Luk 20

Ɛ́ maanen ghaa əbtaawe Jesus lòòn

(Mat 21.23-27; Mak 11.27-33)

1Nè lu ɛ kechii kelee Jesus se lu ɛ ndaa-ɛykokse dinte əbnəə se ghele gese fekte kenəə ə Feyin, ghele mbiy se ghɛ́ ntaŋle, nɛ̀ ghɛ́ ɛydinte tesake gese nɛ̀ chɛɛse me kokte gwiy, 2è suuy se wen ge: Dine se ghɛs ghaa wɛ̀ liɛn əbtaawe se yɛ momle so lɛ. Fo ndɛ əbtaawe vin se wɛ̀? 3Əb fise ge: Mɛ bif sɛy ɛybif se ghɛn, ghɛn fekte se mɛ ge, 4sɛ fo Feyin əbtaawe se Joon ge əb yɛ foo moo se ghele moo fo wel-a? 5Ghene me se bekte ge: Ghɛsen suuy ge fo Feyin, é əb me bif ge: Ghɛn jia beeme se wen bek ghɛ? 6Dî nɛ ghɛsen suuy ge fo wel, é ghel ghɛ ɛ́ luun fɛn təmle ghɛsen nɛ̀ ɛtiye bek ka ghene nè beemen ge Joon lu nfekte. 7Ghene me fise ge: Ghɛse báà se ke ghaa əb nè lòòn. 8Jesus me suuy ge: Fene mɛ jia fekte sɛy ghaa mɛ fiin əbtaawe se yɛ nɛɛye əbnəə vin so.

Ngan kum ghel ɛylem ɛbee

(Mat 21.33-46; Mak 12.1-12)

9Jesus me gese maa ngan ɛylee se ghene ge: Wel əblee nè lô dise ɛylem əmtam mɛ ɛ́ sɛɛ fɛl əmnduk so, è vii ghel ɛlemene se ten, è lòò è ndu è chii naa se əbtəm. 10Əbliy ɛykoy əmtame nɛy kwɛn, əb tum wel ɛyfɛl nə wen əblee ge əb ndu è fii mii mɛ əmtam se ghel ɛylem ghii. Ghene sɛy tɛl wen è jum, əb fiile ɛghoo ɛyum. 11Əb gese tum wel ɛyfɛl nə wen əblee, ghene tɛl wen, è nyable so ɛ jii ɛybee, è jum əb fiile ɛghoo ɛyum. 12Əb gese tum əblee ge ɛtal əb ndu, ɛ́ tɛl wen, è lɛmse, è fəyse se ɛylem è mak se bɛy.

13Ba ɛylem me kante ge: Mɛ nɛɛy lɛɛy? Mɛ nɛ̂y tum wán ə wom wɛ mɛ koŋen, ɛ lefelee ghene ngvəmle wen. 14Wan vi nɛ̂y ndu, ghel ghii yɛn wen è chəmten ge: Vin lu nyiɛ ndaa nə Ba ɛylem, ghɛse yuy wen, è yof ɛyleme ten. 15Ghene me dom-dom wen è fəy so se ɛylem fo, è yuy. Jesus me bif se ghene ge: Ghɛne kwaate ge lòó ba ə ɛylem nɛɛy ghɛ se ghele tene? 16Əb nɛ̂y gwiy, è yuyte ghene, è fo ɛyleme ten se ghel ɛchine. Ghele yio è suuy ge: Feyin ko tɛɛke fɛ ke yî gan. 17Jesus soo ɛshiɛ ɛ ghene əbghun è bif ge: Kenəə kɛ ɛ́ nè nyaken ɛ ŋwaale-Feyin ge: “Ɛytiy yɛ ghɛ́ kembome nè maayen, shi ɛyghene yɛ ɛy token ɛybuu ndaa.” 18Naa ndɛ wɛ əb diamten ɛ ɛytiy fo lòó əb lɛm ɛ jii ɛybee, ɛy fɛy ɛ naa ndɛ əbghun, é ɛy jɛm wen jɛmen.

Kenəə kum ɛylake shile

(Mat 22.15-22; Mak 12.13-17)

19Jesus maa ngan yi di, ghɛ́ ɛydinte tesake ghene ghele mbiy se ghɛ́ ntaŋlee keele ge əb maa bek ghene, è me se kɛŋe se koo wen kɛn se əbliy, dî è fan ghel. 20Ghene se kiye ɛyjɛl ə wen se ɛytof, è tum ghel ɛyshiɛ ɛ́ se fefse ge ɛ́ lu ghel ɛjuŋe, ka Jesus loo suŋnen, é ghene koo kenəə ɛ wen əbchio, è me fo wen se ghɛ ɛysake gese nɛ̀ se Goveno. 21Ghɛ ɛyshiɛ ghii bif se wen ge: Dinte, ghɛs ke ge wɛ̀ suuye gese dinte kenəə kɛ luun kɛ́ əbluuye, dine wiy əmndun-ndun, gese yiɛke nɛ lu kenəə kɛ Feyine kɛŋen ge wɛ̀ yɛ nɛɛy. 22Ke lu ɛ titiy ge ghɛs yɛ lake shile se əbfon ə wɛ̂ Lûm moo ɛngaŋ-a? 23Jesus keele ge ɛ́ gofe wen gofen, è suuy se ghene ge: 24Ghɛn din əbkaa kekas se mɛ, ɛ́ din, əb bif ge Lu ketuu ndɛ gese nɛ̀ ɛyghel ə ndɛ ɛ ten? Ghene fise ge: Lu yɛ əbfone. 25Əb me suuy se ghene ge: Ghɛn fó yi kɛ əbfone se əbfon, è fo kɛ Feyine se Feyine. 26Əbchio yum ghene, ghene gok ɛ chichi bek ka ghene nè báà se ki kenəə kɛ toy wen so ɛ ghele ɛyshiɛ.

