Mə́líkusu 9

1Yə́susu a ná bəə́bú lɛná tɔ́na a sɛ́á: «Ɔ taká, bɛndɔ ɔbá bá lɛ́á háha, bɔ́mɔtɛ́ bá sa ndə́wə́ə́ ɛŋaná usinə nəníə́ Huɛlɛ́ a ndɔ manɛna na iŋgínə́ yikimə.»

Yə́susu a nɔ́ bíhə́ŋətə

(Mat 17.1-13; Lúk 9.8-36)

2Ɔ əlimə yɛ́ mɔɔsɛ́ málɛ́ndálɔ, Yə́susu á ná Bíə́lə, Yákɔbɔ na Yɔhánɛsɛ ákánáná ɔ ɔmáá ɔmbáŋá hata na bɛndɔ. A ná bíhə́ŋə́tə ɔ uwəbú busíə́. 3Bɛ́áyɛ́á bɛlɛŋa bɛ́ ná botólíə́ ɔ ɔnɔma mɔŋɛ́ŋa, bɛ́ mɔanyɛmaka, bɛ́ ka báá naŋákátɔ́ ɔ nindínə́ ɔnɛ́á, ata mɔndɔ ɔmɔtɛ́ ɔ misí a sa bá ɔwá a bɛɛ́ta nəŋə́síə́ nɔ́yɛ́. 4Ɔ yɛ́táyɛ́ ikúílí, báyɛ́á bɔkɔ́nɛna bálálɔ́ bá ná Ɛlíásɛ na Mósisi ɛ́ná ɔ ɛŋgamɔ́ na wɛɛ́ya. 5Mba, Bíə́lə a ná Yə́susu lɛ́na a sɛ́á: «Á Isə́lúkú, yɛ́ lɛa muɛsɛ ɔwá tɔ túə́nə́ háha. Ɛkasɛ tɔ́ bɛanda falábáká bɛ́lálɔ́: Yáwɔ ɛ́mɔtɛ́, yɛ́ Mósisi ɛ́mɔtɛ́, yɛ́ Ɛlíásɛ ɛ́mɔtɛ́.» 6A sa bá a ndɔ manya yatɛ́ a ndɔ laa bɔkɔasɛ́á, bɔ́táyɛ́ bɔkɔa bɔ́ ka bá bɔ́ ndɔ bəə́bu kúlúmiə. 7Ɛlɔndɔ́ yɛ́ ná bəə́bu huə, ɔ ɛlɔndɔ́ nuúmə́, bá ná nióni ɔ́kɔ́ nɛ́ ndɔ laa nɛ́ sɛ́á: «Wɔ́ɔwɔ a lɛa wamɛ́á Mɔná wuhikiə. Nɔ́ wɛɛ́ya ɔ́kɔ́kɛ́nɛ́na.» 8Ɔ umisíúmə́, bɔkɔ́nɛna bá ná bɛ́híámɛ́la, bá lɛ sinə́ tɔ́na ata mɔndɔ, ɔ́maná bəə́bu na Yə́susu. 9Ikúílí bá ná báá ɔ ɔlɔɔkɔ ɔ ɔmáá, Yə́susu a ná bəə́bu manɛ́na a sɛ́á: «Nɔ lɛ mɔndɔ lɛ́na yatɛ́ ɔyɛ́á nɔ na siəkínə ɔkafámáká ɔ ikúílí ɔyɛ́á Mɔná wa mɔndɔ a ŋɔ hɔŋɔa ɔ ətíə́ yɛ bəwə́nú.» 10Bá ná bɔ́táyɛ́ bɔkɔa tə́tə́níə́, bá bɛ́bátaka bəə́bu na bəə́bu bá sɛ́á: «Yatɛ́ yɛ́ lɛ́á ɔhɔŋɔa ɔ ətíə́ yɛ bəwə́nú əə́?»

