Luk 15
15
Ngane Bvəy-njiɛ yɛ ɛy nè Lɛyen
(Mat 18.12-14)
1Ghel ɛyfii əbkaa shile naa ɛjim, nɛ̀ ghel ə mbeese ɛlee me kokte gwiy se yiote ɛyyíɛ́ke ə Jesus. 2Ghele kenone Faliseese, nɛ̀ ghel ɛydinte tesake yɛn, è me se vəke, suuye ge: Wel vine choksen ketuu se yɛ fiisen ghel ə mbeese, gese yiɛ naa ghene ghene. 3Jesus me maa ngan yin se yiɛke ghene ge: 4Wel se ghɛn lɛ ki bvəyse-njiɛ əbviɛ, yɛ ɛymoke lɛy, é əb nɛɛy lɛɛy? É əb jia vəse sɛ njiose-buumok əmbuumok se əbkwak, è yɛ sas əblik kɛŋe yɛ ɛy lɛyen se ka əb nɛ̂y yɛn-a? 5Əb yɛn, əb liɛ è bɛɛy se wene mbɛk, è yɛ saŋle kfəəye so. 6É əb kfəəy dî, è me jaŋte sunse wen, gese nɛ̀ ghel ghɛ ɛ́ chiin baksen se wen, è suuy ge: Ghɛn gwiy, é ghɛsen saŋle bvəy njiɛ nə mɛ yɛ ɛy ne lɛyen, mɛ kase yɛn. 7Jesus mɛyse ngan yin, è me suuy ge: Ghɛn keele ge lu kɛn ghɛɛ-ghɛɛ ka ɛysaŋle ɛyghakene náà yɛ lu ɛyyio bek wel ə mbee əbmok, wɛ əb kubsen ɛytem ə wen, è beeme Feyin, chia ka lòó ɛy yɛ lu se ghel njiose-buumok əmbuumok ghɛ ɛ́ báà se ki shii se kubsen tetem ə ghen.
Ngan əbkaa wɛ əb nè Lɛyen
8Moo əbvii lɛ ki əbkaa kabase ɛyvəm, yɛ ɛymoke lɛy, əb nɛɛy lɛɛy? Əb chək əbkaaken, è yɛs ndaa ɛybam-ɛybam, è kɛŋ se chin ka əb yɛn. 9Əb yɛn, əb jaŋte sunse wen, gese nɛ̀ ghel ghɛ ɛ́ chiin báksen se wen, è suuy se ghene ge: Ghɛn gwiy, é ghɛsen saŋle kábà ə yom yɛ ɛy ne lɛyen mɛ kase yɛn. 10Jesus mɛyse ngan yin, è me suuy ge: Ghɛn keele ge lu kɛn ghɛɛ-ghɛɛ ka ɛysaŋle náà yɛ lu ɛ məm nə nchiyse-ndaa nə Feyine, bek wel ə mbee əbmok, wɛ əb kubsen ɛytem ə wen, è beeme Feyin.
Ngane wan wɛ əb nè Lɛyen
11Jesus gese se dinte əbnəə nduu ɛ mbiy ge: Wel əblee nè lô se ki ghon ɛbaa. 12Wane wɛ̂ ɛybam náà me lòò è suuy se wen ge: Bàá, gia əbtik, è fo ɛybee ə yom san. Əb me gia əbtik vi se ghon ə wen ghi ɛbaa. 13Se lu kɛn ɛybam əbchii se ɛylaay, wane wɛ̂ ɛybam vi me feene wɛ wene wɛ əbtik, è fii əbkaa ten, è lòò. Əb nè lòò dî, è ndu ɛ ketum kelee naa əbtəm, è kfəl əbkaa vi se kengan naa əbjim. 14Əb kfəl əbkaa vi mɛyse ɛ leghɛ, jeŋ me koo ɛylak fo, naa nɛ əb bo ki wiy kefaa se yiɛ se nkan. 15Ke ghak, əb me ndu è yɛn wele wɛ̂ ɛylak fo əblee, è nyiim ɛ wen ɛytaŋ ɛyfin, ge yi yɛ fɛl se wen. Əb me tinse wen ge əb ndu, è yɛ toknen nɛ lu nɛ̀ nkfəənyamse. 16Əb me ndu è se toknen so, nɛ wel chèmè foo wiy naa kefaa ge əb yiɛ. Əb lóó əb me yɛ kiy ge, kè lòó yi ko yiɛ kul ə nkfəənyamse. 