Lûk 10

Yɛso tum sə Tsə̀təndə̄ghā ŋghəm sə̀ghàmbəgha à ghè tò tə bə̀ghà

1A m bùghò ghəa ghən tsəghà tsughu, Yɛso n shìa kpèʼe sə̀ wò tsə̀təndə̄ghā ŋghəm sə̀ghàmbəgha à ghè tò tə bə̀ghà, tùm zìi ndùw ghee a bə̀ghà à bə̀ghà â sə ko an nàʼà mə̀n n dzə̀m an lùʼù tən tə̀ dzə̀m ù lo nduūw a fughu. 2#Mat 9:37, 38 Ù mo e tuu səa ghee dzɛ̀ â ghee enyəa, “Fʉghàzəa u ŋge lò an sum ghî yia kuūwn biso buw aledùmlò, gɔ̌ɔŋ tsughu nlò enyəa mughùsum tuū nyəā ndûw ghì à duūm gho an sum u wə̄n. 3#Mat 10:16 Ndǔw nlò, ghɛ̀ è kwo enyəa Ŋ̀ ghɛ fɛ tuu səa ndùw tǒ wɛ a təndzì an saʼ kə ubʉ̄ghā. 4Kǎ nlò nî kua wo, kà nî sùgho mbə̀ghà ŋkāa təgûw. Kà nlò e fughuu tɔŋlo è də̀ghàa zò â ghî ghò an dziī. 5Mò ghɛ̀ nyə ko an ndùghù è ghɛ̌ zò, ghɛ̀ m bùʼ dzɛ̀ tsùghù dzə̀ enyəa, ‘Bughuun zə e lo fɛ̄ an ndughu.’ 6Mò ghùw lǒ fughu an ndughu ù ləghaa bughuun zo, ù n dòʼò alo ebughunlō, mò ù yò, tɔŋlo e te zə n nùghù wò èbàm aŋ ghùu ghɛ̀. 7#1Kò 9:14; 1Ti 5:18 Bɔɔm dòʼo tən ko nlǒ fughu an ndughu, ghɛ̀ è zəa, mʉa sùghò fəgha kela ghe fughu, nu a ki nû aletsəa ghùw ù kə̀fwà, kǎ nlò è nyəa səa ndughu tə ndughu. 8Abugho ghɛ̀ nyə ndûw alo enaʼ ghe yìa kpaʼ kpe nî ghɛ, mò ghê fughu kô kwò, ghɛ̀ mò è zə. 9Ghɛ̀ m baāŋ tsughu ghì à dzaŋā yì fughu, ghɛ̀ n dzɛ̀ â ghee enyəa, ‘Fɔ̂e u Kəzə̀ wə n sū alebùghò.’ 10#Kfw 13:51Mò ghɛ̀ kuuwn nyə̀ ndùw alo enaʼ, ghe yia doʼŋkè kpaʼā kpeē nî ghɛ̀, ghɛ̀ m būʼ kaaŋ ndùw kə̀bɔ̀ŋ fughu alo enaʼ enyəa, 11#Mat 10:7-14; Mâk 6:8-11; Lûk 9:3-5 ‘Kɛ̀sò gbə̀n kə enaʼ kɛʼɛ̄ kəla kə kɔʼ kɔʼ aŋ ghùw ghaʼā, ghàʼ buʼu màʼn tsùghuu ko an tuw wɛʼɛ, kuuwn kele tsughu ko nlò enyəa Fɔ̂e u Kəzə̀ wə n sū.’ 12#Dzs 19:24-28; Mat 11:24; Mat 10:15 Ǹ so n dzâa wô â ghɛ̀ enyəa, a kê bugho an tsuʼ u sāʼ, dzɔ̀ kè nya kuuwn lò nû â naʼ e Sodòm zò tsə̀ghàtàʼà naʼ zə̀ èzə̀.”

