Mak 15

Jesus ɛ Bailɛt ɛyshiɛ

(Mat 27.1-2,11-14; Luk 23.1-5; Jn 18.28-38)

1Əbtəke bvəs è yio, ghele mbiye se ghɛ́ ntaŋle, nɛ̀ chɛɛse, nɛ̀ ghɛ́ ɛydinte tesake gese nɛ̀ ghel ɛysak ɛlee konen è chio ntaŋ è kul Jesus, è liɛ è ndu so se Bailɛt. 2Bailɛt bif se wen ge: Lu wɛ̀ əbfon ə ghele Juus-a?

Əb fise ge: Lu ka wɛ̀ suuyen.

3Ghele mbiye se ghɛ́ ntaŋlee me se toye əbnəə ɛ Jesus əbghun se ɛydio. 4Bailɛt gese bif se wen ge: Wɛ̀ báà se ki kenəə se suuy-a? Yio yi əbnəə wɛ ɛ́ toyen wɛ̀ so. 5Jesus cheme jia suuy kenəə ghɛy, kii nɛ̂ kine nɛɛy Bailɛt se lu nɛ̀ əbchíò əbyúméné.

Bailɛt tenen nsak ge ɛ́ yúy Jesus

(Mat 27.15-26; Luk 23.13-25; Jn 18.39–19.16)

6Ɛ́ nè sɛɛ lóò yiɛ Kechii Ɛyboyse, Bailɛt yɛ lu se fəyse wele nchak wɛ ghele bifen ge əb fəyse. 7Nè lu əbliy fo nɛ wel əblee lu ɛ nchak nɛ ɛ́ toŋte ge Balabbas nɛ̀ ngoo ə wen nɛ lu ghene ghɛ ɛ́ nè losen əbchio ge ɛ́ bak ɛysak, è gese yuyte ghel. 8Ngos wel nɛy kaame, è suuy ge Bailɛt nɛɛy ka əb nè sɛɛ nɛɛye, 9əb bif se ghene ge: Ghɛne kɛŋe ge mɛ fəyse əbfone ghele Juus se ghɛn-a? 10Bailɛt nè bife di, bek ka əb nè lô yɛn ge ghele mbiy se ghɛ́ ntaŋlee nè gwiy nɛ̀ Jesus se yi nɛ ɛ́ ghɛk kɛn wen ghɛken.

11Dî ghɛ́ ntaŋlee bɛyse ghel ge ɛ́ suuy é Bailɛt fəyse nɛ lu Balabbas se ghene. 12Bailɛt gese bif se ghene ge: Ghɛne kɛŋe ge mɛ nɛɛy lɛɛy nɛ̀ wel wɛ ghɛne toŋten ge əbfon ə ghele Juus?

13Ghene waame ge: Bante wen se kentam!

14Bailɛt bif ge: Jas ə wen lu ghɛ?

Ghene gese waame ketaan ketaan ge: Bante wen se kentam! 15Bailɛt se kɛŋe ge ghele yɛ saŋle, è me fəyse Balabbas se ndaa nchak se ghene, è suuy ɛ́ tɛl Jesus ɛ leghɛ, əb me fo ge ɛ ndu yi è bante se kentam.

Ghel ɛyghoŋe buu Jesus

(Mat 27.27-31; Jn 19.2-3)

16Ghel ɛyghoŋ ghi me liɛ Jesus, è lii nɛ̀ wen se məme ntok nə Bailɛt, è tooy kembɛke ghel ɛyghoŋ. 17È lafse wen nɛ̀ ndəy se baŋene, è lim kenjoonjoŋ ka ketaandoŋ è sooy se wen ə ketuu. 18Ghene me kɛɛte se yɛ bune wen ge: Ghɛse bune wɛ̀ əbfon ə ghele Juus. 19Ɛ́ se tɛle ketuu ə wen nɛ̀ mbàŋ, tio teliɛ ɛ wen əbghun, təme ɛləy ɛ wen ɛyshiɛ buu wen ge ɛ́ bune. 20Ghene buu Jesus è mɛyse, è chok ndəyse tefon shi se wen əbghun è kase mak sɛ́ wene, è liɛ wen è se nduu so se bante se kentam.

Ɛ́ bante Jesus se kentam

(Mat 27.32-44; Luk 23.26-43; Jn 19.17-27)

21Ghene loo ndu, è konen ghene ghe wele wɛ́ Silen əblee nɛ ɛ́ toŋte ge Simon nɛ əb kfəəye əbkwak. Simon vin nè lu ba Alesanda ghene Lufus. Ɛ́ me kan Simon bɛɛy kentam ə Jesus. 22Ghene ndu nɛ̀ Jesus se kelik kelee nɛ ɛ́ toŋte ge Golgota, (nɛ ɛyghel yɛ Golgota yin lu ge kelike kevəfe ketuu); 23è fo ɛynkii əmnduk əmlee se Jesus ge əb nəə, nɛ ɛ́ fis nɛ̀ kegii kelee nɛ ɛ́ toŋte ge Mee dî əb jia nəə. 24Ɛ́ bante wen se kentam, è liɛ ndəyse ə wen, è mak kaŋ se yɛn ge ɛ́ sɛ giate lɛɛy-a? 25Ɛ́ nè bante wen se kentam ɛ chuy buumok ɛ bvəse bvəse, 26è me nyak kenəə è base se wene ketuu kentam ge njio ə wen. Kenəə nɛ̂ kin nè lu ge: Vin lu əbfon ə ghele Juus. 27Ɛ́ gese bante ɛchoŋ ɛbaa se əmntam ɛ Jesus ɛyghaŋ, əblee ɛybee əbkoy əbtaa nɛ̀ əblee se ɛybee əbkoy əbkiye. 28[Ɛ́ bante dì, kenəə kɛ ɛ́ nè nyaken ɛ ŋwaale-Feyin ge: “Ɛ́ nè taŋ wen ghene ghele mbeese” me kwɛn].