Feyine náà lose ghel se ɛykuo

(Mat 22.23-33; Mak 12.18-27)

27Sadduseese nè lu ghel ghɛ ɛ́ nè báà se beeme ge Feyine yî lose ghel se ɛykuo, ghene ɛlee gwiy se Jesus, 28è bif se wen ge: Ndinte, Moses nè nyak ɛ ghɛsene nchil ge: Wel kuo ki əbvii ghàà ghon, fene wan-no ə wel əbkuon lu se lɛm əbvii ten é ghene wen yɛ bii ghon ge ghɛ́ wel əbkuone. 29Ghone-nyii ɛlee nè lô se lu saamba, wɛ ngɛsewel kiile əbvii è nɛy kuo nɛ ghene wen bɛɛy ghàà yɛ ki ghon. 30Kenkumtene lɛm əbvii vi, è kuo ghàà wán, 31ɛybame wene lɛm è kuo ghàà wán. Ke me gan ge ghene ghɛ ghel saamba kuo nɛ ɛ́ báà lɛm ghon. 32Se ɛybam, əbvii vi kuo sɛy. 33Feyine nɛ̂y lose ghel se ɛykuo, é əb yɛ lu wiy ə ndɛ nɛ ghene nè liɛmen wen se əbvii ghel ɛjim? 34Jesus fise ge: Lu ɛ ketuu ntiɛ fɛn nɛ ghele chintene ka əbkiy ghene ɛlume, 35se lu nɛ ghel ghɛ Feyine náà lose se ɛykuo ɛ mbi yɛ ɛygwiyene jia náà yɛ chinten ka əbkiy ghene ɛlume. 36Ghene jia bo yi kuo, bek ge ghene lu ka nchiyse-ndaa nə Feyine. Ghene loolemen se ɛykuo è se lu ghon ə Feyin. 37Moses nè lô din ɛ fengaan fɛ əb nè nyaken kum fekak fɛ əbvəse nè baalen ɛ ten ge ghele kuo kase loole. Əb nè toŋte Bay ɛ fengaan fo ge: Feyin ə Ablaham, nɛ̀ Ayzek gese nɛ̀ Jakob. 38Feyine báà se lu Feyin ə ghel ɛkuone bek ge lu se wen nɛ ghel ɛjime bo chii. 39Ghɛ́ ɛydinte tesak ɛlee suuy se wen ge: Ndinte, wɛ̀ suuy kejuŋ. 40Ghene jia gese mom ge bif ɛybif se Jesus.

Ɛybif kum Vi wɛ Feyine nè Yiosen

(Mat 22.41-46; Mak 12.35-37)

41Jesus me bif se ghene ge: Lòó ɛ́ yɛ suuy lɛy ge Vi wɛ Feyine nè Yiosen nɛ̂y yɛ lu wel ɛykfəə nə David? 42Nɛ David se wen ə ngeŋ nè nyak ɛ ŋwaale Salm ge: “Bay nè suuy se Báàba ə wom ge: Diom ɛ mɛ əbkoy əbtaa, 43se chin se ka mɛ nɛ̂y nyiŋse mbanen ə shiɛ ɛ wɛ̀ ɛyhiɛ, é wɛ̀ yɛ tom ɛvəə ə ghiɛ ɛ ghen ə əbtuu ka kegokten.” 44Lòó Vi wɛ Feyine nè Yiosen yɛ lu lɛɛy wel ɛykfəə nə David, nɛ David nè toŋte wen ge Báàba.

Jesus tef ghon-ɛyfɛl nə wen

(Mat 23.1-36; Mak 12.38-40)

45Se lu nɛ ghel ɛjime bo yiote kenəə kɛ Jesus nè suuyen, əb suuy se ghon-ɛyfɛl nə wene ge: 46Ghɛn yɛ bààme ghɛ́ ɛydinte tesake. Ghene koŋe se yɛ kaale nɛ ɛ́ mak dalese, koŋe ge ɛ́ yɛ chakte ghene nɛ̀ ɛyvəme əblik əbwɛy, koŋe se yɛ diom ɛ əblik əbtaa ɛ ngayse ɛyjem gese koŋe se yɛ diom ɛ əblik əbtaa ɛ kelik ɛyyiɛ ɛyghuye. 47Ghɛne fii əbfua əbkiy-nkfə, dî fefse ghel nɛ̀ ɛyjem ɛydia yɛ ghɛne jemen. Bek kii nɛ̂ kine, Feyine náà mak ngɛk ɛytaa se ghɛn.

Currently Selected:

Luk 20: oku

Highlight

Copy