17Ɛ leghɛ, ɛytof ə wene kase yɛmen, əb bif se ngeŋ wen ge: Lɛ kuo mɛ jeŋ lɛ, nɛ ghel ghɛ ba ə wom laken laken, nɛ ɛ́ fɛle se wen ki əbfua-əbyíɛ́ne, nɛ əb ghake ghene se yiɛ-a? 18Mɛ kase fiile è ndu nyiim ɛ ba ə wom ɛshiɛ, è suuy se wen ge: Ba ə wom, mɛ lu nɛ mɛ nɛɛy mbee se Feyine gese nɛ̀ se wɛ̀. 19Mɛ bo bɛɛy wiy kekwɛnten se yɛ lu wán ə viɛ, liɛ mɛ kɛn ka wel ɛyfɛl nə wɛ̀ əblee. 20Əb kwaate di, è me lòò è kase fiile, è se nduu se yɛne ba ə wen. Ka əb nduun, è tum bo bɛɛy naa əbtəm, ba ə wen yɛn wen, ketuu lum wen. Əb tum, è loole, è nyiŋ, è ndu è baamé wán vi, əmshiɛme se səəke ɛ wen ɛshiɛ. 21Wán ten me suuy ge: Bàá, mɛ lu nɛ mɛ nɛɛy mbee se Feyine gese nɛ̀ se wɛ̀. Mɛ bo bɛɛy wiy kekwɛnten se yɛ lu wán ə viɛ. 22Əb suuy di, Ba ə wen sɛy jaŋ è suuy se ghele ɛyfɛl nə wen ge: Ghɛn gwiy nɛ̀ ndəy se juŋe chikiy, è mak se wen əbghun. Ghɛn gwiy nɛ̀ fenchake, è vii se wene keghoo, è gese tuŋ guose ɛvəə se wen ɛvəə. 23Ghɛn gese ndu, è koo na ɛyghaken, è sɛɛ è naay, é ghɛsen kfəl, è saŋle wán vin, 24bek ge mɛ nè liɛmen ge wan wom vin nè kuomen, se lu nɛ əb bo bɛɛy kɛn naa əbtaa. Əb nè lɛymen, mɛ kase yɛn wen. Əb suuy di, ɛ́ me se yíɛ́, bine, saŋlee.
25Nè lu di, nɛ wane wɛ̂ mbiy lu ɛylem. Əb nɛ̂y lòò, è loo kfəəy se baksene kebɛy, è yio nɛ kebine fuo-fuon. 26Əb me kwas wán-ɛyfɛl nə ba ə wen əblee, è bif ge: Gane ghɛ ɛ bɛy fɛn? 27Əb fekte se wen ge: Wan-no ə viɛ lu nɛ əb kase gwiy lu əbghun əbtaa, ba ə viɛ yɛn wen, è se saŋlee, è me suuy ge ɛ́ sɛɛ na ɛyghaken ɛ́ yiɛ se saŋle ɛygwiy ə wen.
28Əb yio dî, è me yafse əblɛɛ, è tɛn ge yi jia lii se ndaa fo. Ba ə wen me fəy, è se beŋte ge əb lii. 29Əb fise se ba ə wen ɛ əblɛɛ əblikene ge: Keele ge mɛ fɛlmen se wɛ̀ kɛn ka kekos se ngukse, nɛɛy naa əbnəə əbjim wɛ wɛ̀ làmen ge mɛ nɛɛy. Wɛ̀ ne tesemen fo ghɛ san? Chèmè kɛn naa fewán ə bvəy ge ghɛse sun some yíɛ́, è saŋle. 30Leenen ka wan viɛ vin wɛ əb nè feenen əbfua viɛ, è ndu kfəl əbkaa ten ghene əbkiy ɛjɛ́lene gwiyen, wɛ̀ me sɛɛ na ɛyghaken se wen. 31Ba ə wen me fise ge: Wan wom, lu ghɛsoo fɛn əbliy əbjim, nɛ̀ əbfua əbjime wɛ mɛ kiin lu viɛ. 32Dî, nɛ jofe ge ghɛsoo saŋle ɛygwiy ə wan-no ə viɛ yin. Ɛ́ nè kwaate ge əb nè kuomen, əb kase gwiy lu əbghun əbtaa. Əb nè lɛymen, ghɛsoo kase yɛn wen.
Currently Selected:
Luk 15: oku
Highlight
Share
Copy
Want to have your highlights saved across all your devices? Sign up or sign in
©CABTAL, 2012