29Ghel ghɛ ɛ́ nè chian jii fo me se mɛkte əbtuu ə ghen tɛyle wen suuye ge: Aa! Wɛ̀ ne bee ge wɛ̀ sakte ndaa-ɛykokse, è kase baklé se əbchii əbtal, 30Giamten yi ngeŋ ə yiɛ è səəke se kentam.

31Ghele mbiy se ghɛ́ ntaŋlee nɛ̀ ndintese tesake ko se buu sɛy wen suuye ge: Əb nè giamten ghel ɛchine dî nɛ lòó əb jia giamten ngeŋ ə wen. 32Vi wɛ Feyine nè Yiosen lu əbfon ə ghele Islael, səəke yi se kentam ɛ leenen é ghɛs yɛn è fo ɛytem se wɛ̀.

Ghel ghɛ ɛbaa ghɛ ɛ́ nè banten ghene ghe Jesus ko se tɛyle wen sɛy.

Ɛykuo ə Jesus

(Mat 27.45-56; Luk 23.44-49; Jn 19.28-30)

33Nɛy se lu ka chuy tiysen, mbi sasen è fin naa ɛyjim, è fin dî se chuy setal. 34Se lu ɛ chuy setal Jesus toŋ ɛ giɛ ɛytaa ge: Eloi, Eloi, Lama Sabatani, nɛ lu ge: Feyin ə Fome, Feyin ə Fome, Wɛ̀ maay mɛ lɛ bek ghɛ?

35Ghel ɛlee ɛ məme ghel ghɛ ɛ́ nè tiyen fo yio, è me se suuye ge: Yɛn-a, əb se jaŋe Elija. 36Wel əblee ɛ ghene məm nyiŋ è ndu, è liɛ kuncha, è chəə se kengwɛy əmnduk, è sooy se ketuu mbàŋ, è lose se Jesus ge əb nəə, è se suuye se ghele ge: Ghɛsen chiyte ge Elija sɛ gwiy è səkse wen se kentam-a?

37Jesus nɛ̂y toŋ ɛ giɛ ɛytaa, è me mɛy. 38Ndəy sɛ ɛ́ nè keŋen ɛybuu ɛylanene so ɛ ndaa-ɛykokse me basen əbwaŋ əbbua se lòò ɛ ɛyyio se səəke se chin ɛ ntiɛ. 39Ketuu ghel ɛyghoŋ kɛ ke nè tiyen ɛ Jesus əbghune kentam yɛn jii yɛ əb kuon ɛ ten è suuy ge: Wel vin nè lu kɛn naa wán ə Feyin se əbluuy! 40Nè lu dî nɛ əbkiy ɛlee teem ɛ əbtəm è se kiye. Əbkiy ɛlee ɛ məme əbkiy nɛ̂ ghan nè lu Mɛɛle Magdalene, nɛ̀ Salome gese nɛ̀ Mɛɛle wɛ no ə Joses ghene Jɛms əbtɛlɛ. 41Əbkiy nɛ̂ ghin nè jɛle ɛ Jesus ɛybam ɛ əbliy wɛ əb nè luun ɛ Galilee giamten wen. Əbkiy ɛlee ghɛ ghene nè koken ɛ Jesus ɛ ɛybam ɛ Jolesalem nè lu sɛy fo.

Ɛ́ gvəəme Jesus

(Mat 27.57-61; Luk 23.50-56; Jn 19.38-42)

42-43Əbtəke nɛy loo jiɛ, Josɛf wɛ̂ Alimatea gwiy. Əb nè lu wel əblee ɛ məm nə chɛɛse, nɛ ghele ngvəmle wen, nɛ əb gese chiyte ɛysak ə Feyin. Kechii nɛ̂ kin nè lu kechii ɛybaate, nɛ lu kechii kɛ ke nè fóon se kechii ɛybame. Josɛf me kul ɛytem è lii ɛ ntok, è suuy ge Bailɛt fó ɛygvəne Jesus se yi. 44Bailɛt se lu nɛ̀ əbchíò əbyúméné se yio ge Jesus kè kuomen, è me jaŋ ketuu se ghɛ́ ɛyghoŋe è bif se wen ge sɛ lu əbluuy ge Jesus kè kuomen-a? 45Bailɛt yio dì, è me suuy se Josɛf ge əb ndu è səkse ɛygvəne Jesus. 46Josɛf me yun əbkoye ndəyse, è səkse ɛygvəne Jesus, è lim se ten è me vii se ɛysɛy yɛ ɛ́ nè chufen ɛ ɛyghok, è me biŋse ɛytiy è chite əbchio ɛysɛy so. 47Nè lu dî nɛ Mɛɛle Magdalene ghene Mɛɛle wɛ no ə Joses lu fo kiye ghaa ɛ́ gvəəmen Jesus.

Currently Selected:

Mak 15: oku

Highlight

Copy