Lûk 21

Fughu kə wîkpūw

(Mâk 12:41-44)

1Yɛso n nùghù bàŋ kòʼ ndùw aŋghəa ghî à kuu a kɔʼɔ̄ dzəlā fughu ko alo kəkə̌a fughu am be kə̀ ne ko; 2Ù ŋ kòʼ ghəa làalɛ̀ kə wîkpuw kə̀ li kə kɔʼ dzə̂n nyə tsughu twəla ŋ wən mò m bə̀ghà. 3Ù n daŋso dzɛ̀ tsùghù enyəa, “Ǹ so Ŋ̀ kûu dzâa wô â ghɛ̀ enyəa làalɛ̀ kə wîkpuw kən m fùghù tsə̀gha ghee a dzə̀m; 4nu ghee a dzə̀m fɛ mâʼnlò mo ghe dzə̂a sə̌a wò aŋ kə̀m kəla kə səā tsughu an ndə̀m zəla ghe ki, vʉ̀ ù kuūwn maʼà mɛʼɛ̀ ndûw mbeʼe fəla fə̄ lɛɛ̄n mughùu e wə̄n zo.”

Yɛso kə̀a ghə̀a à saʼā maʼnlo a be kə̀ ne ko

(Mat 24:12; Mâk 13:12)

5Ghəa tsə̀təndə̄ghā tə Yɛso tə̀ li tə kɛɛ̄ ghəa ghe bəgha be kə̀ ne ko a te an dzɔ̀ɔdzɔ̀ tə atia àsùghò dzɔ̀ɔdzɔ̀ tə ufʉgha təla ghî a fə̀ fughu nyə̄ wô enyəa ghe kɔʼso wò Kə̀zə̀, Yɛso n dzɛ̀ tsùghù enyəa, 6“Yia a bughò fʉgha wəla ghɛ̀ koʼò fɛ, tî kə̀ lo bùghòo nù, fəgha kə e ke e koōm nyaʼ yo fɛ a zəŋò wàazə̀ tò etia mo ghe kâ bù sàʼ.” 7Ghe m bvʉ â wə̄n enyəa, “Wàdè, à kè lò zən, à lo dèe sùghò kwò enyəa e fɛ so e nî kə̀bəla lo a?” 8Ù n daŋso bɛ̀lɛ̀ tsùghù enyəa, “Nǐ nlò ghôom zò, ghe lô sêe məŋso ghɛ; nu ndə̀m kè ndùw bùghòo fɛ enyəa ghe lo mugho, ghe e dzaā wo enyəa; ‘À lò mugho ghùw ù te! Nəghā e te e fɛ kpè dzə̀ nù!’ Kà nlò tsəghà tə̀ŋò tsùghu a bàâ ghee. 9Abugho ghɛ̀ kê zuw ghî à dəmà kaŋlo, təmā kaāŋ sùghò tə̀tsaā; nu ghəa ghən kê bùʼù nìi dzə̀ kə̀bəla, nəgha è mianlō e kê kǔuwn kaam daŋso dzùum wò yò.”

10Ù n daŋso dzɛ̀ â ghee enyəa, “Naʼ zən e ke taa nduw e zə̂ alo kəŋgè, naʼ e də̀ŋ kən zə n tàm ndùw naʼ e də̀ŋ kə̀ chî, 11luʼū tə ke e noʼō; dzə̀ŋ kè nyə dəŋò tə̀də̀ŋò àsùghò dzàŋà tò; fɛ̀ɛn tə ufʉgha, à tsə̌a tə̀ fɛɛ̄n tə kê səā tsughuu wô alo Kəwālā.”

