Matiu 10
10
Ḍioph rꞌịyal abutelhedom
(Mạk 3.13-19; Luk 6.12-16)
1ẠJizos ạmagh ḍioph rꞌịyal ạbumatuan phọ ọdi aakpomoghi, kụ ạngo bịdi ịikpo ophoroghom ịkaraph aruwaloor, rꞌookonom ọdo kịrokiro ariiphina rꞌạreezegh. 2Ịphen kụ asiḍien aḍioph rꞌịyal abutelhedom mọ: ọḅel phọ, aSaimon ọpo oghol bọ mọ aPita, rꞌẠndru umor phọ ọdi; aJems rꞌạJon umor phọ ọdi, ạnmuny aZebidi; 3aFilip rꞌaBatolomiu; ạTomos rꞌaMatiu ọbonyiom iisogh phọ; aJems ọony phọ Ạlfios, rꞌạTadios; 4aSaimon ọpo aKenan phọ, rꞌaJudas Ịskariot ọpo aal bọ Jịzos.
ẠJizos ạmagh ḍioph rꞌịyal ạbumatuan phọ aaromogh sidom
(Mạk 6.7-13; Luk 9.1-6)
5Ḍioph rꞌịyal phọ ạbuen kụ ẹdi ạJizos arom bọ, kụ ạto ạḅeni bịdi mọ, “Kẹ́ki eelhe aruuruen, ḅịle kẹn kéḍigh rꞌeniin ẹmha aSameria. 6Ịki ghụn ẹteeny weye Ịzirel, bụphe ọghigh bọ iyool-ịga dị ephe eten. 7Ịki ẹghaaph ghan mọ ọmar phọ kꞌẸnaan mạteeny sịen ẹda ạḍighaagh, 8eekonom bụo ariiphina, eḅerion bụphe momuughu bọ, eḍume bụo ẹzegh ọku ufe, ephorogh ruru. Ẹnaan mịlhoghonaan inyina ḍịghaagh oopho, ịtuugh ịdipho kụ ẹloghonaan bụnon ḍịghaagh. 9Kẹ́pam gol rꞌasilva pạ iḍigh ikpoki phọ anyina kụ erelhiom. 10#1 Kọr 9.14; 1 Tim 5.18Ḅịle kẹn kẹ́pam rukuru ịlom, rꞌọnon ạsuoma, rꞌarokoro, rꞌịkpara. Oye lọ raḍighi oḍighi kọngo ghan ni ịyaar ole.
11“Kụ tọrobo ẹmha lọ nyina ẹghi esi, ipuru nyọpo ạkpe bọ ọpham anyina kụ ẹrol sịphe, ẹteeny mem lọ nyina kẹḍua ẹmha phọ ẹpe. 12Kụ otu lọ nyina eḍigh, ịmagh we phọ kụ ẹḅeni mọ, ‘Ẹepho ịrolonaan inyina!’ 13Eḍighi ịyaar dị awe phọ ịsighe ni inyina, pọ ạḍiseph phọ nyina ẹngo bọ bịdi kẹtolonaan ni bịdi. Mụghumo inyina ị́sighe, ạḍiseph phọ nyina ẹngo bọ bịdi keḅula ni. 14#Iiḍ 13.51Kụ tọrobo otu rꞌẹmha dị inyina ị́sighe, ụ́naghanan kẹn ikpo ọnhu phọ anyina, pọ rẹḍua ịikpa ịisaar aruwol phọ anyina eseere. 15#Mat 11.24; Emi 19.24-28#Luk 10.4-12Mị ạkar rịḅeni ghan inyina mọ ḍio ịiruen phọ kebephenaan ni we ẹmha phọ ẹpe phọ epu we phọ ạSodom rꞌaGomora.”
Ịminimiin dị retu
(Mạk 13.9-13; Luk 12.12-17)
16 #
Luk 10.3
“Ịnaghan, nyina ạbuphe mị arom bọ mọ iḍighi oḍighi phọ ạmi kẹkigh ịdipho iyool-ịga dị edi ogbo ilhom ịnam. Ịsu ologhi ịdipho ẹkaraph-ịyaar, ẹmoogh ẹepho ịdipho ọkurughozo. 17#Mạk 13.9-11; Luk 12.11, 12; 21.12-15Igona loor. Awe kirorori ni inyina osoorom erugh kꞌikumoor awe kụ ịgurogh inyina rubughotu phọ ạbidi. 18Kịsighe ni inyina ọki esi ạbudaam eelhe rꞌaruwo ẹmha ịlo ạsiagba loor ẹmhu phọ ạmi, ịlo ọghaaph ooḅi ọghaaph phọ ọḅeni ạbidi rꞌaruuruen phọ. 19Mem lọ bịdi isoorom inyina erugh, kékaphian ghan oomiigh ịlo nyina kẹgba. Amem mọ ẹteeny, kịḅeni ni inyina ịpe nyina kẹkaaph bọ, 20ịdi eḍighi bọ ikpo ọnhu phọ ịpe nyina kẹgba bọ kị́lo anyina, kẹḍua esi Uwaloor Ọde phọ anyina kụ etu.
