Luk 1

Ɛychakte

1Babɛy Teofilus; ghel se ɛydio lu nɛ ɛ́ mommen se nyak kum əbnəə wɛ əb nè ganenmen ɛ ghɛsene məm. 2Ghene nè nyak kɛn ghɛɛ-ghɛɛ ka ghel ghɛ ɛ́ nè yɛnen əbnəə wɛ́ tene se kenkɛɛte nè fekten se ghene, me se lu ghel ghɛ ɛ́ fekten nduun nɛ̀ əbnəə nɛ̂ vine. 3Ke lu Babɛy, nɛ mɛɛ mɛ sɛ̂y lootemen biinen əbnəə nɛ̂ vin naa əbjim se ka əb nè kɛɛten, è me yɛn ge jofe ge mɛ loote siyse əbghene è nyak se wɛ̀. 4Mɛ nyake lɛ ka wɛ̀ me yɛ loote ke əbluuy kum əbnəə wɛ ɛ́ nè dinten se wɛ̀.

Ɛ́ Fekte ɛybii ə Joon Nfoo Moo

5Nè lu əbliy wɛ əbfon wɛ Helod nè saken ɛylake Judea, nɛ wele ntaŋle əblee lu nɛ ɛ́ toŋte ge Zakalia. Əb nè lu ɛ kenon ə ghele ntaŋle kɛ Abija. Əb nè ki əbvii nɛ ɛ́ toŋte ge Elizabet, nɛ lu wán ə Aalon. 6Zakalia ghene Elizabet nè lu ghel ɛjuŋe ɛyshiɛ nə Feyine, yionen se Feyine, lɛme tesak ə Feyin naa tejim, gese ki wiy jas. 7Dî nɛ ghene nè báà se ki ghon bek ka Elizabet nè báà se bii, nɛ ghene gesemen ngɛsen naa se ŋaŋ.

8Naa se lu ɛ kechii kelee əbwɛy wɛ kenon ə Zakalia nè fɛ́len ɛ ndaa-ɛykokse Feyin, Zakalia se siyse ntaŋle, 9ka ɛ́ nè kɛŋenmen ɛ ndee nə ghɛ́ ntaŋlee è chok wen ge əb lii è nyok kelɛy ɛ ndaa-ɛykokse. 10Əbliye kwɛn, ngose wel yɛ ɛy nè luun fo baate se əbchio ndaa-ɛykokse, è se jeme; Zakalia me lii è se nyoke kelɛy. 11È loo sasen nɛ nchiy-ndaa-Feyin tiy ɛ ɛybee əbkoy əbtaa se ketatan kɛ əb nè nyoken kelɛy ɛ ten. 12Keləme gwɛl Zakalia, əb me se fane naa se ŋaŋ.

13Dî nchiy-ndaa-Feyin yi me suuy ge: Zakalia! Ghàà yɛ fan. Feyine yiomen ɛyjem ə yiɛ, nɛ Elizabet wɛ wiy ə viɛ nɛ̂y bii wán əbluumen, é wɛ̀ chio ɛyghel ə wen ge Joon. 14Ɛ́ nɛ̂y bii wán nɛ̂ vin é wɛ̀ yɛ saŋle naa se ŋaŋ, nɛ ghel se ɛydio ləke; 15bek ka əb nɛ̂y yɛ ki fekɛɛy fengaŋtene ɛyshiɛ nə Feyine. Əb jia náà kum əmnduk əmtaa se wen əbchio naa se nkan. Keyioy Kelanene nɛ̂y lun se wen ɛytem è yɛ dine jii se wen nɛ əb bo bɛɛy kɛn ɛ no ə wen əblɛɛ. 16Əb náà kuy è fekte kenəə ə Feyin se ghele Islaele, é ghel se ɛydio kubsen tetem ə ghen, è kase fiile se Báàba Feyin nə ghen. 17Feyine náà fo kediak se wen kɛn ghɛɛ-ghɛɛ ka fe nè foon se wele ntum nə wen wɛ Elija se əmməən, ge əb yɛ ndu ɛ Feyine mbiy, è bense teteme ɛbàá, ɛ́ yɛ koŋe ghon ə ghen, è bense ghel ghɛ ɛ́ yionen wiy se Feyine é ghene keele Feyin, è yɛ lu ghel ɛtofene, è gese siyse ghel ghɛ ɛ́ báà beeme Feyin é ghene beeme, è yɛ lu kebaaten se fiisene wen.