Eshwâʼ àsùghò bɛ̀ zò

12To ghəa ghən e kuūwn bughò nî kə̀bəla, à kè lǒ mo ghe ŋ ghɛ̀ bûʼ fəmso; ghe e kwuun ghɛ, sèe ndùw an ndughutə̀ne to, kwuun dzə̀là ghɛ̀ an ndughutətsāʼ, sèe ndùw ghɛ̀ a vʉ̀a dwə̀ŋ wò àsùghò a vʉ̀a ghê gɔvə̀nò enyəa so à lò ghəa zāŋā. 13Zən kè lò enəghā ghɛ̀ kê tɔʼɔ̀ kə̂aa ghəa gho â ghee kùu ndùw mùghò. 14#Lûk 12:11, 12 Kà ndôʼ bàŋsò nlò fə̂ŋ tò enyəa ghɛ̀ kê yia a kə̂aa ndùw èndūghō abugho nəgha e te e kê kpe à; 15nu Ǹ lo fughuu nù ghɛ â tɔ zo, à nom kə̀là ghùw ù kə̀tuw wɛʼɛ u mɔ̀ʼ kè dɔ̂ɔm yô alekōmsō ghɛ̀. 16À kè ghɛ̀ kôom fèen fùghuu tsughuu ko ghê tsùghò ghèe ghê zùghùu, waazə̂ ghɛʼɛ, tom ghɛʼɛ, à fən ghɛʼɛ̄ gho, ghe kê wiīn maʼà daŋso sūghò ghɛ̀ à li gho a te; 17ghî ghə̀n à dzə̀m ke ŋgēe baā ghɛ enyəa a so à lò ghəa zāŋā, 18ghue u nyùŋ e mɔ̀ʼ kè kǔuwn ndùw yò luʼū ko an nyùŋ tə kətuw tɛʼɛ̄. 19Abugho ghɛ̀ kê kɔlɔ̄ tsughu fə̂ŋ tò, ghɛ̀ ke zə tuw ko.

Yɛso kə̀a ghəa à buu saʼā a Yɛ̀lusalɛ̀m ghò

(Mat 24:15-21; Mâk 13:14-19)

20“Abugho ghɛ̀ kê daŋso kōʼ sùghugòʼ tə̀ dzə̂ŋ ŋgəa kɔʼ Yɛ̀lusalɛ̀m, à kè fi lo nəgha e sô kpěe wò nù aleləŋê naʼ e te zo. 21Ghî yia an Dzùdîa kè kì alenùghù tiī kɔʼɔ̄ ndûw alo təkàʼà, ghən an tsə̀tèʼè fə enaʼ kê tiīn sə, ghəla a lô alo təŋgwə̀là e kwo ghe lô kwəlā enaʼ; 22#Hos 9:7 nu zən kè lò nəgha zəla Zə̀ kə̀ kê fɔeso ghî ghò a te, aŋghəa ghe tɔm naŋa am mwàʼsò kə Kəzə̀. 23Tsuʼ n te ŋ kê lò nəgha è biigh zo â yìzən ghəla ghe lo nə̀ghà mə̀ àwɛ mò, à sùghò ghəla ghe ki wɛ gho aŋ ghu! Fala e kê ŋgè lò aŋ ghueekətsə̄ kə te ko, Zə̀ kə̀ kê dèe tsùghû nʉ̀ghà pfʉso wo a zəŋò ghì ghən; 24ghe kê tsuʼn wi ghee alo nnyə, ghe kê kwuūn nughù ndûw à li gho an nàʼà mə̀ Ètòʼò mə̀n n dzə̀m, Toʼò è kê foʼō səsō tsughu Yɛ̀lusalɛ̀m alo aghùw ènyə, to nəgha e ghee e kê ndoʼò kpeē tsughu.”

