Mat 25

Ngan yɛ kum ghondɛɛ ngon ɛyvəm

1Ɛ́ náà loo lu əbliy fo, ɛysak ə Feyine yɛ lu ka ngan yɛ kum ghondɛɛ ngon ɛyvəm ghɛ ɛ́ nè liɛn əbkaaken ə ghen, è ndu se fiisene lum jen. 2Ghɛ ɛtane nè ngoole, nɛ ghɛ ɛtane feesene. 3Ghɛ ɛ́ nè ngoolen loo liɛ əbkaaken ə ghen, è jia liɛ moome ten əmlee, 4dî ghɛ ɛ́ nè feesen loo liɛ əbkaakene ə ghen, è liɛ moome ten əmlee. 5Lûm əbvii loo moo se ŋaŋ, mbuunese se yɛke ghondɛɛ ngon ghi, ghene me buune.

6Nɛy se lu nɛ ɛyteme ntəke, ɛ́ gwɛl fezəə ge: Yɛn-a, lum jen se gwiye, ghɛn fəy è fiisen wen. 7Ghondɛɛ ngon ghii loole, è kokse əbkaaken ə ghen. 8Ghɛ ɛ́ nè ngoolen me suuy se ɛfeesene ghii ge: Ghɛn fó ghɛs nɛ̀ moome kekaaken bek ge əbkaaken ə wɛse se liimee. 9Ghene me fise ge: Ɛngaŋ, moo mɛ ghɛs kiin lòó əm jia kwɛn se ghɛsen ghel ɛjim. Ghɛn ndu, è yun mɛn ɛ kelik əbwɛy. 10Ghene ndu se yun, lum əbvii gwiy ghene ghel ghɛ ɛ́ nè luun kebaaten me lii se ndaa əbjen, ɛ́ me tɛk əbchio ndaa, è fen.

11Ghene nɛ̂y fiile è se tiy ɛ bɛy jaŋe suuye ge: Babɛy, Babɛy, dise əbchio ndaa se ghɛs. 12Lûm əbvii fise ge: Mɛ suuye əbluuy se ghɛn ge, mɛ báà se ke ghɛn. 13Jesus se ləysen, suuye ge: Ghɛn yɛ lu kebaaten bek ge ghɛne báà se ke kechii kene əbliy wɛ mɛ náà kase gwiy ɛ ten.

Ngan yɛ kum ghel ɛyfɛl ɛtal

(Luk 19.11-27)

14Ɛ́ náà loo lu əbliy fo, ɛysak ə Feyine yɛ lu ka ngan yɛ kum wel wɛ əb nè loo ndu ɛyjel, è jaŋte ghel ɛyfɛl nə wen, è fo əbkaa se ghene ge ɛ́ yese è yɛ bɛ́ɛ́lé so. 15Əb nè fo əbbuam əbkaa əbtan se wel əblee, è fo se wel əblee əbbuam əbbua, è fo kemok se wel əblee. Əb nè foo wɛ́ wele kɛn ka lòó əb toknen so. Əb fô dì, è me lòò. 16Wel ɛyfɛl wɛ əb nè kiin əbbuam əbkaa əbtan kɛɛte kɛn əbwɛy so se əbliy è nɛ̂y yiɛ sɛk əbbuam əbkaa əbtan. 17Wel wɛ əb nè kiin əbbuam əbkaa əbbua kɛɛte sɛy əbwɛy, è yiɛ sɛk əbbuam əbbua. 18Dî wel wɛ əb nè kiin kebam əbkaa kemok ndu è tim ɛybee, è lete əbkaa ba-ɛyfɛl nə wen vi ɛ ten.

