Matíó 22

Ɔŋana wɔ́ ɛŋganda yɛ nɛbɛ́lɛna

(Lúk 14.15-24)

1Yə́susu a ná manyɔ́ ɔ uwəbú ɔŋana tɛ́na a sɛ́á: 2«Nɔ́ síə́kínə, Nɛmanɛna nɛ́ Nɔɔ́mɛná nɛ́ lɛa hɔ́ákátɔ́ ɔ munəni ɔmɔtɛ́ ɔwá a ná ɛŋganda yɛ́ nɛbɛ́lɛna nɛ́ wayɛ́á mɔná tikə.» 3Nɔ́yɛ́, a ná báyɛ́á bɔnyɛna lɔ́má ɔwá a ká bɛndɔ ɛ́lɛ́ákɛ́na, bá sákɔ́na ɔ nɛbɛ́lɛna. Mba, bááyɛ́ bɛndɔ bá sa hikiə ɔndasa. 4A ná bɔnyɛna bənə́bənə́ lɔma, a ná bəə́bu lɛ́na a sɛ́á: «Bɛɛ́la bikimə bɛ́ báka tábɔ́nákátɔ, Mɛ ná bɛ́ámɛ́á bɛfɔŋɔ na bɛ́ámɛ́á bilúkə́ bɛ́ tɔtɔ́kɔ́tɔ́ ɔ́nɔkɔ, bá sákɔ́na ɔ ɛŋganda.» 5Mba, bááyɛ́ bɛndɔ bá sa nɛ́táyɛ́ nɛɛ́lɛna ɛta ɛ́sɛ́á bɔkɔa, bá ná ákáká ɔbánɔ́ ɔ uwəbú masɔ́ma. Wɔ́ɔwɔ ɔ ɔwayɛ́ ɛtɔbɔtɔ́bɔ́, wə́ə́ní ɔ ɔwayɛ́ nyuŋgə́. 6Bɔ́mɔtɛ́ bɔnyɛna bá ná bəə́bu súbə́kə́ muɛsɛ, bá ná bəə́bu ɔnɔkɔ, 7hilóbi hɛ́ ná mɔ́táyɛ́ munəni ɛta, a ná báyɛ́á bɔkɔfɔnɛa lɔ́má ɔwá bá bááyɛ́ bəcəŋə ɔnɔkɔ, bá yəbúə́ bətínə́ títə́kíə́. 8Nɔ́yɛ́, a ná bɔ́mɔtɛ́ báyɛ́á bɔnyɛna lɛ́na a sɛ́á: «Bɛ́labɔ́nɛ́á bɛ́ nɛbɛ́lɛna bɛ́ lɛa tábɔ́nákátɔ, mba, bɛndɔ ɔbá mɛ ná ɛ́lɛ́ákɛ́na, bá lɛ báá hɔ́ánánátɔ́ ɔwá bá bɛɛ́ta nɛaka. 9Nɔ́ ákána ɔ manáka, ɔ tusə́mbə́nə́níə́ tɔ́ bɛnɔ́mɛ, nɔ́ bɛndɔ ɛ́lɛ́ákɛ́ná bəkimə ɔbá nɔ ndɔ nibəkə umə́, bá sákɔ́na ɔ ɛŋganda.» 10Bɔnyɛna bá ná ákáká ɔ mɛnɔ́mɛ, bá ná bɛndɔ bəkimə ɛ́lɛ́ákɛ́na ɔbá bá ná bɔŋɔ; babɛ́á na baasɛ. Yanda yɛ́ ɛŋganda yɛ́ ná úndúə́ mbíɔ́kɛ. 11Munəni a ná fínə́ ɔ yanda ɔ bɛndɔ usinə ɔbá a ná ɛlɛ́ákɛ́na, a ná wɔmɔtɛ́ mɔndɔ ɛ́ná ɛŋaná bɔlɛŋa bɔ́ nɛbɛ́lɛna. 12A ná wɛɛ́ya lɛ́na a sɛ́á: «Á ɔŋɔ́ámɛ, nəníə́ ɔ ná fínə́ háha ɛŋaná bɔlɛŋa bɔ́ nɛ́bɛ́lɛna əə́? » Mba, wɔ́ɔwɔ a ná wɛɛ́ya indímə́ sana. 13Nɔ́yɛ́, munəni a ná bɔnyɛna lɛ́na a sɛ́á: «Nɔ wɛɛ́ya makátá ɔ́lɔ́kɔ́kɔ́ na makɔlɔ́, nɔ́ wɛɛ́ya fə́míə́ ɔ níə́lətíə́ ɔ ibínə́binə nuúmə́ ɔhá malɛlá má lɛ́á na bɛka ɔ ukóto.» 14Yə́susu a ná tifə́níə́ a sɛ́á: «Ɛ́ɛ! Bəəŋí bá lɛa ɛ́lɛ́ákɛ́nátɔ, mba, tɛ́tɛ́á bá lɛ́á tɛ́fátɔ.»

