Lúkasɛ 7

Ilumininə yɛ́ isə́lúkú yɛ bɔkɔfɔnɛa bá lɔ́ma

(Mat 8.5-13; Yɔh 4.46-54)

1Ikúílí Yə́susu a ná nɛmɔndɔ bɛ́ɛ́yɛ́ bɛtambá hɔ́á ɔlɛna, a ná fínə́ ɔ Kafalanahúmu. 2Wɔmɔtɛ́ mɔmanɛna mɔŋɛ́ŋa wa bɔkɔfɔnɛa a ka báá na mɔnyɛna ɔmɔtɛ́ ɔwá a ná bá a ndɔ hikiə mɔŋɛ́ŋa, a ka bá a ndɔ náá hoóyi ɔ uwə́kunə. 3Ɛnaka mɔmanɛna mɔŋɛ́ŋa wa bɔkɔfɔnɛa á ɔ́kɔ́ bá ndɔ hɔ́ɔ́ ɛlɔ́áyɛ́ Yə́susu, a ná bɛnatákɛ bɛ́ Bɛyútɛnɛ lɔ́má ɔ ɔwayɛ́ busíə́ ɔkɛaka ɔwá bá wɛɛ́ya bɛ́tɔ́kɔ́lɔ́kɛ́na, a sɔ́nɔ a ndá wayɛ́á mɔnyɛna niŋə́síə́. 4Ikúílí bá ná káfámá á Yə́susu busíə́, bá ná botólíə́ ɔ ɔwayɛ́ ɔbɛ́tɔ́kɔ́lɛna na ɔwɛmbɛ́na bá sɛ́á: «Wɛ́ɛ́yɛ́ mɔndɔ a báka hɔ́ánánátɔ́ ɔwá ɔ wɛɛ́ya mɛɛ́lɔ wəə, 5bɔkɔasɛ́á a ndɔ híə́súə́ hitikə hikiə, wɛɛ́ya á ná yəsúə́ miímə yɛ mabɛ́kálɛ́na lúmə́sə́kíə́.» 6Ɔ yɛ́ɛ́yɛ́ ikúílí, Yə́susu a ná ákáná na bəə́bu iŋgində́. Ɛnaka a báá hoóyi ɔ ɔkafámáká ɔ ɔmbɛ́la, mɔmanɛna wa bɔkɔfɔnɛa a ná bɛ́áyɛ́á bɛŋgɔ́áyɛ́ lɔ́má ɔ ɔwayɛ́ busíə́ ɔkɛaka ɔwá bá wɛɛ́ya lɛná bá sɛ́á: «Á Isə́lúkú, ɔ lɛ sulú ɛmɔ́kɛ́ nyáá bɔkɔasɛ́á, mɛ lɛ bá hɔ́ánánátɔ́ ɔwá ɔ fínə́ ɔ ɔwámɛ miímə. 7Ɛlɔ́áyɛ́ nɔ́yɛ́ mɛ ná siəkínə ɔwá, mɛ lɛ bá hɔ́ánánátɔ́ ɔ ɔndasá mɛaŋɔ́á bɛ́múɛ́tɛ́ ɔwáwɔ busíə́. Mba láá ɔbánɔ́ ɛtambá ɛ́mɔtɛ́ ɔwá, wamɛ́á mɔnyɛna a niŋə. 8Ɔwámɛ mɛ báka ɔ matá má bisə́lúkú, mɛ báka tɔ́na na bɔkɔfɔnɛa ɔ matá má nɛ́ámɛ́á nɛmanɛna. Ábá mɛ ná ɔmɔtɛ́ lɛ́na mɛ sɛ́á: “Káka!” A ndɔ ákána; ábá mɛ ná muinə́muinə́ lɛ́ná mɛ sɛ́á: “Sɔ́nɔ!” A ndɔ ndasa; ata mɛ ná wamɛ́á mɔnyɛna lɛná mɛ sɛ́á: “Kɛ́áká bɔ́ɔbɔ!” A ndɔ bɔɛ́ta kɛa.» 9Ikúílí Yə́susu a ná bɛ́ɛ́yɛ́ bɛtambá ɔ́kɔ́, a ná mɔmanɛna wa bɔkɔfɔnɛa lə́mbə́kíə́. A ná bɛ́kɔ́ŋɔ́ná ɔ nɛmɔndɔ ɔnɛ́á nɛ́ ná wɛɛ́ya nɛŋɛ́lɛ́na, a sɛ́á: «Mɛ ndɔ bənú nɔ́yɛ́ lɛna, ata ɔ Ísilahɛ́lɛ, mɛ sa ndá yɛ́ɛyɛ ɛnya yɛ ilumininə sinə.» 10Bááyɛ́ ɔbá bá ná lɔ́má ɔ bɔsɔ́ma, bá ná tilə́ ɔ ɔmbɛ́la, bá na nibə́ mɔnyɛna wa isə́lúkú yɛ bɔkɔfɔnɛa a nɔ́ niŋə.

