Matìo 9
9
Yɛso bǎaŋ kə̀kə̀ŋlò
(Mâk 2:1-12; Lûk 5:17-26)
1Yɛso n daŋso nyə kɔʼ alo kəkwə̀n, nùghù dàŋ wò an naʼ zə̀a ù mò mughu a te. 2A mo e kôʼ ghe m bòʼò wô ghùw ù kə̀ kə̀ŋlò ù li alo kəmbùŋ. A m bùghò Yɛso kòʼ tsughu enyəa ghî a te ŋge boo fughu â wə̄n, ù n dzɛ̀ â ghùw ù kəkə̀ŋlò ù te enyəa, “Dzə̀la tsughu fə̀ŋ a ŋ wɛ̄; Zə̀ kə̀ m bòo tə̀ghà tə̀ ghuuw màʼà.” 3Ghê dèekə̀làŋ à li ghə n daŋa kaʼ tsughu aletsə̀əm kaŋlo aŋ ghùe e ghee enyəa, “Tûw wən bəla sùuwn Kə̀zə̀ lu.” 4Yɛso n lo mò ù ŋ kele zìi moʼnlò e ghee zo, ù n dzɛ̀ â ghee enyəa, “Ghɛ̀ ghəa à biigh gho ghɛ̀ nî naŋā alo təfə̀ŋ a, ghɛ̀ nî nàŋa bòʼ kwò à? 5À bùghuun tsə̀ghà è ghɛ zo alembaā dzâa səā wo a, aledzɛ̀ â ghùw enyəa ‘Ghe m bòo tə̀ghà tə̀ ghuuw màʼà.’ Ŋkāa aledzɛ̀ â wə̄n enyəa, ‘Nùghu kɔʼɔ̀ ghù bwii səa nduw a?’ 6Ŋ̀ ghəəŋ tsughuu nù, ghɛ̀ kele tsughu enyəa Wɛ̀ ù Ghùw ki nû daʼa ko aleghuūw maʼn bôo tə aghì to am mbī.” Ù n daŋso nùghù dzɛ̀ tsùghù â ghùw ù kəkə̀ŋlò vʉ enyəa, “Nùghu nǐ kɔʼ mbùŋ kə̀a kò, ghù nduw alô ghù.”
7Kə̀əŋ chi kə n nùghù è kɔʼ, nùghù ndùw alô wə̄n. 8A m bùghò nê kə aghì chi kə kôʼ tsughu ghəa yi gho, fə̂ŋ tə̀ n sə ghee, ghe ŋ kàʼ ndùw alekɔʼso Kə̀zə̀, kəla kə mò fughu ŋgòʼò dàʼà kən â ghì ghò.
Yɛso tɔ̀ŋɔ Matìo
(Mâk 2:13-17; Lûk 5:27-32)
9Ghəa Yɛso zə̀ghàa tsughu luʼu chi ko, nughùun ndùw, ù ŋ kòʼ tsùghu dzə̀akə̀mwàʼsò ù lì ghe mò tɔŋlo enyəa à lò Matìo, mò ù lǒ an lùʼù kə kəfwàʼ kə wə̄n. Ù n dzɛ̀ â wə̄n enyəa, “Nùghù wò a bǎà mùghò.”
Matìo n nùghù ndùw sùghò a bàâ Yɛsò.
10 #
Lûk 15:1, 2 Yɛso n ndùw gùŋsò alô Matìo, a m bùghò ghe sô zəā, ghê dzə̀akə̀mwàʼsò à li gho ndə̀m ghèe ghê ghì ghəla ghe fə̀ bâʼzəghā enyəa ghe bwîi yò an làŋ kə Musî m bùghò nyàʼa dzəəŋ wò alezə ghèe ghê Yɛso àsùghò tsə̀təndə̄ghā tə wə̄n to. 11A m bùghò ghî a Falàsîi à kôʼ ghəa ghən gho, ghe m bvʉ â tsə̀təndə̄ghā tə wə̄n to enyəa, “À lǒ kwò Mughùbè wɛʼɛ sô zəa dzəə̄ŋ ghèe ghê dzə̀akə̀mwàʼsò a, àsùghò ghì à biigh à li ghən a?” 12Yɛso n zə̂ən ghəa a te gho, dzɛ̀ â ghee enyəa, “Ghî ghəla ghe tughūu dzɔɔ̄ ki yo ghəa è li zo aleghəŋlo ghèe ghê ghùwŋgàŋ, à gɔ̀ʼɔ̀ kô ghì ghəla ghe dzaŋa. 13#Mat 12:7; Hos 6:6 Nduw kəŋ sə kɔʼ nlò enyəa shwāʼ u Kəzə̀ wə̄n moʼnlò èndughō enyəa, ‘Ǹ tsâʼ ghì ghəla ghe fə̂ŋ tə̀ dzûŋ to aŋ ghùe e ghee, Ŋ̀ kâ lə̀ghà dzə̀ enyəa ghe e gboō nyòm tò kɔʼso mùghò a te.’ Tɔŋlo enyəa Ŋ̀ kâ bùghò dzə̀ alebùghò tɔŋɔ̂ ghì a tsəghatsəgha gho, Ǹ laam bughò bòʼ ghì à biigh gho.”
