Luk 18

Ngan kum wiy-nkfə ghene wel ɛysak əbbee

1Jesus me maa ngan yin se ghon-ɛyfɛl nə wene, se dinte se ghene ge ghene lu se yɛ jem əbliy əbjim bole wiy. 2Əb nè kɛɛte ge: Wel ɛysak əblee nè lô se lu ɛ ntɛk ɛylee, fane wiy Feyin, ngvəmle wiy ghel; 3nɛ wiy-nkfə əblee chii ɛ ntɛk fo. Əb nè lóó əb yɛ nduu se wel ɛysak vi lone wen ge: Kiy wɛ̀, fii mɛ se ɛghoo nə wel əbbaanese nə mɛ. 4Nè lu se əbtəm nɛ wel ɛysak vi bene wiy, è nɛy loo è suuy se ngeŋ ə wen ge: Chèmè lu ka mɛ fanen wiy Feyin, ngvəmle wiy ghel, 5mɛ tenen nsak ə wen bek ka əb fóon ngɛk san se ŋaŋ, buu dì é əb nɛ̂y yuy mɛ nɛ̀ ɛygwiye wene yɛ ŋaŋe.

6Jesus maa di, è suuy ge: Ghɛn lɛ lu nɛ ɛ́ yio kenəə kɛ wel ɛysak əbbee vin suuyen-a? 7Feyine lɛ jia nɛ̂y ben nsake ghel ghɛ əb chokenmen ge ghɛ́ wene ghɛ ɛ́ toŋen se wen nɛ̀ nchuy, nɛ̀ ntəke ge əb giamten ghene-a? Lɛ lòó əb nɛ̂y yɛ sekte sekten se giamten ghene-a? 8Mɛ suuy se ghɛn ge: Feyine nɛ̂y fiɛlé fiɛ́lén, è ben nsak ə ghen. Wanwel lɛ nɛ̂y loo gwiy, è baksen ghel ɛ ketuu ntiɛ fɛn ghɛ ɛ́ samsen se Feyine-a?

Ngan kum Wele Kenone Falisee ghene wel ɛyfii shile

9Jesus maa sɛy ngan ɛylee se ghel ghɛ ɛ́ kwaaten ge ghene lu ghel ɛjuŋe, nyayse ghel ɛlee nyaysen ge: 10Ghel ɛbaa nè lô kok ɛ ndaa-ɛykokse se jem, əblee nè lu wele Kenone Falisee, nɛ əblee lu wel ɛyfii shile. 11Wele Kenone Falisee vi kokte, è teem wen nyiŋ è se jeme kum ngeŋ ə wen ge: Mɛ bɛ́ɛ̀lè wɛ̀ Feyine bek ge mɛ báà se lu ka ghel ɛlee. Mɛ choŋe wiy, nɛɛye wiy mbee, liɛ wiy əbkiy ə ghel, naa ɛŋaŋ ɛŋaŋ mɛ wiy ka wel ɛyfii shile vin. 12Mɛ bame əbfua-əbyíɛ́ne kaŋ ɛbaa se əbwɛy, mɛ giate əbfua ə wom əblik ɛyvəm, mɛ fo kelik kemok se wɛ̀. 13Wel ɛyfii shile vi teem ɛ ɛybam ɛybam, è jia cheme lose ketuu se kiye Feyin, soo ketuu, è vii əmwɛm è suuy ge: Koosen ɛysen sane Feyine bek ge mɛ lu wele mbeese. 14Mɛ suuye se ghɛn ge wel ɛyfii shile vi nè chio se wen ə ndaa lu kelanen ɛ ɛyshiɛ nə Feyine chia wele kenone Falisee vi. Bek ge Feyine nɛ̂y səkse naa ndɛ wɛ əb yion əbghun, è lose naa ndɛ wɛ əb liɛn ngeŋ ə wen ɛ ntiɛ.

Feyine Koŋe Ghon Ɛtɛlɛɛ

(Mat 19.13-15; Mak 10.13-16)

15Ghel ɛlee nè gwiy nɛ̀ ghon ɛtɛlɛɛ ge Jesus kum nɛ̀ keghoo nzəətee. Ghon-ɛyfɛl nə wene yɛn, è sɛ́y se yole ghene yolen. 16Jesus me jaŋ ghone ten è suuy ge: Ghɛn vəse é ghene gwiy se mɛ, ghàà ghɛn se jum ghene bek ge Feyine koŋe ghel ghɛ ɛ́ liɛn ngeŋse ghen ka ghon ɛtɛlɛɛ. 17Mɛ suuye əbluuy se ghɛn ge: Naa ndɛ wɛ əb báà beeme ɛysak ə Feyin ka wán əbtɛlɛ, jia yî lii se ten.

Ketaa nɛ Wel Əbghaken kiile ɛyboy

(Mat 19.16-30; Mak 10.17-31)

18Wele mbiy əblee nɛy bif se wen ge: Ndinte, wɛ̀ lu wel əbjuŋ. Lòó mɛ nɛɛy ghɛ se geese kiile ɛychii yɛ ɛy jia yî mɛy?