Utsû â nàʼà təla tə boōm yô shwaʼ u Kə̀zə̀ wò

13 # Èzy 23:1-18; Ɛ̀zi 26:1—28:26; Dzw 3:4-8; Amò 1:9, 10; Zâk 9:2-4 “Tsû ù ne wo a zəŋò ghɛ̀ a ghî a Kolàzîn ghò, àsùghò â ghɛ̀ a ghî a Bɛ̀dsǎedà ghò; nu sə̀ghà məla ghe fə̀ dêe fɛ â ghɛ̀, bugho a mô deē â ghì a Tâe ghò, àsùghò ghì a Sidɔ̀n ghò, to ghe maā ki ti kuwnlo, ghe e lo an shwàʼ ù təndzʉ̄, muŋe. 14Zə̀ kə̀ lô se e tɔʼɔ̀ kwuso yo a zəŋò ghɛ̀ to Kə lo kwuso a zəŋò ghì ghə enaʼ a Tâe ghò àsùghò a Sidɔ̀n ghò. 15#Èzy 14:13-15Mo a ghî a Kàpɛnùm ghò, ghɛ̀ ləghaa alekɔʼsô ghue zɛʼɛ alo Kəwālā à? Ɛ̂ŋgaŋ, ghe lô ghɛ̀ kuuwn nìi màʼnlò am kpǎaghùw.”

16 # Mat 10:40; Mâk 9:37; Lûk 9:48; Dzn 13:20 Yɛso n dzɛ̀ â tsə̀təndə̄ghā tə wə̄n to enyəa, “Ghùw wəla ù zuw ghɛ, ù fi zuw mugho, wəlà ù tue maʼà ghɛ, ù fi tue màʼà sùghò mùghò. Abugho ghùw tue maʼà mugho ù fi tue màʼà sùghò ghùw wəla ù tum wô mugho.”

Kwəlā nyə e ghə̀m n tsə̀təndə̄ghā tən sə̀ghàmbəgha à ghè tò tə bə̀ghà

17Ghə̀m n tə tsə̀təndə̄ghā mən sə̀ghàmbəgha ŋ kwəla nyəa wò aleduʼnlo, dzàa wò enyəa, “Mughùbè, ghue e ùzʉ̀ e buʼù zǔuw sùghò làŋ kaʼa bòʼ zən zəghà.”

18Yɛso n daŋso dzɛ̀ â ghee enyəa, “Ŋ̀ kôʼ Satàn ù bvʉ̀ tsughu wô alo Kəwālā to ghuuw e lô bvʉā. 19#Sms 91:13Kòʼô, mùghò ŋ ghɛ̀ â dwaʼa u fughu aledàŋlò alo təzughu, dàaŋ sùghò alo tənàŋ, àsùghò enyəa ghɛ̀ è ghaʼa wo ghî ghəla ghe lô ghî a kətuw ghɛʼɛ̄ gho; fəgha kə lô ghùw wɛʼɛ kɛ̂ yò. 20Ghəa e kuūwn lô ko êzə̀, kà nlò duʼn dzə̀ aŋ ghəa ghən enyəa, zʉ̀ u zuuw â ghɛ̀; e laam duʼnlo nlò enyəa ghe n zən ghɛʼɛ̄ gho alo Kəwālā tɔm naŋa.”

Yɛso dùʼn nù

(Mat 11:25-27; 13:16-17)

21An nə̀gha e te zo, Yɛso n nùghù duʼn kɔʼ an daʼa kə Zuʼ tə̀ Zɔlɔ to, dzɛ̀ tsùghù enyəa, “Zɔ̀ɔŋ kə̌a a Tsele waŋā, Mughù ù kəwala à ghueekətsə̄ ko, enyəa ghù nàn tsughu ghəa ghən â ghî ghəla ghe moʼo enyəa ghe lo à tɔɔ gho, àsùghò ghəla ghe zuūwkɛlɛ ghəa gho, ghù vʉ̀a ghù kuūwn dê fughu tsughu â ghì ghəla ghe kwo yô ghəa gho. Òhòŋò Tsele waŋā, à mò tsəm ghû enyəa ghəa a te a doʼò èzə̀.

22 # Dzn 3:35; Dzn 10:15 Bəghà ŋ ghəa gho â mùghò dê mɛ̀ʼɛ̀, ghùw lì kwò yo fəgha kela wɛ lo ghè kò, à gɔ̀ʼɔ̀ ko Tsele. Ghùw kwò sugho yo fəgha kela tsele lo ghè kò, à gɔ̀ʼɔ̀ ko wɛ, àsùghò ghì ghəla wɛ tsə̂m tsughu aledè fəgha kela Tsele lo ghè kò â ghee.”