Bûʼ kə Dzughu è baa zo
(Mâk 2:18-22; Lûk 5:33-39)
14Tsə̀təndə̄ghā tə Dzɔ̌n tə m bùghò kòʼ wò Yɛso, bvʉ â wə̄n enyəa, “À lǒ kwò ghàʼ à ghê ghì a Falàsîi à sô baā dzughu zo, tsə̀təndə̄ghā təghà tia tə baā yô a?”
15Yɛso n dzɛ̀ â ghee enyəa, “To fən a num ù wìzən ghə n dòʼò alo ese mò ù lǒ ghèe ghee a? Nəghā e lo bùghòo nù ghe lo nîi nughùun kɔʼɔ̄ num ù wìzən aŋ ghùu ghee, ghe laʼa baa nduw dzughu zo an nə̀gha e te zo.
16Ghùw ù lì yo ù lò alenìi kɔʼ bâ kə ndzʉ̄ kə̀ fughu ko ù taā mə̀ghàa naŋā ndûw an ndzʉ tə̀ wii to; nu bâ kə ndzʉ̄ kə te kə lo pfʉ̄a nùghùun sə̌a wò nǔ ndzʉ tə̀ wii tə te to, bûʼ kə te kə kôom dûuw tsəghàa tsughu ghəa kə mò bûʼ lo a te. 17Ghùw yò sughò alenìi kɔʼ sə̀ŋ è nlʉ̀ ù kùu naŋa tsughu an suʼ#9:17 Dzûu tə fə̀ lʉ̀ ŋ ghee n dzəlā naaŋ tsəgha an suʼ mo ghe ta tsughu aŋ gûw è nyòm. mò zə̀ n kɔm mɛ̀ʼɛ̀; nu è sò gbə̀la kɛʼɛ nù, lʉ̀ m fɔlɔ̀ səa tsughu, mo suʼ ŋ wì sùghò. A laam kùu nǎaŋ sə̀ŋ è nlʉ̀ an suʼ e fughu zəla è naām ki fô kò, suʼ e te àsùghò lʉ̀ mə n zə kətuw.”
Yɛso zòm nùghù wò wɛ mò ù m kpuw, baaŋ kɔ̀ʼ sùghò wìzən ù dzaŋa ù lì
(Mâk 5:21-43; Lûk 8:40-56)
18Ghəa Yɛso sò naām kə̂a ghəa gho, a mo e kôʼ, ghùw ù ne ù lì an Dzudà ù n sə̀ ndùw nyàʼa ndùw a sə̀a wə̄n, dzɛ̀ â wə̄n enyəa, “Wɛ waŋā ù zən fɛ tsò kùʼn kpuw tsughu nû, bùgho mɔ̌ɔ tsughu ko wə̄n an tuʼ è mɔɔ̄ zo ko, ù sò zòom nùghùn wò nù ebàm.”
19Yɛso n nùghù ndùw ghee ghê tsə̀təndə̄ghā tə wə̄n to a bàâ ghùw vʉ̀.
20Aŋghə ghe nduuw alô ghùw ù ne vʉ̀, wìzən ù lì n ndùw sə̀ kɔʼ wo a bǎà Yɛso, mò ù m fɔ̀n tsɛ̀lɛ̀ alo tənùu eghə̄m a ghè tò tə bə̀ghà, ù m bùghò mɔ̀m tsùghù dzughu e təndzʉ e Yɛso. 21Nu ù fə̀ ki am fə̂ŋ è wə̄n enyəa, “Abugho M̀ bûʼ mɔ̂m tsughu ko ndzʉ tə wə̄n to, Ǹ sô tùghuu nù.”
22Yɛso m fə̀n tsùghù ughue, kòʼ tsughu wə̄n, dzɛ̀ tsùghù enyəa, “Kele tsughu fə̀ŋ è dzùŋ a ŋ wɛ̄; fə̀ŋ zəla ghù gaʼ tsughu a zəŋò Zə̀ kò, zə̀ ŋ ghù baŋlo.” Wizən vʉ n tughu tən kɔʼ ko an nə̀gha e te zo.
