Lúkasɛ 21

Nɛhánɛna nɛ́ hɛtɔyɔ́nɔ́ yɛ́ ilíkímúə́ndú

(Mə́l 12.41-44)

1Yə́susu a ná bɛ́híámɛ́la, a ná bambiaŋɛ yámá bá ndɔ mə́búə́ mahánɛna háá ɔ bikoó bɛ́ mahánɛna ɔ Tɛ́mbɛlɛ. 2A ná hɛtɔyɔ́nɔ́ hɛ́ ilíkímúə́ndú yámá tɔ́na, a nɔ́ háá umə́ tɔcácɔ́cácɔ́ tɔ́fandɛ́. 3A ná yɛ́ɛ́yɛ́ ikúílí láá a sɛ́á: «Mɛ ndɔ bənú lɛna mɛ sɛ́á nɔ́yɛ́ yɛ́ lɛa taká, híihi hɛtɔyɔ́nɔ́ hɛ́ ilíkə́ a ná háá yáyɛ́ná bə́ə́ní bəkimə. 4Ɔ taká bə́ə́ní bəkimə bá ná índíə́ ɔ nɛhánɛna á bɛcácɔ́ ɔbɛ́á bá sá bá na ilókí yɛ́ bɔkɔa ɔbɛ́kɛna; mba ɔwayɛ́, na nɛ́áyɛ́á nɛsɔ́ka, a ná índíə́ yatɛ́ yikimə ɔyɛ́á yɛ́ ná wɛɛ́ya bá ɛlɔ́áyɛ́ uniŋə.»

Nɛnɔŋɔna nɛ́ ɔ́nɔkɔlɔna wɔ́ Tɛ́mbɛlɛ

(Mat 24.1-2; Mə́l 13.1-2)

5Bɔ́mɔtɛ́ bɛndɔ bá ka báá bá ndɔ hɛ́ɛ́na ɛlɔ́áyɛ́ Tɛ́mbɛlɛ, bá sɛ́á yɛ́ lɛa mɛmbányɛ na yə́yíə́ miɔkɔ na bɛɛ́la ɔbɛ́á bɛndɔ bá ná Huɛlɛ́ hánákɛ́na. Mba, Yə́susu a sɛ́á: 6«Mɔɔsɛ́ má ŋɔ ndafámá ɔwá ata muɔkɔ úmotí wɔ́ sɔ́ ŋɔ tíkə́nə tálátɔ́ ɔ wúmotí muɔkɔ; yatɛ́ ɔyɛ́á nɔ ndɔ hɔ́yɛ́ sínə, yɛ́ ŋɔ kɔakɔna yikimə.»

Məsə́kə na mətəkəsənə ɔ ikúílí yɛ́ nitifə́

(Mat 24.3-14; Mə́l 13.3-13)

7Bá ná wɛɛ́ya batá bá sɛ́á: «Á Mulə́liə, ɔ́ uyə́níə́ ikúílí nɔ́yɛ́ yɛ́ ŋɔ bɛ́kɛaka əə́? Yatɛ́ hɛŋgɛtɛ́nɛ́á hɛ́ yələ́mənə hɛ́ ŋɔ bá ɔhɛ́á hɛ́ ŋɔ ikúílí ínə́niə ata mɔɔsɛ́ ɔmá bɛ́táyɛ́ bɛkɔa bɛ́ ŋɔ ndafámá əə́?» 8Yə́susu a sɛ́á: «Nɔ manyaka, nɔ lɛ bɛ́níása ɔwá bá bənú nə́nə́síə́. Ɔ taká, bɛndɔ bəəŋí bá ŋɔ ndasá bá nɛ́ámɛ́á niínyə bɛ́kɛ́ákɛ́na, bá ŋɔ laaka bá sɛ́á, ɔwámɛ á Huɛlɛ́ a ná lɔma: “Ikúílí yɛ́ nɔ ndafámá!” Nɔ lɛ bəə́bu ɔŋgɔ. 9Ikúílí nɔ ŋɔ ɔ́kɔ́kɛna bɛndɔ bá ndɔ hɛ́ɛ́na ɛlɔ́áyɛ́ bilə́ na mətuŋulə, nɔ lɛ kɔ́lɔ́má bɔkɔasɛ́á, nɔ́yɛ́ yɛ́ ŋɔ ndafámá ɔ busíə́ bɔ́ ikúílí; mba, nɔ́yɛ́ yɛ́ sɔ́ ŋɔ bá ɔ umisíúmə́ nisúki nɛ́ misí.»

