Lûk 5

Yɛso tɔ̀ŋɔ Tsə̀təndə̄ghā tə sûesʉ to

(Mat 4:18-22; Mâk 1:16-20)

1 # Mat 13:1, 2; Mâk 3:9, 10; 4:1 A fə̀ bugho tsuʼ ù li wo, Yɛso ti aŋ ŋgùŋ è nyʉ̀ e Dzɛ̀nɛ̀salɛ̀t, ghî ghə n nyəŋo zùuŋ wò a vʉ̀a wə̄n, alebùghò zyə̂ən shwaʼ u Kəzə̀. 2Ù ŋ kòʼ tsùghu ùkwə̀n u bʉ̀ghà aŋ ŋgùŋ è ènyʉ̀ mo ghî à kwuu a tətsə̄ghāa ghə n sə̀ nùghù kɔ̀ʼ a te, ghe n nəŋsô ghuūw e ghee. 3Yɛso n nyə kɔʼ alô kə̀ li ko, kə Sǎemòn kò, dzɛ̀ â wə̄n enyəa ù nyɛʼɛ̄ baŋà nyəā kəŋo ndûw alo enyʉ̀. Ù n dòʼò è tsughu, zoʼn səa wò àghǐ fughu alo kəkwə̀n.

4Ghəa ù zoʼn mɛʼɛ̀ tsughu ghî ghò, ù n dzɛ̀ â Sǎemòn enyəa, “Sěe nyə kəŋo ndǔw nlǒ kwə̀n kò alo kətsə̀m, ghɛ̀ maʼa nyə tsughu ghuūw zɛʼɛ̄ zo, ghɛ̀ kwu tsəghaa to.”

5 # Dzn 21:3 Sǎemòn n dzɛ̀ â wə̄n enyəa, “Mughùbè, ghàʼ m fɛ də̂m bwǐi, kè kwu kəfəgha; ghəa à dzɛ̀ wô dzə̂ ghû, M̀ màʼn tsùghuu ko nù ghuūw e te zo.” 6#Dzn 21:6Ghəa ghe maʼà tsughu êzə̀, tsəghaa tə n nyə bɛɛ tsughu a te, ghuūw zə m bən lǒ to zə e tenlo. 7Ghe n daŋso nà wò fən a ghee aŋ kwə̀n kə̀ li kə chî, enyəa ghe bughò yosò ghee. Ghe m bùghò bɛ̌ɛ lueso tsughu tətsəgha aŋ kwə̀n u te wo u bʉ̀ghà, wə n lo ko to wə e məla saŋ. 8Ghəa Sǎemòn tɔɔŋ Pità kòʼ ghəa yì, ù n tə̀m ndùw tə̀ŋguʼ a vʉ̀a Yɛso, dzɛ̀ â wə̄n enyəa, “Nùghu a vʉ̀a mùghò a Mughùbè, Ǹ lo ghùw wəla Ŋ̀ ghəə̄ŋ ghəa à biigh gho.”

9Tuw kə màʼa fə̀ ŋge kpuw Pità ghèe ghê fən a wə̄n gho an ŋgòʼ è ndə̀mà tə tətsəgha təla ghe kwu kɔʼ. 10Tuw kə m kpuw sùghò Dzɛ̂ms ghèe Dzɔ̌n, wɛ a Zɛbɛ̀dîi; fən a Sǎemòn. Yɛso n daŋso dzɛ̀ â Sǎemòn enyəa, “Kà tsəŋ; nì nùghù tsùghù êzə̄ŋ, ghù lo êzə̄ŋ e kwuu wo ghî ghò.”

11A m bùghò ghe bâŋ sə wo kwə̀n u ghee wo a ŋgùŋ è dzùghùntsòʼ, ghe n naŋatàʼà tsùghù fʉgha u ghee u dzə̀m nùghù ndùw a bàâ Yɛso.

Yɛso bǎaŋ ghùw ù Tə̀tsùghò

(Mat 8:14; Mâk 1:40-45)

12Ghəa Yɛso sə̀ lo an nàʼà fə̀ li fo, ghùw ù lòʼ n ndùw bùghò fughu mò tsùghò tə̀ ŋ wə̄n kwu pfʉ̄. A m bùghò ù kòʼ tsughu Yɛso, ù n tə̀m ndùw tə̀ŋguʼ a vʉ̀a wə̄n, buʼ kəghu â wə̄n enyəa, “Mughùbè, abugho ghù tsə̀m tsughu, ghù lò nû alebaāŋ kɔʼ mugho, Ǹ zɔlɔ̄ tsughu.”

