Jn 9
9
Jesus chuk wel wɛ ɛ́ nè biin nɛ əb fefmen
1Jesus loo ghanle ndu è yɛn wel əblee nɛ ɛ́ nè bii nɛ əb fefmen. 2Ghon-ɛyfɛl nə wene bif se wen ge: Ndinte, nè nɛɛy ndɛ mbee nɛ ɛ́ geese bii wel vin nɛ əb fefmen? Nè nɛɛy wen moo, nè nɛɛy ba ə wen ghene no ə wen-a?
3Jesus fise ge: Ke wiy ge wel vin nè nɛɛy mbee, nɛ ke báà se lu ge ba ə wen ghene no ə wen nè nɛɛy mbee. Ɛ́ nè bii wen nɛ əb fefmen se nɛɛy ge ɛyfɛl ə Feyine yɛnsen ɛ wen ə əbghun.
4Ghɛsen tiy se yɛ nɛɛy ɛyfɛle wel wɛ əb nè tumen mɛ nɛ bo bɛɛy nɛ̀ nchuy. Ntəke gwiye wɛ lòó wel jia bo fɛl. 5Ka mɛ bo bɛɛyen ɛ mbi fɛn, lu nɛ mɛ lu kekaakene mbi.
6Əb suuy di è me tio ɛyliɛ ɛ ntiɛ, è toote kechiale nɛ̀ ɛyliɛ tene, è yiose ɛshiɛ ə wel vi so; 7è suuy se wen ge: Ndu è suu ɛshiɛ ə ghiɛ ɛ kechəme Siloam. (Ɛyghel yɛ Siloam yin lu ge: Ɛ́ tum tumen.) Wel vi ndu è suu ɛshiɛ ə wen è kase fiile nɛ əb se yɛne əblik.
8Ghel ghɛ chiin báksen se wen gese nɛ̀ ghel ghɛ ɛ́ nè yɛnen nɛ əb yese lonen fenloone me se kante ge: Vin lɛ báà se lu wel wɛ əb nè yese diom fɛn lone fenloone-a?
9Ghel ɛlee suuy ge: Lu wen. Ɛlee suuy ge: Əb fuosen wen fuosen.
Wel vi se wene ngeŋ fise ge: Lu kɛn naa mɛ.
10Ghene bif se wen ge: Ke ghan lɛɛy ge wɛ̀ yɛ yɛn əblik?
11Əb fise ge: Wel vi wɛ ɛ́ toŋten ge Jesus kè toote kechiale, è yiose ɛshiɛ ə ghom so, è suuy ge mɛ ndu è suu ɛ kechəme Siloam. Mɛ ndu è suu, è me se yɛne əblik.
12Ghene bif se wen ge: Wel nɛ̂ vi waay? Əb fise ge: Mɛ báà se ke ghaa əb luun.
Ghele kenone Falisee chakle əbchio wel wɛ Jesus nè chuken
13Ghene me liɛ wel wɛ nè yî luun kenfef vi è ndu so se ghele kenone Falisee. 14Nè lu dì nɛ Jesus nè toote kechiale è yìàse ɛshiɛ wel vi so nɛ lu ɛ kechii ɛybam. 15Ghele kenone Falisee ghii gese bif se wel vi ge əb sɛ ghan lɛɛy se geese yɛ yɛn əblik-a. Əb suuy se ghene ge: Əb kè yiose kechiale ɛ mɛ ɛshiɛ, mɛ ndu è suu ɛshiɛ ə ghom, è me se yɛne əblik.
16Falisee se ɛlee suuy ge: Wel wɛ əb kè nɛɛyen kenəə kine báà loo nɛ lu se Feyine, bek ge əb báà se bame ɛybam.
Ghene ɛlee suuy kɛ́ ghene ge: Loo lɛɛye wele mbee yɛ nɛɛy əbnəə əbchio əbyúméné ka vin-a? Əbngiabsene me fəy ɛ ghene məm.
17Ghel ghii gese bif se wel vi ge: Ka wɛ̀ suuyen ge kè yiase wel nɛ̂ vi ɛshiɛ ə ghiɛ, wɛ̀ suuy kiɛ gee ghɛ kum wen.
Əb fise ge: Əb lu wele ntum nə Feyine.
18Ghɛ́ mbiye nə ghele Juus ghii nè báà se koŋe se beeme ge wel vi nè lô se lu kenfef se geese yɛ yɛn əblik. Nɛ ghene geese beeme, ghene nè lô jaŋ ba ə wen ghene no ə wen, 19è bif se ghene ge: Vin lɛ lu wán ə wɛn wɛ ghɛne suuy ge ɛ́ nè bii wen nɛ əb fefmen-a? Ke ghan lɛɛy ge əb yɛ yɛn əblik ɛ leenen?
