Luk 14
14
Jesus chuk Wel ɛ Kechii Ɛybam
1Nɛy se lu ɛ kechii ɛybam kelee, Jesus ndu se yiɛ ɛ ndaa nə wele mbiy nə Falisee əblee. Ghel ghɛ ɛ́ nè luun fo me tam ɛshiɛ è se kiye wen. 2Yɛn kɛn ka ɛ́ nɛɛyen dì nɛ wel əblee tiy ɛ wen ɛyshiɛ, nɛ əb yafe nɛ̀ ŋwɛf. 3Jesus me bif se ghɛ́ ɛydinte tesake gese nɛ̀ ghɛ́ Kenone Falisee ge: Ɛysake beeme ge ɛ́ chuk wel ɛ kechii ɛybam moo ɛngaŋ-a? 4Ghene sɛ́y gok ɛ chichi. Jesus me ghal wel vi, è chuk, è suuy se wen ge əb yɛ kfəəy. 5Jesus me bif se ghene ge: Lu ndɛ ɛ ghɛne məm wɛ əb lòòn, è yɛ ki wán kene nyam, ɛy too se ɛybee moo ɛ kechii ɛybam, é əb jia fəyse chikiy? 6Ghene jia se ki kenəə se suuy.
Wɛ̀ səkse ngeŋ ə yiɛ, é Feyine lose wɛ̀
7Jesus nɛy yɛn ka ghele gwiyen liɛn əblik əbtaa se geese diom ɛ ten, ɛ ndaa nə wele Kenone Falisee vi, è me maa ngan yin se ghel ɛjime ge: 8Wel bee wɛ̀ nɛ̀ əbjene, wɛ̀ ndu, ghàà wɛ̀ diom ɛ kelik ketaa, bek ge lòó yɛ lu nɛ ba əbjen kè lô bee wel əblee so wɛ əb chian wɛ̀. Wɛ̀ lòò è diom nɛ lu ɛ kelik ketaa, 9é wel wɛ əb kè jaŋen ghɛn gwiy, è suuy se wɛ̀ ge: Loole é wel vin diom, é wɛ̀ loo nɛ̀ kenghuumene è liɛ ketiɛ kɛ nchɛke. 10Ɛ́ náà jaŋ wɛ̀ se kenəə mba, wɛ̀ ndu, wɛ̀ diom nɛ lu ɛ kelike kɛ nckɛke, ka ba kenəə nɛ̂y gwiy è suuy se wɛ̀ ge: Sun ə yom, gwiye è diom ɛ kelik kejuŋe. Ke gan dì, é wɛ̀ yɛ ki ɛyvəm ɛ ɛyshiɛ nə wel əbjim fo. 11Ghɛn yɛ ke ge lose ndɛ ngeŋ ə wen fene Feyine yî səkse wen, səkse ndɛ ngeŋ ə wen fene Feyine yî lose wen.
12Jesus me suuy se wel wɛ əb kè jaŋen wen ge: Wɛ̀ loo jaŋe ghel ge ɛ́ gwiy è yiɛ əbfua-əbyíɛ́ne, ghàà wɛ̀ jaŋ sun ə shiɛ, kene ghone-no ə viɛ, kene ghele ndaa nə ghɛn, kene ɛbaa əmkaa ghɛ ɛ chiin báksen se wɛ̀. Wɛ̀ jaŋ ghene é ghene nɛ̂y kase jaŋ wɛ̀ è seese əbfua ə viɛ. 13Wɛ̀ loo lu se yiɛse ghel, wɛ̀ bee nɛ lu ghɛ ketane, nɛ̀ ghel ɛləmmene ka ghɛ ɛ́ ngɛsen ngɛsen, gese nɛ̀ əbnfefe, 14é Feyine nɛ̂y mɛ bose wɛ̀, bek ka ghel nɛ̂ ghine lòó ɛ́ jia seese əbfua ə viɛ. Ɛ́ yî yɛ lu ɛ kechii kɛ ghel ghɛ ɛ́ nè nɛɛyen əbnəə wɛ Feyine koŋen loolen se ɛykuo, é Feyine me lak wɛ̀.
Ngan Kum Ɛyyiɛ yɛ Kelik Ɛysak nə Feyine
(Mat 22.1-10)
15Jesus suuy dì ɛ leghɛ, wel əblee wɛ ghene ghene nè yiɛn me bente ge: Ke lu kejuŋ se wel wɛ əb yî yiɛ ɛ kelik ɛysak nə Feyine.
