Ạsuor 41
41
Ịiḅereghi oye ẹzegh
1Ạḍiseph edianaan ghan bụphe rọotughian ghan bọ rukulom mọ.
Ọmoogh-we phọ rạpel ghan bịdi kạsighe esi ịiḅaghami.
2Ọmoogh-we phọ kụ raako ghan bịdi kạpham ghuḍum ạbidi,
kụ bịdi ọmoogh ḍịseph sịen aḅirini phọ.
Ọdi kámeera mọ bịdi omeel oḍighanaan ịpe ạbumulogh-ḍien phọ rọotughianam bọ bịdi.
3Ọmoogh-we phọ kạloghonaan ni bịdi ḍịghaagh mem lọ bịdi rọorurughian,
kụ aakonom bịdi aḍume.
4Mị phọ, mị ạḅem mọ, “Mị maḍighi ni ịkaraph risigh ạna,
kụ ụnma ịmi ighirigiir uukonom ịmi.”
5Ịdi ạbumulogh-ḍien phọ ạmi rụghaaphanaan ịmi ị́nighe:
rọwa ghan mọ mị umugh aḍien ạmi ephe.
6Kụ oye lọ aru ophogh ạmi kapogh ni ịyaar yạar bịn ạkaaph,
kụ ạri ẹpe ologhi phọ odi igey kụ ílho,
kụ romite rakeel kụ ạgba bịn akirinom.
7Oomo phọ ạbuphe ụlogh bọ ịmi ḍien roophola ghan oniin kạḅeni nyoniin ịlo ạmi,
kụ rọotughian ghan ọkaraghi ịpe eeph bọ ịlo ạmi.
8Kụ rọḅem ghan mọ,
“Ẹdi ẹpham bọ nyọdi egi phọ káḍum mun.”
9 #
Mat 26.23; Mạk 14.18; Luk 22.21; Jọn 13.18 Rꞌọkaraghi ọyaghiri phọ ạmi
ọpo mị aḍuom bọ ologhi, rꞌạmi rolian ghan bọ riiḍien,
makitonaan bịn uzuom ịmi.
10Ọmoogh-we, ụnma ịmi ighirigiir, ụtophoron ịmi aphune mị uḍum,
mị uḅulemian bụmulogh-ḍien phọ ạmi.
11Ạbumulogh-ḍien phọ ạmi kụ́kpar upu ịmi:
ịphen phọ miḍeenaan ịmi mọ eḍighinom mọ ạmi mẹḅeeraan ni nyịna.
12Kụ mị phọ, mị raḍighi ghan ịpe eru bọ ịne.
Kụ iḍighi kụ nạ rụlhoghonaan ghan bọ ịmi ḍịghaagh,
ḅịle nạ kuseere ni ịmi sịphe egbodo phọ ạna kꞌagee-pọ.
13 #
Ạsuo 106.48
Iboom Ọmoogh-we Ẹnaan phọ Ịzirel,
Iboom nyọdi kꞌagee-pọ kꞌagee-pọ.
Ẹrol li ịdipho. Ẹrol li ịdipho.
Currently Selected:
Ạsuor 41: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