10A ná manyɔ́ laa a sɛ́á: «Bɔnɔŋɔ bɔ́mɔtɛ́ bɔ́ ŋɔ ɔsɔ́kɔ́ bɔnɔŋɔ nuəkiə, nɛ́mɔtɛ́ nɛmanɛna nɛ́ ŋɔ ɔsɔ́kɔ́ nɛmanɛna kumunə. 11Misí yɛ́ ŋɔ ndandɛmaka mɔŋɛ́ŋa ɔ bɛ́mɔtɛ́ bɛbɔ́ka, mɛtaná na bilibi bɛ́ mɛɛ́mbɔ bɛ́ ŋɔ báá; bɛkɔa bɛ́ bɔkɔ́lɔ́ma uwitiəsiə, ɛnyɛnya yɛ́ tɔŋgɛtɛ́nɛ́á tɔŋɛ́ŋa tɔ́ ŋɔ húlə́kinə ɔ ɔmbáŋá.»

Umənyəsiə wɔ́ mətəkəsənə

12«Mba ɔ busíə́ bɔ́ bɛ́ɛ́yɛ́ bikimə, bá ŋɔ bənú halɛakɛna, bá ŋɔ bənú tə́kə́sə́kə, bá ŋɔ bənú sɛmɛna ɔ məə́bə má mabɛ́kálɛ́na, bá ŋɔ bənú hákɛna ɔ bɛbɔka, bá ŋɔ ka bənú fámáná ɔ busíə́ bɔ́ bisə́lúkú na bamanɛna ɛlɔ́áyɛ́ ámɛ. 13Nɔ́yɛ́ yɛ́ ŋɔ báá ɛlɔ́áyɛ́ ənú ikúílí ɔyɛ́á nɔ yamɛ́á imbóŋi fə́mə́lə́níə́. 14Nɔ manyaka, nɔ lɛ bɛ́kɔ́lɔ́mɔ́ná ɛlɔ́áyɛ́ níə́núə́ nɛbɛ́kála. 15Ɔ taká mɛaŋɔ́á bɛ́múɛ́tɛ́ mɛ ŋɔ bənú bɛtambá índiə ɔ nindínə́ ɔnɛ́á ata ɔmɔtɛ́ wənúə́ mukóyíkoyi a sɔ́ ŋɔ bɛɛ́ta nuəsiə, ata ɔ bɛɛ́ta ɔsáŋɔ́na. 16Bíə́núə́ bisə́ na binyə́, bə́núə́ bənínyə́, mə́núə́ məkúlə, na bɛŋgɔ́áyɛ́ bá ŋɔ bənú sɛmaka, bá ŋɔ bəəŋí ɔ uwənú ətíə́ ɔ́nɔ́kɔ. 17Bɛndɔ bəkimə bá ŋɔ bənú kóyokiə ɛlɔ́áyɛ́ ámɛ. 18Ata hihúínyi hímotí ɔ uwənú mɔlɔ́á hɛ́ sá ndányɔa. 19Nɔ ŋɔ búə́núə́ buɔmɔ́ nuəkəniə ábá nɔ ná tiŋímínə.»