Ɛtásɛ ɔyɛ́á bá ná hɔ́ánána ɔsábɔ́nɛna a káyɛsa

(Mə́l 12.13-17; Lúk 20.20-26)

15Əlimə yɛ́ nɔ́yɛ́, Bɛfalísia bá ná Yə́susu hɛtɔkɔ hɔ́kɛ́na ɛlɔ́áyɛ́ hɛkɔma usiə ɔkɛaka ɔwá, bá wɛɛ́ya nənə́síə́ na yɛ́mɔtɛ́ ɛmbataka. 16Bá ná bɔ́mɔtɛ́ bə́búə́ bɔkɔ́nɛna lɔ́má na bɔ́mɔtɛ́ bɛndɔ bá Əlóto ɔkɛaka ɔwá, bá ká Yə́susu lɛná bá sɛ́á: «Á Muínə́niə, tɔ ndɔ manya ɔwá ɔ ndɔ hɔ́ɔ́ á taká, ɔ ndɔ bɛndɔ úkúniə nəníə́ bá ná hɔ́ánána uniŋə ɛ́sɛ́á Huɛlɛ́ a ndɔ siə. Ɔ lɛ ndɔ bɛndɔ kɔ́lɔ́ma, ata nifəŋə ɔháá. 17Lɛná bəsú tə́lə́ŋu, ɛ́sɛ́á wə́wúə́ usinə: Wə́súə́ umbə́ndə́ wɔ́ ndɔ bəsú iŋgínə́ índiə ɔ ɛtásɛ ɔsábɔ́na á káyɛsa alɛ́ɛ́, tɔ sá hɔ́ánana ɔ ɔsábɔ́na əə́?» 18Mba, Yə́susu a yəbúə́ ɛŋgɛ́lɛ́ manyaka, a ná bəə́bu bíhíə́níníə́ a sɛ́á: «Uwənú á bɛndɔ bá ɛbɛ́nyɔ́nyɔlɔ, ɛlɔ́áyɛ́ yatɛ́ nɔ ndɔ mɛaŋɔ́á kɔsɔnɛna əə́? 19Nɔ́ mɛaŋɔ́á ɛcácɔ́ ínə́níə́ ɔyɛ́á nɔ ndɔ sábɔ́nɛna ɔ ɛtásɛ.» Bá ná wɛɛ́ya yɛɛ́ta ínə́níə́. 20A ná bəə́bu batá a sɛ́á: «Híə́ní hibílíndíníə́ híihi, na bɔ́ɔbɔ á busíə́ əə́?» 21Bá sɛ́á: «Hɛ́ káyɛsa.» A ná kɔndá a sɛ́á: «Nɔ́ índíə́ á káyɛsa yatɛ́ ɔyɛ́á yɛ́ lɛ́á yɛ́ káyɛsa, á Huɛlɛ́ yatɛ́ ɔyɛ́á yɛ́ lɛ́á yɛ́ Huɛlɛ́!» 22Ɛnaka bá bɛ́ɛ́yɛ́ bɛtambá ɔ́kɔ́, bá ná ə́lə́mə́nə́ mɔŋɛ́ŋa. Bá ná wɛɛ́ya tíkə́ ɔmɔ́tɔ́yɛ́, bá ná ákáka.

