Ɛyf 4

Bita ghene Joon teem ɛ ɛytiye nsak

1Se lu nɛ Bita ghene Joon bo suŋnen se ghele, ghɛ́ ɛychiyse Feyine, nɛ̀ ketuu se ghɛ́ ntaŋlee ɛ ndaa-ɛykokse gese nɛ̀ ghele kenone Saddusee gwiy se ghene. 2Ghene nè yafse ɛytem bek ge Bita ghene Joon nè dinte se ghele ge Jesus nè loole se ɛykuo se din ge nkfəsayse náà loole se ɛykuo. 3Ghene me koo Bita ghene Joon è ndu so, ka kebɛye nè se finen, è kum se ndaa nchak ka əbtəke yio ɛ́ yɛn ka ɛ́ jɛl. 4Dî ndio ghel ghɛ ɛ́ nè yion kenəə kɛ tene ko beeme. Ghel ɛjim ghɛ ɛ́ nè beemen me se lu ka nkam setan.

5Əbtəke nɛy yio ghɛ ɛ́ saken nɛ̀ chɛɛse gese nɛ̀ ghɛ́ ɛydinte tesake konen ɛ Jolesalem. 6Ghene nè konen ghene ghe Annas wɛ ketuu se ghɛ́ ntaŋlee, nɛ̀ Kaiafas nɛ̀ Joon nɛ̀ Alesanda gese nɛ̀ ghel ɛykfəə nə ketuu se ghɛ́ ntaŋlee. 7Ghene me tiyse Bita ghene Joon ɛ ghene ɛyshiɛ, è bif se ghene ge: Ghɛn ne nɛɛy kenəə kin nɛ̀ əbtaawe nɛ əb lòò ghááy? Ghɛn nɛɛy nɛ̀ əbtaawe ɛyghel nə ndɛ?

8Keyioy Kelanene lose ɛytem ə Bita, əb me suuy ge: Ghɛ ɛ́ saken nɛ̀ chɛɛse, 9lu ge ghɛne bife əbnəə se ghɛs kum kenəə kejuŋe kɛ ghɛs nɛɛyen se wel əbləmen gese nɛ̀ kɛ ke ganen nɛ əb geese bonen, 10ghɛne ghele ghɛ Islael ɛjim me yɛ ke ge: Lu bek əbtaawe ɛyghel nə Jesus Christ wɛ̂ Nazalet wɛ ghɛn nè banten se kentam Feyine lose wen se ɛykuo wɛ wel vin teem ɛ ghɛn ɛyshiɛ nɛ əb bonenmen. 11Jesus nɛ̂ vin lu wel wɛ ɛ́ nyaken ɛ ŋwaale-Feyin kum wen ge:

“Ɛytiy yɛ ghɛ́ kembome nè maayen

lu ɛyghene yɛ ɛ́ bomen ɛybuu ndaa so.”

12Lu kɛn wen wɛ lòó əb boyse ghel, bek ge wel əblee bɛɛy wiy ɛ mbi fɛn wɛ Feyine lɛmen ge lòó əb boyse ghɛsen.

13Ghɛ ɛ́ saken ghii yio ka Bita ghene Joon suŋnen ketaan, əbchio yum ghene bek ge Bita ghene Joon nè lu ghel se nchɛk, loote ke wiy ŋwaale. Ghene me keele ge Bita ghene Joon nè lu ghele ngoo nə Jesus. 14Dî ghene jia gese se ki kenəə se suuy bek ge wel vi wɛ ɛ́ nè chuken nè tiy fo ghene ghe Bita. 15Ghɛ ɛ́ saken ghî suuy ghene fəynen se ghene məm, ghene me se ghale chəm, 16suuy ge: Lòó ghɛsen nɛɛy ghɛ se ghel ghine? Wel əbjim ɛ Jolesalem yɛnmen əbchəyte əbchio əbyúméné wɛ ghene dinen nɛ lòó ghɛsen jia tunse. 17Dî nɛ se nɛɛy ge ghàà ke saanken, ghɛsen chiise se ghene ge kefɛ́ ghene bo suŋnen se wel kum ɛyghel ə Jesus.