18Zakalia bif se nchiy-ndaa-Feyin yi ge: Lòó mɛ keele se ghɛ, nɛ mɛ ngɛsenmen lɛ, nɛ wiy ə wom ngɛsenmen sɛ̂y? 19Nchiy-ndaa-Feyin fise ge: Lu mɛ Gabliel, nɛ mɛ fɛle se Feyine əbliy əbjim. Lu wen wɛ əb tumen mɛ ge mɛ gwiy è fekte sakghɛ əbjuŋ vin se wɛ̀. 20Yɛn-a! Wɛ̀ yɛ lu kechichi se chin ka əbnəə vine nɛ̂y gan bek ka wɛ̀ báà beeme ntum yin yɛ mɛ gwiyen so, nɛ əbnəə tene nɛ̂y gan ɛ əbliy wɛ Feyine choken.

21Ka Zakalia ghene nchiy-ndaa-Feyine suŋnen nduun se əbtəm dì, ghel ghɛ ɛ́ nè jemen ɛ əbchio ndaa-ɛykokse, chiyte ge Zakalia fəy, me se fane, kante ge əb sɛ bɛɛne moo lɛɛy lɛ-a. 22Əb nɛy fəy è baksen ghel ghi, è loo ge yi se suŋnene ke me ghak. Əb me gok kechichi, è se feke kɛn əbnəə feken. Ghele yɛn dì è me liɛ ge kuumese Feyine di lu nɛ se koo wen ɛ ndaa-ɛykokse.

23Zakalia nɛy mɛyse əbwɛy ɛyfɛl nə wen, è me kase kfəəy se wen ə bɛy. 24Əbliye se keŋte nduu, Elizabet wɛ wiy ə wen me chia nɛ̀ əblɛɛ, è lete ngeŋ wen ɛ məme ndaa, è jia se fəynene ɛ ghele məm se njoŋ setan, suuye ge: 25Yibɛy! Báàba lu nɛ əb cham ɛysen ə yom, kechii kwɛn əb chakse kenghuumen se mɛ ketuu.

Ɛ́ Fekte Ɛybii ə Jesus

26Se lu ka Elizabet nè gufenmen əblɛɛ ə wen vi è chin njoŋ ntuufe, Feyine me gese tum nchiy-ndaa nə wen yɛ Gabliel se ntɛk ə Nazalet ɛ Galilee, 27ge əb ndu è teefe ntum se wándɛ ngon əblee nɛ əb bɛɛy ghàà yɛ ke əbluumen, nɛ ɛ́ toŋte wen ge Mɛɛle, nɛ ke nè shi ke keelen ge əb nɛ̂y yɛ lu wiy ə Josɛf wɛ wel ɛykfəə nə əbfon wɛ David. 28Nchiy ndaa Feyin yi ndu è lii, è chakte Mɛɛle ge: Mɛ chakte wɛ̀! Báàba toknen nɛ̀ wɛ̀, nɛ əb gesemen bose wɛ̀.

29Mɛɛle yio, ke se noo ɛytem ə wen naa se ŋaŋ, əb me se kante ge sɛ lu ɛynkii ɛychakte ɛykɛ lɛ-a? 30Nchiy-ndaa-Feyin yi me suuy se wen ge: Mɛɛle! Ghàà yɛ fan, Feyine lu nɛ Fe buk wɛ̀. 31Yɛɛ ke ge wɛ̀ nɛ̂y chia nɛ̀ əblɛɛ, è bii wán əbluumen, è chio ɛyghel ə wen ge Jesus. 32Əb nɛ̂y yɛ lu wel əbtaa, nɛ Feyin fengaŋtene toŋte wen ge: Wan ə wom, é Báàba Feyin nɛ̂y gese fo əbtaawe se wen, é əb kok ketiɛ è yɛ sak əbfon kɛn ka Ba ɛykfəə nə ghen wɛ David nè saken. 33Əb náà kok əbfon ə ɛykfəə nə Jakob è yɛ sak kɛn saken, nɛ ɛysak ə wene jia yî mɛy.