11Bá ná wɛɛ́ya batá bá sɛ́á: «Ɛlɔ́áyɛ́ yatɛ́ bətilə imbə́ndə́ bá ndɔ əbú laa ɔwá, Ɛlíásɛ a ŋɔ taŋa ndasá ubusíə́ na Mɛ́sia əə́?» 12Mba, Yə́susu a sɛ́á: «Yɛ́ báka ɔwá, Ɛlíásɛ a ŋɔ taŋa ɔ ndasá ɔ bɛkɔa bikimə utikəlinə. Mba, ɛlɔ́áyɛ́ yatɛ́ Mətilə má ndɔ laa tɔ́na ɔwá, Mɔná wa mɔndɔ a ŋɔ məsə́kə siəkinə mɔŋɛ́ŋa, bɛndɔ bá ŋɔ wɛɛ́ya yaŋɔnakɛna əə́? 13Mba ɔwámɛ, mɛ ndɔ bənú lɛna mɛ sɛ́á: Ɛlíásɛ a ka ndasá, bɛndɔ bá ná wɛɛ́ya bɛ́kɛ́ákɛ́na ɛ́sɛ́á bá ná əbú hikə́kíə́. Nɔ́yɛ́, Mətilə má ndɔ laa ɔ ɔwayɛ́ ɛsalɛ.»

Iniŋəsiə yɛ́ mɔná wa Umbúínyi mɔbɛ́á

(Mat 17.14-21; Lúk 9.37-43)