21 #
Mạk 13.12; Luk 21.16 “Umor katorori ni umor ạlogh esi aḍuugh; ọde kạtuugh ni ịdipho aḍighi aani mọony ọdi; ạnmuny phọ kọmoogh ni oḅom ẹmhu ọḅogh bụphe ọmar bọ bịdi ọlogh esi aḍuugh. 22#Mat 24.9; Mạk 13.13; Luk 21.17; Mat 24.13; Mạk 13.13Oomo awe kịlogh ni inyina ḍien loor ẹmhu phọ ạmi, kụ oye lọ ạkparam asi eekuna phọ, kạmoogh ni pẹleeny. 23Bịdi ịgbiphoghom inyina eniin ẹmha, pọ ikiil ẹghi ẹnon. Mị ạkar rịḅeni ghan inyina mọ nyina kétue ẹkiighi oomo ạramha phọ Ịzirel eḍighi oḍighi phọ anyina ẹman, tụtu Ọony phọ Oye aru.
24 #
Luk 6.40;
Jọn 13.16; 15.20 “Ạmatuan rápu ghan ọtughemia phọ ọdi. Ọony-otu rápu ghan ọde-otu phọ ọdi. 25#Mat 9.34; 12.24; Mạk 3.22; Luk 11.15Ẹkasian ni dị ạmatuan phọ kameera ọmiinom ịdipho ọtughemia phọ ọdi, ḅịle ọony-otu phọ ịdipho ọde-otu phọ ọdi. Eḍighi ịyaar dị oghol ọde-otu phọ mọ aBielzebul, pọ asiḍien ịlo ạnmuny-otu phọ kebeeph epu sịphe.”
Ọpo ạkpe bọ oghiilaan phọ
(Luk 12.2-7)
26 #
Mạk 4.22; Luk 8.17 “Loor ịduon phọ, kékiilaan we. Ịyaar dị eekpereghian dị kékpegherenu ílho ghan. Ịyaar dị ạaghian dị kéganana ílho ghan. 27Ịlo mị ịḅeni inyina esi ufiri, ịḅile ni ẹghaaph esi ẹphalaḅaal. Ịlo nyina ẹnaghan esi ịbooghian, ịtuugh ni ẹghaaph esi ogbo. 28Kékiilaan bụphe kokiigh bọ ḍizu ạnyu phọ bịn kụ kótue bọ okiighom uwaloor phọ. Ikiilaan ghụn ni Ẹnaan phọ ketue bọ ekiigh ḍizu phọ rꞌuwaloor phọ sịphe ooni ạnian phọ. 29Ịkiom ologhi ịdipho robool ghan bọ ịyal ạsimighor egbem ạkobo phọ. Kụ oniin ọnyo ạbidi kámeel ude, dị Ọde phọ anyina úmeeraam. 30Ẹnaan ẹkar ri elegheri ọnhu ạsilaal dị edi rụmhu anyina. 31Esi ịphen phọ, kẹ́moogh mun oghiilaan. Nyina ẹman mạar epu ịbadi ạsimighor!”
Ịlo oghol aKraist oganana mụghumo ọpharanaan ọdi
(Luk 12.8-9)
32“Oye lọ ughol ịmi aganana esi ogbo awe, mị kạtuugh ni ịdipho aḍighi aani nyọdi ghisigh Ọde phọ ạmi odi bọ kꞌạke phọ. 33#2 Tim 2.12Tọrobo ọlo ụpharanaan ịmi esi ogbo awe, mị kạtuugh ni ịdipho aḍighi aani nyọdi ghisigh Ọde phọ ạmi odi bọ kꞌạke phọ.”
Elhool ẹgham, kẹ́epho
(Luk 12.51-53; 14.26-27)
34“Kégbiom ghan mọ mị ụpham ẹepho kụ arumom bọ sịen aḅirini phọ. Kị́dipho. Mị uru ghụn olher ẹgham. 35#Maik 7.6Mị uru ọgbarion ạburude rꞌạnmuny, burunhiin rꞌạnmanyaan, nmạnyaan ilhom rꞌaburunhiin ilhom. 36Kụ asiya oye phọ kụ kọlogh oye phọ ḍien.
37“Oye lọ ạphomoghian ọde rꞌonhiin ọdi upuemiom ịmi, ọ́kpianaan oḍighi ọlo kꞌạmi, oye lọ ạphomoghian nmụny ọdi upuemiom ịmi, ọ́kpianaan oḍighi ọlo kꞌạmi. 38#Mat 16.24; Mạk 8.34; Luk 9.23Oye lọ útool osuom arusu phọ ọdi kụ ụdapham ịmi, ọ́kpianaan oḍighi ọlo kꞌạmi. 39#Mat 16.25; Mạk 8.35; Luk 9.24; 17.33; Jọn 12.25Oye lọ ạwa ọmoogh aghuḍum ọdi, kapiemi ni, kụ oye lọ aphiemi ghuḍum ọdi loor ẹmhu ạmi, kạmoogh ni.”
Aruunmo
(Mạk 9.41)
40 #
Luk 10.16; Jọn 13.20;
Mạk 9.37; Luk 9.48 “Oye lọ ịlhoghoma inyina, mụlhoghoma aani ịmi, kụ oye lọ ụlhoghoma ịmi, mạlhoghoma aani nyọpo urom bọ ịmi. 41Oye lọ alegheri mọ ọphon oyil kꞌẸnaan kụ ạloghoma, ọdi kapin aani ni bin oyil; kụ oye lọ alegheri mọ ọphon ogey oye kụ ạloghoma, kapin aani ni bin ogey oye. 42Kụ oye lọ alegheri mọ bụen rụdaph ghan ịmi kụ ạngo mụum oniin ọnyo ạbidi, Ẹnaan kẹ́bile dị oye phọ ọpo kẹ́kpiom iiḅi.”
Currently Selected:
Matiu 10: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