34Mɛɛle yio di, è me bif se nchiy-ndaa-Feyin yi ge: Lòó ke gan dî lɛɛy, nɛ mɛ bɛɛy ghàà yɛ ke əbluumen? 35Nchiy-ndaa-Feyin fise se wen ge: Keyioy Kelanene nɛ̂y gwiy se wɛ̀, é əbtaawe Feyin fengaŋtene chite wɛ̀ é wɛ̀ chia nɛ̀ əblɛɛ è bii wán. Bek kii nɛ̂ kine, ɛ́ náà yɛ toŋte wán nɛ̂ vin ge: Wán ə Feyin. 36Yɛn-a! Wele ndaa nə ghɛn wɛ Elizabet wɛ ɛ́ nè suuyen ge əb lu kekan nɛ əb gesemen ngɛsen naa se ŋaŋ, shi nɛ̀ əblɛɛ ɛ leenen se njoŋ ntuufe, nɛ əb nɛ̂y bii wán əbluumen. 37Kii nɛ̂ kine me se dine ge kenəə wiy kɛ lòó ke ghak Feyin se nɛɛy. 38Mɛɛle me fise ge: Mɛ lu wel ɛyfɛl nə Feyine. Ke ko gan san kɛn ka wɛ̀ suuyen. Nchiy-ndaa-Feyin yi me lòò.

Mɛɛle Shik ɛyghan se Elizabet

39Se lu kɛn ɛ əmchii fo, Mɛɛle me lòò è liɛ jii è kok chikiy-chikiy ɛ ntɛk ɛylee ɛylake kfənse ɛ Judea. 40Əb kok dî è lii ɛ Zakalia ə ndaa, è chakte Elizabet. 41Kɛn ka Elizabet yion ɛychakte Mɛɛle ɛ leghɛ, wan me ghayle ɛ wen əblɛɛ, Keyioy Kelanene me gwiy è lii è lun se Elizabet ɛytem. 42Əb suuy se Mɛɛle ɛ giɛ ɛytaa ge: Feyine bosemen wɛ̀ chia ka əb bosen əbkiy ɛjim, è gese bose sɛ̂y wán wɛ wɛ̀ nɛ̂y bii. 43Lu ɛynkii mbukma ɛykɛ yin lɛ, yɛ Feyine nɛɛyen ge No Báàba ə wom gwiy è ghan mɛ? 44Wɛ̀ kè lii è chakte mɛ ɛ leghɛ, wan wɛ əb luun ɛ mɛ əblɛɛ me ghayle nɛ̀ ɛysaŋlee. 45Ke lu kejuŋ se wɛ̀ bek ka wɛ̀ beemenmen ge Báàba Feyin lunse nkakma yɛ əb nè kaken wɛ̀ so.

Mɛɛle yem njàŋ se kokse Feyin

46Mɛɛle fise ge:

Ɛytem ə yome kokse Báàba Feyin,

47nɛ mɛ yio əbjuŋ nɛ ɛytem ə yome, saŋle bek Feyin wɛ mboyse yom.

48Əb lu nɛ əb kuumemen mɛ, nɛ mɛ lu wel ɛyfɛl nə wene wɛ̂ nchɛk.

Se lu nɛ ghel ɛjime náà yɛ toŋte mɛ ge: Wel wɛ Feyine nè bosen.

49Bek ka Feyin wɛ Ba əbtaawe nɛɛyenmen əbnəə əbghakene se mɛ,

ɛyghel ə wene lu ɛylanen.

50Əb koosen ɛysen əbliy əbjim, se ghel ɛjime ghɛ ɛ́ ngvəmlen wen.

51Əb dinmen əbtaawe ə wen, è saŋse ghel ghɛ ɛ́ kwaaten ɛ ghene tetem ge ghene lu.

52Əb səksemen tefon se ghene kabase,

è tom ghele ghɛ́ nchɛke se tefon.

53Əb yiɛsemen ghel ghɛ jeŋe yafen nɛ̀ əbfua əbjuŋe,

è jumte ghɛ́ əmkaa ɛghoo yum.

54Əb lu nɛ əb kuume ɛykak yɛ əb nè foon se ɛbaa ɛbaa ghɛse,

è gwiy se giamtene wel ɛyfɛl nə wene wɛ Islael.

55Ka əb nè kaken ge yi náà koosen ɛysen se Ablaham,

ghene ɛykfəə wene əbliy əbjim nɛ ɛymɛye wiy.

56Mɛɛle suŋnen di è chii ghene Elizabet ka njoŋ setal, è kase fiile se wene ndaa.

