Emiighom 28
28
1Ạizik ạmagh Jẹkob kụ ạseph, kụ ạphur nyọdi rụru kụ ạḅeni mọ, “Úpin ghan ọnyani ọlo aKenan. 2Kịa ghụn ẹpe Mesopotamia kꞌạBetuel ọde onhiin phọ ạna kụ aphin ọnyani ạLeban umor onhiin phọ ạna. 3Ẹnaan Oomo Ịikpo phọ ẹseph nyịna, esu nyịna ọghor ẹmaria, ạmar amuzeḍi ạmoogh ḍita awe. 4#Emi 17.4-8Ẹnaan ẹngo nyịna ḍịseph phọ Ebraham, nạ rꞌọto ạna, ọbo nyina ẹmoogh de phọ ạḍien nạ odi bọ iiruen phọ; ḍịen Ẹnaan ẹngo bọ Ebraham.” 5Ạizik ạghiom Jẹkob ạkele kꞌẹpe Mesopotamia ạteeny Lẹban ọpo aḍighi bọ mọony ạBetuel ọlo ạSiria phọ kụ aru bọ umor ạRibeka onhiin phọ ạJekob rꞌỊso.
Ịso ạḅile aphin ọnon ạnir
6Ịso ạnaghan mọ Ạizik mạseph Jẹkob, ạḅile ạḅem mọ ọdi ạkel ạghi Mesopotamia lọ kapin ạnir ẹpe. Ọdi ạnaghan kẹn mọ, mem mọ Ạizik ạseph bọ nyọdi, ạkpaariom ni nyọdi mọ kúpin ọnyani ọlo aKenan. 7Ọdi ạmiin ni mọ ạJekob ạnaghanan ni ọnhu ọde phọ ọdi rꞌonhiin phọ ọdi, kụ maten ạki Mesopotamia. 8Pọ kụ ẹdi Ịso alegheri mọ ạnmanyaan aKenan ụ́ḅeeraan Ạizik ọde phọ ọdi. 9Sịphe kụ ẹdi ọdi ạghi ạteeny Ịsmael ọony phọ Ebraham, kụ aphin aani Mahalat ọnyani ọdi, ọpo aḍighi bọ umarani phọ aNebayot.
Ạmalha phọ ạJekob pạ Bẹtel
10ẠJekob ạḍua ẹpe Beersheba kụ amiigh onyeene ạHaran. 11Mem dị erumuḍio memeel ighool, ọdi masi eniin esi kụ ạrol sịphe dị meghul. Ọdi ạsighe ḍighiigh dị edi sịphe phọ aḅetenom ẹmhu ọdi rạnaani. 12#Jọn 1.51Ọdi ạmalha kụ ạmiin ọgbada dị ạḍua ude kụ akhara kꞌạke, rꞌạruukpaany Ẹnaan dị rọsinyighu ḅịle rosoroghu ghan pạ ọgbada phọ. 13#Emi 13.14, 15Kụ pạ phọ Ọmoogh-we phọ ạmeera ni ọogaany ạmi kụ ạḅem mọ, “Mị Ọmoogh-we phọ ni, Ẹnaan phọ Ebraham rꞌẠizik. De phọ ạḍien nạ ạmina bọ mị mạngo nyịna rꞌạnmuny ạna. 14#Emi 12.3; 22.18Ạnmuny ạna koḍiza ịdipho ịisaar ade phọ, kụ nạ ạtara asi ẹpe erumuḍio phọ remite ghan bọ, rꞌẹpe remeel ghan bọ, ạtara ạki ephunom ạtara ạki esoorom; kọtuan nyịna kụ ọseph oomo arughunughun sịen aḅirini phọ. 15Kịom ologhi, mị odianaan ni rꞌạna. Mị kaako ni nyịna asiemi tọrobo ekpisi lọ nạ rạki, kụ mị kạḅile ni ạsighe nyịna aḅulemi sịen ade phọ ạḍien. Mị kạ́wile nyịna tụtu mị maḍighi oomo phọ ịphen mị aguanaan bọ nyịna.”
16ẠJekob ạsuma rạlha phọ kụ ạḅem mọ, “Ageny ni, Ọmoogh-we phọ odi ni sịen kụ mị úlegheri.” 17Aruugu rasiph nyọdi, kụ ọdi ạḅem mọ, “Esi phọ ịsien phọ eḍigh ịikia ruugu; esi phọ ẹphen kẹ́non esi, ịsien phọ otu Ẹnaan, ịsien phọ ọnhu-aḍibuo kꞌạke.”
18ẠJekob ạsuma eḅon ạḍiroor, kụ ạsighe ḍighiigh phọ ọdi aḅetenom bọ ẹmhu phọ ạmeremi, aḍighi ẹko ịlo ọotughianam ghan, kụ ạsighe mụnum ạsagharan ẹpe ạnyu phọ. 19Kụ ọdi aghol esi phọ mọ ạBetel abo; ḍịḅel aḍien esi phọ ịsien phọ ughol ghan mọ aLuz. 20ẠJekob aghunyian kụ ạḅem mọ, “Eru mạar dị Ẹnaan ịrolonaan ni ịmi, kụ uuko ịmi erelhe phọ mị rạki bọ, kụ ụngo ịmi eḍien olhe rꞌarukpe omuuna, 21eru mạar dị mị kạḅile ni aḅula kꞌọde phọ ạmi rꞌedughom, pọ Ọmoogh-we phọ kaḍighi ni Ẹnaan ạmi. 22Pọ aḍighiigh ọotughianam mọ ạḍien mị ạmeremi bọ ịdipho ẹko, keḍighi otu Ẹnaan, kụ oomo ạraraar phọ ịpe nạ kụngo bọ ịmi, mị kadi ghan ḍioph abin ạngo nyịna bin.”
Currently Selected:
Emiighom 28: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
