Ạsuor 22
22
Emoghi amukum ologhi rꞌạḍuor oboomiom
1 #
Mat 27.46; Mạk 15.34 Ẹnaan ạmi, Ẹnaan ạmi, uḍighi ika kụ nạ ughinom bọ ịmi?
Mị ramoghiom ghan nyịna rꞌịkuph. Uḍighi ika kụ nạ ạkel bọ kꞌẹpe?
2Ẹnaan ạmi, mị amoghi rạmagh ghan nyịna ootaany,
kụ nạ ịmi ụ́phagharanaan;
kụ ḍughul kẹn
mị ụ́naani, úḅoorian.
3Nạ Oye Iigbia. Nạ ạtolom oobagaam mọ Ịzirel
dịadi ạgada ạraalha.
4Ạburude ayoor uḍuom nyịna ologhi;
uḍuom nyịna ologhi kụ nạ ạphel bịdi.
5Bịdi umoghi osomoriom nyịna kụ nạ ạphel bịdi;
bịdi uḍuom nyịna ologhi, kụ nạ bịdi óbi.
6Mị ạḍileegbem, mị kóye mun.
Mị maḍigh rẹer aafola esi awe.
7 #
Mat 27.39; Mạk 15.29; Luk 23.35 Oomo ạbulo ụmiin ịmi rụmilogh ghan ịmi,
rụnmoghoghoom yogh ghan ịmi, kooḅoghomi rụmhu ạbidi,
8 #
Mat 27.43
Bịdi ọḅem mọ, “Nạ uḍuom ologhi esi Ọmoogh-we phọ.
Uḍighi ika kụ ọdi nyịna ọ́phel bọ?
Eḍighi mạar dị nạ ạḅeeraan Ọmoogh-we phọ,
uḍighi ika kụ ọdi nyịna ọ́lhoghonaan bọ ḍịghaagh?”
9Nạ kụ ụsighe ịmi amitiom rꞌẹwoor sịphe otu-ọony phọ;
mị aḍuom nyịna ologhi kꞌịpa ekpologhi onhiin phọ ạmi.
10Ughinanaan ịmi nyịna kꞌamem mọ mị odi bọ pạ otu-ọony phọ.
Nạ kụ Ẹnaan ạmi kꞌọkuruḅaka onhiin ạmi.
11Kạ́kel loor ạmi.
Ịiḅaghami mẹebeeph,
kụ oye ọloghonaan ạmi ḍịghaagh ólho.
12Aḍita ạbumulogh-ḍien phọ ạmi muko ịmi okitonom ịdipho ilephiri ạsinam;
ạsinam dị ẹmoogh ịikpo mẹḍua ẹpe ade phọ ạBasan ikoom ịmi.
13Opoghoghomi ịnhu ạbidi ruphoghomiom ghan ịmi,
kụ rọlayaghuan ịdipho ilhom ịnam.
14Ịnyaam ịmi ílho mun,
memoopha ịdipho ạmuum lọ ozu ude;
oomo ịḅarara ạmi megboronu ẹḍuaghu sịphe asimatul phọ ạbidi,
ologhi ạmi makelele.
15Ẹḍogh ạmi mẹgharaghar ịdipho ophugh,
anem ạmi mẹḅaraghan rukpo ạmi.
Nạ mụmuneeny ịmi pạ ọposo aḍuugh phọ.
16Asuogh miko ịmi ekitonom;
aḍita awe ạsipioghom mughoonyom ịmi
bịdi mogimi rạghaagh ạmi rꞌaruwol ạmi okpurion.
17Mị katue ni ạbal oomo ịḅarara phọ ạmi amuneni.
Ạbumulogh-ḍien phọ ạmi ọnmagharan riḍien ạbidi kụ ruphoghom ịmi.
18 #
Mat 27.35; Mạk 15.24; Luk 23.34; Jọn 19.24 Bịdi modianagh rụsuoma phọ ạmi,
ọḅile ọsa ẹlhel oye lọ kạmoogh rukpe phọ ạmi.
19Ọmoogh-we, kạ́kel esi ạmi.
Nạ kụ ịnyaam ạmi; nụun aru ụphel ịmi.
20Pẹl uwaloor phọ ạmi ạsighe esi elhool ẹgham,
ạphel ghuḍum mọ ạmi ạsighe esi ịnyaam asuogh.
21Ụutoghion ịmi ạsighe ọnhu ạnam-dịka phọ,
ạphel ghuḍum ạmi ạsighe ịbaay ạraphaal ilhom ạsinam.
22 #
Hib 2.12
Mị kạgbaam ni ḍien phọ ạna aleenyemi ạḅeni siya phọ ạmi.
Mị kaboom ghan nyịna sịphe ogbo ookpomoghan phọ ạbidi.
23Nyina abutelhedom Ọmoogh-we phọ iboom ghan nyọdi;
nyina ạnmuny ạJekob, ikueni ghan nyọdi;
ịiḅereghi ghan nyọdi, nyina awe Ịzirel.
24Ọdi rạ́ḅitonaan ghan, ḅịle rạ́kel ghan we lọ odi esi ịminimiin;
ạ́aghi risigh ọdi,
tọro amem lọ ọmagh nyọdi ọdi rạnaghanan ghan ni.
25Mị kaboom ghan nyịna sịphe ogbo ookpomoghan phọ, esi ịpe nạ uḍighi bọ ịmi;
ogbo aḍita ạbuphe rọoḅereghi bọ nyịna
kụ ẹdi mị kạkpe ịpe mị aguanaan bọ.
26Arukulom mọ kole ni ẹper.
Bụphe oru bọ esi Ọmoogh-we phọ koboom ghan nyọdi.
Edughom ẹrolonaan bịdi kꞌagee-pọ!
27Oomo areelhe phọ kọotughian ni Ọmoogh-we phọ,
kụ oḅula oḍighom nyọdi,
ḅịle oomo arughunughun phọ kọoḅereghi ghan nyọdi.
28Ọmoogh-we phọ ọdaam
ḅịle ọdi kụ ạda reelhe phọ.
29Oomo abu-iḅo igbogh phọ kokpuḍian ni ọoḅereghi nyọdi;
oomo awe dị kọḅor ri kokpuḍian risigh ọdi.
30Oghiil phọ ọphon kakumu ghan Ọmoogh-we phọ;
awe kọkaaph ghan ni ịlo Ọmoogh-we phọ ọḅeni oghiil phọ ọpo ratu bọ.
31Kọkaaph ni ọḅeni bụlo kọmar,
ịpe Ọmoogh-we phọ ạphel bọ we phọ ọdi.
Currently Selected:
Ạsuor 22: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