Ɛybii ə Joon Nfoo Moo

57Əbliy wɛ Elizabete bii ɛ ten nɛy kwɛn, əb me bii wán əbluumen. 58Ghel ghɛ ɛ́ chiin báksen se wen gese nɛ̀ ghel ɛykfəə nə wene yio ka Feyine chamen ɛysen ə wen è fo wán se wen, è me gwiy se chɛkle ghene ghene. 59Əbchii lun ɛyfaame ghele gwiyke se nɛyte wán vi, è me se kɛŋe ge ɛ́ chio ɛyghel ə wen ge Zakalia ka yɛ ba ə wene. 60Dî no ə wen suuy ge: Ɛngaŋ, ɛyghel ə wene lu Joon. 61Ghele suuy se wen ge: Wɛ̀ ki wiy wel ɛykfəə wɛ ɛ́ toŋten ge Joon. 62Ɛ́ me se feke nɛ̀ ɛghoo se Ba ə wan, bife se wen ge əb sɛ kɛŋe ge ɛ́ yɛ toŋte wán ə wen ge ndɛ-a? 63Zakalia fek ge ɛ́ gwiy nɛ̀ kebaŋe fekake. Ɛ́ gwiy so, əb nyak ge: Ɛyghel ə wene lu ge Joon. Ghene yɛn dî è me se lu nɛ̀ əbchíò əbyúméné. 64Kɛn ka əb nyaken ɛ leghɛ, əb me kase kɛ̀ɛ̀tè se yɛ suŋnen, kokse Feyin. 65Ghel ghɛ ɛ́ nè chiin báksen se wen yɛn əbnəə nɛ̂ vin, ɛyfane koo ghene. Əbnəə wɛ tene əbjim me saanken, ghele se fiɛle nduu so ɛylak ə kfənse ɛ Judea ɛyjim. 66Wel əbjim wɛ əb nè yion sakghɛ vin se kantee, bife ge wan vin sɛ náà yɛ lu ɛynkii wel əbkɛ-a? Ghele yɛn ge keghoo ə Feyine lu ɛ wene kenəə.

Kenəə kɛ Zakalia nè Suuyen

67Zakalia kɛɛte se suŋnen di, Keyioy Kelanene lii è lun se wen ə ɛytem, əb me se fekte kenəə ə Feyin ge;

68Ɛykokse lu se Bay Feyin wɛ Feyin ə ghele Islael.

Əb gwiymen se giamtene ghel ə wen, se gese se tene ghene se ngɛkse.

69Əb tinsemen wel əbtaa wɛ əb náà yɛ lu mboyse ə yɛsen,

nɛ̀ əb lòò ɛykfəə nə əbfon wɛ David wɛ wel ɛyfɛl nə wen.

70Lu kenəə kɛ əb nè kaken se əmməən,

è chia ɛ giɛse sɛ ghele ntum nə Feyine nè fekten ge,

71yi náà fii ghɛsen

se ɛghoo nə ghel ə əbbaanese nə ghɛsene.

72Əb nè suuy ge yi náà koosen ɛysen se ɛbaa ghɛse

è kuume kelek ə ki kelanene.

73Əb nè lek se ba ə wɛs wɛ Ablaham ge.

74Yi náà fii ghɛs se ɛghoo nə ghele əbbaanese nə ghɛs,

ka ghɛse yɛ fɛl se yi bo fane wiy,

75lu ghel ɛlanene, nɛɛye ka yi koŋen,

əbchii wɛs əbjim, ke ge yi yɛne.

76Wán, ɛ́ náà yɛ toŋte wɛ̀ ge:

Wele ntum nə Báàba Əbngaŋten,

bek ge wɛ̀ nɛ̂y yɛ nduu ɛ mbiy nə Bay, siyse jii ə wen.

77Wɛ̀ nɛy yɛ nɛɛye nɛ ghele keele

ka lòó Feyine lɛyse mbeese ə ghen, è boyse ghene,

78bek ge, Feyin ə Fɛsene lóó əb yɛ koosen ɛysen se ghele se ŋaŋ.

Əb náà tum mboyse ɛyyio é əb gwiy se ghɛs,

ka chuy yɛ ɛy tóòn ɛ bvəse bvəse,

79è fo ɛyban se ghele ghii dii ghɛ ɛ́ luun ɛ nfiine,

chii fane ɛykuo əbliy əbjim,

è gese yɛ dine jii se ghɛs ka lòó ghɛs yɛ chii ɛyzəəte.

80Zakalia suŋnen di, wan ə wen ko me se kuye, ki ɛytof, foo ɛytem ə wen se Feyine naa ketaan, è me ndu è se chii əbkwak se chin ka əb nè kɛɛten se yɛ fekte kenəə ə Feyin ɛ Islael.

Currently Selected:

Luk 1: oku

Highlight

Copy