Matíó 11

Bɔkɔ́nɛna bá Yɔhánɛsɛ Mɔsɔabɛndɔ

(Mat 10.15; Lúk 10.12-15)

1Ɛnaka Yə́susu a hɔ́á ɔ nɛ́áyɛ́á niómo nɛ́ bɔkɔ́nɛna na báfandɛ́ ɔhɛ́na, a ná ákáná ɔ uwukúniə na ɔ Imbə́nú Yɛɛsɛ ɔ uhúlə́ nɔŋɔna ɔ uwəbú bətínə́.

2Yɔhánɛsɛ ɔ ɔwayɛ́ ɛbɔka nuúmə́, a ka ɔ́kɔ́kɛna yatɛ́ ɔyɛ́á Kilísitusu a ná báá a ndɔ kɛa. A ná bɔ́mɔtɛ́ báyɛ́á bɔkɔ́nɛna lɔ́má ɔwá bá ká Yə́susu batá bá sɛ́á: 3«Baánɛ, ɔ lɛa wɛ́ɛ́yɛ́ ɔwá a ná hɔ́ánána ɔ ndasá ataná, tɔ́ tátáká muinə́muinə́ əə́?» 4Yə́susu a ná bəə́bu bíhíə́níníə́ sɛ́á: «Nɔ́ ká Yɔhánɛsɛ lɛná yatɛ́ ɔyɛ́á nɔ ná ɔ́kɔ́kɛ́na, yatɛ́ tɔ́na ɔyɛ́á nɔ ná siəkínə: 5Bəndímə́ndímə bá ndɔ sinənə, bɛkátá bá ndɔ kɛnda, bə́mínú bá lɛa bínə́ŋə́síə́tɔ, bɛ́ndɔ́kɔ́ bá ndɔ ɔ́kɔ́nɔ, bəwə́nú bá ndɔ hɔŋɔa, Imbə́nú Yɛɛsɛ yɛ́ lɛa nɔŋɔ́nákɛ́nátɔ́ ɔ tɔtɔyɔ́nɔ́. 6Nɛhɔnɔ na wɛ́ɛ́yɛ́ ɔwá a ŋɔ nɛ́áyɛ́á nɛkɔmba tálɛ́na ɔ ɔwámɛ.»