13Yɛso n dàan ndùw kə̀ghu, mɔ̀m tsùghu wə̄n, dzɛ̀ tsùghù enyəa, “M̀ baaŋ nù, tughu kɔ̀ʼɔ̀.” Tsùghò ti tə n daŋso zə̀ghàa tsùghù tûwbʉ̀ghà vʉ̀ an nə̀gha zə̀ èzə̀. 14#Lɛv 14:1-32 Yɛso ŋ kwɛ̀ɛn tsùghu wə̄n enyəa, “E kwo ghù lò dzâa â ghùw, kuuwn ndǔw kòʼo ndùw ko fɔ̀e, ghù fughu nduw Zə̀ kò aŋghəa lâŋ kə Musî kə̀ deē, aledèe tsughu enyəa ghù n dzàŋ tùghù, tǒ tsə̌a â naʼ zo enyəa ghù èzəŋ zɔlɔ nù.”

15Zɔ̂ŋ u Yɛso wə̀ ŋ kòom kǔuwn fwə̀ən kùm tsə̀ghàsò è tsughu, ndə̀mà tə aghì tə̀ n tsôo bùghòo ndùuŋ ko alebùghò zyə̄ən shwaʼ u wə̄n, àsùghò enyəa ù baāŋ tsughu ghee an dzàŋà tə ghee. 16Yɛso ŋ kuuwn nyɛʼɛ nùghùun něe nùghùun tsùghuu, zə̀mà ndùw gɔ̀ɔŋ wò wəlà nəŋ ko an nàn kə kəlùʼu.

Yɛso bǎaŋ Kə̀kə̀ŋlò

(Mat 9:18; Mâk 2:1-12)

17Tsuʼ ù li wo, ghəa Yɛso zoʼnlō, Falàsîi tə̀ n doʼ ghèe ghê Dèekə̀làŋ; ghe sə kaāŋ wo an nàʼà ŋ Galèlîi, nàʼà n Dzùdîa à nàʼà n Yɛ̀lusalɛ̀m mə̀n n dzə̀m. Ù n lo êzə̀, mò Zə̀ kə̀ ŋ wə̄n â daʼa kə̀ baaŋ kə aghì kə̀ fughu. 18Ghe mo e kôʼ ghî à li a sô sə̀ŋo wò â kə̀əŋ kò alo kəmbùŋ, ghe ŋ kəŋo kèe dzì alebùghò tsəghàa nyəā sueʼē tsughu a vʉ̀a Yɛso. 19Ghəa ghe kəŋ ke dzì aletsə̀ghàa nyə â wə̄n, ghî a màʼa fə̀ ŋge tsuŋ, ghe ŋ kɔ̀ʼ ndùw aŋ gɔ̀ŋ kə ndughu, tsʉ̀ è kɔʼ, zə̀ghàa nyə tsughu wə̄n am bùʼ kə te ko a vʉ̀a Yɛso, am bvʉ̄a zə aghì. 20Ghəa ù kòʼ tsughu enyəa ghe ŋge boo fughu nû, ù n dzɛ̀ tsùghù enyəa, “Ǒo tûwbʉ̀ghà, Zə̀ kə̀ m bòo tə̀ghà tə̀ ghuuw màʼà.”

21Ghê dèekə̀làŋ ghèe ghê ghì a Falàsîi y ghə m bvʉ enyəa, “Fən lǒ fə̀ ndùghò, fə bəlā suūwn Zə̀ kò ènyə à? À lò ndughoo, ù lò aleghuūw maʼà bòo tə aghî a, bugho à buw Zə̀ kò à?”

22Yɛso ŋ kòʼ tɔ tsughu moʼnlò e ghee, ù m bvʉ â ghee enyəa, “Tuw kə ghɛ kpûuw kwò? 23À bùghuun tsə̀ghà è ghɛ zo, aledzàa tsughu enyəa, ‘Zə̀ kə̀ m bòo tə̀ghà tə̀ zə̂.’ Ŋkāa aledzàa tsughu enyəa, ‘Nùghu bwǐi wǒ a?’ 24Ǹ dêe tsùghuu nù â ghɛ̀ enyəa Wɛ ù Ghùw kì nû daʼa ko aleghuūw maʼà bòo tə aghì fɛ am mbī.” Ù n dzɛ̀ â kə̀əŋ chi ko enyəa, “Ǹ dzɛ̂ â ghù enyəa, ghù nughu kɔʼ, ghù ni kɔʼ chʉ̂a wʉ̀a wò, ghù nduw alô ghù.”

25Kə̀əŋ chi kə n daŋso nùghù kɔ̌ʼ fughu an sə kə ghee, nì kɔ̌ʼ mbùŋ chì ù mò nyəŋ a te, nùghù ndùw alô wə̄n, kɔʼso ndùw Kə̀zə̀. 26Dzughu zə n zum ghee a dzə̀m, ghe ŋ kɔ̀ʼsō Kə̀zə̀, tsəəŋ kə̀aa tsùghuu enyəa, “Ghàʼ bwîi tsəgha, ghǎʼ ŋ ghəa e nɛ kòʼ.”

