Matiu 8
8
ẠJizos aḍume oye dị ẹzegh ọku ufe eḍighi
(Mạk 1.40-45; Luk 5.12-16)
1ẠJizos mạḍua pạ eegum mọ asoor, kụ aḍita awe ọdaph nyọdi. 2Kụ oniin oye dị ẹzegh ọku ufe eḍighi aru akpuḍian ghisigh ọdi kụ ạḅem mọ, “Oye phọ, lọ nạ kameera ni, pọ uukonom aani ịmi.”
3Kụ ạJizos asele ḍịghaagh ạḅogh nyọdi kụ ạḅem mọ, “Mị ameera ni. Ḍum.” Kụ egina amem bịn ọdi aḍum. 4#Lịv 14.1-32Kụ ạJizos ạḅeni nyọdi mọ, “Nạghan. Kạ́kaaph ạḅeni oye. Nyeene ạghi kꞌoyil ạrikia phọ aḍeenaan loor phọ ạna ạphighironaan ẹkia phọ ẹpe aMozis ạtooghi bọ ịlo oḍeenaan awe mọ nạ mamoon.”
ẠJizos aakonom mọony-otu uwo ẹmhu ạbuo ẹgham
(Luk 7.1-10)
5ẠJizos raḍigh Kạpaniom, bịn uwo ẹmhu ạbuo ẹgham ọlo aRom aru ạteeny nyọdi kụ ạaḅereghian mọ, 6“Oye phọ, ọony-otu ạmi ameel ẹzegh dị ạḍighaagh rꞌaḍuwol emugh kụ rẹeḅaghami ni iboom, ạmina ni ẹpe ologhi otu.”
7Kụ ạJizos ạḅeni nyọdi mọ, “Mị kạki ni aakonom nyọdi.”
8Uwo ẹmhu phọ mọ, “Oye phọ, mị ụ́kpe dị nạ kaḍigh kꞌạmi. Ḅẹm ọnhu bịn. Ọony-otu phọ ạmi kaḍum ni. 9Mị ạmoogh ni bụdi upu ịmi, rꞌạbuo ẹgham dị mị apu. Mị arom nyọon mọ kịa, bịn rạki ghan ni. Mị ạḅeni ọnon mọ tue, bịn ratu ghan ni. Ịlo mị ạḅeni ẹbene ạmi mọ aḍighi, bịn raḍighi ghan ni.”
10Mem dị ạJizos ạnaghan bọ ịphen ọdi ạghaaph bọ, iḍighi ni iikia esi ọdi, kụ ạḅeni bụphe rọdaph bọ nyọdi mọ, “Mị ạkar rịḅeni ghan inyina mọ mị kọ̋miin ghan oye dị umeeraam ịmi omeeraam dị aleeny ịduon, ghạlamo rꞌọnyo Ịzirel li. 11#Luk 13.29Mị rịḅeni inyina mọ ịbadi kọḍua ni inya ạsiagaany aḅirini phọ otu ọtolan Ebraham, rꞌẠizik, rꞌạJekob olian eḍien ẹpe ọmar phọ kꞌẸnaan. 12#Mat 22.13; 25.30; Luk 13.28Kụ bụphe muḍigh bọ ọmar phọ kosumeeny esi ufiri, kụ ọtol sịphe omoghi yogh ọkirigha.” 13Kụ ạJizos ạḅeni oḍiemiom uwo ẹmhu phọ mọ, “Keel, ịpe nạ ameeraam bọ moḍighinaan nyịna.”
Mem mọ ạmuphe phọ bịn ọony-otu phọ ọdi aḍum.
ẠJizos aakonom ịbadi ạbudi úmoonogh aḍume yogh
(Mạk 1.29-34; Luk 4.38-41)
14ẠJizos ạghi aḍigh kꞌaPita kụ ạmiin dị onhiin ạnir aPita ạmina, dị osipheeny odi uloor. 15Kụ ọdi ạḅogh ḍịghaagh ạnir phọ, kụ osipheeny phọ amite, kụ ạnir phọ aḅetenu ạko bịdi igoni.
16Dulhe aḍio phọ ạḍiphe kụ ọsighe ịbadi ạbudi aruru eghola yogh oruomonaan nyọdi, kụ ọdi ạghaaph ọnhu bịn aphoroghom ruru phọ, kụ aakonom oomo ạbudi úmoonogh. 17#Azay 53.4Ịphen phọ imite omuneniom ịpe Azaya oyil phọ Ẹnaan ạghaaph bọ mọ, “Ọdi amuḍion oomo ạreezegh phọ rꞌịminimiin phọ ayira atenian loor ọdi.”
