Ạsuor 39
39
Iituma oye dị rạmiinom
1Ịdi mị rạḅem ghan ịduon: “Mị kạmaar ạpama loor phọ ạmi rꞌanem mọ ạmi,
esi lọ mị rꞌạbuo ạsipioghom mọ kụ odi,
ọbo mị kaḍighi ghan bọ ịkaraph.”
2Mị ạkurughan, aḅoorian, ạpama loor phọ ạmi,
ịyaar mị ụ́ḅem ghạlamo ịlo ẹnighe ni;
kụ ịminimiin phọ ạmi ẹbugh ghan bịn.
3Mị odimom rꞌokaphian oomiigh,
kụ tọro amem lọ mị ạatughian bịn rịiḅaghami ịmi,
kụ mị ạbile ghan rapuru.
4“Ọmoogh-we, mị kạtol dọl phọ ạḍien kꞌạpur amem?
Mị kamugh pụr aḍio?
Ụḅeni ịmi mem mọ aghuḍum mọ ạmi ạmuen kamuneen bọ.”
5Pogh aani, nạ makpere siḍughul-otu phọ ạmi,
ị́man mun ẹezua ạḍighaagh ḅịle ạsia phọ ạmi kị́yaar mun esi ạna.
Agey ni, tọrobo aḍigeny ạdol dị oye odi, ookpomoghi oomo phọ ạdol phọ ọdi oopho, oopho ni bịn.
6Oye ịdipho oogho,
rakumuan ghan oopho arukumuan bịn,
raakpomoghi ghan ẹelha phọ ọdi kaseerian kụ ọpo kaliom bọ ẹelha phọ ọdi ólhegheri.
7Kụ nyịidipho, Ọmoogh-we, mịna ụḅile rakori ghan eeghe?
Mị aḍuom ni nyịna ologhi.
8Ụphel ịmi ạsighe esi oomo ạsipioman phọ ạmi. Kámeera mị aḍigh ạagia,
ọbo bụo elologhi phọ kụmilogh ghan bọ ịmi.
9Mị makpomoghan, ọnhu mị rạ́tagharan ghan mun.
Nạ kụ uḍighi bọ ịmi ịphen phọ.
10Sịghiogh sigbir phọ ạna loor ạmi.
Mị mạghola ramuneen loor ikuphogh phọ ạna.
11Nạ rạliom oye lọ aḍighi ịkaraph, pọ oroma ni;
ḅịle nạ rapiemi ghan ẹnighe phọ ọdi ịdipho ophiliḅa asuphuugh.
Agey ni, oye phọ oopho ịyaar ri bịn.
12Ọmoogh-we, nạghan ịiḅereghi phọ ạmi.
Ler rụru ạnaghan emoghi phọ ạmi.
Tue ụlhoghonaan ịmi ḍịghaagh mem lọ mị amoghi.
Ịdipho ạbuḅel ạburude phọ ạmi,
mị aḍighi ooruen ạna bịn esi ẹnum amem.
13Ụwile ịmi, mị ụmoogh aani ọḅaal ologhi,
kụ egbi ọteeny amem egheel phọ ạmi,
mem mọ mị kạ́tol mun bọ sịen aḅirini phọ.
Currently Selected:
Ạsuor 39: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