7Ɛnaka bɔkɔ́nɛna bá Yɔhánɛsɛ bá bísúə́lə́, Yə́susu a ná botólíə́ ɔ ilúkunə ɔhɛ́na ɛlɔ́áyɛ́ Yɔhánɛsɛ a sɛ́á: «Yatɛ́ nɔ́ ná kə́síə́kínə ɔ makɔ́tákɛ, nɛtɔŋɔ ɔnɛ́á umbúínyi wɔ́ ndɔ fúkə əə́? Bóo! 8Mba, yatɛ́ nɔ́ ná siəkínə nə́ə, mɔndɔ lɛŋábákátɔ́ na bɛlɛŋa bɛɛsɛ əə́? Bááyɛ́ ɔbá bá ndɔ lɛŋaba na bɛlɛŋa bɛɛsɛ bá lɛa tuənə́kínə́tɔ́ ɔ məə́bə má bənəni. 9Mɔhɛ́nátɔtányɛ́ nɔ́ ná siəkínə əə́? Ɛ́ɛ! Mɛ ndɔ bənú nɔyɛ́ lɛna muɛsɛ, a lɛa yáyɛ́ná mɔhɛ́nátɔtányɛ́ tɔ́na. 10Yɔhánɛsɛ a lɛa wɛ́ɛ́yɛ́ ɔwá Mətilə má ndɔ fə́mə́ləniə má sɛ́á: “Ɛkasɛ mɛ taŋá ɔ wamɛ́á mɔsɔ́másɔma ɔlɔ́ma ɔkɛaka ɔwá a aŋɔ́á ɛnɔ́mɛ kunínə.” 11Ɔ taká, mɛ ndɔ bənú nɔ́yɛ́ lɛna ɔwá, mɔndɔ mɔŋɛ́ŋa a lɛ boóko yáyɛ́ná Yɔhánɛsɛ Mɔsɔabɛndɔ, mba, wɛ́ɛ́yɛ́ ɔwá a lɛ́á mɔtɛ́tɛ́á ɔ ɔyáyɛ́na ɔ nɛmanɛna nɛ́ Huɛlɛ́, a lɛa mɔŋɛ́ŋa yáyɛ́ná wɛɛ́ya. 12Ɔ botolokiə ɔ tunó tɔ́ Yɔhánɛsɛ Mɔsɔabɛndɔ ɔ ndafámáká isíŋáka, bɛndɔ bá ndɔ Nɛmanɛna nɛ́ Huɛlɛ́ həŋəbiə, bahaŋaba bá ndɔ nɛɛ́ta ɔ́lɔ. 13Bɔhɛ́nátɔtányɛ́ bəkimə na Umbə́ndə́ wɔ́ Mósisi bá ka Imbə́nú Yɛɛsɛ nɔŋɔnaka ɔ ndafámáká ɔ ikúílí yɛ́ Yɔhánɛsɛ. 14Ábá nɔ ndɔ siə ɔwɔ́kɔ muɛsɛ, wɛɛ́ya a lɛ́á Ɛlíásɛ ɔwá a ná hɔ́ánána ɔ ndahiana. 15Wɛ́ɛ́yɛ́ ɔwá a lɛ́á na məlúə́, á ɔ́kɔ́kɛ́na! 16Ɔwanɛ́ ɛ́kɛ mɛ bɛndɔ bá yɛ́ɛyɛ ɛhanyɛ kətiə əə́? Bá lɛa hɔ́ákátɔ́ ɔ baná ɔbá bá lɛ́á tuənə́kínə́tɔ́ ɔ manáka, ɔbá bá ndɔ bɔsɔ́kɔ́ ɛ́lɛna bá sɛ́á: 17“Tɔ ka bənú ilolí lɔ́ŋɔ́kɛna, nɔ sa ɛ́ndɛ́na ubínə! Tɔ ka bɔŋana bɔ́ mənyənə ósóko, nɔ sa bɛ́lɔ́mɔ́nɔ!”»

18«Ɔ taká, Yɔhánɛsɛ a ka ndasá, a lɛ nɛ́á mbá ata ɔnyɛ́na, bá sɛ́á: “A lɛa na umbúínyi mɔbɛ́á.” 19Mɔná wa mɔndɔ á tíkə́ ndafámá, a nɛ́áka a nyákɛna, bá sɛ́á: “Ə́yə́ə́ mɔndɔ wɔ́ɔwɔ ɔwá a ndɔ bɛ́kɔ́lɔmɔna há ɔnɛ́á na məluku ɔ ɔnyɛ́na, a lɛa ɛŋgɔ́áyɛ́ yɛ bakɔtabɛtásɛ na bɔ́mɔtɛ́ bɛndɔ babɛ́á!” Mba, ɛmanya yɛ Huɛlɛ́ yɛ́ ndɔ bífə́mə́ləniə ɔ tɔ́mbákɛna bɛ́áyɛ́á biolí.»

Nɛbɛ́lɔ́mɔ́nɔ ɛlɔ́áyɛ́ bətínə́ yɛ Kalɛ́lɛa

(Lúk 10.12-15)