Yɛso tɔ̀ŋɔ Lɛvì

(Mat 9:9-13; Mâk 2:13-17)

27Aŋghəa ghəa ghən tsəghà tsughu, Yɛso m bwîin kǎaŋ ndùw, ndùw kòʼ tsughu dzə̀akə̀mwàʼsò ù lì, ghe fə̀ tɔŋlo enyəa à lò Lɛvì, mò ù lǒ an lùʼù kə kəfwàʼ kə wə̄n, dzɛ̀ â wə̄n enyəa, “Bùghò ghàʼàghù nùghù.” 28Ù n zə̀ghàa tàʼà tsùghù ghəa yì à dzə̀m, nùghù ndùw a bàâ wə̄n.

29Lɛvì n daŋso bùghò ghə̌əŋ tsughu zə è səŋò zò alô wə̄n an ndughu, tɔŋɔ zɔ̀ʼ tsùghù Yɛso. Ghî ghə̀ n tsuŋ tsughu fùghù èzə̀, ghê dzə̀akə̀mwàʼsò à li ghə n lo sugho ghèe ghee, ghe n dzeŋe zəa. 30#Lûk 15:1, 2Tə̀ Falàsîi ghèe ghê Dèekə̀làŋ, ghe n nyuuŋ saʼa kâaŋ tsə̀təndə̄ghā tə Yɛso enyəa, “À lǒ kwò ghɛ̀ zəā dzəŋlō, mʉa dzə̄əŋ sùghò nlʉ̀ ghɛ̀ à ghê dzə̀akə̀mwàʼsò àsùghò ghì à biigh gho a?” 31Yɛso n daŋso bɛ̀lɛ̀ ndùw ghee enyəa, “Ghî ghəla ghe dzaŋà yo, ghe ki yo ghəa è ghəəŋ zo ghèe ghê ghùwŋgàŋ, à gɔ̀ʼɔ̀ ko ghəla ghe dzaŋā. 32Ŋ̀ kâ bùghò dzə̀ ghî à dzûŋ ghò aletɔŋɔ, Ǹ laam bùghò alebùghò tɔŋɔ̂ ghì à biigh gho, enyəa ghe kuwnlo.”

Dzughu è pfʉa zo kùu ndùw dzughu è baa zo

(Mat 9:14-17; Mâk 2:18-22)

33Ghî à lì ghə n dzɛ̀ â Yɛso enyəa, “Tsə̀təndə̄ghā tə Dzɔ̌n àsùghò Falàsîi tò, ghe baa tsə̀ghà nù dzughu zo, gɔ̀ɔŋ tsə̀ghà sùghò, təghà tə̀ kuuwn tsòo zə̌a ko nù, mʉa ndùw sùghò ùfʉgha.”

34Yɛso m bɛ̀lɛ̀ ndùw ghee enyəa, “Ghù lò nû alenaŋâ fən a nùm ù yìzən, ghe e baa dzughu zo an tsuʼ fə kəmālē fə wə̄n a, mò nùm ù yìzən lǒ ghèe ghee a? Ɛ̂ŋgaŋ! 35Nəghā e ndoʼò bùghòo nù, zəla ghe lo nîi nughùun kɔʼɔ̄ nùm ù wìzən aŋ ghùu ghee, ghe lo e laʼā baa nduw dzughu zo an nə̀gha zə̀ èzə̀.” 36Ù n dzɛ̀ â ghee sughò aŋ kwə̀ən kə ushwaʼ enyəa, “Ghùw yò alegbə̀là ndûw bâa wô bà kə ndzʉ̄ kə̀ fughu ko enyəa e so e məghàa an ndzʉ̄ tə̀ wii to. Abugho ù ghəŋlo êzə̀, ù fi boon màʼà ndzʉ tə̀ fughu tə te to, mo bâ kə ndzʉ kə̀ fughu chi kə yo dzə̂ alekpeē dzəŋlo ghèe ndzʉ tə̀ wii tì. 37Ghùw yò alenìi kɔʼ sə̀ŋ è nlʉ̀, ù kùu naŋā tsughu an sùʼ è gùuwnyòm è wǐi. Abugho ù ghəəŋ tsughu êzə̀, lʉ̀ n te n sô ghə̌əŋ nù sùʼ è wǐi è te gbəla bâa, lʉ̀ n sô kwəlà sâŋlò, suʼ boō tsughuu sughò. 38Ghùw lǎam ki aledzə̀n sə̀ŋ zə̀ nlʉ̀ an sùʼ è fughu. 39Ghùw wəla ù mʉ kwoōn tsughu lʉ̀ n tùghu mò, ù kòom mbùuŋ yǒ sə̀ŋ è nlʉ̀, bòʼ ù bɔ̌ɔm dzàa ko enyəa, ‘À dzɔ̀ ko n tùghu mò.’ ”

Currently Selected:

Lûk 5: agq

Highlight

Copy