19Ba ɛyfɛl vi ndu è chii naa se ŋaŋ è nɛ̂y kase gwiy, è jaŋte ghel ɛyfɛl ghi ge ghene ghene kiynen ka ghene nè yesen è fɛl nɛ̀ əbkaa vii. 20Wel wɛ əb nè kiin əbbuam əbkaa əbtan lii, è nyiŋse əbbuam əbkaa ɛyvəm è suuy ge: Babɛy, wɛ̀ nè fo əbbuam əbkaa se mɛ əbtan, mɛ nè yese è bɛɛle əbwɛy è yiɛ sɛk əbbuam əbkaa əbtan. 21Ba ɛyfɛl me suuy se wen ge: Wɛ̀ nɛɛy fo. Wɛ̀ lu wel ɛyfɛl əbjuŋ gese suuy əbluuy. Wɛ̀ nè lô toknen nɛ̀ fefafa ɛ jii ɛyjuŋ nɛ mɛ nɛ̂y lɛm wɛ̀ é wɛ̀ yɛ toknen nè əbdione. Gwiye, é ghɛsoo chɛkle.

22Wel wɛ əb nè kiilen əbbuam əbkaa əbbua lii, è nyiŋse əbbuam əbkaa əbkɛɛk è suuy ge: Babɛy, wɛ̀ nè fo əbbuam əbkaa se mɛ əbbua, mɛ nè yese è bɛɛle əbwɛy è yiɛ sɛk əbbuam əbkaa əbbua. 23Ba ɛyfɛl me suuy se wen ge: Wɛ̀ nɛɛy fo. Wɛ̀ lu wel ɛyfɛl əbjuŋ gese suuy əbluuy. Wɛ̀ nè lô toknen nɛ̀ fefafa ɛ jii ɛyjuŋ nɛ mɛ nɛ̂y lɛm wɛ̀ é wɛ̀ yɛ toknen nɛ̀ əbdione. Gwiye, é ghɛsoo chɛkle.

24Wel wɛ əb nè kiin kebam əbkaa kemok gwiy è suuy ge: Babɛy, mɛ ke ge wɛ lu wele ndee ɛytaa bek ge wɛ̀ lóó wɛ̀ yɛ kaa əbfua nɛ wɛ̀ nè báà vii gese baate əbfua nɛ wɛ̀ nè báà lem. 25Mɛ nè fane ge əbkaa ə viɛ lɛy, è me tim ntiɛ è vii se ten. Yɛn-a, əb vine.

26Ba ɛyfɛl me fise ge: Wɛ̀ lu wel əbbee gese kwene. Ke dine ge wɛ̀ nè ke ge mɛ lu wel kaa əbfua nɛ mɛ nè báà vii, gese baate əbfua nɛ mɛ nè báà lem? 27Nè nɛɛy ghɛ fɛ wɛ̀ lɛm əbkaa ə wom ɛ ɛychia əbkaa é mɛ nɛ̂y gwiy è liɛ nɛ̀ sɛk ɛ ketuu ten? 28Əb me suuye ge: Ghɛn fii əbkaa vin se biɛ vin è fo se wel wɛ əb kè gwiyen nɛ̀ əbbuam əbkaa ɛyvəme. 29Ke me se lu ge naa ndɛ wɛ əb kiin, lu nɛ ɛ́ náà gise é əb yɛ ki əbfua ɛ mbvəəle, dî nɛ vi wɛ əb báà se ki, lu nɛ ghɛy-ghɛy wɛ əb kiin lu nɛ ɛ́ náà fii. 30Ghɛn liɛ wele lólò vin è mak ɛ nfiine bene fɛ əb yɛ toŋ gese kfəle ɛsoŋ.

Nsake kenləysen

31Wanwele náà loo gwiy ka əbfon, ghene nchiyse-ndaa nə wene, è diom ɛ wen ə kaba əbghuy. 32Əb naa diom é əbtum əbjim ɛ mbi fɛn baate ɛ wen ɛyshiɛ, é əb me giabsen ghene əblik əbbua, ghɛɛ-ghɛɛ ka nchiy-bvəyse sɛɛ giabsen bvəyse njiɛ se sɛ ndoŋe. 33Əb náà giabsen dî è lɛm ghele ghɛ́ titiye ɛ wen əbkoy əbtaa è me lɛm ghɛ ɛ́ wiyen ɛ titiy ɛ wen əbkoy əbkiye.