Yə́susu a nɔ́ mɔná wa ilíkə́ yɛ́ muəndú huŋuəsiə

11Ɔ hinó ɔhɛ́á hɛ́ ná ɔ́ŋgɔ́nɔ, Yə́susu a ná ákáná ɔ yɛ́mɔtɛ́ bətínə́ ɔyɛ́á bá ndɔ ɛ́lɛnɛna bá sɛ́á Nayíni. Báyɛ́á bɔkɔ́nɛna na nɛmɔndɔ nɛŋɛ́ŋa bá ka báá ilúkunə na wɛɛ́ya. 12Ikúílí a ná báá hoóyi na hɛkɔ́kɛ hɛ́ yɛ́ɛ́yɛ́ bətínə́, bɛndɔ bá ka báá na umimə túánátɔ́ ɔ wákakana ɔ kənyəə, yohí yɛ́ mɔná mɛlɛ́mɛndɔ́ yɛ́ ilíkə́ yɛ́ muəndú. Bɛndɔ bəəŋí bá mɛ́táyɛ́ bətínə́ bá ka báá na wɛɛ́ya. 13Isə́lúkú a ná wɛɛ́ya yámá, mɛɛ́lɔ yɛ́ ná wɛɛ́ya wəə, a sɛ́á: «Ɔ lɛ lɛlá tɔ́na.» 14A ná tɔ́mbálɛ́la, a ná umbimbə itíə́lə. Ɔbá bá ná báá na umbimbə túánátɔ́, bá ná tɛnɛma. Yə́susu a sɛ́á: «Á mɔná bɛnɔ́kɔ́, mɛ ná aŋɔ́á mánɛ́na, hɔnyɔ́á!» 15Nɔ́yɛ́, muwə́nú a ná hɔalɛ́na, a ná botólíə́ ɔ ɔhɔ́ɔ́. A ná wɛɛ́ya híə́níə́ á yayɛ́á inyə́ makátá. 16Bɔkɔ́lɔ́ma bɔ́ ná bɛndɔ bəkimə itíə́, bá ná lúmə́ á Huɛlɛ́ ɔ tuúmə uhíə́niniə bá sɛ́á: «Mɔhɛ́nátɔtányɛ́ mɔŋɛ́ŋa a ná ndásá ɔ uwəsú ətíə́, Huɛlɛ́ a ná ndá híə́yíə́ hitikə nuəkə́níə́.» 17Ɔ Yútɛa yikimə na ɔ mamɛ́ŋɛ́ məkimə, imbə́nú yɛ́ ná yambána ɔ yatɛ́ ɔyɛ́á Yə́susu a ná kɛ́áka.

Ɛmbataka yɛ́ Yɔhánɛsɛ Mɔsɔabɛndɔ

(Mat 11.2-19)