19Jesus fise ge: Lu bek ghɛ wɛ wɛ̀ toŋten mɛ ge wel əbjuŋ. Wel əbjuŋ báà se lu buu kɛn Feyin wen nyiŋ. 20Wɛ̀ ke nchil sɛ ge: “Ghàà liɛ wiy ə wel, ghàà yuy wel, ghàà yɛ choŋ, ghàà toy kenəə ɛ wel əbghun, ngvəmle ba ə viɛ ghene no ə viɛ-a.”

21Wel vi suuy ge: Mɛ nè se lɛme tesak tin tejim se kɛ̀ɛ̀tè se əmtɛlɛ. 22Jesus yio kii nɛ̂ kine, è suuy se wen ge: Kenəə bɛɛy kemok kɛ lòó wɛ nɛɛy. Ndu, è feene əbfua ə viɛ əbjim, è fo əbkaa ten se ghɛ ketane, è me yɛ jumte ɛybam ə yom, wɛ nɛɛy di é wɛ̀ me yɛ ki əbghaake ɛyyio. 23Əb yio dì è soo ketuu bek ka əb nè kiin ɛykɛŋ naa se ŋaŋ.

24Jesus kiy wen è suuy ge: Ketaa ka wel wɛ əb kiin ɛykɛŋ se ŋaŋ lii se kelik ɛysak nə Feyine. 25Ke bonen se nyam fenkok se chia ɛ kebuke tas chia ka wel əbghaken yɛ lu wel əblee ɛ məme ɛysak nə Feyine. #18.25 Nyam fenkok nɛ̂ yi lu nyam ɛylee yɛ ɛ sɛɛ lu əbkwake kesɛsɛy nɛ é toŋte əblame mekale ge Kamel.

26Ghel ghɛ ɛ́ nè yion suuy ge: Ke lòò è yɛ lu dì, fene naa boy ndɛ?

27Jesus fise ge: Kenəə kɛ ke ghaken ghel lu nɛ lòó ke jia ghak Feyin.

28Bita me suuy ge: Yɛn-a! Ghɛs vəsemen əbnəə ə wɛs əbjim è se jumte ɛybam ə yiɛ. 29Jesus me suuy se ghene ge: Mɛ suuye əbluuy se ghɛn ge: Wel wiy wɛ əb vəsen kebɛy ə wen, kene wiy ə wen, kene ghone-no ə wen, kene ba ə wen ghene no ə wen, kene ghon ə wen bek kelik ɛysak nə Feyine, 30é əb náà buu se kiile əbdione ɛ mbi fɛn gese nɛ̀ ɛychii yɛ ɛy jia yî mɛy ɛ mbi yɛ ɛy gwiyen.

Jesus gese suŋnen kum ɛykuo ə wen

(Mat 20.17-19; Mak 10.32-34)

31Jesus nɛy lòò è liɛ ghɛ ntum nə wen ghɛ njio-sebaa ɛyvəm ghene ghene bak əbghun, əb suuy se ghene ge: Kiy mba! Ghɛsen se koke ɛ Jolesalem ghaa əbnəə əbjim wɛ ghele ntum nə Feyine nè nyakenmen kum Wanwele nɛ̂y kwɛn. 32Ɛ́ nɛ̂y fo wen se ghel ghɛ báà se lu ghele Islael, ɛ́ buu wen, è tɛyle wen, è tio teliɛ ɛ wen ɛykek. 33Ɛ́ nɛ̂y tɛl wen, è yuy, é əbchii lun əbtal, əb kase loole se ɛykuo. 34Ghon-ɛyfɛl ghi jia keele əbnəə wɛ əb suuyen. Ghene nè báà keele əbnəə wɛ tene bek ka Feyine nè leten se ghene.

Jesus yiase ɛshiɛ kenfef

(Mat 20.29-34; Mak 10.46-52)

35Jesus nɛy loo bɛɛte Jeliko, è yɛn kenfef nɛ ke diom ɛ ɛyghaŋe jii è se lone əbfua. 36Ke yio ka kenone ghele chian, è bif ge sɛ gane ghɛ-a? 37Ɛ́ suuy se wen ge: Chia Jesuse wɛ̂ Nazalet. 38Əb me jaŋ ketaan ge: Jesus wɛ wán Əbfon wɛ David, koosen ɛysen se mɛ. 39Ghel ghɛ ɛ́ nè nduun ɛ mbiy se wamnen wen suuye ge: Yɛɛ lu ɛ chichi. Əb sɛ̂y gese jaŋ ketaan ge: Wan Əbfon wɛ David, koosen ɛysen se mɛ!

40Jesus teem è suuy ge, ɛ́ gwiy nɛ̀ wen se yi, ɛ́ gwiy so, Jesus bif se wen ge: 41Wɛ̀ kɛŋe ge mɛ nɛɛy ghɛ se wɛ̀? Əb fise ge: Báàba, mɛ kɛŋe se yɛ yɛn əblik.

42Jesus me suuy se wen ge: Yɛɛ yɛne əblike. Ɛytem yɛ wɛ foon san nɛɛymen wɛ̀ bonen.

43Ka Jesus suuyen dî ɛ leghɛ, ɛshiɛ kenfef ki me yìàse, əb se jumte ɛybame Jesus foo ɛykokse se Feyine.

Currently Selected:

Luk 18: oku

Highlight

Copy