Bughò e Wɛ ù Ghùw

(Mat 24:29-31; Mâk 13:24-27)

25 # Èzy 13:10; Ɛ̀zi 32:7; Dzw 2:31; Edê 6:12, 13 Tsə̌a tə kê daŋso dêe kɔʼ alo ezūw, an ndzɔ̄ŋ àsùghò alo nsə̀ghàbəlà, ghueekətsə̄ kən kè fala aŋ ghùu dəm kə dzùghùntsòʼ kò àsùghò tùŋutùŋu ko. 26Ghî ghə̀ è ke vuuŋ bvʉā wo, ghe tsəŋō enyəa à yia so e sə ghə̀a è kwò am mbī a; nu fʉgha u kəwālā wən ù dzə̀m kè nòʼò kǎaŋ wò nù. 27#Dan 7:13; Edê 1:7 Ghe kê daŋso koʼò ko Wɛ ù Ghùw mò ù sò bùghòo am mbàʼ, à dwaʼa wo, ù è lo e lo sugho alo ŋkɔʼso. 28Abugho ghəa ghən kê kaʼ tsughu êzə̄ŋ alenì kə̀bəla, ghɛ̀ ke nughu tēe wo ebàm alo tətsə̀n, nu ghe kê fi so e kuʼù bəghā sə ghɛ.

Kwə̀ən kə ushwāʼ alo kəgə̀m

(Mat 24:32-35; Mâk 13:28-31)

29Yɛso ŋ kwə̀ən kə̀a tsùghù â tsə̀təndə̄ghā tə wə̄n to enyəa, “Kòʼo tsughu nlò kâʼ fə kəgə̀m fò a, àsùghò kàʼ n lì mən n dzə̀m a; 30abugho ŋ kaʼ tsughu zûw zò; ghɛ̀ n daŋso kele tsughu enyəa ghuuw e fi so e bughò tsughuu kwə̄n. 31À lò sugho eghəla abugho ghɛ̀ kê kôʼ ghəa ghən tsəghāa, à fi lo mo Fɔ̂e u Kəzə̀ wə̀ ŋ kuʼso. 32Ǹ so Ŋ̀ kûum dzâa wô â ghɛ̀ enyəa, ghɛ̀ mweē e nɛ̄ zən yo aletsoō tsəghàa mɛʼɛ̀ mo ghəa ghə̀n à dzə̀m kà bəla kə nî kɔ̀ʼ dzə̀. 33Wala kə kê tsəghà mîa àsùghò ghueekətsə̄ ko, shwaʼ waŋa u kê kǔuwn tsə̀ghà mìa kòʼ yò.”

Tsə̀təndə̄ghā tə ndzûuŋ tsughu eghue

34“Nǐ nlò ghôom zò, e kwo ghɛ̀ lô laʼsò doʼn nduw a bàâ dzughu è zəa zo ŋkāa ghɛ̀ doʼo nduw mgbə̀ŋ wò a bàâ fʉgha ù mʉa wo àsùghò a bàâ fʉgha u mbī wo, e kwo tsuʼ u te u lô vûuŋ kpeē wo mò ghɛ̀ kâ ghue e ndzûŋlò, ghɛ̀ lô nîi an tsāʼ. 35Tɔŋlo enyəa e lo vùuŋ mɔ̀ɔ kǎaŋ wò ghì ghə̀n à dzə̀m ghe mughù aŋ ghueekətsə̄. 36E tsoō ghoōm ko nlò nû, gɔ̀ɔŋ ndùw sùghò enyəa Zə̀ kə̀ yôsò ghɛ̀, ghɛ̀ lô kpaʼā nɔ̂ɔsəā am fɛ̀ɛn tə aghəa təla tə kê nîi bəla ko, tò ghɛ̀ ke bɔŋ tee sugho a vʉ̀a Wɛ ù Ghùw.”

37 # Lûk 19:47 Yɛso n tsʉ̂a zěe ko àghì am be kə̀ ne ko, nùghùun kɔ̀ʼɔ bwīi ndùw aŋ Kwàʼ u tə̀ Olèf. 38Ghî ghə̀n a dzə̀m m gbəla tsūŋū tsə̀ghà ko am be kə̀ ne ko tsuʼu mən n dzə̀m n dzə̀m alebùghò zyə̂ən shwaʼ u wə̄n.

Currently Selected:

Lûk 21: agq

Highlight

Copy