14Ɛnaka bá ndáfámá hoóyi na bɔ́mɔtɛ́ bɔkɔ́nɛna, bá ná ilúkunə yɛŋɛ́ŋa yámá yɛ́ nɔ́ bəə́bu nɛŋɛlɛna, na bamanyumbə́ndə́ ɔbá bá ná tə́ŋə́kə́níə́ na bəə́bu. 15Ɛnaka bɛndɔ bá Yə́susu yámá, bəkimə bá ná ə́lə́mə́nə́ mɔŋɛ́ŋa, bá ná káhɔ́álákɛ́na ɔ ɔwayɛ́ ɔ ndəbíhólíə́. 16Yə́susu a ná báyɛ́á bɔkɔ́nɛna batá a sɛ́á: «Yatɛ́ nɔ́ ná bá nɔ ndɔ tə́ŋə́niə na bəə́bu əə́?» 17Ɔ ətíə́ yɛ ilúkunə, wɔmɔtɛ́ a ná wɛɛ́ya bíhíə́níníə́ a sɛ́á: «Á Isə́lúkú, mɛ ná aŋɔ́á wamɛ́á mɔná húlə́nínə ɔwá umbúínyi mɔbɛ́á wɔ́ ndɔ tuŋulə, wɔ́ wɛɛ́ya halɛ́na, wɔ́ wɛɛ́ya híə́nəsiə imúkú. 18Ata hə́níə́ umbúínyi mɔbɛ́á wɔ́ ná wɛɛ́ya halɛ́na, wɔ́ wɛɛ́ya omboko ɔ misí, ihúísí yɛ́ mɔná fámáka ɔ munuə, a bɛka kótóko, a sata. Mɛ ná báwɔ́á bɔkɔ́nɛna batá ɔwá bá muítə bulə́, mba, bá sa óso.» 19Yə́susu a sɛ́á: «Á bɛndɔ bá ɛŋaná ilumininə! Mɛ ŋɔ bámɛnɛna na bənú tɔ́na ɔkafámáká ɔ uyə́níə́ ikúílí əə́? Ɔkafámáká ɔ uyə́níə́ ikúílí mɛ́ ŋɔ bənú ísə́biniə əə́? Nɔ́ mɛaŋɔ́á wɛɛ́ya húlə́nínə́ háha.» 20Bá ná yɛ́ɛ́yɛ́ ikúílí wɛɛ́ya hulənə. Ɛnaka umbúínyi wɔ́ Yə́susu yámá, wɔ́ ná mɔná fúkə́lə́ na iŋgínə́, a ná kɔ́á ɔ misí, a bíbúŋúləkə, ihúísí yɛ́ ná úndúə́ ɔ munuə. 21Yə́susu a ná isə́ batá a sɛ́á: «Á ánɛ́á niɔfɛ́nɛ a ná lúmə́ ɔ nɔ́yɛ́ ɔkɛa əə́?» Isə́ a sɛ́á: «Ɔ botolokiə ɔ ɔwayɛ́ bɔtɛ́tɛ́á bukimə. 22Ɔ yɛ́mɔtɛ́ ikúílí, umbúínyi mɔbɛ́á wɔ́ wɛɛ́ya omboko ɔ hiwə ata ɔ mənífə́ ɔkɛaka ɔwá wɔ́ wɛɛ́ya ɔnɔ. Mba, wə́ə́ bəsú mahana, ɔ ndá bəsú ɔ́lɔ́ ábá ɔ ndɔ ósóko!» 23Yə́susu a sɛ́á: «Ɔ ndɔ laa ɔwá ábá ɔ ndɔ ósóko. Ata bɔkɔa bɔ́mɔtɛ́ bɔ́ sa ósó ɔ wɛ́ɛ́yɛ́ ɔyáyɛ́na ɔwá a ndɔ lumininə.» 24Isə́ yɛ mɔná a ná yə́mə́ a sɛ́á: «Ɔ́lɔ́ mɛaŋɔ́á, mɛ lɛ ndɔ óso ulumininə.» 25Yə́susu a ná yámá ɔwá, ilúkunə yɛ́ ndɔ bɛ́nya, a ná umbúínyi mɔbɛ́á bámálɛ́na a sɛ́á: «Ɔwáwɔ á umbúínyi wɔ́ ɛndɔ́kɔ́ na imúkú, mɛ ndɔ aŋɔ́á manɛna, fáma á wɔ́ɔwɔ mɔná mɛɛ́lɔ, ɔ lɛ ndahíáná tɔ́na ɔ umə́.» 26Umbúínyi mɔbɛ́á wɔ́ ná fámá na miyə́mə́yə́mə́, wɔ́ ná mɔná fúkə́lə́ mɔŋɛ́ŋa, a ná híáná ɛ́sɛ́á iwə́wə́ ɔ nindínə́ ɔnɛ́á, bɛndɔ bəəŋí bá sɛ́á: «A lɛa wə́ə́tɔ.» 27Mba, Yə́susu a ná wɛɛ́ya itíə́ ɔ mɔkátá, a ná wɛɛ́ya huəlíníə́, mɔná a ná tɛnɛma. 28Ɛnaka Yə́susu á híánáka ɔ ɔmbɛ́la, báyɛ́á bɔkɔ́nɛna bá ná wɛɛ́ya batá bá sɛ́á: «Ɛlɔ́áyɛ́ yatɛ́ tɔ́ sa óso ɔ wútə́yí umbúínyi mɔbɛ́á ubulə əə́?» 29Yə́susu a sɛ́á: «Ɔ́maná na mabɛ́kálɛ́na bá óso ɔ yɛ́táyɛ́ ɛnya yɛ umbúínyi ufə́miə.»

Yə́susu a ndɔ manyɔ bɛndɔ yayɛ́á nyɛmbɛ́ lɛna

(Mat 17.22-23; Lúk 9.43-45)

30Bá ná hɔalɛ́na ɔmɔ́tɔ́yɛ́, bá ná tɔ́mbáká ɔ Kalɛ́lɛa. Yə́susu a sa bá a ndɔ hikiə ɔwá bɛndɔ bá manyá ɔ ɛbɔ́ka ɔyɛ́á a lɛ́á. 31Ɔ taká, a ka bá a ndɔ báyɛ́á bɔkɔ́nɛna úkúniə, a sɛ́á: «Bá ŋɔ Mɔná wa mɔndɔ sɛmɛna ɔ bɛndɔ, bá ŋɔ wɛɛ́ya ɔ́nɔ́kɔ, mba əlimə yɛ mɔɔsɛ́ málálɔ́, a ŋɔ hɔŋɔa.» 32Bá sa binífúnínə́ bɛ́ bɛ́táyɛ́ bɛtambá ɔ́kɔ; bá kɔ́lɔ́maka ɔ ɔwayɛ́ ɔbata.