20Ghene fise ge: Ghɛs ke ge əb lu wán ə wɛs, nɛ ghɛs ke ge ɛ́ nè bii wen nɛ əb fefmen. 21Dî nɛ ghɛse báà se ke ge əb sɛ ghan lɛɛy se geese yɛ yɛn əblik-a, gese ke wiy ge sɛ yiase ndɛ ɛshiɛ ə wen-a. Ghɛn bif se wen; ɛshiɛ ə wene yiomen, nɛ lòó əb fise se wene ngeŋ. 22Ba ə wen ghene no ə wen nè suuy dì bek ge ghene nè fane ghɛ́ mbiye nə ghele Juuse ghi ghɛ ɛ́ nè lɛmenmen ge naa ndɛ beeme ge Jesus lu Vi wɛ Feyine nè Yiosen ɛ́ jum se ngay ɛyjem. 23Ghɛy kenəə kɛ ke nè nɛɛyen ba ə wen ghene no ə wen suuy ge: Ɛshiɛ ə wene yiomen; ghɛn bif se wen.
24Ghene gese jaŋ wel vi wɛ ɛ́ nè biin nɛ əb fefmen è suuy se wen ge: Kan ɛyghel ə Feyin ge wɛ̀ suuy əbluuy! Ghɛs ke ge wel vin wɛ əb kè chuken wɛ̀ lu wele mbeese.
25Əb fise ge: Mɛ báà se ke ge əb sɛ lu wele mbee moo əb wiy-a. Kɛ mɛ keen lu ge mɛ nè lu kenfef, se lu ɛ leenen nɛ mɛ se yɛne əblik.
26Ghene gese bif se wen ge: Əb kè nɛɛy ghɛ se wɛ̀? Əb kè yiasé lɛɛy ɛshiɛ ə ghiɛ?
27Əb fise ge: Mɛ kè suuymen, nɛ ghɛn koŋe wiy se yiote. Ghɛne gese kɛŋe se yio se jɛl lɛɛy? Ghɛne kɛŋe se yɛ lu ghon-ɛyfɛl nə wen-a?
28Ghene me tɛyle wen tɛylen è suuy ge: Wɛ̀ lu wán-ɛyfɛl nə biɛ nɛ̂ vi, nɛ̀ ghɛs lu kɛse ghon-ɛyfɛl nə Moses. 29Ghɛs ke ge Feyine nè suŋnen se Moses, dî nɛ se biɛ vin lu nɛ ghɛs ke wiy ghaa əb lòòn.
30Wel vi me suuy ge: Lu kenəə əbchio əbyúméné se mɛ! Ghɛn ke wiy ghaa əb lòòn, dî əb ko yiase ɛshiɛ ə ghom. 31Ghɛsen ke ge Feyine báà se yiote kenəə kɛ ghele mbee suuyen. Əb yiote nɛ lu se ghel ghɛ ɛ́ ngvəmlen wen, nɛɛy kenəə kɛ əb kɛŋen. 32Naa ka mbi nè kɛɛten, wel nè bɛɛy ghàà yio ge wel kè yiase ɛshiɛ ə wel wɛ ɛ́ nè biin nɛ əb fefmen. 33Buu ge wel vin lòò nɛ lu se Feyine, é əb jia nɛɛy ɛynkii kenəə ka kinee.
34Ghene fise se wen ge: Ɛ́ nè bii wɛ̀ ɛ məme mbee, wɛ̀ kuy ɛ mbee, è se kɛŋe se yɛ dinte əbnəə se ghɛs-a? Ghene suuy di è me jum wen se ngay ɛyjem.
Wel wɛ luun kenfef ɛ ɛyshiɛ nə Feyine
35Jesus yio ge ɛ́ jummen wen se ngay ɛyjem è se yɛne gwiye nɛ̀ wen è bif ge: Wɛ̀ lɛ lu nɛ wɛ̀ fó ɛytem se Wanwel-a?
36Əb fise ge: Babɛy, ko fekte wel wɛ luun wen, é mɛ fó ɛytem se wen!
37Jesus suuy se wen ge: Wɛ̀ yɛnmen wen, nɛ lu wen wɛ əb suŋnen se wɛ̀ ɛ leenen.
38Wel vi me suuy ge: Báàba, mɛ lu nɛ mɛ fó ɛytem se wɛ̀. Əb suuy di, è ngvəkte ɛ Jesus ɛyshiɛ è se foo ɛykokse se wen.
39Jesus suuy se wen ge: Mɛ nè gwiy ɛ mbi fɛn se sake ghel, ka ghel ghɛ luun əbnfef yɛ yɛne əblik, é ghɛ ɛ́ yɛnen əblik fef.
40Ghele kenone Falisee ɛlee ghɛ ɛ́ nè luun fo yio ka Jesus suuyen dî è bif se wen ge: Wɛ̀ kɛŋe se din ge ghɛs lu sɛ̂y əbnfef-a?
41Jesus fise ge: Ghɛn kè boy se yɛ lu əbnfef, fene ghɛn ki wiy njio. Dî nɛ ka ghɛne dinen ge ghɛne yɛne əblik-a, fene ghɛn ko bo ki njio.
Currently Selected:
Jn 9: oku
Highlight
Share
Copy
Want to have your highlights saved across all your devices? Sign up or sign in
©CABTAL, 2012
