Mə́líkusu 11

Nifínínə́ nɛ́ Yə́susu ɔ Yəlúsalɛma

(Mat 21.1-11; Lúk 19.28-40; Yɔh 12.12-19)

1Ɔ ikúílí ɔyɛ́á bá ná bɛ́nyálɛ́la na Yəlúsalɛma, hoóyi na mɔnɔŋɔ má Bɛtɛfasɛ́ na Bɛtánia, bá ná káfámá ɔ ɔmáá wɔ́ Olífia. Yə́susu a ná báyɛ́á bɔkɔ́nɛna báfandɛ́ búə́kíníə́, 2a sɛ́á: «Nɔ́ ákáná ɔ bɔnɔŋɔ ɔbɔ́á bɔ́ lɛ́á ɔ uwə́nú busíə́. Ɔ ikúílí ɔyɛ́á nɔ ŋɔ kafámá ɔmɔ́tɔ́yɛ́, nɔ ŋɔ ɛnjakásɛ nibə wayɛ́á mɔná tiŋə́tɔ. Ata mɔndɔ a lɛ boóko ɔbála. Nɔ́ tuŋúnə, nɔ́ mɛaŋɔ́á húlə́nínə. 3Ábá mɔndɔ a ná bənú bátá a sɛ́á: “Ɛlɔ́áyɛ́ yatɛ́ nɔ ndɔ yɛɛ́ta tuŋuninə əə́?” Nɔ́ wɛɛ́ya bíhíə́níníə́ nɔ sɛ́á: “Isə́lúkú a ndɔ yɛɛ́ta siə.” Ɔ yɛ́táyɛ́ ikúílí ɛkasɛ a niása ɔwá nɔ yɛɛ́ta húlə́nə́ háha.» 4Bɔkɔ́nɛna báfandɛ́ bá ná ákáná, bá ná ɛnjakásɛ nibə́ tiŋə́tɔ́ ɔ niə́lətíə́ ɔ busíə́ bɔ́ hɛkɔ́kɛ hɛ́ miímə ɔyɛ́á yɛ́ ná bá ɔ ɛnɔ́mɛ, bá ná yɛɛ́ta tuŋúnə. 5Bɔ́mɔtɛ́ bɛndɔ ɔbá bá ná báá ɔmɔ́tɔ́yɛ́ bá sɛ́á: «Haa! Yatɛ́ nɔ ndɔ hɔ́yɛ́ kɛ́á əə́? Ɛlɔ́áyɛ́ yatɛ́ nɔ ndɔ yɛ́táyɛ́ ɛnjakásɛ tuŋuninə əə́?» 6Bɔkɔ́nɛna bá ná bəə́bu bíhíə́níníə́ ɛ́sɛ́á Yə́susu a ná laa; nɔ́yɛ́, bá ná bəə́bú niása ɔkɛaka ɔwá bá ɛnjakásɛ ákánána 7Bá ná yɛɛ́ta tilə́nə á Yə́susu busíə́. Bá ná mə́búə́ molókiə táláká ɔ əlimə yɛ mɛnyama. Yə́susu a ná talɛma. 8Bɛndɔ bəəŋí bá ná mə́búə́ molókiə bɛ́lɛ́ákɛ́ná ɔ ɛnɔ́mɛ; bɔ́mɔtɛ́ bá mɛlɛ́áfɛ sɔ́mbáka yɛ́ malɛ́á ɔ bɛtɔbɔtɔ́bɔ́, bá miítə əmbəkinə ɔ ɛnɔ́mɛ. 9Bɛndɔ ɔbá bá ná báá ɔ busíə́ na Yə́susu na bááyɛ́ ɔbá bá ná báá bá ndɔ wɛɛ́ya ɔŋgɔkɔ bá moóni bə́ləkiə bá sɛ́á: «Tuúmə na Huɛlɛ́! Huɛlɛ́ á wɔ́ɔwɔ saná ɔwá a ná ndásɛ́ná ɔ niínyə nɛ́ Isə́lúkú! 10Huɛlɛ́ á nɛmanɛna saná ɔnɛ́á nɛ́ lɛ́á ɔ ɔsákɔna. Nɛmanɛna nɛ́ yəsúə́ isə́kínə́ á Ndə́witi! Tuúmə na Huɛlɛ́ ɔ nɔɔ́mɛná!» 11Nɔ́yɛ́ Yə́susu a ná fínə́ ɔ Yəlúsalɛma, a ná káfámá ɔ Tɛ́mbɛlɛ nuúmə́. Ɛnaka a bítíbə́kíníə́ bɛsalɛ bikimə, a ná ákáná ɔ Bɛtánia, na niómo na báfandɛ́ nɛ́ bɔkɔ́nɛna, ɛkɔlákɔ́lá yɛ́ ka báá kɔ́átɔ.