Ɛ́yánɛ́ a lɛ́á mɔŋɛ́ŋa ɔ ɔyáyɛ́na

(Mat 18.1-5; Lúk 9.46-48)

33Bá ná ákáná ɔ Kabɛlɛnawúmu. Bəə́bu ɔmɔ́tɔ́yɛ́ ɔ miímə nuúmə́, Yə́susu a ná bəə́bu batá a sɛ́á: «Yatɛ́ nɔ ná bá nɔ ndɔ tə́ŋə́niə ɔ ɛnɔ́mɛ əə́?» 34Bá ná nə́yə́níə́ bɔkɔasɛ́á, ɔ ɛnɔ́mɛ bá ná tə́ŋə́kə́níə́ ɔkɛaka ɔwá, bá manyá ɛ́yánɛ́ a lɛ́á mɔŋɛ́ŋa ɔ uwəbú ətíə́. 35Nɔ́yɛ́, Yə́susu a ná túə́nə ɔ misí, a ná niómo na báfandɛ́ ɛ́lɛ́ná, a sɛ́á: «Ábá mɔndɔ a ndɔ siə ɔbáá wəbusíə́, á bámɛ́nɛ́ná wənitifə́, mɔnyɛna tɔ́na wa bəkimə.» 36A ná mɔná mɔtɛ́tɛ́á tínímíə́ ɔ uwəbú ətíə́, a ná wɛɛ́ya túáná ɔ makátá, a ná bəə́bu lɛ́na a sɛ́á: 37«Wɛ́ɛ́yɛ́ ɔwá a ŋɔ mɔná káha ɛ́sɛ́á wɔ́ɔwɔ ɔ ɔwámɛ niínyə, ɔ ɔwámɛ bɛ́múɛ́tɛ́ a ná kaha; wɛ́ɛ́yɛ́ ɔwá a ŋɔ mɛaŋɔ́á káha muɛsɛ, tátá ɔ ɔwámɛ bíbúə́ a ná káhá, mba, ɔ wɛ́ɛ́yɛ́ ɔwá a ná mɛaŋɔ́á lɔma.»

Wɛ́ɛ́yɛ́ ɔwá a sá bəsú ɛ́ŋɛ́mana, a lɛa na bəsú

(Lúk 9.49-50)

38Yɔhánɛsɛ a ná Yə́susu lɛ́na a sɛ́á: «Á Isə́lúkú, tɔ ná mɔndɔ siəkínə a ndɔ imbúínyi mɛbɛ́á bulə ɔ ɔwáwɔ niínyə; tɔ ná wɛɛ́ya sáŋɔnɛ́ná ɔ nɔ́yɛ́ ɔkɛa bɔkɔasɛ́á, a lɛ báá wa yə́súə́ ilúkunə.» 39Mba Yə́susu a sɛ́á: «Nɔ lɛ wɛɛ́ya kotíə́ ɔ nɔ́yɛ́ ɔkɛa bɔkɔasɛ́á, mɔndɔ a sa ósó ɔ yələ́mənə yɛ́ bɔkɔa ɔkɛa ɔ ɔwámɛ niínyə, a manyɔ híána ɔ ɔwámɛ ɔbánya. 40Yɛ́ báka ɔwá mɔndɔ ɔwá a sá bəsú ɛ́ŋɛ́mana, a lɛa na bəsú. 41Wɛ́ɛ́yɛ́ tɔ́na ɔwá a ŋɔ bənú mənífə́ nyə́siə ɔ ɔwámɛ niínyə bɔkɔasɛ́á, nɔ lɛa bɛndɔ bá ilúkunə yɛ́ Kilísitusu, ɔ taká, mɛ ndɔ bənú lɛna, a ŋɔ wə́yíə́ mɔsábɔ́náná kusənə.»

