Matiu 4
4
Ịdi ọdegh Jịzos ophogh
(Mạk 1.12-13; Luk 4.1-13)
1 #
Hib 2.18; 4.15 Kụ Uwaloor Iigbia phọ ạpham Jịzos ạghimom ẹpe ẹdala phọ, ịlo Eru phọ kẹdegh nyọdi epogh, 2kụ ọdi ạkaagh ẹḍogh inyadi aḍughul-otu, kụ mọony amem kụ ọkoony asiph nyọdi. 3Kụ Eru phọ eru ẹdegh nyọdi kụ ẹḅem mọ, “Nạ kụ Ọony phọ Ẹnaan ni, pọ ḅẹni sighiigh phọ ịphen mọ bịdi eteneghu iiḅoghoḍi ạbred!”
4 #
Dut 8.3
Kụ ạJizos ạphagharanaan nyọdi mọ, “Ọge ni pạ ạḍinya iigbia phọ mọ, ‘Oye kạ́tolom rꞌeḍien bịn, emuton oomo ikpo ọnhu phọ ịpe ẹḍua bọ ọnhu Ẹnaan kụ emite.’”
5Kụ Eru phọ ẹsighe Jịzos esiemi ẹpe ẹmha iigbia phọ ẹsiinye eekuna ạnyu Otu Ịiḅereghi phọ, 6#Ạsuo 91.11, 12kụ ẹḅeni nyọdi mọ, “Mọ ạna kụ Ọony phọ Ẹnaan ni, pọ pel akuruph. Ọge ni pạ ạḍinya iigbia phọ mọ,
“‘Ẹnaan kẹḅeni ni rụukpaany phọ ọdi mọ okoph nyịna,
ọbo nạ kạnmighima ghan bọ owol loor aḍighiigh.’”
7 #
Dut 6.16
ẠJizos ạphagharanaan mọ, “Ọge kẹn ni pạ ạḍinya iigbia phọ mọ, ‘Kạ́degh Ọmoogh-we Ẹnaan phọ ạna apogh!’”
8Kụ Eru phọ ẹḅile ẹsighe nyọdi ẹsiinye ạnyu eboom eegum, kụ eḍeenaan nyọdi oomo areelhe aḅirini phọ, rꞌigbogh phọ ạbidi, 9kụ ẹḅeni nyọdi mọ, “Mị kạngo ni nyịna oomo ạraraar phọ ịphen, lọ nạ ameera akpuḍian uuseeny ịmi.”
10 #
Dut 6.13
Kụ ạJizos mọ, “Setan, ḍụa sịen ghisigh ạmi. Ọge ni pạ ạḍinya iigbia phọ mọ, ‘Nạ kakpuḍian ghan ạngo eghuan Ọmoogh-we Ẹnaan phọ ạna, kụ aaseeny ghan nyọdi bịn!’”
11Kụ Eru phọ ẹwile nyọdi ẹḍua kụ ạruukpaany phọ Ẹnaan eru ẹrolan nyọdi.
ẠJizos amiigh oḍighi phọ ọdi ẹpe Galili
(Mạk 1.14-15; Luk 4.14-15)
12 #
Mat 14.3; Mạk 6.17; Luk 3.19, 20 Kụ ạJizos rọnaghan mọ mosiph Jọn ọlogh ikoli, kụ ạḍua ạghi ẹpe Galili. 13#Jọn 2.12Ọdi ọ́ghi mun Nạzeret, ạḅile agheel Kạpaniom ẹpe ọgbal ọphiiny phọ, eelhe phọ ạZebiulon rꞌạNaftalai, kụ aḍighi ẹmha ọdi. 14Ịphen phọ imite omuneniom ịpe Azaya oyil phọ Ẹnaan ạghaaph bọ mọ,
15 #
Azay 9.1, 2 “Ẹpe eelhe ạZebiulon rꞌạNaftalai,
ẹpe etuman bọ otu-ḅualhe phọ,
ẹḅeenyom Ọphiiny ạJodan,
ẹpe eelhe phọ aGalili aruuruen phọ orugh bọ,
16awe phọ ạbuphe ọrol ghan bọ esi ufiri
kọmiin ḍịnmananmana ạḍiḅaal!
Kụ bụphe aḍuugh memoogh bọ
ạḍiḅaal mesoorom!”
17 #
Mat 3.2
Emiigh kꞌamem mọ ọpo kụ ẹdi ạJizos agbi bọ ọghaaph ghan kụ ạḅem mọ, “Ikiton esi ịkaraph anyina. Ọmar phọ kꞌẸnaan masi sịen ẹda ạḍighaagh.”
ẠJizos ạmagh inya ạbukoniom ạkoni
(Mạk 1.16-20; Luk 5.1-11)
18ẠJizos ratelhe oogbom Ọphiiny aGalili, kụ ạmiin ịyal abumor, Saimon ọpo oghol bọ mọ aPita, rꞌẠndru, dị rozu ghan ọzuguru, ịdi eḍighi bọ bịdi ạbukoniom ạkoni. 19Kụ ọdi ạḅeni bịdi mọ, “Itu ịdaph ịmi. Mị kiḍighi inyina bụo ạkoni awe.” 20Egina amem bịn bịdi ọwile ịzuguru phọ ạbidi ọdaph nyọdi.
21Ọdi atelhe rạki, kụ ạḅile ạmiin ịyal ạbunon abumor, Jems rꞌạJon, dị odi ologhi oghuugh rꞌaZebidi ọde phọ ạbidi rọokoḍi ghan ịzuguru phọ ạbidi. Kụ ọdi ạmagh bịdi. 22Egina amem kụ bịdi ọwile ọde phọ ạbidi pạ ologhi oghuugh phọ ọdaph nyọdi.
ẠJizos ạkaaph ạtughemi we, ạḅile aakonom bụdi úmoonogh aḍume yogh
(Luk 6.17-19)
23 #
Mat 9.35; Mạk 1.39 ẠJizos arelhe yogh ni oomo phọ aGalili, ạtughemi ghan pạ arubughotu phọ ạbidi, kụ ạghaaph ghan ooḅi ọghaaph ọmar phọ kꞌẸnaan, kụ aakonom ghan we oomo awe dị ariiphina rꞌạreezegh kịrokiro eḍighi yogh. 24Kụ ọdu phọ ọdi aleeny ni eleeny oomo eelhe phọ ạSiria, kụ awe ọsighe yogh oomo ạbuphe úmoonogh bọ rꞌạbuphe ịkaraph aruwaloor phọ ẹrol ghan bọ ẹmhu phọ, rꞌạbuphe osiphi ghan bọ isughuna phọ, rꞌạbuphe ạraghaagh rꞌaruwol emuughu bọ, rꞌạbuphe ariiphina kịrokiro eḍighi yogh bọ oruomonaan nyọdi, kụ ọdi aakonom bịdi. 25Kụ aḍita awe ụḍua ni Galili rꞌạDekapolis, rꞌaJeruselem, rꞌaJudia, rꞌẹḅeenyom ạJodan ọdaph nyọdi.
Currently Selected:
Matiu 4: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