16Jesus me fiɛl se wen ge: Wel əblee nè lô se baate se yiɛse ghel, è me bee ghel naa se ɛydio. 17Əbliye tene nɛy kwɛn, əb tum wel ɛyfɛl nə wen ge əb ndu è suuy se ghel ghɛ əb nè been ge: Ghɛn gwiy, əbfua əbjime shi əbbaaten. 18Əb ndu è teefe ɛ leghɛ, ghene me kɛɛte se yɛ lone jii femok femok. Wele wɛ̂ mbiy suuy ge: Mɛ ne lô yun ɛylem, nɛ̀ mɛ lu se ndu se kiynen. Kiy wɛ̀ ghàà ghɛn yɛ ghame mɛ. 19Əb yɛn əblee, əb suuy ge: Mɛ chî yun naase ɛylem nə mɛ ɛyvəm nɛ mɛ se shike se mom. Kiy wɛ̀, ghàà ghɛn yɛ ghame mɛ. 20Əb yɛn əblee, əb suuy ge: Mɛ kooy wiy ə wom kɛn ɛ əbchii fɛn, nɛ loo mɛ jia gwiy.
21Wel ɛyfɛl vi fiile è fekte ɛyjɛl ə wen se ba-ɛyfɛl nə wen. Babɛy vi yio ke yaf wen naa se ŋaŋ, əb gese tum wel ɛyfɛl nə wen vi ge: Ndu ɛ jiise naa sejim ɛ məme ntɛk chikiy chikiy, è gwiy nɛ̀ ghɛ́ ketane, nɛ̀ ghel ɛləmmene ka əbnfefe nɛ̀ ɛngɛsene. 22Əb ndu, è gwiy, è suuy ge: Babɛy, mɛ jɛlmen ka wɛ̀ kè suuyen, kelike gese bɛɛse. 23Ba ɛyfɛl vi me gese suuy se wen ge: Ndu ɛ leenen è jɛl jii setaa gese nɛ̀ əbfiaŋe, è lam é ghele gwiy, ka ndaa ə yome lun. 24Mɛ suuy se ghɛn ge, wel wiy ɛ məme ghel ghɛ mɛ nè been se mbiy ghi wɛ əb nɛ̂y ləmte əbfua-əbyíɛ́ne nə mɛ.
Ngɛk se yɛ lu Wán-ɛyfɛl nə Jesus
(Mat 10.37-38)
25Jesus se nduu nɛ feliɛ wele chem ɛ wen ɛybam, əb benle è suuy se ghene ge: 26Naa ndɛ wɛ əb gwiyen se mɛ, è jia yɛ koŋe mɛ chia ka əb koŋen ba ə wen ghene no ə wen, koŋe wiy mɛ chia ka əb koŋen wiy ə wen nɛ̀ ghon ə wene, koŋe wiy mɛ chia ka əb koŋen ghone-no ə wen, gese koŋe wiy mɛ chia naa ka əb koŋen ngeŋ ə wen, lòó əb jia yɛ lu wán-ɛyfɛl nə mɛ. 27Naa ndɛ wɛ əb gwiyen ɛ mɛ ɛybam è jia yɛ lu kebaaten se bɛɛy kentam ə wen se yɛ jɛl so ɛ mɛ ɛybam, lòó əb jia yɛ lu wán-ɛyfɛl nə mɛ.
28Wele ghɛn lɛ kɛŋe se bakle ndaa ɛyghaken, é əb jia chia mbiy è feknen ge yi sɛ ki əbkaa əbkwɛnen ka lòó yi baklé so é ɛy mɛy-a? 29Əb jia feknen dì, è vii kɛn ketiɛ, è jia bàklè ndaa, é ghel ɛjim ghɛ ɛ́ yɛnen me yɛ chɛke wen, 30suuye ge: Biɛ vin chî kɛɛte kebakle, ke ghak wen.
31Kene əbfon lɛ kè ki ghel ɛyghoŋ nkam ɛyvəm è taame ɛyghoŋ se əbfon əblee nɛ əb ki ghel ɛyghoŋ nkam əmbaa, é əb jia kɛɛte è diom, è kwaate ge sɛ lòó ghel ə ghii ghɛ nkam ɛyvəm noo ghɛ nkam əmbaa-a? 32Əb loo kiynen, ke ghak, é əb tum ghel ɛ́ ndu è yɛn əbfone vi di nɛ əb bo bɛɛy naa əbtəm è beŋte é kenəə tene chia. 33Ke me se lu ge naa ndɛ ɛ ghɛne məm wɛ əb báà fəyse ɛytem se wen ə əbfua wɛ əb kiin əbjim, è yɛ jumte mɛ, lòó əb jia yɛ lu wán-ɛyfɛl nə mɛ.
Fengwaŋe Leme wiy ɛ́ maay
(Mat 5.13; Mak 9.50)
34Kéné ghɛn ke ge fengwaŋe lu kefaa kejuŋe, dî nɛ fe lòò è jia yɛ lem, fene jii wiy yɛ lòó ɛ́ nɛɛy é fe kase lem. 35Fe loo è jia gese yɛ lem, fene shi kefaa lólò nɛ̀ lòó ɛ́ səs kɛn səsen bek ge fe báà cheme gese jof se ɛylem, nɛ lòó fe jia bo nɛɛy é kelike bol. Naa ndɛ wɛ əb kin əbtuule se yio, əb yio.
Currently Selected:
Luk 14: oku
Highlight
Share
Copy
Want to have your highlights saved across all your devices? Sign up or sign in
©CABTAL, 2012