Iiḍighi 11
11
APita ạkaaph ịdi oḍighi phọ rạki ạḅeni bụo ạsiosi phọ aJeruselem
1Abutelhedom mọ rꞌạbuo ạsiosi eelhe aJudia ụnaghan ni mọ aruuruen phọ momeeraam aani ọghaaph phọ Ẹnaan. 2APita aḅula Jeruselem, bịn ạbuo aJu phọ ạbuphe ọkpaariom bọ mọ oḍunogh ghan ruuruen phọ, oḍighi nyọdi ḍighiton mọ, 3“Nạ mạghi iiruen kꞌaruuruen phọ úḍuna yogh bọ, ạḅophoghan rꞌạbidi alian eḍien.” 4Kụ aPita ạmaar ạghaaph ịpe emite bọ ẹkpigh etum ẹkpigh ạḅeni bịdi mọ:
5“Mị ụrol ẹpe Jọpa rạaḅereghi ghan, kụ mị ạmiin ikon dị ọkpooghi kꞌạke inya aruukuna ịyaar dị ẹghigh oboom oopa ukpe ọkpaaghi kꞌạke, ruseeriom ịmi. 6Mị aphogh akananaam kụ ạmiin ịnam inya asike ịsien aḅirini phọ, rꞌilhom ịnam rꞌịpe rekuura bọ, rꞌịnun okuaḍio phọ. 7Kụ mị ạnaghan ẹḍogh dị ịḅeni ịmi mọ, ‘Pita, ḅetenu! Kiigh ạa!’ 8Kụ mị ạphagharanaan mọ, ‘Ọmoogh-we, kị́duon. Ịyaar lọ eḍighi iigbia mꞌạḅaphanya ọnhu ạmi kꞌekulha íḍigh.’ 9Kụ ẹḍogh phọ ẹḅile kẹn ẹḍua kꞌạke ịḅeni ịmi emuneniom ịyal amem mọ, ‘Ẹlo Ẹnaan mẹḅaalami, kákol ghan mun mọ ạḅaphanya!’ 10Kụ emite ịduon phọ ịraar amem, kụ ọkpaaghi oomo phọ ịdi oḅulemi kꞌạke. 11Ọkaraghi amem mọ ạmuen phọ kụ ẹdi ịraar awe, dị orom ẹpe Sizaria mọ oru ụmagh ịmi, ọmeregha pạ ọnhu-aḍibuo otu phọ mị ạrol bọ. 12Kụ Uwaloor Iigbia phọ ụḅeni ịmi mọ, ‘Dạph ạghi, kạ́moogh iikia!’ Kụ odiiny ạbuo asiya phọ ayira ạbuen ụdaph aani ni ịmi ọghi osi kꞌoye phọ. 13Kụ ọdi ụḅeni iyoor ịdi ọdi ạmiin ọokpaany dị ạmeera kꞌọdi kụ ạḅeni mọ, ‘Tom ọghi Jọpa ọmagh Saimon phọ ọpo ọta bọ mọ Pita phọ! 14Ọdi kạkaaph ni ọghaaph ạḅeni nyịna, ịdi nạ rꞌọto ạna kọmoogh pẹleeny.’ 15Kụ mị ramiigh ọghaaph phọ, bịn Uwaloor Iigbia phọ asoorom bịdi, ịdipho usoorom bọ iyira ẹḅel egbiom mọ. 16#Iiḍ 1.5Kụ mị ạatughian ịdipho Ọmoogh-we phọ ạḅem bọ mọ, ‘ẠJon ạsighe mụum kụ awuroghom we, kụ nyiidiphọ, kiwurom inyina Uwaloor Iigbia phọ.’ 17Ịdipho Ẹnaan mẹngo aani bọ ọdo inmo phọ ịpe ọdi unmoom bọ iyira, mem mọ yira omeeraam bọ Jịzos Kraist Ọmoogh-we phọ, mịna ạnhian dị kakikima bọ Ẹnaan?”
18Bịdi ọnaghan bọ ịphen phọ, ịyaar ụ́ḅem, uboom ni Ẹnaan kụ ọḅem mọ, “Ịduon phọ pọ Ẹnaan memeera mọ aruuruen phọ okiton esi ịkaraph phọ ạbidi ọmoogh aani ghuḍum.”
Ịbadi awe omeeraam aani ẹpe Ạntiok
19 #
Iiḍ 8.1-4
Bụphe ọtuan bọ ịpe ọgbiphoghom bọ Stivin ọwalala, usumughu ni ogheleghu ịikela arikpisi ẹpe Finisia, rꞌạSaipros, rꞌẠntiok, kụ ọghaaph ghan ọghaaph phọ Ẹnaan ọḅeni bụo aJu phọ bịninin. 20Kụ mem dị buniin ạbuo ạSaipros rꞌaSairini oru bọ osi Ạntiok, ụghaaph ni ooḅi ọghaaph ịlo ạJizos Ọmoogh-we phọ ọḅeni aani ruuruen phọ. 21Kụ ịikpo Ọmoogh-we phọ ịrolan ni rꞌạbidi, kụ ịbadi omeeraam kụ okiton ọdaph Ọmoogh-we phọ.
22Kụ ịpe emitenaan bọ ruuruen phọ, ọdu aḍigh rụru ạbuo ạsiosi phọ aJeruselem, kụ bịdi ọlogh Bạnabas mọ ạghi Ạntiok. 23Mem dị ọdi asi bọ ạmiin ḍịseph Ẹnaan phọ, ọdi abo ni kụ ạlom oomo phọ ạbidi mọ ọsighe iloghi phọ ạbidi ọkpasaghiom Ọmoogh-we phọ. 24ẠBanabas phọ ogey oye ni, dị Uwaloor Iigbia phọ rꞌomeeraam emuza loor, kụ upumom ni ịbadi aweye ḍita ạbuphe momeeraam bọ Ọmoogh-we phọ.
25Kụ ạBanabas ạḍua ạghi Tạsos ọwa ạSol. 26Rọmiin bọ, kụ ạpham nyọdi aḅulolom Ạntiok. Kụ ịyal phọ ạbidi ọḅophoghan ọrolan rꞌạbuo ạsiosi phọ ḍiniin ạlha, ọtughemi ịminighan awe. Ạntiok kụ ẹḅel ekpisi phọ oghol bọ bụmatuan phọ mọ aKristen.
27Riiḍio phọ ịpe, buniin ariil ịmiin ụḍua ni Jeruselem ọghi Ạntiok. 28#Iiḍ 21.10Kụ oniin ọnyo ạbidi dị oghol mọ Ạgabos aḅetenu ạmeera ạsighe ịikpo Uwaloor Iigbia phọ kụ ạmiinom ịmiin mọ ilhom ịgbakuro kẹtol li oomo aḅirini phọ. (Ịphen phọ imite ni ọrugh ạKlodios.) 29Kụ ạbumatuan phọ oguanaan mọ tọrobo ọnyo ạbuno kasogh ghan ni ọnhu ikpoki lọ ạḍighaagh ọdi ẹman ọkiomonaan bụo ạsiosi phọ aJudia. 30Bịdi ụtuugh ni ịphen phọ oḍighi, kụ ạBanabas rꞌạSol ọsighe ọghiomonaan ikumoor awe ạsiosi phọ.
Currently Selected:
Iiḍighi 11: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