18Bɔkɔ́nɛna bá ná Yɔhánɛsɛ bɛ́táyɛ́ bɛkɔa bikimə nɔŋɔ́nákɛ́na. 19A ná báyɛ́á bɔkɔ́nɛna ɛ́lɛ́ákɛ́na báfandɛ́, a ná bəə́bu lɔ́má á Isə́lúkú busíə́ ɔkɛaka ɔwá bá wɛɛ́ya batá bá sɛ́á: «Aŋɔá ɔ lɛ́á wɛ́ɛ́yɛ́ ɔwá a ŋɔ ndafámá alɛ́ɛ́, tɔ́ tátáká muinə́muinə́ əə́?» 20Ɛnaka bá káfámá á Yə́susu busíə́, bá sɛ́á: «Yɔhánɛsɛ Mɔsɔabɛndɔ a ná bəsú lɔ́má ɔwáwɔ busíə́ ɔkɛaka ɔwá, tɔ aŋɔ́á batá tɔ sɛ́á: “Baánɛ, aŋɔ́á ɔ lɛ́á wɛ́ɛ́yɛ́ ɔwá a ŋɔ ndafámá alɛ́ɛ́, tɔ́ tátáká muinə́muinə́ əə́?”» 21Ɔ yɛ́táyɛ́ ikúílí, Yə́susu a ná bɛndɔ bəəŋí yə́búə́ mɛɛ́mbɔ niŋə́sə́kíə́, na bɛkátá, a ná bəə́bu hutúnə́kə ɔ imbúínyi mɛbɛ́á, a ná məə́sə má bəndímə́ndímə bəəŋí úbə́nə́kə. 22Nɔ́yɛ́, a ná bəə́bu bíhíə́níníə́ a sɛ́á: «Nɔ́ ákána, nɔ́ ká Yɔhánɛsɛ lakɛ́ná yatɛ́ nɔ ná siəkínə, yatɛ́ nɔ ná ɔ́kɔ́kɛ́na; bə́mínú bá lɛa niŋə́sə́kíə́tɔ, bɛ́ndɔ́kɔ́ bá ndɔ ɔ́kɔ́nɔ, bəwə́nú bá ndɔ hɔŋɔa, bá ndɔ Imbə́nú Yɛɛsɛ nɔŋɔnɛna ɔ tɔtɔyɔ́nɔ́. 23Nɛhɔnɔ na wɛ́ɛ́yɛ́ ɔwá a sɔ́ ŋɔ yáyɛ́á ilumininə niasa ɛlɔ́áyɛ́ ámɛ!»

24Ikúílí ɔyɛ́á bɔkɔ́nɛna bá Yɔhánɛsɛ bá ná ákáná, Yə́susu a ná botólíə́ ɔ nɛmɔndɔ ɔ ɔhɛ́na ɛlɔ́áyɛ́ Yɔhánɛsɛ, a sɛ́á: «Yatɛ́ nɔ ná ákáná ukəsínə ɔ makɔ́tákɛ əə́? Nɛtɔŋɔ ɔnɛ́á umbúínyi wɔ́ ndɔ fúkə əə́? 25Mba, yatɛ́ nɔ ná ákáná ɔ usinə əə́? Mɔndɔ wa lɛŋábákátɔ́ na bɛlɛŋa bɛ́ mukunə́ mɔŋɛ́ŋa əə́? Mba, bááyɛ́ ɔbá bá ndɔ bɛlɛŋa bɛ́ mɔnɛ́á bɛ́háá, bá ndɔ niŋə ɔ buɛsɛ, bá ndɔ bɛ́nyama ɔ məə́bə má bənəni. 26Yatɛ́ nɔ ná ákáná ukəsínə əə́? Mɔhɛ́nátɔtányɛ́ əə́? Ɛ́ɛ! Mɛ ndɔ bənú lɛna, a lɛa yáyɛ́ná mɔhɛ́nátɔtányɛ́. 27Ɔ ɛlɔ́áyɛ́ ayɛ́ Mətilə má ndɔ fə́mə́ləniə má sɛ́á: “Mɛ ndɔ wamɛ́á mɔsɔ́másɔma lɔ́ma ɔwáwɔ busíə́ ɔkɛaka ɔwá, a aŋɔ́á ɛnɔ́mɛ kunínə.”»