Bɛkɔa ɔbɛ́á bɛ́ ndɔ mɔndɔ kuəsiə

(Mat 18.6-11; Lúk 17.1-2)

42Wɛ́ɛ́yɛ́ ɔwá a ŋɔ ɔmɔtɛ́ ɔ mɔtɛ́tɛ́á wa bááyɛ́ ɔbá bá ndɔ lumininə kuəsiə, yɛ́ lɛa muɛsɛ ɔwá, bá wɛɛ́ya muɔkɔ mɔŋɛ́ŋa ɔ́lɔ́kɔ́kɛ́na ɔ ɛmɛna, bá wɛɛ́ya əmbinə ɔ nɔmɔ́ nuúmə́. 43Ɛ́bá mɔkátá wɔ́ ndɔ aŋɔ́á ákánana ɔ bɔbɛ́á, húmbə́ muítə; Yɛ́ lɛa muɛsɛ ɔwá ɔ fínə́ ɔ buɔmɔ́ bɔ́ ikúílíə́kimə mɔkátá úmotí yáyɛ́ná ɔwá, ɔ fínə́ na makátá məkimə ɔ hɛfɛa hɛ́ hiwə ɔhɛ́á hɛ́ sa ndə́nimə. 44[Ɔ ɛbɔ́ka ɔyɛ́á mɛsíɔ́ŋɛ́ yɛ́ ndɔ mɛɛ́lɔ nɛ́á, yɛ́ lɛ wə́ə́, abáka hiwə hɛ́ lɛ nimə]. 45Ɛ́bá mɔkɔlɔ́ wɔ́ ndɔ aŋɔ́á ákánana ɔ bɔbɛ́á, sɔ́mbá muítə; yɛ́ lɛa muɛsɛ ɔwá ɔ fínə́ yaáta ɔ buɔmɔ́ bɔ́ ikúílíə́kimə, yáyɛ́ná ɔwá ɔ fínə́ na makɔlɔ́ məkimə ɔ hiwə ɔhɛ́á hɛ́ sa ndə́nimə. 46[Ɔ ɛbɔ́ka ɔyɛ́á mɛsíɔ́ŋɛ́ yɛ́ ndɔ mɛɛ́lɔ nɛ́á yɛ́ lɛ wə́ə́, abáka hiwə hɛ́ lɛ nimə].#9.46 Yɛ́ɛyɛ ɛsalɛ yɛ́ lɛ sulú bá ɔ mɔ́mɔtɛ́ mətilə. 47Hɔ́ánánátɔ́ tɔ́na, ɛ́bá nɛ́áwɔ́á niísə nɛ́ ndɔ aŋɔ́á ákánana ɔ bɔbɛ́á, sáná nɛɛ́ta. Yɛ́ lɛa muɛsɛ ɔwá ɔ fínə́ ɔ nɛmanɛna nɛ́ nɔɔ́mɛná na niísə nɛ́mɔtɛ́, yáyɛ́na ɔwá, ɔ fínə́ ɔ hiwə hɛ́ ikúílíə́kimə na məə́sə áfandɛ́, 48ɔ ɛbɔ́ka ɔyɛ́á mɔsíɔ́ŋɛ́ wɔ́ lɛ ndɔ wə́ə́ tɔ́na hiwə hɛ́ lɛ ndɔ nímə. 49Hiwə hɛ́ ŋɔ mɔndɔ mukimə tábɔ́naka ɛ́sɛ́á ibusə́ yɛ́ ndɔ bɛ́labɔ́nɛ́á tábɔ́na. 50Ibusə́ yɛ́ lɛa bɔɔ́la buɛsɛ, ɛ́bá ibusə́ yɛ́ ná sɔnɔ́á, yɛ́ lɛ siomo, nəníə́ bá ŋɔ óso ɔ yɛɛ́ta usiomosiə əə́? Nɔ́ báá na məsiomo má ibusə́, nɔ́ niŋə́kə́ ɔ bumbə́nú bənú na bənú.

Currently Selected:

Mə́líkusu 9: tvu

Highlight

Copy