen phọ emitiom ḍụghum?
Ọdi alegheri bọ ni rạraar ịbooghian phọ edi bọ ologhi oye.
22 #
Rom 8.36
Ii, ụtuan ẹmhu ạna kụ rụze bọ iyoor ḍio ḍio ḍio,
mugbiom iyoor dịadi iyool-ịga dị kọkanyan.
23Ọmoogh-we, sụma. Nạ rạnaani ghan ịduon phọ ika?
Ḅetenu. Kúghinom iyoor kꞌagee-pọ.
24Nạ ụtuan ika kụ ạaghian bọ,
kụ nạ abula bọ ịminimiin phọ ayoor rꞌịiḅaghami phọ ayoor?
25Yoor momeleghu ude ọogughuḍian,
yoor moḅololo yogh esi ọposo.
26Ḅetenu aru ụlhoghonaan iyoor ḍịghaagh.
Esi ẹphomoghian phọ ạna rémuneen ghan bọ, tue ụlhoghonaan iyoor ḍịghaagh.
Currently Selected:
Ạsuor 44: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