28«Mɛ ndɔ bənú nɔ́yɛ́ lɛna, ətíə́ yɛ bááyɛ́ ɔbá bəəndú bá ná bíə́nə́kə, ata ɔmɔtɛ́ a lɛ báá mɔŋɛ́ŋa yáyɛ́ná Yɔhánɛsɛ. Mba wɛ́ɛ́yɛ́ ɔwá a lɛ́á mɔtɛ́tɛ́tɛ́tɛ́á ɔ Nɛmanɛna nɛ́ Huɛlɛ́, a lɛa mɔŋɛ́ŋa yáyɛ́ná wɛɛ́ya. 29Nɛmɔndɔ nikimə na bakɔtabɛtásɛ ɔbá bá ná wɛɛ́ya ɔ́kɔ́kɛ́na, bá ná lumínə ɔwá, Huɛlɛ́ a lɛa wataká, bá ná kɛáka Yɔhánɛsɛ a ná bəə́bu nɛsɔa índíə́kínə. 30Mba, Bɛfalísia na bamanyumbə́ndə́ bá ka sáŋɔ́na yatɛ́ Huɛlɛ́ a ná bá a ndɔ hikiə ɛlɔ́áyɛ́ əbú, bá ná sáŋɔ́ná ɔwá a lɛ bəə́bu nɛsɔa índíə́. 31Ɔ ɔwanɛ́ mɛ óso ɔ bɛndɔ bá yɛ́ɛyɛ ɛnyɔŋɔnɔ iŋgətí ɔwɛtɛna əə́? Ɔ ɔwanɛ́ bá lɛ́á hɔ́ákátɔ́ əə́? 32Bá lɛa hɔ́ákátɔ́ ɔ baná ɔbá bá lɛ́á tuənə́kínə́tɔ́ ɔ ɛbɔ́ka yɛ́ nɛnáka, ɔbá bá ndɔ bɔsɔ́kɔ́ yə́mínə bá sɛ́á: “Tɔ ka bənú bɔŋana bɔ́ ɛŋganda ósókinə na hɛndɔ́ŋɔ́, nɔ́ sa bínə! Tɔ ka bənú maŋana má mənyənə ósókinə, nɔ́ sa lɛla!” 33Ɔ taká, Yɔhánɛsɛ Mɔsɔabɛndɔ a ka ndásá, a lɛ bɛlɛ́tɛ nɛa, a lɛ məluku nyɛna, nɔ sɛ́á a báka na umbúínyi mɔbɛ́á. 34Mɔná wa mɔndɔ a ná ndása, a ayɛ́ nɛ́áka, a nyákɛna, nɔ ndɔ laa nɔ sɛ́á: “Nɔ́ wɔ́ɔwɔ mɔndɔ siəkínə ɔwá a lɛ́á ɔ́maná ɔbɛ́kɔ́lɔmɔna há ɔnɛ́á na məluku ɔnyɛ́na, a lɛa ɛŋgɔ́áyɛ́ yɛ bakɔtabɛtásɛ na bakɛamabɛ́á!” 35Mba, ɛmanya yɛ Huɛlɛ́ yɛ́ lɛa manyánátɔ́ taká ɔ bəkimə ɔbá bá ndɔ yɛɛ́ta luminə.»

Yə́susu ɔ miímə yɛ Símono á Mɔfalísia

36Mɔfalísia ɔmɔtɛ́ a ná Yə́susu ɛ́lɛ́ákɛ́na ɔ ɔnɛ́á na wɛɛ́ya, a ná fínə́ á mɔ́táyɛ́ mɔndɔ miímə, a ná tuə́nə. 37Ɔ yɛ́táyɛ́ bətínə́, muəndú ɔmɔtɛ́ a ná ndáfama, a ka bá na bɛkɛndɛ́ná bɛbɛ́á. Ikúílí a ná ɔ́kɔ́ ɔwá Yə́susu a lɛa ɔ ɔnɛ́á ɔ ɛtáka á Mɔfalísia miímə, a ná hikətə húlə́nə́ úndúə́tɔ́ na bunumbə. 38A ná tɛ́nɛ́má əlimə yɛ Yə́susu ɔwayɛ́ makɔlɔ́. A ka bá a ndɔ lɛla, a ná tuə́nə́ ɔ makɔlɔ́ má Yə́susu ɔ ulufə na bɛ́áyɛ́á bililíní. Nɔ́yɛ́, a maáta sɔ́tɔ́kɔ na tɔ́áyɛ́á tuhúínyi, a maáta bíbóŋokiniə, a maáta fofokiə na bunumbə.