12Ɔ ɔyáyáka, ikúílí yɛ́ wə́búə́ ɔhɔalakɛna ɔ Bɛtánia, mɛtaná yɛ́ ná botólíə́ á Yə́susu ɔnɔɛna. 13A ná bɔlɛ́á ɛ́ná hatá ɔbɔ́á bá ndɔ ɛ́lɛnɛna bufíkiə, bɔ́ lɛa na tɔánjɛ. Nɔ́yɛ́ a ná bɛ́nyálɛ́la ɔ indínə́ ɔwá a siəlínə́ ábá a óso ɔ tɔtámátámá ɔbɔ́ŋɔ ɔmɔ́tɔ́yɛ́. Mba, a ná nibə́ ɔbánɔ́ há tɔánjɛ bɔkɔasɛ́á, yɛ́ sa bá ikúílí yɛ́ tɔtámátámá tɔ́ fíkiə.

14Yə́susu a ná yɛ́ɛ́yɛ́ ikúílí bufíkiə lɛ́na a sɛ́á: «Ɔ botolokiə isíŋáka ata mɔndɔ a sa ndá híə́wúə́ hɛtámátámá nɛ́á tɔ́na.» Báyɛ́á bɔkɔ́nɛna tɔ́na bá ná nɔ́yɛ́ ɔ́kɔ́kɛ́na.

Yə́susu a nɔ́ bəlúə́ kúbə́kə ɔ Tɛ́mbɛlɛ

(Mat 21.12-17; Lúk 19.45-48; Yɔh 2.13-16)

15Əlimə yɛ nɔ́yɛ́, bá ná káfámá ɔ Yəlúsalɛma. Yə́susu a ná fínə́ ɔ Tɛ́mbɛlɛ, a ná botólíə́ ɔ bəlúə́ na bɔɔ́ndɔ bɛɛ́la ɔ ukúbə ɔbá bá ná báá ɔmɔ́tɔ́yɛ́. A bɛtáka bɛ́ bəsə́njíə́ bɛcácɔ́ nyɛkakɛna na bɛɔkɔ́ bɛ́ bəlúə́ tubúbə́. 16A sa niasa ɔwá mɔndɔ a bɔɔ́la bátá ɔ bíásakɛna ɔ Tɛ́mbɛlɛ. 17Nɔ́yɛ́ a ná botólíə́ ɔ uwəbú uwukúniə, a sɛ́á: «Yɛ́ lɛa tilə́kə́tɔ́ ɔ Mətilə má Huɛlɛ́ yɛ́ sɛ́á: “Yamɛ́á miímə yɛ́ ŋɔ báá miímə yɛ mabɛ́kálɛ́na ɛlɔ́áyɛ́ bɛndɔ bá mɔnɔŋɔ məkimə.” Mba uwənú, nɔ ná mɛɛ́ta híə́nə́síə́ nibítímínə́ nɛ́ boóbi.» 18Ɛnaka bisə́lúkú bɛ́ bətitiəmahánɛna na bamanyumbə́ndə́ bá ɔ́kɔ́kɛ́ná nɔ́yɛ́, bá ná botólíə́ ɔ hɛkɔma usiə hɛ́ ɔwayɛ́ ɔwɔ́nɔ; ɔ taká bá ka bá bá ndɔ wɛɛ́ya kɔ́lɔ́maka bɔkɔasɛ́á, ilúkunə yikimə yɛ́ bɛndɔ yɛ́ ka báá ə́lə́mə́nə́tɔ́ mɔŋɛ́ŋa na nɛ́áyɛ́á nindínə́ nɛ́ uwukúniə. 19Bɛkɔlakɔ́lá bɛ́ ndáfámá, Yə́susu na báyɛ́á bɔkɔ́nɛna bá ná hɔalɛ́na ɔ Yəlúsalɛma.

Yə́susu a ndɔ hɛ́na ɛlɔ́áyɛ́ bɔlɛ́á ɔbɔ́á a ná tíkísíə́

(Mat 21.20-22)