Bá ndɔ Yəlúsalɛma kə́lə́siə

(Mat 24.15-21; Mə́l 13.14-19)

20«Ɔ ikúílí ɔyɛ́á nɔ ŋɔ mɛlɔ́ŋɔ́ yɛ́ bilə́ siəkinə yɛ́ nɔ́ Yəlúsalɛma nɛŋɛlɛna, nɔ ŋɔ manya ɔ yɛ́táyɛ́ ikúílí ɔwá ɛkasɛ bá yɛɛ́ta nɔkɔ́lɔ́kɔ́na. 21Ɛlɔ́áyɛ́ nɔ́yɛ́, bááyɛ́ ɔbá bá ŋɔ báá ɔ Yútɛa bá tɛbákɛ́na ɔ ɛmáá ɔmbáŋá, ɔbá bá ŋɔ bá ɔ Yəlúsalɛma bá ŋɔ fámáka, ɔbá bá ŋɔ bá ɔ mahɔ́ma, bá lɛ fínə ɔ bətínə́. 22Ɔ taká, mufunənə wɔ́ ŋɔ báá ɔ mátáyɛ́ mɔɔsɛ́. Ɛ́sɛ́á tuəfulə tɔ́ ndɔ laa ɛlɔ́áyɛ́ yatɛ́ yikimə ɔyɛ́á yɛ́ ŋɔ bɛ́kɛaka. 23Yatɛ́ ɛmɔ́kɛ́ yɛ́ ŋɔ báá, ɔ mááyɛ́ mɔɔsɛ́ ɛlɔ́áyɛ́ bəəndú bá ɛ́mɛ́lákátɔ́ na bááyɛ́ ɔbá bá ŋɔ báá bá ndɔ baná nyóhiə bɔkɔasɛ́á, busə́kə bɔŋɛ́ŋa bɔ́ ŋɔ báá ɔ bɔnɔŋɔ. Huɛlɛ́ a ŋɔ híə́yíə́ hilóbi ínə́niə ɔ yɛ́táyɛ́ ilúkunə. 24Bá ŋɔ bəə́bu ɔ́nɔ́kɔ na mɔkɔ́átá, bá ŋɔ bəə́bu ɛtaka mikómó ɔ ətíə́ yɛ mɔnɔŋɔ mənə́mənə́ məkimə, mɔnɔŋɔ má ŋɔ Yəlúsalɛma tafaka ɔkafámáká ikúílí ɔyɛ́á, Huɛlɛ́ a ná bəə́bu índíə́ a sɛ́á yɛ́ tɔ́mba.»

Mɔná wa mɔndɔ a ŋɔ ndafama

(Mat 24.29-31; Mə́l 13.24-27)

25«Tɔŋgɛtɛ́nɛ́á tɔ́ yələ́mənə tɔ́ ŋɔ báá ɔ hiɔtɔ́tɔ́, ɔ muilí, na tusənji, ɔ misí, mɔnɔŋɔ má ŋɔ báá ɔ bɔkɔ́lɔ́ma bɔŋɛ́ŋa, ɛlɔ́áyɛ́ məkumbəki má iŋgínə́ má nɔmɔ́, na iŋunu. 26Bɛndɔ bá ŋɔ wə́kunə na bɔkɔ́lɔ́ma bɔŋɛ́ŋa ikúílí bá ŋɔ bɛ́kɔ́lɔmɔna yatɛ́ ɔyɛ́á yɛ́ ŋɔ ndafámá ɔ misí bɔkɔasɛ́á, Huɛlɛ́ a ŋɔ tundondoní tɔ́ nɔɔ́mɛná ndəndəməkiə. 27Nɔ́yɛ́, bɛndɔ bá ŋɔ Mɔná wa mɔndɔ siəkinə ɔsákɔna tálɛ́mátɔ́ ɔ ɛlɔndɔ́, ɔ injiŋə, na tuúmə tɔŋɛ́ŋa. 28Ikúílí bɛ́táyɛ́ bɛkɔa bɛ́ ŋɔ lúmə ɔndafámá, nɔ́ tɛ́nɛ́ma, nɔ́ mɛlɔ́á nyákɔ́ná tɔ́na bɔkɔasɛ́á, níə́núə́ nihutunə nɛ́ lɛa hoóyi.»