20Nɔyɛ́, Yə́susu a ná botólíə́ ɔ bətínə́ ɔkɛ́kɛ́lɛna ɔhá a ná bɛ́áyɛ́á bisə́mə́tə́ bɛŋɛ́ŋa kɛ́áká bɔkɔasɛ́á, bə́búə́ bɛndɔ bá sa mɔlɛ́má kɔ́ŋɔ́na. A sɛ́á: 21«Ɛmɔ́kɛ́ na aŋɔ́á á Kolasínə! Ɛmɔ́kɛ́ na aŋɔ́á á Bɛtɛsayíta! Bɔkɔasɛ́á ata bisə́mə́tə́ ɔbɛ́á bɛ́ ná bɛ́kɛ́áka ɔ uwənú, bɛ́ nɔ́yɛ́ bɛ́kɛaka ɔ Tíli na Sítono, há buɔnɔ́ bá ná fíə́kínə ɔ mələbə, bá mɔlɔ́ bɛ́tɛ́laka ɛlɔ́áyɛ́ mɔlɛ́má ɔkɔ́ŋɔ́na. 22Ɔ taká, mɛ ndɔ bənú nɔ́yɛ́ lɛna, ɔ buɔsɛ́ bɔ́ mikə́lə́kí, bá ŋɔ Tíli na Sítono sɔ́kɔ́tɛa tɛ́tɛ́á yáyɛ́ná bənú. 23Ɔwáwɔ tɔ́na á Kafalanahúmu, ɔ ndɔ fɛka ɔwá ɔ ŋɔ bálaka ɔ ɔmbáŋá əə́? Bá ŋɔ aŋɔ́á lolosoliə há ɔ misí yɛ bəwə́nú! Bɔkɔasɛ́á ata bisə́mə́tə́ ɔbɛ́á bɛ́ ná aŋɔ́á bɛ́kɛ́áka bɛ́ bɛ́kɛaka ɔ Sótomo, há yɛ́ nabáka ɔ ndafámáká niɔfɛ́nɛ. 24Ɔ taká, mɛ ndɔ bənú nɔ́yɛ́ lɛna, bá ŋɔ bɔnɔŋɔ bɔ́ Sótomo sɔ́kɔ́tɛa tɛ́tɛ́á yáyɛ́na aŋɔ́á.»

Isə́ na mɔná

(Lúk 10.21-22)

25Ɔ yɛ́ɛ́yɛ́ ikúílí, Yə́susu a ná ɛtambá ɛ́tá a sɛ́á: «Á Isə́, á Isə́lúkú yɛ nɔɔ́mɛná na misí, mɛ ndɔ aŋɔ́á nyama, yatɛ́ ɔyɛ́á ɔ ná bítə́ ɔ bəmənyí na bɛ́ŋgɛ́lɛ́, ɔ ka nɔ́yɛ́ fə́mə́ləniə ɔ batɛ́tɛ́á. 26Ɛ́ɛ! Á Ába, na wə́wúə́ mɔlɛ́má muɛsɛ ɔ́ ná nɔ́yɛ́ híkə́kíə́. 27Isə́ a ka mɛaŋɔ́á bɛkɔa bikimə híə́niniə. Ata mɔndɔ a lɛ ndɔ Mɔná manya yɛ́ sá bá á Isə́, ata mɔndɔ tɔ́na a lɛ ndɔ Isə́ manya, yɛ́ sá bá á Mɔná na wɛ́ɛ́yɛ́ tɔ́na ɔwá Mɔná a ndɔ hikiə ubífə́mə́ləniə.»

28«Bənú bəkimə ɔbá bɔlɔmɔ́ bɔ́ ndɔ nyɔlɔ, nɔ́ sɔ́nɔ́ na mɛaŋɔ́á, mɛaŋɔ́á mɛ ŋɔ bənú nɛhɔtɔ índiə. 29Nɔ́ yámɛ́á ɛhɔka tuana, nɔ́ bɛ́níása mɛ́ bənú úkúnə́kíə́ bɔkɔasɛ́á, mɛ lɛa ɛbɔ́yɛ́ na mɔlɛ́má wɔ́ nɛlɛaŋɛ, nɔ ŋɔ nɛhɔtɔ kusə ɛlɔ́áyɛ́ bənú bɛ́múɛ́tɛ́ tɔ́na. 30Ɔ taká, yámɛ́á ɛhɔka yɛ́ lɛa ndɛ́ndɛlɛ́á ɔ ɔtúána, bɔ́ámɛ́á bɔlɔmɔ́ hə́hə́nə́tɔ.»

Currently Selected:

Matíó 11: tvu

Highlight

Copy