Ɛmbataka ɛlɔ́áyɛ́ nɛhɔŋɔa nɛ́ bəwə́nú

(Mə́l 12.18-27; Lúk 20.27-40)

23Ɔ bɔ́táyɛ́ buɔsɛ́, bɛ́mɔtɛ́ Bɛsalutúsia bá ná ndáfámá á Yə́susu busíə́. Bá ná wɛɛ́ya batá bá sɛ́á: 24«Á Muínə́niə, Mósisi a ka laa a sɛ́á: “Ábá mɛlɛ́mɛndɔ́ a ná muəndú bɛ́lɛ́na, mbá a ná wə́ə́ ɛŋaná mɔná, munínyə́ a ŋɔ tíkə́ ilíkə́ bísúə́linə, a wɛɛ́ya baná bíə́nəkinə.” 25Bənínyə́ ɔ balɛ́mɛndɔ́ bá ka bá bálɛ́ndɔ́lɔ́mɔnɔ háha ɔ uwəsú, wəbusíə́ a ná muəndú bɛ́lɛ́na, a ná wəə. Ɛ́sɛ́á a sa mɔná tíkə, munínyə́ a ná ilíkə́ bísúə́línə. 26Yɛ́ ná manyɔ́ bɛ́kɛaka nɔ́yɛ́ na munínyə́ ɔwá a ná úndúsíníə́ báfandɛ́ na wa niɔŋgɔnɔ ɛ́lálɔ́ ɔkafámáká ɔ niɔŋgɔnɔ nɛ́ bənínyə́ bálɛ́ndɔ́lɔ́mɔnɔ. 27Əlimə yɛ nɔ́yɛ́, muəndú a ná ayɛ́ wə́ə́ tɔ́ná. 28Ɔ́ ɛlɔ́áyɛ́ nɔ́yɛ́ tɔ ndɔ aŋɔ́á bata ɔwá, ɔ ikúílí yɛ́ nɛhɔŋɔa, ɛ́sɛ́á báyɛ́ bəkimə bálɛ́ndɔ́lɔ́mɔnɔ bá ná wɛɛ́ya bɛ́lɛ́na, uwə́níə́ munínyə́ a ŋɔ báá ibə́ yɛ́ mɔ́táyɛ́ muəndú əə́?» 29Yə́susu a sɛ́á: «Nɔ lɛa nanákátɔ, nɔ lɛ ndɔ Mətilə ɔ́kɔ muɛsɛ ata injiŋə yɛ Huɛlɛ́. 30Ɔ taká, ɔ ikúílí yɛ́ nɛhɔŋɔa, balɛ́mɛndɔ́ bá sa ndábɛ́lɛ́na, ata bəəndú bá sá ndálɔnɔ, bá ŋɔ niŋəkə ɛ́sɛ́á bɛáŋgɛlɛ ɔ nɔɔ́mɛná.» 31Mba, ɛlɔ́áyɛ́ bɔkɔa bɔ́ nɛhɔŋɔa nɛ́ bəwə́nú, nɔ́ sa fana ɛ́sɛ́á Huɛlɛ́ a ná bənú hɔ́kɛ́na a sɛ́á: 32«Mɛaŋɔ́á mɛ lɛ́á Huɛlɛ́ yɛ́ Ábɛlaháma, Huɛlɛ́ yɛ Ísakɛ, Huɛlɛ́ yɛ Yákɔbɔ əə́?» Nɔ́ manyá ɔwá Huɛlɛ́ a lɛa Huɛlɛ́ yɛ bɔɔmɔ́, tátá Huɛlɛ́ yɛ bəwə́nú. 33Nɛ́áyɛ́á nindínə́ nɛ́ uwukúniə nɛ́ ná ilúkunə yɛ́ bɛndɔ ə́lə́mə́nə́síə́ mɔŋɛ́ŋa ɔyɛ́á yɛ́ ná bá ɔmɔ́tɔ́yɛ́.