23Yɛso m fə̀n tsùghu ughue, tsə̀əm tsùghu ghèe ghê tsə̀təndə̄ghā tə wə̄n to enyəa, “Ghî ghəla ghe kôʼ ghəa ghən, ghe ki tuw kə̀ dzûŋ kò! 24Nu ghəa Ǹ dzâa wô fɛ â ghɛ̀, ndə̀mà tə ghîishʉ̀gha àsùghò dwə̀ŋ wò, ghe fə̀ ŋgee ləghaa alo e koʼō ghəa ghə̀là ghɛ̀ koʼō, ghe ŋ kè kôʼ, àsùghò alezuuw tuūŋ wəla ghɛ̀ zuūw. Ghe ŋ kê zuw.”

Kwə̀ən kə ushwāʼ aŋ ghûw ù Sàmalìa ù dzùŋ

25 # Mat 22:35-40; Mâk 12:28-34 Tsuʼ ù li wo, dèekə̀làŋ ù lì n nùghù tème è kɔʼ alemɔ̀ɔ kôʼ Yɛso. Ù mo â Yɛso enyəa, “Wàdè, Ǹ lo aleghəŋlo ênzə̂n tò mùghò è kelê mùghù è doʼn təla zo a?” 26Yɛso m bvʉ â wə̄n enyəa, “Ghe laʼa tɔm naŋa êndūghō am mwàʼsò kə Musî a? Ghù a te tɔɔŋ kòʼ kɔ̀ʼ èndùghō?”

27 # Lwa 6:5; Lɛv 19:18 Ù m bɛ̀lɛ̀ tsùghù enyəa, “Shwaʼ u Kə̀zə̀ ù dzɛ̂ enyəa, ‘Ghù è ləghaa Zə̀ kə̀a kò am fə̂ŋ zə̀ghà e dzə̀m, à mòʼn zə̀ghà zò e dzə̀m, à daʼa kə̂a kò kə dzə̀m àsùghò enyəa ghù è ləghaa wàazùghù#10:27b Wàazùghù wən fɛ mòʼò enyəa: à lǒ ghùw nsɔ̌ɔŋnchùw, à ka yò dzə wàazùghù wəla ghɛ̀ à wə̄n ki zə̂ u mɔ̀ʼ. tò ghəa ghù ləghaa ghue wʉ̀a wò a te.’” 28#Lɛv 18:5 Yɛso n dzɛ̀ â wə̄n enyəa, “Ghǔ n nyɔ̀ʼ bɛ̀lɛ̀; abugho ghù ghəə̄ŋ dzə êzə̀, ghù ke mughūu tsɛlɛ̄.”

29Tûw vʉ n ləghaa aledèe tsughu enyəa e kâ nɔ̄ʼ, ù m bvʉ â Yɛso enyəa, “Wàanùghò lò ndughoo?”