20Ɔyáyáka, bá tɔ́mbáka ɔ ɛnɔ́mɛ, bɔkɔ́nɛna bá ná bufíkiə ɛ́ná ɔbɔ́á Yə́susu a ná tíkísíə́ naánɛkɔla bɔ́ nɔ́ kálásaka na mɛkaŋá ánɛ! 21Bíə́lə a ná bɔ́táyɛ́ bɔkɔa bɔ́ naánɛkɔla bɛ́kɔ́lɔ́mɔ́na ɛlɔ́áyɛ́ bufíkiə, a ná Yə́susu lɛ́na a sɛ́á: «Á Isə́lúkú, siəlínə! Bufíkiə ɔbɔ́á ɔ ná tíkísíə́ naánɛkɔla bɔ́ ná kálásáká bukimə.» 22Yə́susu a sɛ́á: «Ɔ taká, mɛ ndɔ bənú nɔ́yɛ́ lɛna ɔwá; Nɔ́ níə́núə́ nɛkɔmba tálɛ́na á Huɛlɛ́! 23Ábá mɔndɔ a ná wúuwu ɔmáá lɛná a sɛ́á: “Hɔalɛ́ná háha, káka bíómbóko ɔ nɔmɔ́”, ábá a lɛ báá na mɛnyɔ́ ɔ ɔwayɛ́ mɔlɛ́má, á lumínínə ɔwá yatɛ́ a ndɔ laa yɛ́ ŋɔ bɛ́kɛaka, nɔ́yɛ́ yɛ́ ŋɔ bɛ́kɛaka. 24Ɔ́ ɛlɔ́áyɛ́ nɔ́yɛ́ mɛ ndɔ bə́nú lɛna ɔwá; bɛkɔa bikimə ɔbɛ́á nɔ ŋɔ Huɛlɛ́ bata na mabɛ́kálɛ́na, nɔ́ fɛká ɔ mɔlɛ́má nuúmə́ ɔwá nɔ ŋɔ bɛɛ́ta kusənə; a ŋɔ bənú bɛɛ́ta índiə. 25Ikúílí ɔyɛ́á ɔ ndɔ bɛ́kálɛ́na, ábá ɔ báka itə́níə́tɔ́ na mukúlə́kulə, niasɛ́ná wɛɛ́ya ɔkɛaka ɔwá, yənúə́ Isə́ ɔwá a lɛ́á ɔ nɔɔ́mɛná a aŋɔ́á máwɔ́á mabɛ́á niasɛ́na. [26Mba, ábá nɔ lɛ ndɔ niasɛnana, yənúə́ Isə́ ɔwá a lɛ́á ɔ nɔɔ́mɛná wɛɛ́ya tɔ́na, a sa ndá bənú mə́núə́ mabɛ́á niasɛ́na].»

Hə́níə́ iŋgínə́ yɛ Yə́susu yɛ́ ndɔ húlínə əə́?

(Mat 21.23-27; Lúk 20.1-8)

27Bá ná tilə́ ɔ Yəlúsalɛma. Yə́susu a ka bá a ndɔ kɛnda ɔ Tɛ́mbɛlɛ, bisə́lúkú bɛ́ bətitiəmahánɛna, bamanyumbə́ndə́ na bɛnatákɛ bɛ́ Bɛyútɛnɛ bá ná ndásá ɔwáyɛ́ busíə́, 28bá sɛ́á: «Na yanɛ́ iŋgínə́ ɔ ndɔ bɛ́ɛ́yɛ́ bɛkɔa kɛna əə́? Ɛ́yánɛ́ a ná aŋɔ́á yɛ́táyɛ́ iŋgínə́ índíə́ yɛ́ bɛ́táyɛ́ bɛkɔa ɔ ɔkɛa əə́?» 29Yə́susu a sɛ́á: «Ɛkasɛ mɛ bənú ɛmbataka batá ɛ́mɔtɛ́; ábá nɔ ná mɛaŋɔ́á bɛ́kámɔ́sɔ́na, mɛ ndɔ bənú laakɛna ɛ́yánɛ́ a ndɔ mɛaŋɔ́á iŋgínə́ índiə yɛ bɛkɔa ɔkɛa. 30Nɛsɔa nɛ́ Yɔhánɛsɛ nɛ́ ndɔ húlínə na Huɛlɛ́ alɛ́ɛ́, na bɛndɔ əə́?» 31Bá ná botólíə́ ɔ ubílúlə bəə́bu na bəə́bu bá sɛ́á: «Ábá tɔ ná bɛ́kámɔ́sɔ́ná tɔ sɛ́á: “Nɛ́ ndɔ húlínə na Huɛlɛ́”, ɛkasɛ a bə́súə́ bátá a sɛ́á: “Ɛlɔ́áyɛ́ yatɛ́ nɔ sa wɛɛ́ya níə́núə́ nɛkɔmba tálɛ́na əə́?” 32Mba ábá tɔ ná wɛɛ́ya bɛ́kámɔ́sɔ́ná tɔ sɛ́á: “Bɛndɔ bá ná wɛɛ́ya lɔma”». Bá ka bá bá ndɔ ilúkunə kɔ́lɔ́ma, ɔ taká, bɛndɔ bəkimə bá ka bá bá ndɔ fɛka ɔwá, Yɔhánɛsɛ a lɛa taká taká mɔhɛ́nátɔtányɛ́. 33Nɔ́yɛ́, bá sɛ́á: «Tɔ lɛ ndɔ manya.» Yə́susu a sɛ́á: «Óo! Ata mɛaŋɔ́á mɛ sɔ́ ŋɔ bənú wɛ́ɛ́yɛ́ lɛna ɔwá a ndɔ mɛaŋɔ́á iŋgínə́ índiə yɛ bɛ́ɛbɛ bɛkɔa.»

Currently Selected:

Mə́líkusu 11: tvu

Highlight

Copy