Bụphe rọwa bọ ọdaph ạJizos
(Luk 9.57-62)
18ẠJizos rọmiin ḍita awe phọ okoom bọ nyọdi, kụ ạto ạḅeni bụmatuan phọ ọdi mọ ọḍua ọḅeeny ophun ẹpe ạḍieri phọ ạḍighaagh ọphiiny phọ. 19Kụ oniin ọtughemia iilogh phọ aru kụ ạḅeni nyọdi mọ, “Oye phọ, mị kạdaph aani ghan nyịna tọrobo ekpisi lọ nạ rạki.”
20Kụ ạJizos mọ, “Ạruukpa-ako bịn ẹmoogh ni ropogh, ịnun phọ ẹmoogh ni ruutu, kụ Ọony phọ Oye ọ́moogh esi oḅetenom ẹmhu ọdi.”
21Ọnon oye dị rạdaph ghan nyọdi ạḅeni nyọdi mọ, “Oye phọ, meera mị ukeel uḍi ọde ạmi kụ mị agbi oru ọdaph ạna.”
22ẠJizos ạḅeni nyọdi mọ, “Ụdaph ịmi. Bịle bụphe momuughu bọ oḍiighi iḍim ạbidi.”
ẠJizos ạpoomi oghim
(Mạk 4.35-41; Luk 8.22-25)
23Kụ ạJizos rꞌạbumatuan phọ ọdi ọghi oḍiku ologhi oghuugh phọ. 24Odi rọzoghi, kụ oboom oghim aghim pạ ọphiiny phọ kụ oologh amite aphum mụum ạloghoḍi ologhi oghuugh phọ. Mem mọ ạmuen phọ ạJizos rạnaani. 25Kụ ạbumatuan phọ ọdi ọghi ọteeny nyọdi ọsumeeny kụ ọḅeni mọ, “Ọmoogh-we, ụphel iyoor, yoor rope.”
26Kụ ọdi ạḅeni bịdi mọ, “Sey, nyina awe dị omeeraam ụ́manam. Eeghe kụ iḍighi kụ nyina reepuph bọ ịduon phọ?” Kụ ọdi aḅetenu, kụ ạḅeni oghim mọ rꞌọphiiny phọ mọ ẹpho, kụ ẹpho bịn nam.
27Iḍighi ni iikia esi ạbidi, kụ ọḅem mọ, “Ọphon phọ ọghen ọdo oye dị oghim mọ rꞌọphiiny phọ ẹnaghanan ni nyọdi!”
ẠJizos aakonom ịyal awe dị aruru eghola yogh
(Mạk 5.1-20; Luk 8.26-39)
28ẠJizos ạḅeeny ọphiiny phọ aphun reelhe ạGadara, kụ ịyal awe dị aruru eghola yogh ọḍua ẹpe ẹkaraph eḍum mọ omite ozuan nyọdi. Ụgam ni ịdi oye eten phọ ẹpe óten ghan. 29Kụ bịdi ọlooghi mọ, “Nạ Ọony phọ Ẹnaan. Nạ rụwa ghan iyoor eeghe ịyaar? Nạ uru ọmiine ayoor kụ egbi ọteeny amem mọ ḍụghum?”
30Aḍita arophoropo ịrol li egher rẹḅal ghan ịḅal. 31Kụ aruru phọ ẹeḅereghian Jịzos mọ, “Nạ ruphorogh iyoor, pọ uphorogh iyoor ạlogh loor arophoropo phọ.”
32Kụ ọdi ạḅeni bịdi mọ, “Ịki”. Kụ bịdi romite, kụ ọghi oḍigh loor arophoropo phọ, kụ oomo aḍita arophoropo phọ, eghiil esumughu ọphiiny phọ bịn emuughu ephe.
33Kụ bụphe ropogh ghan bọ bịdi oghiil ogheel ẹpe ẹmha phọ, kụ ọghaaph oomo ịphen phọ rꞌịpe emitenaan bọ bụphe aruru phọ eghola yogh bọ ọḅeni we. 34Kụ oomo phọ ẹmha phọ ọghi ọteeny Jịzos, kụ rọmiin nyọdi, kụ ọoḅereghian nyọdi mọ ạḍua eelhe phọ ạbuno.
Currently Selected:
Matiu 8: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