Bɔlɛ́á bɔ́ fíkiə na yáyɛ́á yɔkɔ́na

(Mat 24.32-35; Mə́l 13.28-31)

29Yə́susu a ná bəə́bu iŋgətí ɛ́tɛ́na a sɛ́á: «Nɔ́ bɔlɛ́á bɔ́ fíkiə siəkínə na mə́ə́ní malɛ́á: 30Ikúílí nɔ ŋɔ túə́búə́ tɔánjɛ tɔtɔ́tɔ́ siəkinə tɔsɔ́kɔ́tɔ́, nɔ́ manyá ɔwá ikúílí yɛɛsɛ yɛ́ lɛa hoóyi. 31Nɔ́yɛ́ tɔ́na, ikúílí nɔ ŋɔ bɛ́ɛ́yɛ́ bɛkɔa siəkinə bɛ́ nɔ́ ndáfama, nɔ́ manyá ɔwá, Nɛmanɛna nɛ́ Huɛlɛ́ nɛ́ lɛa hoóyi. 32Mɛ ndɔ bənú nɔ́yɛ́ lɛna, nɔ́yɛ́ yɛ́ lɛa taká: Bɛndɔ bá yɛ́ɛyɛ ɛhanyɛ bá sa ndátɔ́mbá bəkimə ubusíə́ ɔbɔ́á bɛ́ɛ́yɛ́ bɛkɔa bikimə bɛ́ ndafámá. 33Nɔɔ́mɛná na misí bɛ́ ŋɔ tɔ́mba, mba, bɛ́ámɛ́á bɛtambá bɛ́ sá ndátɔmba.»

Mɔsɛ́ŋɛ́ wɔ́ utuənə ɛmbɛnyɛ́

34«Nɔ́ bɛ́tátáká ɔkɛaka ɔwá, yə́núə́ mɛlɛ́má yɛ́ lɛ lɛmá na ɛmbáta yɛ ɔnɛ́á, yɛ ɔnyɛ́na, na bisə́hísə́hí bɛ́ buɔmɔ́, bɔ́táyɛ́ buɔsɛ́ bɔ́ lɛ bənú fámɛ́ná həmə́tu. 35Ɔ taká, bɔ́ ŋɔ ndafámá ɛ́sɛ́á nibúnjə́ ɔkɛaka ɔwá, nɛ́ kɔɛ́na ɔ bɛndɔ bəkimə bá misí mikimə. 36Nɔ lɛ ákáná ɔ hinó, nɔ́ bɛ́kálákɛ́ná ikúílí tɛ́á; nɔ́yɛ́, nɔ ŋɔ iŋgínə́ kusənə ɔ bɛkɔa bikimə ɔ yáyɛ́na ɔbɛ́á bɛ́ lɛ́á ɔsákɔna ɔkɛaka ɔwá, nɔ bínə́níə́ bátaká ɔ busíə́ bɔ́ Mɔná wa mɔndɔ.»

37Yə́susu ka bá a ndɔ buɔsɛ́ túmbiə ɔ uwinə́niə ɔ Tɛ́mbɛlɛ; mba, bɛkɔlakɔ́lá, a ka bá a ndɔ fáma, a ka bulúə́ túmbíə́ ɔ ɔmáá ɔwá bá ndɔ ɛ́lɛnɛna bá sɛ́á ɔmáá wɔ́ Olífia. 38Bɛndɔ bəkimə bá ka báá bá ndɔ ndasá ɛsɔ́mbalɛ́ ɔ Tɛ́mbɛlɛ ɔ ɔwayɛ́ ɔwɔ́kɔ.

Currently Selected:

Lúkasɛ 21: tvu

Highlight

Copy