Umbə́ndə́ ɔwá wɔ́ ná imbə́ndə́ mikimə yáyɛ́ná

(Mə́l 12.28-34; Lúk 10.25-28)

34Ɛnaka Bɛfalísia bá ɔ́kɔ́ ɔwá Yə́susu a ná Bɛsalutúsia yóyíə́, bá ná kɔtálána. 35Wɔmɔtɛ́ mukúniə imbə́ndə́ uwəbú ətíə́ a ná Yə́susu kɔsɔ́ná na ɛmbataka, a sɛ́á: 36«Á Muinə́niə, ɔ́ uwə́níə́ umbə́ndə́ wɔ́ ná imbə́ndə́ mikimə yáyɛ́ná əə́?» 37A ná wɛɛ́ya bɛ́kámɔ́sɔ́na a sɛ́á: «Hikə́kíə́ Isə́lúkú ɔ yawɔ́á Huɛlɛ́ na wə́wúə́ mɔlɛ́má mukimə, na yáwɔ́á ɛmanya yikimə, na híə́wúə́ hɛtányɛ́ hikimə.» 38Muítə wɔ́ lɛ́á umbə́ndə́ wúbúsíə́, mɔŋɛ́ŋa tɔ́na ɔwá wɔ́ ná imbə́ndə́ mikimə yáyɛ́ná. 39Wɔ́ ɔwɔŋgɔkɔnɔ ɔwá wɔ́ ndɔ hɔ́ána na wúbúsíə́ ɔwá wɔ́ ndɔ laa wɔ́ sɛ́á: «Hikə́kíə́ wawɔ́á mukúlə́kulə ɛ́sɛ́á aŋɔ́á bɛ́múɛ́tɛ́.» 40Yítə́yí imbə́ndə́ ífəndí yɛ́ lɛ́á ɔ hiəfulə hɛ́ Mósisi na hɛ́ Bɔhɛ́nátɔtányɛ́.

Mɛ́sia na Ndə́witi

(Mə́l 12.35-37; Lúk 20.41-44)

41Ɛ́sɛ́á Bɛfalísia bɛ́ ná bá kɔtákánátɔ́, Yə́susu a ná bə́əbu batá a sɛ́á: 42«Nəníə́ nɔ ndɔ fɛka ɛlɔ́áyɛ́ Mɛ́sia əə́? Ɛlɔ́áyɛ́ ənú, Mɛ́sia a lɛa wa híə́níə́ hikúlə əə́?» Bá ná wɛɛ́ya bɛ́kámɔ́sɔ́ná bá sɛ́á: «A lɛa wa hikúlə hɛ́ Ndə́witi.» 43A sɛ́á: «Nəníə́ nɔ ndɔ ənú sinə, ikúílí ɔyɛ́á Umbúínyi Mɔnaŋanaŋa wɔ́ ná ndə́witi fínə́ ɔ mɛɛ́lɔ, a ka wɛɛ́ya ɛ́lɛnɛna “Isə́lúkú” na ɔlaa ɔwá;

44Huɛlɛ́ á Mɔmanɛna a ka yamɛ́á Isə́lúkú lɛna ɔwá,

sɔ́nɔ ɔ ndə́túə́nə ɔ ɔwámɛ mɔkátá wɔ́ bɛnɔ́mɛ,

mɛ ŋɔ kɛaka ɔwá, báwɔ́á bokóyíkoyi bá bámɛ́nɛ́ná nɛbɛ́lɛ́nɛ́ná nɛ́ máwɔ́á makɔlɔ́.»

45«Ábá Ndə́witi a ndɔ wɛɛ́ya ɛ́lɛnɛna yáyɛ́á isə́lúkú, nəníə́ ɛ́kɛ a báá tɔ́na ibíə́nəkənə yɛ́ Ndə́witi əə́?» 46Nɔ́yɛ́, ata mɔndɔ tɔ́na a sa ɛtambá bɔ́ŋɔ yɛ́ ɔwáyɛ́ ɔbɛ́kámɔsɔna, ɔ botolokiə ɔ bɔ́táyɛ́ buɔsɛ́, ata mɔndɔ a sa bɛ́ɔ́kɔ́lɛna tɔ́na ɔ ɔwayɛ́ ɛmbataka ɔbata.

Currently Selected:

Matíó 22: tvu

Highlight

Copy