30Yɛso mo e bɛ̀lɛ̀ nù, dzɛ̀ â wə̄n enyəa, “Ghùw ù lì fə̀ zəghāa tsughu naʼ e Yɛ̀lusalɛ̀m tsughuu ndùw an Yɛ̀lekò, ndùw sə kpeen kɔʼ ghèe ghê ghìtsɔŋɔ gho. Ghe ŋ kwu tsughu wə̄n, è bu; tsɔʼn nùghù tə̀ndzʉ̄ a zəŋo ughùe, bɛlɛbəgha kɔʼ fʉgha u wə̄n, ti naŋatàʼà tsùghu wə̄n fughu mò ù lò ko a vʉ̀a vʉ zo. 31Fɔ̀e è Kə̀zə̀ ù lì n tsə̄ghàa tsùghuu ndùw sùghò fughu an dziī; ndùw kòʼ tsùghu ghùw vʉ̀, nyàa tsə̀ghà dàŋso ndùw e wə̄n zo aŋ kwàn u dziī ù li u vʉ̂. 32Ghùw ù tə̀ Lɛvì ù lì m bùghò ghə̌əŋ dàŋ tsə̀ghà sùghò ghəa è mɔʼɔ̄ zo, bùghò kòʼ tsùghù tûwbʉ̀ghà vʉ̀ fì, nyàa tsə̀ghà dàŋso ndùw sùghò e wə̄n zo aŋ kwàn u dziī ù li u vʉ̂. 33#2Tw 28:15 Ghùw ù Sàmalìa ù lì m bwîin ndùw, bùghò kòʼ tsùghu tûwbʉ̀ghà vʉ̀ an lùʼu chì, kwuso èse, 34kəŋo ndùw a vʉ̀a wə̄n, sùw fəŋ a wə̄n, zɔʼnlo alo mvʉ̄, kɔlɔ am gbà u təndzʉ̄. Ù m bòʼò nyàʼso kɔʼ ghùw vʉ̀ an ndzàkâs fə wə̄n, nì ndùw wə̄n alo atsə̄, #10:34 Atsə̄: Luʼu kə̀ shueʼe zʉʉ̄n ko. ù n lɛnlo â wə̄n. 35A m bùghò tsuʼ u tsʉtsʉ vʉ̀, ghùw vʉ̀ n dzə̀ kɔ̌ʼ tə shwəlà tə bə̀ghà, dzɛ̀ â tûwbʉ̀ghà vʉ̀ ù mò lɛɛ̄n luʼū chī enyəa, ‘E lɛɛn tsughuu â wə̄n, mò ghù bǒon kpeʼe kô fəgha kə̀ li ko, Ǹ lo bughò tsəā tsəghàa wô ebàm.’” 36Yɛso n daŋso bvʉ tsughu enyəa, “Aŋ ghì ghə̀n à təgha êzə̄ŋ, à fə̀ de ndugho enyəa e lo wàazə̀ â ghùw vʉ̀a ghî tsɔŋɔ fə̀ bu boōn lo a?”

37Tûw vʉ mo enyəa, “Ghùw wəla ù fə̀ kwuso se zo a zəŋò wə̄n.”

Yɛso n daŋso dzɛ̀ â wə̄n enyəa, “Ndùw, ghù è bɔɔm ghəəŋ nduw ko êzə̀.”

Yɛso bwìin ndùw alô ghê Màta

38 # Dzn 11:1 Tsuʼ ù li wo ghê Yɛso n tsəghàa dzì an nàʼà fə̀ li fo. Màta, tɔɔŋ yìzən ù lǐ fughu, n nàʼà tsùghù Yɛso an ndughu alô wə̄n. 39Màta ŋ ki wàazə̀ ù zən, ghe fə tɔŋlo enyəa a lo Mèle. Mèle m bɔ̄ɔm ndùw nyàʼa dòʼò kɔʼ ko am bùghu e Yɛso, kuuwn zyəən kô tsʉ̀ e wə̄n. 40Màta ŋ kuuwn ŋgee tsə̀ghànlò aleghə̂əŋ ghəa à zəa gho, ù n ndùw bvʉ̀ â Yɛso enyəa, “Mughùbè, à lò enyəa ghù tsǒo naaŋ yo tuūŋ ko aŋ ghəa wàanùghò zə̀ghàa maʼà mɛʼɛ̀ tsughu fwàʼ kə̀ tsəghasō kə ufʉ̀ghàzəa kən ko â mùghò ânəŋ ko a? Dzǎa tsughu enyəa ù bùghò tɔ̂ɔ wô mùghò.”

41Mughu ù te m fwə̀n bɛ̀lɛ̀ ndùw wə̄n enyəa, “Màta, Màta, ghù gbə̀là ŋgěe fəmsô ghue wʉ̀a kə̀nughùnùghù an ndə̀mà tə aghəa. 42Ghəa è lo ko e mɔ̀ʼ. Mèle fɛ shìaa kɔ̀ʼ bâ kə̀ dzûŋ kò, mò ghùw ù lì kè nì nùghù kòʼ yò aŋ ghulô wə̄n.”

Currently Selected:

Lûk 10: agq

Highlight

Copy