18Ghene me kase jaŋ Bita ghene Joon è chiise se ghene ge ghàà ghene gese suŋnen, kene dinte əbnəə se ghele kum ɛyghel ə Jesus. 19Bita ghene Joon sɛ̂y fise ge: Ghɛn kiy se ghɛne ngeŋse ge kɛ ke luun ɛ titiy ɛ ɛyshiɛ nə Feyine sɛ lu se yionen se ghɛn moo, se yionen se Feyin-a? 20Lòó ghɛs jia gok se yɛ suŋnen kum kenəə kɛ ghɛs yɛnenmen è gese yio. 21Ghɛ ɛ́ saken ghi fanse ghene naa se ŋaŋ è vəse ghene. Ghene nè báà yɛn jii se nəkse ghene bek ge ghel ɛjime nè se kokse Feyin bek kenəə kɛ ke nè ganen. 22Wel nɛ̂ vi wɛ ɛ́ nè chuken nɛ̀ əbchəyte əbchio əbyúméné nè chiamen nguk əmmkɛɛk.

Ghel ɛbeemene lon əbtaawe se Feyine

23Ɛ́ nè vəse Bita ghene Joon ɛ leghɛ, ghene kase ndu è suuy əbnəə əbjim se ghele ngoo nə ghene wɛ ghele mbiy se ghɛ́ ntaŋlee nɛ̀ chɛɛse kè suuyen. 24Ghene yio, è me chìntèn è se jeme se Feyine ge: Bay Feyin, nè bom wɛ̀ ɛyyio, nɛ̀ ntiɛ nɛ̀ jio seghuye, gese nɛ̀ əbfua əbjim ɛ ten. 25Nè nɛɛy wɛ̀ ge Ba ə wɛs David wɛ wel ɛyfɛl nə wɛ̀ suŋnen ɛ əbtaawe nə Keyioy Kelanene ge:

“Lu bek ghɛ wɛ əbtume yafsen ɛytem,

nɛ ghele taŋe ntaŋse nɛ se fɛle wiy?

26Tefone tɛ mbi bááte ɛyghoŋ

nɛ ghɛ ɛ́ saken konen taŋe ge ɛ́ noo Bay Feyin

ghene Vi wɛ Əb nè Yiosen.”

27Ke lu se əbluuy nɛ Helod ghene Bontius Bailɛt nè lô konen ghene ghel əbtume gese nɛ̀ ghele Islael ghene ghene se chio ntaŋ sebee kum Jesus wɛ wel ɛyfɛl nə wɛ̀ wɛ̂ əbluuy, Vi wɛ Wɛ̀ nè Yiosen. 28Ghene nè nɛɛy əbnəə wɛ wɛ̀ nè siysenmen ɛ wɛ̀ ɛykoŋ gese nɛ̀ əbtaawe ə viɛ è lɛm ge əb yî gan. 29Bay, yɛn ka ghene fansen ghɛs. Ko nɛɛy é ghel ɛyfɛl nə wɛ̀ ɛjuŋe yɛ fekte kenəə ə kiɛ fane wiy. 30Nɛɛy é ghɛs yɛ chuke ghel, nɛɛye əbnəə əbchio əbyúméné ɛ əbtaawe ɛyghel nə Jesus wɛ luun wel ɛyfɛl nə wɛ̀ əbjuŋ. 31Ghene mɛyse ɛyjem, kelik kɛ ghene nè luun ɛ ten se shikene. Keyioy Kelanene lose tetem ə ghen, ghene se fekte giɛse Feyin fane wiy.

Ghel ɛbeemene nè giɛknene

32Kenone ghel ɛbeemene se lu əbchio əbmok, ki ɛytem ɛymok, nɛ wel suuye wiy ge kefaa kɛ yi kiin lu kɛn kii, è me se giate əbfua ə ghen se ngeŋse ghene. 33Ghɛ́ ntum nə Báàba Jesus gese se fekte ketaan ge ghene nè lô yɛn ka əb loolen se ɛykuo, Feyine me se bose ghene ghel ɛjim naa se ŋaŋ. 34Wel nè wiy ɛ ghene ngoo wɛ əb nè gháan kefaa. Ɛbaa teleme, kene ndaase me se lóó ɛ́ feene è gwiy nɛ̀ əbkaa tene, 35è fo se ghɛ́ ntum nə Jesuse, ghene yɛ giate se naa ndɛ kɛn ka shii ə wen luun.

36Wel əblee se lu sɛy fo nɛ ɛ́ toŋte ge Josɛf, nɛ lu wel ɛykfəə nə Levi, nɛ ɛ́ nè bii wen ɛ ɛylake Siblus. Ghɛ́ ntume nè toŋte wen ge Balnabas. Ɛyghel yɛ Balnabas lu ge: Wel wɛ əb lumsen tetem ə ghel. 37Əb nè lô feene ɛylem ə wen, è gwiy nɛ̀ əbkaa tene è fo se ghɛ́ ntum nə Jesuse.

Currently Selected:

Ɛyf 4: oku

Highlight

Copy