23A m bùghò Yɛso ndùw tɛ̂ tsughu am be kə tûwbʉghà vʉ̀, ù n ndùw kòʼ ndùw ko mo luʼū tə dəma a fughu aŋ ghùu ghì ghò, mo ndɔŋ zə̀ è kuu. 24Ù n dzɛ̀ tsùghù enyəa, “Sɛ̌ɛ nùghu tsughu nlò; nu zən fə te fə bwii nù, fə kâ kpùw dzə̀.” Ghee a dzə̀m ŋ kuuwn kàʼ ndùw wə̄n aletsōʼ. 25A m bùghò ghe sô dzûm naŋā sə mɛʼɛ̀ wô ghî ghò a beē, Yɛso n tsə̀ghà nyə̀ è nduw, kwu tsughu wɛ fə̀ zən fə te fo aŋ ghu, fə n nùghù dòʼò è wo. 26Zwɔ̂ŋ u te wə ŋ kùm ŋgəa tsughu mbùʼ è te e dzə̀m.
Yɛso ghə̌əŋ ghî à foō à li gho a bə̀ghà enyəa ghe e koʼō luʼū to
27Ghəa Yɛso zə̀ghàa tsughu alô tûwbʉ̀ghà ù te, nùghùun dàŋso ndùw, ghî à foō à li gho a bə̀ghà n nùghù ndùw à bàâ wə̄n. Ghe n dîi dzàa ndùw â wə̄n enyəa, “Wo wɛ ù Dɛvìd, so kwuso se zo a zə̄ŋò ghàʼ a.”
28A m bùghò Yɛso ndùw nyə nduw an ndughu, ghî à foō a te ghə m bùghò kòʼ wò wə̄n; Yɛso n daŋso bvʉ â ghee enyəa, “Ghɛ̀ m boo enyəa to mùghò ŋ ghəəŋ ŋgòʼ è èghəa tò zən a?”
Ghe m boo ndùw enyəa, “Òo à Mughùbè, ghàʼ m boo.”
29Yɛso n daŋso mɔ̀m tsùghù sə a ghee, dzɛ̀ tsughu enyəa, “E doʼò ndûw ko êzə̀, aŋghəa ghɛ̀ boō fughu tsughu dzə.” 30Ghe n daŋso kàʼ ndùw luʼū tə̀ koʼo to. Yɛso n daŋso kùɛɛn tsùghu ghee enyəa, “E kwo ko ghùw lò zuūw ghəa ghən gho!” 31Ghe ŋ kuūwn nùghù tsughu ko nù, zùghòo ŋgəa tsughu làbəlà e te am mbùʼ è te e dzə̀m.
Yɛso ghə̌əŋ kə̀mùʼ enyəa kə kə̂a àghəa
32Ghəa ghî yi nughùun ndùw, ghî à li ghə n nì wò ghùw ù lì a vʉ̀a wə̄n mò ù kə̀a yò ghəa gho, bòʼ ù mò ki zʉ̀ u kəmùʼ.
33A m bùghò Yɛso shùaa sə tsughu zʉ̀ u mùʼ kə te ko, ghùw ù kə̀mùʼ vʉ ŋ kə̀a sə̀ wò àghəa. Tuw kə m kpuw ghî yì, ghe n dzɛ̀ enyəa, “A kaām kôʼ kǒʼ ŋgòʼ è èghə̀a tò zən fɛ alo Ezə̀lɛ̂.” 34#Mat 10:25; 12:24; Mâk 3:22; Lûk 11:15 Ghî a Falàsîi ghə̀ ŋ kuuwn kə̀a enyəa, “Ù ghəa ghən ghəŋlo mò à wə̄n â daʼa kə fughu də̀ŋ kə zʉ̀ ù biigh wo.”
Yɛso kwuso èse a zəŋò ghì ghò
35 #
Mat 4:23; Mâk 1:39; Lûk 4:44 Yɛso ŋ ŋgəaa ndùw nàʼà tə̀ ne to tə dzə̀m àsùghò n tughoon mò a te, zoʼn ndùw àghì, kə̀aa ndùw sùghò ghəa a Kə̀zə̀ an Ndughutə̀ne tə Tə̀dzûu tò, baaŋ ndùw dzàŋà tə ghì ghə̀n a dzə̀m àsùghò ndzughu tə ghee to. 36#Taŋ 27:17; 1Ud 22:17; 2Tw 18:16; Ɛ̀zi 34:5; Mâk 6:34 A m bùghò ù kô nɔ̂e kə aghì kò, ù ŋ kwuso èse a zəŋò ghee, bòʼ ghe mò mughu alo kəfə̄m, làʼ lò sugho tò ndzì təla tə ki bàʼàtə̀ndzì. 37#Lûk 10:2 Ù n daŋso dzɛ̀ â tsə̀təndə̄ghā tə wə̄n to enyəa, “Fʉghàzəa u ghaʼa an usum, à fɛ̀ kuuwn buw ko ghî a kəfwàʼ ghəla ghe lo aledùum kwən â ghə̀ wò; 38Ghɛ̌ fì ki alegɔ̀ɔŋ ndûw â Mughu ù usum tò ù tuū wô ghì a kəfwàʼ.”
Currently Selected:
Matìo 9: agq
Highlight
Share
Copy
Want to have your highlights saved across all your devices? Sign up or sign in