39Ikúílí Mɔfalísia ɔwá a ná wɛɛ́ya ɛ́lɛ́ákɛ́na, a ná síə́kínə́ nɔ́yɛ́, a ná bɛ́láá a sɛ́á: «Ata wɔ́ɔwɔ mɔndɔ a bámɛnɛna mɔhɛ́nátɔtányɛ́, há a ndɔ manya ɛ́yánɛ́ a lɛ́á wɔ́ɔwɔ muəndú ɔwá a ndɔ wɛɛ́ya itiə: Muəndú wa bɛkɛndɛ́ná bɛbɛ́á.» 40Yə́susu a ná yɛ́ɛ́yɛ́ ikúílí ɛtambá ɛ́ta, a ná Mɔfalísia lɛ́na a sɛ́á: «Á Símono, mɛ báka na bɔkɔa ɔ ɔwáwɔ ɔlɛna.» Símono a sɛ́á: «Hɔ́ɔ́kɔ á Mulə́liə.» 41Yə́susu a sɛ́á: «Mɔndɔ ɔmɔtɛ́ a ka bá a ndɔ bɛndɔ báfandɛ́ buhínə bata. A ka bá a ndɔ wəbusíə́ bata bɛbɔ́ɛ́yɛa bɛ́lánɔ bɛ́ bɛcácɔ́, wa ɔwɔŋgɔkɔnɔ moómo álánɔ. 42Ɛ́sɛ́á ikúílí ata ɔmɔtɛ́ ətíə́ yɛ bəə́bu báfandɛ́, bá sa kafáma ɔ búə́búə́ buhínə ɔ ɔsábɔ́na, a ná bəə́bu búə́búə́ buhínə niasɛ́na. Ətíə́ yɛ bəə́bu báfandɛ́, ɛ́yánɛ́ a ŋɔ wɛ́ɛ́yɛ́ mɔndɔ hikəkiə ɔ ɔyáyɛ́na əə́?» 43Símono a sɛ́á: «Mɛ ndɔ fɛka, ɔ́ wɛ́ɛ́yɛ́ ɔwá bá ná buhínə bɔŋɛ́ŋa niasɛ́na.» Yə́susu a sɛ́á: «Ɔ ná hɔ́lɔ́ taká.»

44A ná yɛ́ɛ́yɛ́ ikúílí bɛ́kɔ́ŋɔ́ná ɔ ɛsalɛ yɛ́ muəndú, a ná Símono lɛ́na a sɛ́á: «Ɔ ndɔ wɔ́ɔwɔ muəndú sinə əə́? Mɛ ná fínə́ ɔ ɔwáwɔ miímə, ɔ sá mɛaŋɔ́á mənífə́ índiə ɛlɔ́áyɛ́ mámɛ́á makɔlɔ́. Mba, a ná mɛaŋɔ́á makɔlɔ́ sɔ́áká na bɛ́áyɛ́á bililíní, a ná sɔ́tɔ́kɔ́ na tɔ́áyɛ́á tuhúínyi. 45Ɔ sá mɛaŋɔ́á káha na nibíbóŋoniə. Mba ɔwayɛ́, hata yɛ ikúílí ɔyɛ́á mɛ ná fínə́ háha, a sá súkə ɔ mámɛ́á makɔlɔ́ ubíbóŋoniə. 46Ɔ sa bunumbə olinə ɔ ɔwámɛ mɔlɔ́á; mba ɔwayɛ́, a ná bunumbə olókínə́ ɔ ɔwámɛ makɔlɔ́. 47Ɔ́ ɛlɔ́áyɛ́ nɔ́yɛ́ mɛ ndɔ aŋɔ́á lɛna: Nɛ́áyɛ́á nibo nɛŋɛ́ŋa ɔnɛ́á a ná fə́mə́lə́níə́ nɛ́ ndɔ ínə́niə ɔwá, Huɛlɛ́ a ná máyɛ́á mabɛ́á məəŋí níásɛ́na. Mba, ɔ wɛ́ɛ́yɛ́ ɔwá Huɛlɛ́ a ná niasɛ́ná tɛ́tɛ́á, a nɛ́áyɛ́á nibo ínə́níə́ tɛ́tɛ́á.» 48A ná muəndú yɛ́ɛ́yɛ́ ikúílí lɛ́na a sɛ́á: «Mɛ ná aŋɔ́á máwɔ́á mabɛ́á niasɛ́na.»

49Bááyɛ́ ɔbá bá ná báá ɔ ɛtáka na wɛɛ́ya, bá ná botólíə́ ɔ ubílúlə bá sɛ́á: «Ɛ́yánɛ́ a lɛ́á wɔ́ɔwɔ mɔndɔ ɔwá a ndɔ kafámá ɔ mabɛ́á ɔnɛasɛna əə́?» 50Yə́susu a ná muəndú lɛ́na a sɛ́á: «Yáwɔ́á ilumininə yɛ́ ná aŋɔ́á núə́kə́níə́, káka ɔ bumbə́nú.»

Currently Selected:

Lúkasɛ 7: tvu

Highlight

Copy