34Əbfone náà giabsen dî è me suuy se ghel ghɛ ɛ́ luun ɛ wen ɛybee əbkoy əbtaa ge: Ghɛn ghɛ ba ə wom bosenmen, ghɛn gwiy è lii se məme ɛysak yɛ əb nè siysenmen se ghɛn naa se nguk se kɛ̀ɛ̀tè ka ɛ́ nè bomen mbi. 35Bek ge jeŋ nè yafe mɛ, ghɛn fó əbfua-əbyíɛ́ne se mɛ; kendoŋe moo se yome mɛ, ghɛn fó moo se mɛ; mɛ se lu kengwiy, ghɛn fiisen mɛ ɛ ghɛne ndaase; 36mɛ se jɛle lu kenchokele, ghɛn fó mɛ nɛ̀ ndəyse. Mɛ nè yafe, ghɛn gwiy è chakte mɛ. Mɛ se lu ɛ ndaa nchak, ghɛn gwiy è ghan mɛ.

37Əb náà suuye di, é ghele ghɛ́ titiy ghii me bif se wen ge: Báàba, ghɛs nè yɛn wɛ̀ ghááy nɛ jeŋ yafe, è fo əbfua-əbyíɛ́ne se wɛ̀? Ghɛs nè yɛn wɛ̀ ghááy nɛ kendoŋe moo yume wɛ̀, è fo moo? 38Ghɛs nè yɛn wɛ̀ ɛ leghɛ nɛ wɛ̀ lu kengwiy, ghɛs fiisen wɛ̀ ɛ ghɛse ndaase? Ghɛs nè yɛn wɛ̀ ɛ leghɛ nɛ wɛ̀ lu kenchokele, ghɛs fo ndəyse se wɛ̀? 39Ghɛs nè yɛn wɛ̀ ɛ leghɛ nɛ wɛ̀ yafe, ghɛs gwiy è chakte wɛ̀? Ghɛs nè yɛn wɛ̀ ɛ leghɛ nɛ wɛ̀ lu ɛ ndaa nchak, ghɛs gwiy è ghan wɛ̀? 40É əbfon me fise ge: Naa ghɛ kɛ ghɛn nè nɛɛyenmen se wan-nyii wɛ̂ nchɛk ɛ məme ghone-nyii ghan lu nɛ ghɛn nè nɛɛy nɛ lu se mɛ.

41É əb suuy dî è me suuy se ghel ghɛ ɛ́ luun ɛ wen ɛybee əbkoy əbkiye ge: Ghɛn lòò se mɛ ɛyshiɛ, Feyine liŋmen ghɛn. Ghɛn ndu ɛ əbvəs wɛ əb fuon əbliy əbjim wɛ Feyine nè kwaaymen se Satan ghene nchiyse wene. 42Bek ge jeŋ nè yafe mɛ, ghɛn jia fo əbfua-əbyíɛ́ne se mɛ, kendoŋe moo se yume mɛ, ghɛn jia fo moo san. 43Mɛ nè lu kengwiy, ghɛn jia fiisen mɛ ɛ ghɛne ndaase, mɛ se jɛle kenchokele, ghɛn jia fo ndəyse se mɛ. Mɛ nè lô se yafe, è nɛy gese se lu ɛ nchak, nɛ ghɛne báà gwiy se ghane mɛ. 44É ghene me fise ge: Báàba, ghɛs nè yɛn wɛ̀ ghááy nɛ jeŋ yafe, kene nɛ yume kendoŋe moo, kene nɛ wɛ̀ lu kengwiy, kene nɛ wɛ̀ jɛle kenchokele, kene nɛ wɛ̀ yafe, kene nɛ wɛ̀ lu ɛ ndaa nchak, è jia giamten wɛ̀? 45É əbfon me fise ge: Mɛ suuy əbluuy se ghɛn ge: Ka ghɛn nè báà giamten wán-nyii wɛ nchɛk ɛ məme ghone-nyii ghan, lu nɛ ghɛn nè báà giamten nɛ lu mɛ. 46Jesus loo ləysen è suuy ge: Feyine náà mak ghii nɛ̂ ghii se ngɛk yɛ ɛy jia yî mɛy, dî è fo ɛychii yɛ ɛy jia yî mɛy se ghel ghɛ ɛ́ nɛɛyen kenəə kɛ əb kɛŋen.

Currently Selected:

Mat 25: oku

Highlight

Copy